Category: આજે ફોકસમાં છે

મહેસાણા જિલ્લાના જગુદણ પાસે ખાનગી કંપની અમન ઇન્ડસ્ટ્રીઝમાં મોટો વિવાદ ઉભો થયો છે. કંપનીના 300 થી વધુ કામદારો એકસાથે હડતાળ પર ઉતરી આવ્યા હોવાથી વાતાવરણ ગરમાયું છે.

અમન ઇન્ડસ્ટ્રીઝ સામે હડતાળ ઉપર ઉતરેલા કામદારોનું કહેવું છે કે તેમની લાંબા સમયથી બાકી રહેલી પડતર માંગણીઓને કંપની તરફથી ઉકેલવામાં આવી રહ્યો નથી. અનેક વખત રજૂઆત કર્યા છતાં માલિક દ્વારા સમસ્યાને ગંભીરતાથી લેવામાં આવી નથી, જેના કારણે તેઓ મજબૂર બનીને રસ્તા પર ઉતર્યા છે.

ફેક્ટરી સામે મોટી સંખ્યામાં ભેગા થઈને કામદારો બેનરો અને પ્લેકાર્ડ્સ સાથે વિરોધ પ્રદર્શન કરી રહ્યા છે. આ દરમિયાન કામદારોના સૂત્રોચ્ચારો અને તંગ પરિસ્થિતિ સર્જાતા પોલીસે ઘટનાસ્થળ પર દોડી આવી છે.

પોલીસ દ્વારા પરિસ્થિતિ કાબૂમાં લેવા પ્રયાસો કરવામાં આવ્યા, પરંતુ જ્યારે હડતાળ કરી રહેલા કામદારોને સ્થળ પરથી હટાવવાની કાર્યવાહી હાથ ધરાઈ ત્યારે કામદારોમાં ભારે રોષ ફાટી નીકળ્યો હતો.

આપને જણાવીએ કે છેલ્લા ઘણા દિવસોથી માલિક અને કામદારો વચ્ચે વિવાદ ચાલી રહ્યો છે, પરંતુ ચર્ચા વિફળ રહેતા હડતાળની પરિસ્થિતિ ઊભી થઈ છે. હાલ પોલીસ તંત્ર પરિસ્થિતિ પર નજર રાખી રહ્યું છે અને કામદારો તથા કંપની માલિક વચ્ચે સમાધાન માટે પ્રયાસો કરવામાં આવી રહ્યા છે.

આગામી સમયમાં પરિસ્થિતિ કઈ દિશામાં વળશે.કામદારોની માંગણી કંપની માલિક પુરી કરીને હડતાળ પૂરી થશે કે કામદારોની હડતાળ ચાલુ રહેશે તે જોવાનું રહ્યું.