Category: રાષ્ટ્રીય

મહેસાણા …

    મહેસાણા ભાજપમાં છેલ્લા ઘણા સમયથી અંદરખાને સળગતી જૂથવાદ અને અહંકારની આગ હવે ખુલ્લેઆમ ધગધગતી દેખાઈ રહી છે. ભાજપના રાજ્યસભા સાંસદ મયંક નાયક વિરુદ્ધ સામાજિક આગેવાન તરીકે ઓળખાતા પિન્ટુ પટેલનો વાયરલ થયેલો ઓડિયો માત્ર એક વ્યક્તિની ઉશ્કેરાયેલી ભાષા નથી, પરંતુ મહેસાણા જિલ્લાના રાજકારણમાં ઊંડે સુધી ઘૂસી ગયેલી “હું જ બધું” વાળી માનસિકતાનું જીવતું ઉદાહરણ બની ગયો છે.

 ઓડિયોમાં જે રીતે પિન્ટુ પટેલ પોતાના જ પક્ષના સાંસદને “ઝીરો” ગણાવી રહ્યા છે, “અમારે તેમને ગણવાના નથી” જેવી ભાષા વાપરી રહ્યા છે અને “ફક્ત રજની પટેલની જ પોસ્ટ મૂકવાની” જેવી ધમકીભરી વાતો કરી રહ્યા છે તેનાથી સ્પષ્ટ થાય છે કે મહેસાણા ભાજપમાં કેટલાક લોકો હવે સંગઠનથી પણ ઉપર હોવાનો ભ્રમ પાળી બેઠા છે.

“રજની પટેલ સિવાય બીજાનો ફોટો નહીં” : શું ભાજપ હવે ખાનગી મિલ્કત બની ગયું?

  વાયરલ ઓડિયોમાં સૌથી ચોંકાવનારી બાબત એ છે કે પિન્ટુ પટેલ ખુલ્લેઆમ કહેતા સંભળાય છે કે રજની પટેલ સિવાય બીજા કોઈ નેતાની પોસ્ટ મૂકનાર તેમના માટે દુશ્મન સમાન ગણાશે. આ નિવેદન માત્ર રાજકીય અહંકાર નથી, પરંતુ પક્ષની સામૂહિક નેતાગીરી સામે ખુલ્લી બગાવત તરીકે જોવામાં આવી રહ્યું છે.

પ્રશ્ન એ ઉભો થાય છે કે શું ભાજપ હવે કેટલાક વ્યક્તિઓની ખાનગી મિલ્કત બની ગયું છે?

શું પક્ષના  સાંસદનું પણ સન્માન નહીં રહે?

શું વ્યક્તિપૂજા એટલી હદે પહોંચી ગઈ છે કે પોતાના જ પક્ષના નેતાઓને અપમાનિત કરવું હવે સામાન્ય બની ગયું છે?

મહેસાણા ભાજપમાં ચાલી રહેલા આ આંતરિક ઝઘડાએ હવે પક્ષની શિસ્ત અને નેતૃત્વ બંનેને કટઘરામાં ઉભું કરી દીધા છે.

તૃષા પટેલના પ્રમુખપદ પાછળનું “પાવર સર્કિટ” ફરી ચર્ચામાં

  વાયરલ ઓડિયો બાદ હવે પૂર્વ જિલ્લા પંચાયત પ્રમુખ તૃષા પટેલનું નામ પણ ફરી રાજકીય ચર્ચાના કેન્દ્રમાં આવી ગયું છે. રાજકીય ગલિયારામાં વર્ષોથી એવી ચર્ચા ચાલી રહી હતી કે તૃષા પટેલનું પ્રમુખપદ માત્ર લોકશાહી પ્રક્રિયાનો પરિણામ નહોતું, પરંતુ પાછળથી કેટલાક પ્રભાવશાળી રાજકીય ચહેરાઓની સીધી રાજકીય ગોઠવણી કામ કરી રહી હતી.

  હવે જ્યારે તેમના પતિ પિન્ટુ પટેલ ખુદ પક્ષના સાંસદ સામે બેફામ ભાષામાં હુમલો કરતા સંભળાઈ રહ્યા છે ત્યારે લોકો સવાલ ઉઠાવી રહ્યા છે કે શું સત્તાનો અહંકાર હવે એટલો વધી ગયો છે કે પક્ષની શિસ્ત અને મર્યાદાનો પણ ભંગ થવા લાગ્યો છે?

રાજકીય વિશ્લેષકોનું માનવું છે કે જો કોઈ સામાન્ય કાર્યકરે પોતાના સાંસદ વિશે આવી ભાષા વાપરી હોત તો કદાચ કલાકોમાં કાર્યવાહી થઈ ગઈ હોત. પરંતુ અહીં મામલો “પ્રભાવશાળી કેમ્પ” સાથે જોડાયેલો હોવાથી સમગ્ર ઘટનાને લઈને ભાજપનું મૌન પણ ચર્ચાનો વિષય બન્યું છે.

મહેસાણા ભાજપમાં સંગઠન નહીં, કેમ્પ રાજકારણ?

  મહેસાણા જિલ્લાનું રાજકારણ છેલ્લા ઘણા વર્ષોથી જૂથવાદ માટે કુખ્યાત રહ્યું છે. એક તરફ નીતિન પટેલ કેમ્પ, બીજી તરફ રજની પટેલ સમર્થકો અને હવે નવા નેતાઓ વચ્ચે ચાલી રહેલા અદૃશ્ય યુદ્ધે ભાજપની અંદરની હકીકત બહાર લાવી દીધી છે.

  વાયરલ ઓડિયો એ સાબિત કરી દીધું છે કે મહેસાણા ભાજપમાં હવે સંગઠન કરતા વ્યક્તિગત વફાદારી વધુ મહત્વની બની ગઈ છે. કોણ કયા નેતાનો માણસ છે તેના આધારે રાજકીય સંબંધો નક્કી થઈ રહ્યા છે. વિકાસ, જનતા અને પક્ષની વિચારધારા પાછળ રહી ગઈ છે જ્યારે “મારો નેતા જ સર્વોપરી” વાળી રાજકીય સંસ્કૃતિ હાવી થઈ ગઈ છે.

મયંક નાયક સામે આક્રમકતા પાછળ શું છે રાજકીય ડર?

 રાજકીય વર્તુળોમાં હવે ચર્ચા એ પણ ચાલી રહી છે કે શું મયંક નાયકનો વધતો પ્રભાવ કેટલાક જૂના રાજકીય ગૃપોને અસ્વસ્થ કરી રહ્યો છે?

શું મહેસાણા ભાજપમાં નવી નેતાગીરી ઊભી થવાના ભયથી આ પ્રકારની આક્રમક ભાષાનો ઉપયોગ થઈ રહ્યો છે?

કે પછી આવનારા સમયમાં રાજકીય સમીકરણો બદલાય તે પહેલાં દબાણની રાજનીતિ શરૂ થઈ ગઈ છે?

આ બધા પ્રશ્નો વચ્ચે પિન્ટુ પટેલનો વાયરલ ઓડિયો હવે માત્ર વ્યક્તિગત વિવાદ નહીં પરંતુ મહેસાણા ભાજપના આંતરિક સત્તાસંઘર્ષનું પ્રતિક બની ગયો છે.

હવે ભાજપ પાસે માત્ર બે રસ્તા

હવે ભાજપના ઉચ્ચ નેતૃત્વ સામે સૌથી મોટો પ્રશ્ન એ છે કે શું પક્ષ શિસ્ત બધાને માટે સમાન છે કે ફક્ત સામાન્ય કાર્યકરો માટે જ?

  જો પિન્ટુ પટેલ સામે કોઈ કાર્યવાહી નહીં થાય તો એ સ્પષ્ટ સંદેશ જશે કે મહેસાણા ભાજપમાં કેટલાક “અસ્પૃશ્ય” રાજકીય ચહેરાઓ છે જેમને પક્ષથી પણ ઉપર માનવામાં આવે છે. અને જો કાર્યવાહી થશે તો એ પણ સાબિત થશે કે પક્ષ હવે આંતરિક ગંદકી સાફ કરવા માટે મજબૂર બન્યો છે.

હાલ એક વાત ચોક્કસ છે — મહેસાણા ભાજપમાં ચાલી રહેલું આંતરિક યુદ્ધ હવે બંધ દરવાજાની અંદર રહ્યું નથી. વાયરલ ઓડિયોએ આખા જિલ્લાને બતાવી દીધું છે કે સત્તાના રાજકારણમાં હવે શબ્દોની મર્યાદા, પક્ષની શિસ્ત અને રાજકીય સંસ્કાર બધું જ તૂટી રહ્યું છે.

રિપોર્ટર : રાજભા સોલંકી

માંડલ…

   માંડલ તાલુકા પંચાયતમાં પ્રમુખ, ઉપપ્રમુખ સહિતના વિવિધ મહત્વપૂર્ણ પદોની વરણી કરવામાં આવતા તાલુકાના રાજકીય અને સામાજિક વર્તુળોમાં આનંદ અને ઉત્સાહનો માહોલ જોવા મળી રહ્યો છે. તાલુકા પંચાયતની ચૂંટણીમાં સ્પષ્ટ બહુમતી પ્રાપ્ત કર્યા બાદ ભાજપ દ્વારા સર્વસંમતિથી વિવિધ પદાધિકારીઓની પસંદગી કરવામાં આવી હતી. નવનિયુક્ત પદાધિકારીઓને તાલુકા ભરના આગેવાનો, કાર્યકરો અને ગ્રામજનોએ શુભેચ્છાઓ પાઠવી વિકાસલક્ષી કામગીરી માટે આશાવાદ વ્યક્ત કર્યો છે.

માંડલ તાલુકા પંચાયતની કુલ 16 બેઠકોમાંથી ભાજપે 10 બેઠકો જીતતા સત્તા પર મજબૂત પકડ બનાવી હતી. બહુમતી મળ્યા બાદ પક્ષની આંતરિક ચર્ચા અને સહમતિના આધારે પ્રમુખ, ઉપપ્રમુખ, કારોબારી સમિતિના ચેરમેન, શાસક પક્ષના નેતા તેમજ દંડક જેવા મહત્વપૂર્ણ પદો માટે વરણી કરવામાં આવી હતી.

આ રહ્યા માંડલ તાલુકા પંચાયતના નવા પદાધિકારીઓ

પ્રમુખ તરીકે કડવાસણ ગામના મનુભાઈ ડોડીયા

ઉપપ્રમુખ તરીકે વિઠ્ઠલાપુર ગામના ચેતનાબા સંજુભા સોલંકી

કારોબારી સમિતિના ચેરમેન તરીકે વાસણા ગામના સુમનભાઈ પટેલ

શાસક પક્ષના નેતા તરીકે શેર ગામના હરિકૃષ્ણ પટેલ

દંડક તરીકે કાચરોલ ગામના કૈલાસબેન કિશોરસિંહ ઠાકોર

ની વરણી કરવામાં આવી છે.

ગ્રામ્ય વિકાસના મુદ્દાઓ પર રહેશે ખાસ ધ્યાન

નવનિયુક્ત પદાધિકારીઓએ તાલુકાના સર્વાંગી વિકાસ માટે પ્રતિબદ્ધતા વ્યક્ત કરી હોવાનું જાણવા મળી રહ્યું છે. ગ્રામ્ય વિસ્તારોમાં માર્ગોની સમસ્યા, પીવાના પાણીની સુવિધા, આરોગ્ય સેવાઓ, શિક્ષણ વ્યવસ્થા તેમજ સ્વચ્છતા જેવા પ્રશ્નોને પ્રાથમિકતા આપીને કામગીરી કરવામાં આવશે તેવી લોકોએ આશા વ્યક્ત કરી છે.

ખાસ કરીને છેલ્લા કેટલાક સમયથી ગ્રામ્ય વિસ્તારોમાં રસ્તા, ગટર અને મૂળભૂત સુવિધાઓને લઈને ઉઠતા પ્રશ્નોને ધ્યાનમાં રાખીને નવી ટીમ સામે લોકોની અપેક્ષાઓ વધી છે. તાલુકાના લોકો હવે વિકાસલક્ષી યોજનાઓને વધુ ઝડપથી અમલમાં મૂકવાની આશા રાખી રહ્યા છે.

કાર્યકરો અને આગેવાનોમાં ખુશીનો માહોલ

વરણી જાહેર થતાં જ તાલુકાના વિવિધ ગામોમાં ભાજપના કાર્યકરો અને સમર્થકોમાં ખુશીનો માહોલ જોવા મળ્યો હતો. અનેક આગેવાનો અને સામાજિક સંસ્થાઓ દ્વારા નવનિયુક્ત પદાધિકારીઓને શુભેચ્છાઓ પાઠવવામાં આવી હતી. કેટલાક વિસ્તારોમાં કાર્યકરો દ્વારા મીઠાઈ વહેંચી ઉજવણી પણ કરવામાં આવી હોવાનું જાણવા મળ્યું છે.

રાજકીય વિશ્લેષકોના મત મુજબ તાલુકા પંચાયતની આ નવી ટીમ આગામી સમયમાં તાલુકાના વિકાસ માટે મહત્વપૂર્ણ નિર્ણયો લઈ શકે છે. હવે લોકોની નજર નવી ટીમ કેટલા અસરકારક રીતે કામગીરી કરે છે તેના પર રહેશે.