મહેસાણા જિલ્લાના કડી શહેરમાં નગરપાલિકાની કામગીરી પર ફરી એકવાર ગંભીર સવાલો ઊભા થયા છે. જીવ બચાવવાની સેવા માટે રાખવામાં આવેલી એમ્બ્યુલન્સનો ઉપયોગ કચરો સાફ કરતા મજૂરોને ફેરવવા માટે થતો હોવાનો ચોંકાવનારો મુદ્દો સામે આવ્યો છે. જે વાહન દર્દીઓને હોસ્પિટલ સુધી પહોંચાડવા માટે હોવું જોઈએ, તે જ વાહન સફાઈ કામદારોની હેરફેર માટે વપરાતું હોવાનો આરોપ ઉઠતા તંત્રની કાર્યશૈલી સામે આક્રોશ ફાટી નીકળ્યો છે.
સ્થાનિક સૂત્રો અને જાગૃત નાગરિકોના જણાવ્યા મુજબ, કડી નગરપાલિકાની એમ્બ્યુલન્સમાં નિયમિત રીતે સફાઈ કામદારોને બેસાડી શહેરના અલગ અલગ વિસ્તારોમાં મુકવામાં આવે છે. આ ઘટના માત્ર નિયમોનો ભંગ જ નથી, પરંતુ માનવજીવન સાથેનો ગંભીર ખેલ પણ છે. એમ્બ્યુલન્સ જેવી ઇમરજન્સી સેવા જો આ રીતે અન્ય કામોમાં વ્યસ્ત રહેશે તો જરૂરિયાતના સમયે દર્દીઓને તાત્કાલિક સેવા કેવી રીતે મળશે તે મોટો સવાલ છે.
આ મુદ્દે નગરજનોમાં ભારે રોષ ફેલાયો છે. “એમ્બ્યુલન્સ છે કે મજૂરોને ફેરવવાની ગાડી?” એવો સવાલ લોકો ખુલ્લેઆમ ઉઠાવી રહ્યા છે. નગરપાલિકાના બેદરકાર વહીવટ અને જવાબદારીના અભાવને કારણે જનતાનો વિશ્વાસ ડગમગી રહ્યો છે.
આ સમગ્ર મામલે ઉચ્ચ અધિકારીઓ તાત્કાલિક તપાસ કરે અને જવાબદાર લોકો સામે કડક કાર્યવાહી કરે તેવી માંગ ઉઠી રહી છે. નહીં તો આવનારા સમયમાં આવી બેદરકારી કોઈના જીવ માટે ખતરો બની શકે છે.