બહેનના નિવેદન બાદ અટકળો તેજ
તાજેતરમાં રોનાલ્ડોની બહેન કાતિયા એવેઇરોએ સોશિયલ મીડિયા પર સંકેત આપ્યો હતો કે FIFA વર્લ્ડ કપ 2026 પોર્ટુગલ માટે ક્રિસ્ટિયાનો રોનાલ્ડોનો છેલ્લો ટૂર્નામેન્ટ બની શકે છે. આ નિવેદન બાદ ફૂટબોલ જગતમાં તેમના સંન્યાસને લઈને ચર્ચાઓ તેજ બની હતી.
રોનાલ્ડોએ નિવૃત્તિ પર શું કહ્યું?
ક્રોએશિયા સામેની મેચ બાદ નિવૃત્તિ અંગે પૂછાયેલા સવાલના જવાબમાં રોનાલ્ડોએ કહ્યું કે હાલ તેનો ફોકસ માત્ર ટીમ પર છે. તેમણે જણાવ્યું કે ટૂર્નામેન્ટ પૂર્ણ થયા બાદ પરિવાર સાથે ચર્ચા કરીને જ ભવિષ્ય અંગે નિર્ણય લેશે. સાથે જ તેમણે ઉમેર્યું કે હવે તેઓ લાગણીઓમાં વહીને કોઈ નિર્ણય લેતા નથી.
ક્રોએશિયા સામે ગોલ સાથે બનાવ્યો ખાસ રેકોર્ડ
મેચ દરમિયાન 61મી મિનિટે રોનાલ્ડોનો એક ગોલ VAR દ્વારા ઓફસાઇડ જાહેર થતાં રદ થયો હતો. જોકે ત્યારબાદ મળેલી પેનલ્ટીને ગોલમાં ફેરવી તેમણે સ્કોર 1-1 કર્યો. આ સાથે વર્ષ 2006માં વર્લ્ડ કપ ડેબ્યૂ કર્યા બાદ નોકઆઉટ સ્ટેજમાં તેમનો આ પ્રથમ ગોલ બન્યો.
જીત ડિઓગો જોટાને સમર્પિત કરી
પોર્ટુગલે ગોન્કાલો રામોસના નિર્ણાયક ગોલની મદદથી ક્રોએશિયાને 2-1થી હરાવ્યું. મેચ બાદ રોનાલ્ડોએ આ જીત પોતાના દિવંગત સાથી ખેલાડી ડિઓગો જોટાની યાદમાં સમર્પિત કરી હતી.
હવે સ્પેન સામે મહામુકાબલો
ક્રોએશિયા પર જીત બાદ હવે પોર્ટુગલનો આગામી મુકાબલો પ્રી-ક્વાર્ટર ફાઇનલમાં મજબૂત સ્પેન સામે થશે. સમગ્ર ટૂર્નામેન્ટમાં સ્પેને અત્યાર સુધી એકપણ ગોલ સ્વીકાર્યો નથી, જેના કારણે આ મુકાબલો વધુ રોમાંચક બનવાની શક્યતા છે.
