રિપોર્ટ : કુલદીપ ભાટીયા (સાબરકાંઠા)
ઇડર તાલુકાના બડોલી ગામે સરકારી જમીન પર થયેલા બિન અધિકૃત દબાણો અને પંચાયત ભાડા પટ્ટાની દુકાનો દ્વારા લાંબા સમયથી બાકી રહેલા ભાડાંના મુદ્દે બુધવારના રોજ વહિવટી તંત્ર દ્વારા કડક કાર્યવાહી હાથ ધરવામાં આવી હતી. ઇડર–ભિલોડા હાઇવે રોડની સાઈડમાં ગામતળની એવી જગ્યામાં, જે સામૂહિક આરોગ્ય કેન્દ્ર માટે અનામત રાખવામાં આવેલી હતી, ત્યાં છેલ્લા અંદાજે ૪૦ વર્ષથી ગેરકાયદે દબાણ કરાયેલા હતા. જાહેર હિત અને સરકારી યોજનાઓને ધ્યાનમાં રાખીને તંત્રએ આ દબાણો દૂર કરવાની કામગીરી કરી હતી.
આ કાર્યવાહી દરમિયાન પંચાયત ભાડા પટ્ટાની જગ્યાઓ પર આવેલી દુકાનો અને કેબિન ધારકો દ્વારા લાંબા સમયથી બાકી રહેલા ભાડાં ન ચૂકવાતા હોવાની પણ તપાસ કરવામાં આવી હતી. તંત્ર દ્વારા અગાઉથી સૂચના આપવામાં આવી હોવા છતાં કેટલાક દુકાન ધારકો દ્વારા ભાડું ન ભરાતા દુકાનોને શીલ કરવાની કાર્યવાહી હાથ ધરવામાં આવી હતી. જોકે, કાર્યવાહી દરમિયાન મોટાભાગના દુકાન ધારકો દ્વારા તાત્કાલિક ભાડાની રકમ ભરપાઈ કરી દેતા તેમને રાહત આપવામાં આવી હતી, જ્યારે એક દુકાનને શીલ કરવામાં આવી હતી.
આ ઉપરાંત સરકારી વોટરવર્ક્સ લાઈનમાંથી ગેરકાયદે રીતે લેવાયેલા ચોવીસ કલાક પાણીના કનેક્શનોને દૂર કરવાની કામગીરી પણ કરવામાં આવી હતી. તંત્ર દ્વારા જણાવાયું હતું કે ગેરકાયદે પાણી કનેક્શનના કારણે અન્ય રહેવાસીઓને પાણી પુરવઠામાં અડચણ ઊભી થતી હતી તેમજ સરકારી સુવિધાઓનો દુરુપયોગ થઈ રહ્યો હતો. આ પગલાથી પાણીનો ન્યાયસંગત વિતરણ સુનિશ્ચિત કરવાનો પ્રયાસ કરવામાં આવ્યો છે.
આ સમગ્ર કાર્યવાહી દરમિયાન કોઈ અનિચ્છનીય ઘટના ન બને તે માટે પોલીસ પ્રોટેક્શન વ્યવસ્થા રાખવામાં આવી હતી. સ્થળ પર નાયબ મામલતદાર ડી.પી. દેવડા, વિસ્તરણ અધિકારી નરેશભાઈ પટેલ, બડોલી તલાટી કમમંત્રી જલ્પાબેન, ગામના સરપંચ રાજુભાઈ પટેલ, ડેપ્યુટી સરપંચ રમીલાબેન સુતરીયા તેમજ પંચાયતના સભ્યો, અધિકારીઓ અને પોલીસ સ્ટાફ હાજર રહ્યા હતા.
સ્થાનિક તંત્ર દ્વારા સ્પષ્ટ કરવામાં આવ્યું હતું કે સરકારી જમીન, જાહેર હિતની યોજનાઓ અને વિકાસ કાર્ય માટે અનામત રાખેલ જગ્યાઓ પર કરવામાં આવેલા બિન અધિકૃત દબાણો સહન કરવામાં નહીં આવે. આવનારા સમયમાં પણ આવા દબાણો દૂર કરવા માટે નિયમિત રીતે કાર્યવાહી કરવામાં આવશે, જેથી ગામના વિકાસ કાર્યમાં કોઈ અડચણ ન રહે અને જાહેર સુવિધાઓનો લાભ સાચા હકદાર સુધી પહોંચે.
આ કાર્યવાહી બાદ ગામમાં વિકાસ કાર્યો માટે અનામત રાખેલ જમીન ખાલી થતાં સામૂહિક આરોગ્ય કેન્દ્ર સહિતની યોજનાઓને આગળ વધારવા માટે માર્ગ મોકળો બન્યો હોવાનું પણ તંત્ર દ્વારા જણાવવામાં આવ્યું હતું.
