Category: રાષ્ટ્રીય

Capgemini કેમ્પસના ડે-કેરમાં બાળકો પર અત્યાચારનો આરોપ

કર્ણાટકની રાજધાની બેંગલુરુના બ્રુકફિલ્ડ વિસ્તારમાં આવેલા Capgemini Technology Services India Limitedના ઓન-કેમ્પસ ડે-કેર સેન્ટરમાં બાળકો સાથે અમાનવીય વર્તન કરાયાનો ગંભીર આરોપ સામે આવ્યો છે. વાયરલ થયેલા વીડિયોના આધારે પોલીસે પાંચ કેરગિવર વિરુદ્ધ FIR નોંધી તપાસ શરૂ કરી છે.

વોશિંગ મશીનમાં બંધ કરવા સહિત ક્રૂરતાના આરોપ

ફરિયાદ મુજબ, રડતા બાળકોને ડરાવવા માટે વોશિંગ મશીનમાં બંધ કરી દેવામાં આવતા હતા. ઉપરાંત બાળકોને ટોયલેટમાં બંધ કરવા, પાણી ભરેલી સાંકડી જગ્યામાં ધકેલવા અને ટોયલેટ જેટ સ્પ્રેથી પાણી છાંટવા જેવી અમાનવીય હરકતો પણ કરવામાં આવતી હોવાનો આરોપ છે. કેટલાક વીડિયોમાં બાળકોના મોઢામાં બળજબરીથી પાણી છોડવામાં આવતું હોવાનું પણ સામે આવ્યું છે.

વાયરલ વીડિયો બાદ બાળ સુરક્ષા વિભાગ સક્રિય

જિલ્લા બાળ સુરક્ષા એકમના અધિકારીને વોટ્સએપ મારફતે વીડિયો મળ્યા બાદ મામલો બહાર આવ્યો હતો. ત્યારબાદ HAL પોલીસ સ્ટેશને 29 જૂને પાંચ કેરગિવર સામે ગુનો નોંધ્યો. આરોપીઓમાં મંજુલા, વિજયલક્ષ્મી, ભાવની, સિંધુ અને બિંદુના નામ સામેલ છે.

પોલીસે તપાસ શરૂ કરી, વીડિયો ફોરેન્સિક તપાસમાં

પોલીસે જણાવ્યું છે કે વાયરલ વીડિયોની ફોરેન્સિક તપાસ કરવામાં આવી રહી છે. ડે-કેરના સંચાલન અને મેનેજમેન્ટની ભૂમિકાની પણ તપાસ ચાલી રહી છે. સંબંધિત તમામ લોકોને પૂછપરછ માટે નોટિસ પાઠવવામાં આવશે.

Capgeminiએ ડે-કેર તાત્કાલિક બંધ કર્યું

ઘટના સામે આવ્યા બાદ Capgeminiએ સાવચેતીના ભાગરૂપે બેંગલુરુ કેમ્પસમાં આવેલું ડે-કેર સેન્ટર તાત્કાલિક અસરથી બંધ કરવાની જાહેરાત કરી છે. કંપનીએ જણાવ્યું છે કે તે તપાસ એજન્સીઓને સંપૂર્ણ સહકાર આપી રહી છે અને કર્મચારીઓ તથા તેમના પરિવારની સુરક્ષા સર્વોચ્ચ પ્રાથમિકતા છે.

હિંદુ લગ્ન અંગે ગુજરાત હાઈકોર્ટનો ઐતિહાસિક ચુકાદો

ગુજરાત હાઈકોર્ટે હિંદુ લગ્નની કાયદેસર માન્યતા અંગે મહત્વપૂર્ણ ચુકાદો આપતા જણાવ્યું છે કે માત્ર મેરેજ રજિસ્ટ્રેશન સર્ટિફિકેટના આધારે કોઈ હિંદુ લગ્ન કાયદેસર ગણાઈ શકતા નથી. હિંદુ મેરેજ એક્ટની કલમ-7 મુજબ જરૂરી ધાર્મિક વિધિ અને સપ્તપદી (સાત ફેરા) પૂર્ણ થયા બાદ જ લગ્ન માન્ય ગણાય છે.

મેરેજ સર્ટિફિકેટ લગ્નનો પુરાવો, લગ્ન નહીં

કોર્ટે સ્પષ્ટ કર્યું કે હિંદુ મેરેજ એક્ટની કલમ-8 હેઠળનું મેરેજ રજિસ્ટ્રેશન માત્ર પહેલેથી કાયદેસર રીતે થયેલા લગ્નનો રેકોર્ડ અથવા પુરાવો છે. જો લગ્નની મૂળભૂત ધાર્મિક વિધિઓ જ પૂર્ણ ન થઈ હોય તો માત્ર પ્રમાણપત્રથી પતિ-પત્નીનો કાયદેસર દરજ્જો મળી શકતો નથી.

શું હતો સમગ્ર મામલો?

યુકેમાં રહેતા એક યુવકે દાવો કર્યો હતો કે યુવતીના પિતાની કંપનીમાં નોકરી દરમિયાન છેતરપિંડીથી તેની સહી લઈ લગ્નનું રજિસ્ટ્રેશન કરવામાં આવ્યું હતું. યુવકના જણાવ્યા મુજબ બંને વચ્ચે ક્યારેય હિંદુ રીતરિવાજ મુજબ લગ્ન થયા નહોતા અને બંને ક્યારેય પતિ-પત્ની તરીકે સાથે રહ્યા નહોતા.

મહિલાએ પણ કોર્ટમાં કરી સ્વીકૃતિ

સુનાવણી દરમિયાન મહિલાએ પણ લેખિતમાં સ્વીકાર્યું હતું કે બંને વચ્ચે કોઈ લગ્નવિધિ થઈ નહોતી અને તેઓ ક્યારેય પતિ-પત્ની તરીકે સાથે રહ્યા નહોતા. સામે પક્ષે પણ સ્વીકાર્યું કે લગ્નના રજિસ્ટ્રેશન સિવાય કોઈ ધાર્મિક વિધિનો પુરાવો ઉપલબ્ધ નહોતો.

ફેમિલી કોર્ટનો આદેશ રદ

ગુજરાત હાઈકોર્ટની ડિવિઝન બેન્ચે અમદાવાદ ફેમિલી કોર્ટનો અગાઉનો આદેશ રદ કરીને કથિત લગ્નને રદબાતલ જાહેર કર્યા. કોર્ટે કહ્યું કે હિંદુ લગ્ન એક પવિત્ર સંસ્કાર છે અને જરૂરી ધાર્મિક વિધિઓ વિના તેને કાયદેસર લગ્ન તરીકે સ્વીકારી શકાય નહીં.

લગ્ન કોઈ કરાર નહીં, પવિત્ર સંસ્કાર

કોર્ટે પોતાના ચુકાદામાં નોંધ્યું કે હિંદુ સમાજમાં લગ્ન માત્ર કાનૂની કરાર નહીં પરંતુ પવિત્ર સંસ્કાર છે. અગ્નિની સાક્ષીએ સાત ફેરા અને પરંપરાગત વિધિઓ પૂર્ણ થયા બાદ જ લગ્નને હિંદુ કાયદા હેઠળ કાયદેસર માન્યતા મળે છે.