ગુજરાતની પ્રથમ NEP કોન્સેપ્ટ સ્કૂલ વડોદરામાં
નવી રાષ્ટ્રીય શિક્ષણ નીતિ (NEP-2020)ને અનુરૂપ ગુજરાતની પ્રથમ કોન્સેપ્ટ સ્કૂલ વડોદરા શહેરમાં તૈયાર થઈ રહી છે. પ્રથમ તબક્કામાં ડૉ. શ્યામા પ્રસાદ મુખર્જી સ્કૂલ (અટલાદરા) અને કવિ પ્રેમાનંદ સ્કૂલને મોડલ સ્કૂલ તરીકે વિકસાવવામાં આવશે. બંને સ્કૂલોના વિકાસ પાછળ અંદાજે 15-15 કરોડ રૂપિયાનો ખર્ચ કરવામાં આવી રહ્યો છે.
એક જ કેમ્પસમાં બાલવાડીથી ધોરણ-12 સુધી અભ્યાસ
આ સ્કૂલ કોમ્પ્લેક્સમાં બાલવાડી, કેજીથી લઈને ધોરણ-12 સુધીનું શિક્ષણ એક જ કેમ્પસમાં ઉપલબ્ધ રહેશે. ગુજરાતી, હિન્દી અને અંગ્રેજી એમ ત્રણેય માધ્યમમાં શિક્ષણની વ્યવસ્થા કરવામાં આવશે, જેથી વિદ્યાર્થીઓને વારંવાર સ્કૂલ બદલવાની જરૂર ન રહે અને ડ્રોપઆઉટમાં ઘટાડો થાય.
AI, રોબોટિક્સ અને સ્માર્ટ લેબની સુવિધા
ડૉ. શ્યામા પ્રસાદ મુખર્જી સ્કૂલમાં ધોરણ 1થી 8 માટે ચાર માળનું નવું બિલ્ડિંગ તૈયાર થઈ રહ્યું છે, જેમાં 26થી વધુ વર્ગખંડો હશે. ઉપરાંત AI લેબ, રોબોટિક્સ લેબ, સાયન્સ લેબ, કમ્પ્યુટર લેબ અને અદ્યતન લાઈબ્રેરી જેવી સુવિધાઓ પણ વિકસાવવામાં આવશે. આ સુવિધાઓનો લાભ આસપાસની સરકારી શાળાના વિદ્યાર્થીઓ પણ લઈ શકશે.
સ્માર્ટ અને સુરક્ષિત કેમ્પસ
કેમ્પસ સંપૂર્ણ અવરોધમુક્ત રહેશે. દિવ્યાંગ વિદ્યાર્થીઓ માટે રેમ્પ, વિશેષ રિસોર્સ રૂમ અને સુલભ શૌચાલય બનાવાશે. સુરક્ષા માટે ડિજિટલ આઈ-કાર્ડ સ્કેનર, ઓટોમેટેડ બૂમ બેરિયર અને સમગ્ર કેમ્પસમાં CCTV સિસ્ટમ કાર્યરત રહેશે. સાથે જ સોલાર પાવર સિસ્ટમ દ્વારા વીજળીની જરૂરિયાત પણ પૂરી કરવામાં આવશે.
હિન્દી અને અંગ્રેજી માધ્યમ માટે અલગ બિલ્ડિંગ
રાઉન્ડ ટેબલ સંસ્થાના સહયોગથી અંગ્રેજી માધ્યમનું બિલ્ડિંગ તૈયાર થઈ ગયું છે, જ્યારે યુનાઇટેડ વેના સહયોગથી હિન્દી માધ્યમનું બિલ્ડિંગ પણ તૈયાર કરવામાં આવ્યું છે. ભવિષ્યમાં હાયર સેકન્ડરી વિભાગ માટે અલગ બિલ્ડિંગ અને વિશાળ ઓડિટોરિયમ પણ તૈયાર થશે.
વિઝન-2030 હેઠળ 126 શાળાઓમાં થશે અમલ
વડોદરા નગર પ્રાથમિક શિક્ષણ સમિતિના શાસનાધિકારી ડૉ. વિપુલ ભરતીયાના જણાવ્યા મુજબ, હાલ બે સ્કૂલોને મોડલ તરીકે વિકસાવવામાં આવી રહી છે. આગામી સમયમાં ‘વિઝન-2030’ રોડમેપ હેઠળ વડોદરાની તમામ 126 સરકારી શાળાઓને પણ NEP મુજબના સ્કૂલ કોમ્પ્લેક્સમાં પરિવર્તિત કરવાની યોજના છે.
