Category: રાષ્ટ્રીય

રિપોર્ટર: પ્રદીપ ઠાકોર ( બહુચરાજી)

બહુચરાજી તાલુકાના બેચર ગામમાં રસ્તાના મુદ્દે સર્જાયેલી ઘટના હવે માત્ર સ્થાનિક વિવાદ નહીં રહી, પરંતુ પ્રશાસનની કાર્યપદ્ધતિ, કાયદાની પ્રક્રિયા અને માનવ અધિકારો પર ગંભીર પ્રશ્નો ઉભા કરતી ઘટના બની ગઈ છે. મામલતદાર દ્વારા કોઈપણ પ્રકારની પૂર્વ નોટિસ વિના JCB મશીનથી મકાન તોડવાની કાર્યવાહી હાથ ધરાતા સમગ્ર ગામમાં ભારે રોષ ફાટી નીકળ્યો છે.

કાયદેસર રસ્તો હોવા છતાં વિવાદ ઊભો થયો

સ્થાનિકોની માહિતી મુજબ, બેચર ગામમાં વર્ષોથી અસ્તિત્વમાં રહેલો એક કાયદેસર રસ્તો છે, જેનો ઉપયોગ પ્રજાપતિ વાસ અને ઠાકોર વાસના રહેવાસીઓ નિયમિત રીતે કરતા આવ્યા છે. જોકે, આ રસ્તાની વચ્ચે ચંદુજી પ્રતાપજી ઠાકોર દ્વારા મકાનનું બાંધકામ કરવામાં આવતાં રસ્તો બંધ થઈ ગયો હોવાનું સામે આવ્યું હતું. આ બાબતે રસ્તાના ઉપયોગકર્તાઓએ મામલતદાર કચેરીમાં લેખિત ફરિયાદ કરી યોગ્ય કાર્યવાહી કરવાની માંગ કરી હતી.

મામલતદાર પોલીસ બંદોબસ્ત સાથે પહોંચ્યા, JCBથી તોડફોડ

ફરિયાદના આધારે આજરોજ બહુચરાજી મામલતદાર પોલીસ બંદોબસ્ત સાથે JCB મશીન લઈ ગામમાં પહોંચ્યા હતા. કાર્યવાહી દરમિયાન મકાનના આગળના ભાગને તોડવામાં આવ્યો હતો. પરંતુ વિવાદ અહીં વધુ ગંભીર ત્યારે બન્યો, જ્યારે રસ્તાના હકદારોની હાજરી વગર જ ચમનજી ઠાકોરના બાથરૂમની ચોકડી દિવાલ તોડી નાખવામાં આવી.

સૌથી ગંભીર મુદ્દો: પૂર્વ નોટિસ વિના તોડફોડ

આ સમગ્ર ઘટનાનો સૌથી ચિંતાજનક પાસો એ છે કે મકાન માલિકને તોડફોડ પહેલાં કોઈપણ પ્રકારની લેખિત કે મૌખિક નોટિસ આપવામાં આવી ન હતી. મકાન માલિકની ગેરહાજરીમાં સરકારી મશીનરીથી થયેલી આ કાર્યવાહી કાયદેસરની પ્રક્રિયાના મૂળભૂત સિદ્ધાંતોને પડકારતી હોવાનું ગામજનો જણાવી રહ્યા છે.

કાયદાના જાણકારો જણાવે છે કે કોઈપણ બાંધકામ હટાવવાની કાર્યવાહી પહેલાં સંબંધિત પક્ષને નોટિસ આપવી, જવાબ આપવા તક આપવી અને યોગ્ય પ્રક્રિયા અનુસરવી અનિવાર્ય છે. આ નિયમોની અવગણના થવાથી કાર્યવાહી પર કાયદાકીય પ્રશ્નો ઊભા થાય છે.

“આ રસ્તો અમારો નથી” – રસ્તાના હકદારોનો સ્પષ્ટ ઈન્કાર

સ્થાનિક લોકોનું કહેવું છે કે જે રસ્તો હાલ બનાવવામાં આવ્યો છે તે તેમનો કાયદેસર રસ્તો નથી. રસ્તાના હકદારોએ મામલતદારને સ્પષ્ટ રીતે જણાવ્યું હતું કે વર્ષોથી જે રસ્તો તેઓ ઉપયોગમાં લેતા આવ્યા છે તે અન્ય સ્થળે આવેલો છે. તેમણે વિનંતી કરી હતી કે અમને અમારો કાયદેસર રસ્તો જ ખુલ્લો કરી આપવામાં આવે.

રસ્તાના હકદારોનું કહેવું છે કે,

“અમે આ રસ્તે ચાલવા માંગતા નથી. અમને જ્યાં કાયદેસર હક છે ત્યાં જ રસ્તો ખુલ્લો કરવામાં આવે.”

મામલતદારના નિવેદનથી વિવાદ વધુ ઘેરો

સ્થાનિકો અનુસાર, મામલતદાર દ્વારા જવાબ આપવામાં આવ્યો હતો કે,

“હું તમારા માટે નવરો નથી. રસ્તો કરી આપ્યો છે, ચાલવું હોય તો ચાલો, નહીં તો ના ચાલશો.”

આ પ્રકારનું નિવેદન સરકારી અધિકારીની જવાબદારી અને સંવેદનશીલતા સામે પ્રશ્નો ઉભા કરે છે. ગ્રામજનોમાં આ નિવેદનને લઈને પણ ભારે નારાજગી જોવા મળી રહી છે.

માનવતા અને પ્રશાસનની કાર્યપદ્ધતિ પર સવાલ

બીજી તરફ, ચમનજી ઠાકોરના મકાનને કોઈપણ પ્રકારની નોટિસ કે જાણ કર્યા વિના અને તેમની ગેરહાજરીમાં તોડી નાખવામાં આવતાં માનવતા અને કાયદાની પ્રક્રિયા પર ગંભીર પ્રશ્નો ઊભા થયા છે. ગામજનોનું કહેવું છે કે જો બાંધકામ ગેરકાયદેસર હતું તો પણ કાયદેસરની પ્રક્રિયા અપનાવવી જરૂરી હતી.

ગામમાં તણાવપૂર્ણ માહોલ, ઉચ્ચ અધિકારીઓ સમક્ષ રજૂઆતની તૈયારી

આ સમગ્ર ઘટનાને પગલે બેચર ગામમાં ભારે રોષ અને તણાવપૂર્ણ માહોલ સર્જાયો છે. લોકો હવે મામલતદારની કાર્યવાહી સામે ઉચ્ચ અધિકારીઓ, જિલ્લા કલેક્ટર અને રાજ્ય સરકાર સમક્ષ રજૂઆત કરવાની તૈયારી કરી રહ્યા છે.

ગ્રામજનો દ્વારા દોષિત અધિકારીઓ સામે તપાસ હાથ ધરવાની, જવાબદારી નક્કી કરવાની અને ભવિષ્યમાં આવી મનમાની કાર્યવાહી ન થાય તે માટે કડક પગલાં ભરવાની માંગ ઉઠી છે.

હવે નજર ઉચ્ચ તંત્ર પર

બેચર ગામની આ ઘટના હવે સ્થાનિક પ્રશાસન માટે એક કસોટી બની છે. જો યોગ્ય તપાસ અને ન્યાય નહીં મળે તો આ મુદ્દો વધુ ઉગ્ર બનવાની શક્યતા પણ સ્થાનિકો વ્યક્ત કરી રહ્યા છે.

અહેવાલ: અશ્વિન પટેલ, ડાંગ

ગુજરાતના એકમાત્ર ગીરિમથક સાપુતારા ખાતે પ્રવાસીઓને આકર્ષવા અને ડાંગ જિલ્લાના પર્યટનને નવી ઊંચાઈ આપવા હેતુસર ડાંગ જિલ્લા વહીવટી તંત્ર અને સાપુતારા નોટિફાઇડ એરીયા દ્વારા તારીખ ૨૫ થી ૩૧ ડિસેમ્બર ૨૦૨૫ દરમિયાન “સાપુતારા વિન્ટર ફેસ્ટિવલ–૨૦૨૫”નું ભવ્ય આયોજન કરવામાં આવ્યું છે. શિયાળાની મોસમમાં સાપુતારાની કુદરતી રમણીયતા સાથે સંસ્કૃતિ, સંગીત અને સાહસનો અદભુત અનુભવ કરાવવા આ ફેસ્ટિવલ મહત્વપૂર્ણ બની રહેશે.

વિન્ટર ફેસ્ટિવલ–૨૦૨૫નો ઉદ્ઘાટન સમારોહ તારીખ ૨૫ ડિસેમ્બરના રોજ સાંજે ૬:૦૦ કલાકે સાપુતારા ખાતે યોજાશે. આ ઉદ્ઘાટન કાર્યક્રમ રાજ્યના રમતગમત, યુવક સેવા અને સાંસ્કૃતિક પ્રવૃત્તિઓ, સ્વૈચ્છિક સંસ્થાઓનું સંકલન, ઉદ્યોગ, લઘુ-સૂક્ષ્મ-મધ્યમ ઉદ્યોગ, મીઠા ઉદ્યોગ, છાપકામ અને લેખનસામગ્રી, પ્રવાસન અને યાત્રાધામ વિકાસ તેમજ નાગરિક ઉડ્ડયન વિભાગના મંત્રી અને ડાંગ જિલ્લાના પ્રભારી મંત્રીશ્રી ડો. જયરામભાઈ ગાવિતના વરદહસ્તે યોજાશે.

આ ભવ્ય કાર્યક્રમમાં મુખ્ય મહેમાન તરીકે લોકસભાના દંડક તથા સાંસદશ્રી ધવલભાઈ પટેલ, ગુજરાત વિધાનસભાના નાયબ દંડક અને ડાંગના ધારાસભ્ય શ્રી વિજયભાઈ પટેલ ઉપસ્થિત રહેશે. ઉપરાંત, ડાંગ જિલ્લા પંચાયતના પ્રમુખ શ્રીમતી નિર્મળાબેન ગાઇન, જિલ્લા કલેક્ટર સુશ્રી શાલિની દુહાન, જિલ્લા વિકાસ અધિકારી શ્રી કે.એસ. વસાવા, પોલીસ અધિક્ષક શ્રીમતી પૂજા યાદવ સહિતના ઉચ્ચ અધિકારીઓ, પદાધિકારીઓ અને આમંત્રિત મહેમાનો કાર્યક્રમની શોભા વધારશે.

તારીખ ૨૫ થી ૩૧ ડિસેમ્બર સુધી ચાલનારા આ વિન્ટર ફેસ્ટિવલ દરમિયાન પ્રવાસીઓ માટે પ્રકૃતિની સુંદરતા, એડવેન્ચર પ્રવૃત્તિઓ અને સમૃદ્ધ આદિવાસી સંસ્કૃતિનો અનોખો સંગમ જોવા મળશે. ફેસ્ટિવલ દરમિયાન દૈનિક સાંસ્કૃતિક કાર્યક્રમો, સંગીત સંધ્યાઓ, સ્થાનિક લોકનૃત્ય અને ડાંગી વાધ્યો સાથેના લાઇવ પરફોર્મન્સનું આયોજન કરવામાં આવ્યું છે, જે ડાંગની લોકસંસ્કૃતિને ઉજાગર કરશે.

સાપુતારાના મુખ્ય માર્ગો અને પર્યટન સ્થળોને રોડ બ્યુટિફિકેશન સાથે વિશેષ લાઇટ ડેકોરેશન દ્વારા આકર્ષક રીતે સજાવવામાં આવશે. ઉપરાંત, રમત-ગમત અને એડવેન્ચર પ્રવૃત્તિઓ દ્વારા યુવાનો અને પ્રવાસીઓને રોમાંચક અનુભવ મળશે.

વિન્ટર ફેસ્ટિવલના વિશેષ આકર્ષણ રૂપે તારીખ ૨૫ ડિસેમ્બરના રોજ રાત્રે ૯:૩૦ કલાકે ભવ્ય ડ્રોન શો યોજાશે, જેમાં આકાશમાં પ્રકાશ અને ટેક્નોલોજીનો અદભુત નજારો જોવા મળશે. જ્યારે વર્ષના અંતિમ દિવસે એટલે કે ૩૧ ડિસેમ્બરના રોજ રાત્રે ૧૨:૦૦ કલાકે ન્યુ યર સેલિબ્રેશન સાથે ભવ્ય ફાયરવર્ક શોનું આયોજન કરવામાં આવ્યું છે, જે પ્રવાસીઓ માટે યાદગાર ક્ષણ બની રહેશે.

સાપુતારા વિન્ટર ફેસ્ટિવલ–૨૦૨૫ દ્વારા ડાંગ જિલ્લાની પર્યટન ક્ષમતાને નવી દિશા મળશે અને સ્થાનિક વેપાર, રોજગાર તેમજ સાંસ્કૃતિક ઓળખને પ્રોત્સાહન મળશે. જિલ્લા વહીવટી તંત્ર દ્વારા પ્રવાસીઓને આ કાર્યક્રમમાં મોટી સંખ્યામાં ઉપસ્થિત રહી સાપુતારાની શિયાળાની મજા માણવા અપીલ કરવામાં આવી છે.

રિપોર્ટર : જીજ્ઞેશ બારૈયા, જાફરાબાદ

જાફરાબાદ તાલુકાના લોઠપૂર ગામ ખાતે વિશ્વ કોળી-ઠાકોર સમાજ એકતા મહાસંઘ દ્વારા એક મહત્વપૂર્ણ શૈક્ષણિક તથા સામાજિક માર્ગદર્શન કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ સમાજના યુવાઓને આવનાર પોલીસ ભરતી 2026 તેમજ અન્ય સરકારી ભરતી માટે યોગ્ય દિશામાં માર્ગદર્શન આપવાનો અને સાથે સાથે સમાજને વ્યસન અને અંધશ્રદ્ધાથી મુક્ત બનાવવા અંગે જાગૃતિ ફેલાવવાનો હતો.

પોલીસ ભરતી 2026 અને સરકારી નોકરી માટે માર્ગદર્શન

કાર્યક્રમ દરમિયાન નિષ્ણાત વક્તાઓ દ્વારા આવનારી પોલીસ ભરતી 2026 માટે

અભ્યાસક્રમ

ફિઝિકલ તૈયારી

લેખિત પરીક્ષા માટેની રણનીતિ

સમય વ્યવસ્થાપન

વિશે વિગતવાર માર્ગદર્શન આપવામાં આવ્યું હતું. સાથે સાથે અન્ય સરકારી ભરતીની તૈયારી કેવી રીતે કરવી, કયા સંસાધનોનો ઉપયોગ કરવો અને સતત અભ્યાસનું મહત્વ પણ સમજાવવામાં આવ્યું હતું.

વ્યસનમુક્તિ અને અંધશ્રદ્ધા નિવારણ પર ભાર

સમાજને મજબૂત બનાવવા માટે માત્ર શિક્ષણ નહીં પરંતુ સ્વસ્થ વિચારધારા પણ જરૂરી છે તે મુદ્દાને કેન્દ્રમાં રાખી, યુવાઓને

વ્યસનથી થતા દૂષણો

અંધશ્રદ્ધાના સામાજિક નુકસાન

વૈજ્ઞાનિક અને તર્કસંગત વિચારધારા અપનાવવાની જરૂર

વિશે માર્ગદર્શન આપવામાં આવ્યું હતું. વક્તાઓએ યુવાનોને સમાજ માટે સકારાત્મક ભૂમિકા ભજવવા અનુરોધ કર્યો હતો.

સમાજના હક અને અધિકાર અંગે જાગૃતિ

કાર્યક્રમમાં સમાજના બંધારણીય હક અને અધિકારો, સરકારી યોજનાઓનો લાભ કેવી રીતે મેળવવો તથા સંગઠિત રહીને સમાજના પ્રશ્નો ઉકેલવા અંગે પણ વિસ્તૃત ચર્ચા કરવામાં આવી હતી.

સરપંચની મહત્વની જાહેરાત

આ પ્રસંગે લોઠપૂર ગામના યુવા સરપંચ શ્રી સોમભાઈ મકવાણા દ્વારા મહત્વપૂર્ણ જાહેરાત કરવામાં આવી હતી. તેમણે ગામના યુવાનો માટે

દોડ માટેનું મેદાન

અભ્યાસ માટે લાયબ્રેરી

શાળામાં ભણતા બાળકોને તમામ પ્રકારનો શૈક્ષણિક સહકાર

આપવાનું વચન આપ્યું હતું. સરપંચના આ નિવેદનને યુવાનો દ્વારા ખૂબ આવકાર મળ્યો હતો.

અગ્રણી સમાજસેવકો અને મહાનુભાવોની ઉપસ્થિતિ

આ કાર્યક્રમમાં

કોળી સમાજ અગ્રણી રમેશભાઈ સાંખટ

વિશ્વ કોળી-ઠાકોર સમાજ એકતા મહાસંઘના રાજુલા તાલુકા ઉપપ્રમુખ ડૉ. જિતેન બાંભણીયા

હાર્દિકભાઈ શિયાળ

કોળી સમાજ અગ્રણી અને પોલીસ કોન્સ્ટેબલ હેમુભાઈ બારૈયા

જાદવભાઈ બારૈયા, મહેશભાઈ મકવાણા

સહીત લોઠપૂર ગામના તમામ આગેવાનો અને મોટી સંખ્યામાં યુવાનો ઉપસ્થિત રહ્યા હતા.

સમાજમાં નવી ઉર્જા

આ શૈક્ષણિક અને સામાજિક કાર્યક્રમથી લોઠપૂર ગામ તથા આસપાસના વિસ્તારોમાં સમાજના યુવાઓમાં નવી ઉર્જા અને આત્મવિશ્વાસ જોવા મળ્યો હતો. સમાજના સર્વાંગી વિકાસ માટે આવા કાર્યક્રમો નિયમિત યોજવા પર ભાર મૂકવામાં આવ્યો હતો.

રિપોર્ટ : કુલદીપ ભાટીયા (સાબરકાંઠા)

ગુજરાત રાજ્યમાં બાળકોમાં વધતી ટાઈપ-1 (જુવેનાઈલ) ડાયાબિટીસ અંગે સમયસર નિદાન, સારવાર અને જાગૃતિ માટે રાજ્ય સરકારે મહત્વપૂર્ણ પહેલ કરી છે. ગુજરાતના મુખ્યમંત્રી શ્રી ભૂપેન્દ્ર પટેલના વરદહસ્તે ગાંધીનગર ખાતે રાજ્ય કક્ષાએ જુવેનાઈલ ડાયાબિટીસ ટાઈપ-1 કાર્યક્રમનો રાજ્યવ્યાપી શુભારંભ કરવામાં આવ્યો હતો. આ કાર્યક્રમના ભાગરૂપે સાબરકાંઠા જિલ્લાના હિંમતનગર સ્થિત GMERS મેડિકલ કોલેજ ખાતે ટાઈપ-1 ડાયાબિટીસ – જુવેનાઈલ ડાયાબિટીસ કાર્યક્રમનું આયોજન કરવામાં આવ્યું હતું.

બાળકોને સારવાર માટે જરૂરી સાધનોનું વિતરણ

હિંમતનગર GMERS મેડિકલ કોલેજ ખાતે યોજાયેલા આ કાર્યક્રમ દરમિયાન 15 જેટલા જુવેનાઈલ ડાયાબિટીસથી પીડિત બાળકોને ગ્લુકોમીટર, ગ્લુકોઝ સ્ટ્રીપ અને લેન્સેટ સાથેની કીટ તેમજ ફૂડ ડાયરીનું વિતરણ કરવામાં આવ્યું હતું. આ સાધનો દ્વારા બાળકો અને તેમના વાલીઓને ઘરે જ બ્લડ શુગરની નિયમિત તપાસ અને ખોરાકનું સંચાલન કરવામાં સહાય મળશે.

આર.બી.એસ.કે ટીમને ક્ષેત્રિય કામગીરી અંગે માર્ગદર્શન

કાર્યક્રમ દરમિયાન અધિક જિલ્લા આરોગ્ય અધિકારીશ્રીએ આર.બી.એસ.કે (રાષ્ટ્રીય બાળ સ્વાસ્થ્ય કાર્યક્રમ) ટીમના ડોક્ટરોને મહત્વપૂર્ણ માર્ગદર્શન આપ્યું હતું. જેમાં

બાળકોની નિયમિત ગૃહ મુલાકાત

સમયાંતરે આરોગ્ય તપાસ

શાળાના શિક્ષકો અને આંગણવાડી કાર્યકરોને જરૂરી માર્ગદર્શન

આપીને બાળકોના આરોગ્ય પર સતત નજર રાખવા સૂચના આપવામાં આવી હતી.

બાળરોગ નિષ્ણાંત દ્વારા વિસ્તૃત સમજણ

કાર્યક્રમમાં હાજર બાળરોગ નિષ્ણાંતે બાળકો અને તેમના વાલીઓને ટાઈપ-1 ડાયાબિટીસ અંગે વિસ્તૃત માહિતી આપી હતી. તેમાં

ઇન્સ્યુલિન ઇન્જેકશન લેવાની યોગ્ય પદ્ધતિ

ખોરાકની યોગ્ય પસંદગી

નિયમિત કસરતનું મહત્વ

દવા અને તપાસની નિયમિતતા

વિશે સરળ ભાષામાં સમજાવવામાં આવ્યું હતું, જેથી બાળકો સામાન્ય જીવન જીવતા શીખી શકે.

મુખ્યમંત્રીના સંકલ્પને સાકાર કરવાની પ્રતિબદ્ધતા

કાર્યક્રમ દરમિયાન ઉપસ્થિત તમામ આરોગ્ય કર્મચારીઓ અને તબીબોને મુખ્યમંત્રીના “દરેક બાળકને શ્રેષ્ઠ આરોગ્ય સેવા”ના સંકલ્પને સહભાગીતાથી સાકાર કરવા કટિબદ્ધ બનવા અનુરોધ કરવામાં આવ્યો હતો. રાજ્ય સરકાર દ્વારા શરૂ કરાયેલા આ અભિયાનથી જુવેનાઈલ ડાયાબિટીસથી પીડિત બાળકોને સમયસર સારવાર અને માર્ગદર્શન મળશે તેવી આશા વ્યક્ત કરવામાં આવી હતી.

વ્યાપક ઉપસ્થિતિ

આ કાર્યક્રમમાં GMERS મેડિકલ કોલેજના મેડિકલ સુપ્રીટેન્ડન્ટ,કોલેજના તબીબો,આર.બી.એસ.કે ટીમના ડોક્ટરો,જુવેનાઈલ ડાયાબિટીસ ટાઈપ-1થી પીડિત બાળકો અને તેમના વાલીઓ વિશાળ સંખ્યામાં ઉપસ્થિત રહ્યા હતા.

આરોગ્ય ક્ષેત્રે મહત્વપૂર્ણ પહેલ

હિંમતનગર ખાતે યોજાયેલ આ કાર્યક્રમ સાબરકાંઠા જિલ્લામાં બાળ આરોગ્ય માટે મહત્વપૂર્ણ પગલું ગણાઈ રહ્યું છે. રાજ્ય સરકારની આ પહેલથી જુવેનાઈલ ડાયાબિટીસ અંગે જાગૃતિ વધશે તેમજ બાળકોને યોગ્ય સારવાર અને માર્ગદર્શન સમયસર મળી શકશે.

રિપોર્ટર : ભાવિક પટેલ, અમદાવાદ

મુખ્યમંત્રી શ્રી ભૂપેન્દ્ર પટેલે ડિસેમ્બર-૨૦૨૫ના રાજ્યસ્તરના ‘સ્વાગત’ ઓનલાઇન જન ફરિયાદ નિવારણ કાર્યક્રમમાં રાજ્યભરના નાગરિકોની રજૂઆતોને અત્યંત ગંભીરતાથી સાંભળી અને તેના સમયબદ્ધ તથા અસરકારક નિવારણ માટે સંબંધિત વિભાગો અને અધિકારીઓને સ્પષ્ટ સૂચનાઓ આપી હતી. મુખ્યમંત્રીશ્રીએ જણાવ્યું હતું કે, સ્વાગત કાર્યક્રમ માત્ર ફરિયાદ સાંભળવાનું પ્લેટફોર્મ નથી, પરંતુ સામૂહિક પ્રયાસો દ્વારા નાગરિકોને ન્યાય અપાવવાનું સશક્ત સાધન છે.

રાજ્ય, જિલ્લા અને તાલુકા સ્તરે વિશાળ ભાગીદારી

દર મહિને ચોથા ગુરુવારે યોજાતા સ્વાગત કાર્યક્રમ અંતર્ગત ડિસેમ્બર-૨૦૨૫ના રાજ્ય સ્વાગતમાં રાજ્યભરમાંથી ૯૭ રજૂઆતકર્તાઓ મુખ્યમંત્રી સમક્ષ સીધા ઉપસ્થિત રહ્યા હતા. આ સાથે

જિલ્લા સ્વાગતમાં ૧૨૮૪ રજૂઆતો

તાલુકા સ્વાગતમાં ૨૪૫૮ રજૂઆતો

સંબંધિત જિલ્લા અને તાલુકા કક્ષાએ લેવાઈ હતી, જેના નિવારણ માટે તંત્ર દ્વારા કાર્યવાહી હાથ ધરવામાં આવી હતી.મુખ્યમંત્રીશ્રીએ તમામ વિભાગોને સ્પષ્ટ શબ્દોમાં તાકીદ કરી હતી કે ફરિયાદીઓ પ્રત્યે સંવેદનશીલતા દાખવીને સમયસર પરિણામ લાવવામાં કોઈ ઢીલાશ ન રાખવી.

ખેડૂતો પ્રત્યે આગવી સંવેદનશીલતા

સ્વાગત કાર્યક્રમ દરમિયાન મુખ્યમંત્રીશ્રીએ ખેડૂતોના પ્રશ્નોને પ્રાથમિકતા આપી હતી.

જુનાગઢ જિલ્લાના કેશોદ તાલુકાના એક ખેડૂતને ખેતર સુધી પહોંચવાના રસ્તા અંગેની રજૂઆતને ગંભીરતાથી લઈ, સ્થળ પરિસ્થિતિની તાત્કાલિક ચકાસણી કરી જિલ્લા કલેક્ટરને તરત વ્યવસ્થા કરવા આદેશ આપ્યો.તે જ રીતે સીપુ યોજના હેઠળ સાબરમતી–સરસ્વતી લિંક કેનાલ માટે મહેસાણા જિલ્લાના ખેડૂતની સંપાદિત જમીનના વળતર મુદ્દે વિલંબ ન થાય તે માટે કલેક્ટરને કડક દિશાનિર્દેશ આપ્યા.મુખ્યમંત્રીશ્રીએ સ્પષ્ટ કર્યું હતું કે ખેડૂતોને વળતર અને મૂળભૂત સુવિધાઓમાં કોઈપણ પ્રકારની અવગણના સહન નહીં થાય.

નગરપાલિકા વિકાસકામોમાં ગુણવત્તા પર ભાર

નગરપાલિકા વિસ્તારોમાં થતા વિકાસકામોની ગુણવત્તા બાબતે પણ મુખ્યમંત્રીશ્રીએ કડક અભિગમ અપનાવ્યો હતો.કાલોલ નગરપાલિકામાં રોડ, રસ્તા અને ગટર કામોની ગુણવત્તા અંગે થયેલી ફરિયાદોને ગંભીરતાથી લઈ, બેદરકારી દાખવનારા જવાબદારો સામે કડક પગલાં લેવા સૂચના આપી.તેમણે સ્પષ્ટ કહ્યું કે ઇન્ફ્રાસ્ટ્રક્ચર ડેવલોપમેન્ટમાં ગુણવત્તા સાથે કોઈ સમાધાન નહીં થાય.

નાગરિક સુવિધાઓ માટે તાત્કાલિક પગલાં

આ ઉપરાંત વાપી નગરપાલિકા વિસ્તારમાં સંયુક્ત માલિકીની જમીનમાં અંડરગ્રાઉન્ડ ડ્રેનેજ કનેક્શન આપવા થતા અવરોધો દૂર કરીને તાત્કાલિક કનેક્શન આપવા સૂચના અપાઈ.બાબરા તાલુકાના એક રજૂઆતકર્તાને સરકારે ફાળવેલા મફત ઘરના પ્લોટની ગામ નમૂનામાં નોંધ કરી માલિકી હક આપવા સંબંધિત તંત્રને જરૂરી કાર્યવાહી કરવા જણાવાયું.

ઉચ્ચ અધિકારીઓની ઉપસ્થિતિ

આ રાજ્ય સ્વાગત કાર્યક્રમમાં મુખ્યમંત્રીશ્રીના અધિક અગ્ર સચિવ ડૉ. વિક્રાંત પાંડે ખાસ ફરજ પરના અધિકારીઓ શ્રી ધીરજ પારેખ અને શ્રી રાકેશ વ્યાસ સહિત સંબંધિત વિભાગોના સચિવો ગાંધીનગરથી જોડાયા હતા, જ્યારે જિલ્લા કલેક્ટરો વીડિયો કોન્ફરન્સ મારફતે ઉપસ્થિત રહ્યા હતા.

જનવિશ્વાસ મજબૂત કરતું સ્વાગત

રાજ્ય સ્વાગત કાર્યક્રમ દ્વારા નાગરિકોની ફરિયાદોનું સીધું સાંભળવું, તંત્રને જવાબદાર બનાવવું અને સમયસર નિવારણ સુનિશ્ચિત કરવું—આ તમામ બાબતો રાજ્ય સરકારના પારદર્શક અને જવાબદાર શાસનના અભિગમને પ્રતિબિંબિત કરે છે.