રિપોર્ટર: મેહુલ પટેલ, અંકલેશ્વર (ભરૂચ)
અંકલેશ્વર (ભરૂચ): ભરૂચ જિલ્લાના અંકલેશ્વર શહેરમાં ટ્રિપલ તલાકનો ચોંકાવનારો બનાવ સામે આવ્યો છે. અંકલેશ્વર શહેર એ ડિવિઝન પોલીસ મથકની હદમાં રહેતી મુસ્લિમ પરણીતાને તેના પતિએ “મારે તને રાખવી નથી…” કહી જાહેરમાં ત્રણ વાર તલાક ઉચ્ચારી દેતા મામલો પોલીસ સુધી પહોંચ્યો છે.
લગ્નજીવનમાં વિખવાદ
મળતી માહિતી મુજબ, પીડિતાના લગ્ન મુસ્લિમ રીતિરિવાજ મુજબ ઓલપાડની બાગે મદીનામાં રહેતા ઈરફાન હુસેન સિકંદર શેખ સાથે થયા હતા. લગ્નજીવન દરમિયાન દંપતીને બે સંતાનોનું સુખ મળ્યું હતું.
પરંતુ ઓલપાડ તાલુકાના શેરડી ગામની પ્રાથમિક શાળામાં શિક્ષક તરીકે ફરજ બજાવતા પતિએ પત્ની પર આડા સંબંધની ખોટી શંકા રાખી અવારનવાર માનસિક ત્રાસ આપવાનું શરૂ કર્યું હતું. વારંવાર ધમકી આપી ઘરની બહાર કાઢી મુકાતા કંટાળેલી મહિલા પિયર પરત ફરી હતી.
બધાની સામે ત્રિપલ તલાક
પીડિતાના સંબંધીઓ સમાધાન માટે મહિલાને ફરી સાસરીમાં મૂકવા ગયા ત્યારે પતિએ જાહેરમાં જ “મારે તને રાખવી નથી” કહી ત્રણ વાર તલાક ઉચ્ચારી દીધા હતા અને પત્નીને સ્વીકારવાનો ઇનકાર કર્યો હતો.
આ ઘટનાથી વ્યથિત બનેલી મહિલાએ અંકલેશ્વર શહેર એ ડિવિઝન પોલીસ મથકે ફરિયાદ નોંધાવી છે.
કાયદા હેઠળ ગુનો નોંધાયો
પોલીસે મુસ્લિમ મહિલા લગ્ન અધિકારોનું રક્ષણ અધિનિયમ, 2019 હેઠળ ગુનો નોંધી વધુ તપાસ શરૂ કરી છે. નોંધનીય છે કે આ કાયદા મુજબ તાત્કાલિક ત્રિપલ તલાક આપવો ગેરકાયદેસર અને દંડનીય ગુનો ગણાય છે.
પોલીસ દ્વારા આગળની કાનૂની કાર્યવાહી હાથ ધરાઈ રહી છે.