રિપોર્ટર : પ્રદીપ ઠાકોર, બહુચરાજી
કડી પોલીસ સર્કલમાં થયેલા હત્યા કેસમાં સંડોવાયેલો અને જેલ સજા ભોગવી રહેલો આરોપી પેરોલ મંજુર થયા પછી રજા પુરી થવા છતાં જેલમાં હાજર થયા વગર ફરાર થઈ ગયો હતો. આરોપી લાંબા સમયથી પોલીસને ચકમો આપી નાસતો ફરતો હતો, ત્યારે બહુચરાજી પોલીસે ખાનગી બાતમીના આધારે દેથલી–આકબા રોડ ઉપરથી સફળતા પૂર્વક તેની ધરપકડ કરી હતી.
હત્યાના કેસમાં કડી પોલીસ સ્ટેશનમાં સંડોવાયેલો આરોપી
મળતી માહિતી પ્રમાણે, આરોપી બજાણિયા જલાભાઈ ડાહ્યાભાઈ, કડી પોલીસ ડિવિઝનના હત્યા કેસમાં સંડોવાયેલા હોવાને કારણે અમદાવાદ મધ્યસ્થ જેલમાં પાકા કામના કેદી તરીકે સજા ભોગવી રહ્યો હતો. નિયમ મુજબ તેને પેરોલ રજા ફાળવવામાં આવી હતી અને રજાની મુદત પૂર્ણ થતા જેલમાં હાજર થવું ફરજિયાત હતું.
પરંતુ આરોપીએ સરકારી શરતોનો ભંગ કરતાં પેરોલ રજા પૂરી થયા બાદ પણ જેલમાં હાજર ન થઈ પેરોલ જંપ કરી નાસી છૂટ્યો હતો. ત્યારથી કડી તેમજ આસપાસના વિસ્તારમાં પોલીસ તેના પર સતત નજર રાખી રહી હતી.
ગૂપ્ત માહિતી પરથી બહુચરાજી પોલીસ ની નાકાબંધી
આજે વહેલી સવારમાં બહુચરાજી પોલીસને ખાનગી સૂત્રો મારફતે જાણ થઈ કે ફરાર આરોપી દેથલી–આકબા રોડ નજીક જોવા મળ્યો છે.
સૂત્રોની સાચી માહિતીની ખાતરી થતાં જ બહુચરાજી પોલીસના સ્ટાફે સ્થળ પર તાત્કાલિક રેડ ગોઠવી.
કારરવાઈમાં એ.એસ.આઈ વિષ્ણુભાઈ, હેડ કોન્સ્ટેબલ રમેશભાઈ, પીસી અભિજિતસિંહ, દેવદતસિંહ સહિતનું પોલીસ દળ જોડાયું હતું. પોલીસ ટીમે ઝડપી ઘેરાબંધી કરતાં ફરાર આરોપી તેમની પકડમાં આવી ગયો.
અમદવાદ મધ્યસ્થ જેલને સોંપવાની કામગીરી શરૂ
પોલીસે આરોપીને કાબૂમાં લઈને જરૂરી કાનૂની કાર્યવાહી હાથ ધરી છે. પેરોલ જંપી ફરાર થવા અંગે વધારાના ગુના નોધવાની પ્રક્રિયા પણ શરૂ કરવામાં આવી છે. બહુચરાજી પોલીસ દ્વારા આરોપીને પૂરતી કાર્યવાહી બાદ અમદાવાદ મધ્યસ્થ જેલ હવાલે કરવાની તજવીજ કરવામાં આવી રહી છે.
સ્થાનિક પોલીસની આ ઝડપી અને ગૂઢ કામગીરીને કારણે લાંબા સમયથી પેરોલ પર ફરાર ફરતો આરોપી અંતે કાનૂની સજાની જદમાં આવી ગયો છે.