ચૂંટણી વચ્ચે PoKમાં હિંસા ભડકી
પાકિસ્તાન અધિકૃત કાશ્મીર (PoK)માં વિધાનસભા ચૂંટણીના પ્રથમ તબક્કા દરમિયાન હિંસા અને તણાવની ઘટનાઓ સામે આવી છે. વિવિધ અહેવાલો મુજબ અનેક સ્થળોએ પ્રદર્શનકારીઓ અને સુરક્ષા દળો વચ્ચે અથડામણ થઈ હતી.
જોઈન્ટ અવામી એક્શન કમિટી (JAAC)એ દાવો કર્યો છે કે રાવલાકોટમાં સુરક્ષા દળોના ગોળીબારમાં 19 લોકોના મોત થયા છે. જોકે, આ આંકડાની સ્વતંત્ર પુષ્ટિ થઈ નથી અને પાકિસ્તાની સત્તાવાળાઓ તરફથી અલગ સત્તાવાર આંકડો જાહેર કરવામાં આવ્યો નથી.
PPP અને PML-Nએ એકબીજા પર લગાવ્યા આરોપો
પાકિસ્તાન પીપલ્સ પાર્ટી (PPP)એ આરોપ લગાવ્યો છે કે સત્તાધારી પાકિસ્તાન મુસ્લિમ લીગ-નવાઝ (PML-N)ના સમર્થકોના ગોળીબારમાં તેના એક કાર્યકરનું મોત થયું અને અન્ય બે ઘાયલ થયા.
બીજી તરફ PML-N અને PPP બંનેએ એકબીજા પર ચૂંટણીમાં ગેરરીતિ અને હિંસા ભડકાવવાના આરોપો લગાવ્યા છે.
JAACની માંગણીઓ બાદ શરૂ થયો વિરોધ
JAACએ અગાઉ વહીવટીતંત્રને ધરપકડ કરાયેલા કાર્યકરોની મુક્તિ, નોંધાયેલા કેસો પાછા ખેંચવા અને વહીવટી સુધારાની માંગ સાથે અલ્ટીમેટમ આપ્યું હતું.
માગણીઓ સ્વીકારવામાં ન આવતા હજારો સમર્થકો રાવલાકોટમાં ભેગા થયા અને મુઝફ્ફરાબાદ તરફ કૂચ શરૂ કરી, જેના કારણે સ્થિતિ વધુ તંગ બની ગઈ.
તણાવ વચ્ચે અનેક વિસ્તારોમાં ચૂંટણી મુલતવી
વધતા વિરોધને ધ્યાનમાં રાખીને વહીવટીતંત્રે સુધાનૌતી અને રાવલાકોટ જિલ્લાઓમાં મતદાન 10 ઓગસ્ટ સુધી મુલતવી રાખવાનો નિર્ણય લીધો છે.
કેટલાક વિસ્તારોમાં ચૂંટણીના બહિષ્કારના અહેવાલો પણ સામે આવ્યા છે, જ્યાં મતદાન કેન્દ્રો પર મતદારોની હાજરી ખૂબ ઓછી જોવા મળી હતી.
12 શરણાર્થી બેઠકોને લઈને સૌથી મોટો વિવાદ
PoK વિધાનસભાની કુલ 45 બેઠકોમાંથી 12 બેઠકો પાકિસ્તાનમાં વસેલા કાશ્મીરી શરણાર્થીઓ માટે આરક્ષિત છે.
JAACનો દાવો છે કે આ બેઠકોને કારણે સ્થાનિક મતદારોના મતનું મહત્વ ઘટે છે અને કેન્દ્રની સત્તાધારી પાર્ટીઓને રાજકીય લાભ મળે છે.
બીજી તરફ પાકિસ્તાન સરકારનું કહેવું છે કે આ બેઠકો બંધારણીય વ્યવસ્થાનો ભાગ છે અને તેમાં ફેરફાર માટે બંધારણીય સુધારો જરૂરી છે.
નવાઝ શરીફ અને બિલાવલ ભુટ્ટો મેદાનમાં
ચૂંટણી પ્રચાર દરમિયાન પાકિસ્તાનના પૂર્વ વડાપ્રધાન નવાઝ શરીફ અને PPPના અધ્યક્ષ બિલાવલ ભુટ્ટો ઝરદારીએ અનેક ચૂંટણી સભાઓ સંબોધી હતી.
નવાઝ શરીફે PoKને પોતાનું “બીજું ઘર” ગણાવ્યું અને વિકાસના વચનો આપ્યા, જ્યારે બિલાવલ ભુટ્ટોએ પણ પોતાની પાર્ટી માટે જોરદાર પ્રચાર કર્યો.આ