મુંદ્રા નજીક દરિયામાં મોટી ડ્રગ્સ કાર્યવાહી
ગુજરાત ATS અને ઇન્ડિયન કોસ્ટગાર્ડે સંયુક્ત ઓપરેશન હાથ ધરી કચ્છના મુંદ્રા નજીકથી 118 કિલો કોકેઈનનો જથ્થો ઝડપી પાડ્યો છે. આંતરરાષ્ટ્રીય બજારમાં આ ડ્રગ્સની કિંમત અંદાજે ₹1180 કરોડ હોવાનું કહેવાઈ રહ્યું છે.
‘યુરોપ’ નામના કાર્ગો શીપ પર દરોડો
એજન્સીઓને બાતમી મળી હતી કે મુંદ્રા તરફ આવી રહેલા ‘યુરોપ’ નામના કાર્ગો શીપમાં મોટી માત્રામાં ડ્રગ્સ છુપાવવામાં આવ્યું છે. માહિતીના આધારે દરિયામાં જ ઓપરેશન ચલાવી તપાસ હાથ ધરતા કોકેઈનના પેકેટો મળી આવ્યા હતા.
બ્રાઝીલથી શરૂ થઈ હતી ડ્રગ્સની સફર
પ્રાથમિક તપાસ મુજબ કોકેઈનનો જથ્થો બ્રાઝીલથી શીપમાં લોડ કરાયો હતો. ત્યારબાદ કાર્ગો શીપ લેટિન અમેરિકા, મેક્સિકો, અમેરિકા અને કરાંચી થઈને મુંદ્રા પહોંચ્યું હતું.
નાની બોટ મારફતે ડિલિવરીનો પ્લાન
તપાસમાં સામે આવ્યું છે કે મુંદ્રા નજીક પહોંચ્યા બાદ શીપમાંથી નાની બોટ મારફતે ડ્રગ્સનો જથ્થો બહાર કાઢીને આગળ સપ્લાય કરવાનો પ્લાન હતો. આ જથ્થો અંતે દિલ્હી પહોંચાડવાનો હતો.
ત્રણ આરોપી ઝડપાયા
ATSએ આ કેસમાં કુલ ત્રણ આરોપીઓને ઝડપી પાડ્યા છે. જેમાં એક આરોપી બોટમાંથી ઝડપાયો હતો, જ્યારે દિલ્હીમાંથી બે વિદેશી નાગરિકોની ધરપકડ કરવામાં આવી છે.
ઝડપાયેલા આરોપીઓના નામ
- જુમા નાસીર ઓમાર
- કેલ્વિન ચુકવામા
- બ્યારુહંગા જેમ્સ
એક આરોપી દરિયામાં કૂદી ફરાર
ઓપરેશન દરમિયાન એક શખ્સ દરિયામાં કૂદી ગયો હતો. હાલ કોસ્ટગાર્ડ અને સુરક્ષા એજન્સીઓ દ્વારા તેની શોધખોળ ચાલી રહી છે.
6 પેકમાંથી 5 મળી આવ્યા
એજન્સીઓને કુલ 6 પેક હોવાની માહિતી મળી હતી, પરંતુ હાલ 5 પેક જ કબજે થયા છે. એક પેક દરિયામાં ફેંકી દેવામાં આવ્યો હોવાની આશંકા વ્યક્ત કરવામાં આવી રહી છે.
સેટેલાઈટ ફોન અને Apple ટેબ જપ્ત
પોલીસે આરોપીઓ પાસેથી સેટેલાઈટ ફોન અને Appleનું ટેબ પણ કબજે કર્યું છે. ડિજિટલ ડેટાના આધારે હવે આંતરરાષ્ટ્રીય ડ્રગ્સ નેટવર્કની તપાસ શરૂ કરવામાં આવી છે
.દિલ્હી કનેક્શનની તપાસ શરૂ
ATSના જણાવ્યા મુજબ ડ્રગ્સનો જથ્થો દિલ્હીના દ્વારકા વિસ્તારમાં રહેતા વિદેશી નાગરિકોને પહોંચાડવાનો હતો. હવે દિલ્હીથી આગળ આ જથ્થો ક્યાં સપ્લાય થવાનો હતો તે દિશામાં પૂછપરછ ચાલી રહી છે.
ગુજરાતના દરિયાઈ માર્ગનો ફરી દુરુપયોગ કરવાનો પ્રયાસ
છેલ્લા કેટલાક વર્ષોમાં ગુજરાતના દરિયાઈ માર્ગનો ઉપયોગ કરીને આંતરરાષ્ટ્રીય ડ્રગ્સ સિન્ડિકેટ દ્વારા ભારતમાં નશીલા પદાર્થો ઘુસાડવાના અનેક પ્રયાસો સામે આવ્યા છે. સુરક્ષા એજન્સીઓ હવે વધુ સતર્ક બની છે.