ભર ઉનાળે ભાઉપુરામાં ગટરનાં પાણીની નદીઓ
મહેસાણા જિલ્લાના કડી શહેરના ભાઉપુરા વિસ્તારમાં ભર ઉનાળે ગટર લાઇન ઉભરાતા રસ્તાઓ પર ગંદા પાણીનો ભરાવો થયો છે. સમગ્ર વિસ્તારમાં ગટરનાં પાણી નદીની જેમ વહેતા સ્થાનિકોમાં ભારે રોષ ફેલાયો છે.
રસ્તાઓ પર ગંદુ પાણી, લોકોને હાલાકી
ગટરનું પાણી રસ્તાઓ પર ફરી વળતા વાહનચાલકો અને રાહદારીઓને ભારે મુશ્કેલી પડી રહી છે. લોકો માટે ઘર બહાર નીકળવું પણ મુશ્કેલ બન્યું છે.
અસહ્ય દુર્ગંધથી લોકો ત્રાહિમામ
ઉભરાતી ગટર અને ગંદકીના કારણે સમગ્ર વિસ્તારમાં અસહ્ય દુર્ગંધ ફેલાઈ રહી છે. સ્થાનિકોનું કહેવું છે કે દુર્ગંધના કારણે ઘરમાં રહેવું પણ મુશ્કેલ બની ગયું છે.
રોગચાળાનો ભય વધ્યો
ગંદા પાણીના ભરાવાને કારણે વિસ્તારમાં રોગચાળો ફાટી નીકળવાની ભીતિ વ્યક્ત કરવામાં આવી રહી છે. ખાસ કરીને નાના બાળકો અને વૃદ્ધોના આરોગ્ય પર ખતરો વધ્યો હોવાનું સ્થાનિકો જણાવી રહ્યા છે.
પાલિકા સામે લોકોમાં ભારે આક્રોશ
સ્થાનિકોનો આક્ષેપ છે કે અનેક વખત રજૂઆતો કરવા છતાં કડી પાલિકા દ્વારા સમસ્યાનો કાયમી ઉકેલ લાવવામાં આવ્યો નથી. લોકોનું કહેવું છે કે ટેક્સ સમયસર વસૂલવામાં આવે છે, પરંતુ મૂળભૂત સુવિધાઓ આપવામાં પાલિકા નિષ્ફળ સાબિત થઈ રહી છે.
ગંદકીથી સ્થાનિકો પરેશાન
વિસ્તારમાં સતત ગંદકી અને ગટરનાં પાણી ભરાતા રોજિંદું જીવન પ્રભાવિત બન્યું છે. સ્થાનિકોએ જણાવ્યું કે લાંબા સમયથી આ સમસ્યા યથાવત છે છતાં તંત્ર દ્વારા યોગ્ય કામગીરી કરવામાં આવતી નથી.
ઉગ્ર વિરોધની ચીમકી
સ્થાનિકોએ ચેતવણી આપી છે કે જો તાત્કાલિક સમસ્યાનો ઉકેલ નહીં આવે તો કડી પાલિકા કચેરીએ ઉગ્ર વિરોધ પ્રદર્શન કરવામાં આવશે.