samachardiary24x7.in

Category: હરિયાણા

  • સાવરકુંડલામાં ગેસ સિલિન્ડર બ્લાસ્ટથી હાહાકાર,રસોઈ બનાવતી વખતે ઇન્ડિયન ગેસનો બાટલો ફાટ્યો,જાણીતા ગેરેજ સંચાલક જોશી દાદા ગંભીર રીતે દાઝ્યા:નાગનાથ સોસાયટીમાં પ્રચંડ ધડાકા બાદ વિકરાળ આગ, ઘરવખરી બળીને ખાખ

    રિપોર્ટર:સમીર ખોખર,સાવરકુંડલા, અમરેલી

    સાવરકુંડલા શહેરની શાંત ગણાતી નાગનાથ સોસાયટી આજે બપોરે અચાનક ભયાનક ધડાકાથી ધ્રુજી ઉઠી હતી. શહેરના જાણીતા અને વર્ષોથી ગેરેજ વ્યવસાય સાથે સંકળાયેલા ઇન્દ્રકાંતભાઈ જોશી (જોશી દાદા) ના ઘરે રસોઈ બનાવતી વખતે અચાનક ઇન્ડિયન ગેસનો સિલિન્ડર ફાટતા સમગ્ર વિસ્તારમાં અફરાતફરી મચી ગઈ હતી. આ બનાવ એટલો પ્રચંડ હતો કે તેનો અવાજ દૂર દૂર સુધી સંભળાયો હતો અને લોકો ઘરોમાંથી બહાર દોડી આવ્યા હતા.

    ૪:૨૫ વાગ્યે થયો ભયાનક વિસ્ફોટ

    પ્રાપ્ત વિગતો મુજબ, આજે બપોરે આશરે ૪:૨૫ વાગ્યાના સમયે જોશી દાદાના ઘરમાં રસોઈની પ્રક્રિયા ચાલી રહી હતી, તે દરમિયાન અચાનક ગેસ સિલિન્ડરમાં ભયાનક વિસ્ફોટ થયો. વિસ્ફોટ સાથે જ ઘરમાં આગ ભભૂકી ઉઠી અને થોડી જ ક્ષણોમાં આખું ઘર આગની ચપેટમાં આવી ગયું.

    વિસ્ફોટથી ઘર ધ્વસ્ત, સામાન બળીને રાખ

    ગેસ સિલિન્ડર બ્લાસ્ટ બાદ લાગેલી આગમાં ઘરની તમામ ઘરવખરી, ફર્નિચર, ઇલેક્ટ્રોનિક સાધનો તેમજ અન્ય કિંમતી સામાન બળીને ખાખ થઈ ગયો હોવાનું જાણવા મળ્યું છે. આગની તીવ્રતાને કારણે મકાનના માળખાને પણ નુકસાન પહોંચ્યું છે. આગના ધુમાડા અને જ્વાળાઓ જોઈ આસપાસના રહેવાસીઓમાં ભારે ભય ફેલાયો હતો.

    જોશી દાદા ગંભીર રીતે દાઝ્યા

    આ ભયાનક દુર્ઘટનામાં ઇન્દ્રકાંતભાઈ જોશી ગંભીર રીતે દાઝ્યા હોવાનું જાણવા મળ્યું છે. બનાવ બનતાં જ તેમને તાત્કાલિક સારવાર માટે નજીકની હોસ્પિટલ ખસેડવામાં આવ્યા હતા. તેમની હાલત અંગે વધુ માહિતી મેળવવાની કામગીરી ચાલુ છે.

    ફાયર બ્રિગેડની સમયસર કામગીરીથી મોટી હોનારત ટળી

    ઘટનાની જાણ થતાં જ સાવરકુંડલા નગરપાલિકા ફાયર બ્રિગેડની ટીમ તાત્કાલિક ઘટનાસ્થળે દોડી આવી હતી. ભારે જહેમત અને કલાકો સુધીની કામગીરી બાદ આગ પર કાબૂ મેળવવામાં સફળતા મળી હતી. જો સમયસર આગ પર કાબૂ ન મેળવાયો હોત તો આસપાસના મકાનોમાં આગ ફેલાવાની ભયંકર શક્યતા હતી.

    PGVCL દ્વારા વીજ પુરવઠો બંધ

    આગની ગંભીરતા અને સુરક્ષાને ધ્યાનમાં રાખીને PGVCLની ટીમ દ્વારા સમગ્ર વિસ્તારનો વીજ પુરવઠો તાત્કાલિક બંધ કરવામાં આવ્યો હતો, જેના કારણે વીજ શોર્ટ સર્કિટ અથવા અન્ય કોઈ મોટી દુર્ઘટના ટળી હોવાનું જણાવાયું છે.

    ઇન્ડિયન ગેસ એજન્સી તપાસમાં જોડાઈ

    બનાવની ગંભીરતા જોતા ઇન્ડિયન ગેસ એજન્સીના પ્રતિનિધિ બબા શેઠ પણ ઘટનાસ્થળે પહોંચ્યા હતા. તેમણે સ્થળ નિરીક્ષણ કરી સિલિન્ડર બ્લાસ્ટના કારણો અંગે પ્રાથમિક તપાસ હાથ ધરી છે. હાલ ગેસ લીકેજ, ટેક્નિકલ ખામી કે અન્ય કોઈ કારણસર વિસ્ફોટ થયો કે કેમ તે દિશામાં તપાસ ચાલી રહી છે.

    સોસાયટીમાં ભય અને શોકનો માહોલ

    આ ભયાનક ઘટનાના પગલે નાગનાથ સોસાયટી સહિત સમગ્ર વિસ્તારમાં શોક અને ભયનો માહોલ જોવા મળી રહ્યો છે. સોસાયટીના રહેવાસીઓએ જણાવ્યું હતું કે એક ક્ષણ માટે ભૂકંપ આવ્યો હોય તેવો અહેસાસ થયો હતો.

    સામાજિક કાર્યકરની પ્રતિક્રિયા

    બનાવ અંગે સામાજિક કાર્યકર કાંતિભાઈ વાળાએ જણાવ્યું હતું કે, “આ ઘટના ખૂબ જ દુઃખદ છે. ગેસ સિલિન્ડરની સલામતી અંગે લોકોમાં વધુ જાગૃતિ આવે તે જરૂરી છે. પ્રશાસને પણ યોગ્ય તપાસ કરી જરૂરી પગલાં લેવા જોઈએ.”

    તંત્ર દ્વારા વધુ તપાસ ચાલુ

    હાલ સંબંધિત તંત્ર દ્વારા સમગ્ર ઘટનાની વિગતવાર તપાસ હાથ ધરવામાં આવી છે. સિલિન્ડર બ્લાસ્ટનું ચોક્કસ કારણ બહાર આવ્યા બાદ જવાબદારી નક્કી કરવામાં આવશે તેવી માહિતી મળી છે.

  • મુન્દ્રા નગરમાં ધર્મ જાગૃતિનો વિરાટ સંદેશ: વિશ્વ હિન્દુ પરિષદ – બજરંગ દળ દ્વારા ભવ્ય ત્રિશુલ દીક્ષા કાર્યક્રમ યોજાયો

    અહેવાલ: પ્રિયંકા પ્રજાપતિ. કચ્છ

    કચ્છ જિલ્લાના મુન્દ્રા નગરમાં રવિવાર, તા. ૨૧ ડિસેમ્બર ૨૦૨૫ના રોજ વિશ્વ હિન્દુ પરિષદ – બજરંગ દળના નેજા હેઠળ એક ઐતિહાસિક અને ભવ્ય વિરાટ ત્રિશુલ દીક્ષા કાર્યક્રમનું આયોજન કરવામાં આવ્યું હતું. સ્વામિનારાયણ મંદિર, મુન્દ્રા ખાતે યોજાયેલા આ કાર્યક્રમમાં શિસ્ત, સંસ્કાર અને સંગઠનની ઝલક સ્પષ્ટપણે જોવા મળી હતી. મોટી સંખ્યામાં યુવાનો અને હિન્દુ સમાજના આગેવાનોની હાજરીએ સમગ્ર નગરમાં ધર્મજાગૃતિ અને એકતાનો સંદેશ પ્રસારી દીધો હતો.

    કાર્યક્રમની શરૂઆત વૈદિક મંત્રોચ્ચાર અને ધાર્મિક વિધિ સાથે થઈ હતી. શાસ્ત્રી શ્રી અશોકભાઈ યાજ્ઞિકએ ત્રિશુલ દીક્ષા ના આચાર્ય તરીકે ઉપસ્થિત રહી, યુવાનોને વિધિવત રીતે ત્રિશુલ દીક્ષા ગ્રહણ કરાવી હતી. દીક્ષા દરમિયાન યુવાનોને ધર્મરક્ષા, રાષ્ટ્રસેવા, રાષ્ટ્રરક્ષા તથા સંસ્કારયુક્ત જીવન જીવવાના સંકલ્પ લેવડાવવામાં આવ્યા હતા. ત્રિશુલ માત્ર શસ્ત્ર નહીં પરંતુ ધર્મ, સંસ્કાર અને આત્મરક્ષાનું પ્રતિક હોવાનું સંદેશ આ વિધિ દ્વારા આપવામાં આવ્યો હતો.

    આ ધાર્મિક અને સંસ્કારાત્મક કાર્યક્રમને આશીર્વાદ આપવા માટે પ.પૂ. શ્રી શ્યામદાસજી મહારાજ, શ્રી કૃષ્ણપ્રિય સ્વામી તથા પ.પૂ. શ્રી મુર્દુલા માતાજી ખાસ ઉપસ્થિત રહ્યા હતા. તેમના આશીર્વચનોથી સમગ્ર વાતાવરણ આધ્યાત્મિક ઉર્જાથી પરિપૂર્ણ બન્યું હતું.

    કાર્યક્રમમાં મુખ્ય વક્તવ્ય શ્રી કિશનજી પ્રજાપત (કેન્દ્રીય બજરંગ દળ સંયોજક) દ્વારા આપવામાં આવ્યું હતું. તેમણે પોતાના પ્રવચનમાં કહ્યું હતું કે, “આજનો યુવાન જો સંસ્કાર અને સંગઠન સાથે આગળ વધે, તો કોઈપણ પડકાર સામે હિન્દુ સમાજ મજબૂતીથી ઊભો રહી શકે. ત્રિશુલ દીક્ષા એ માત્ર વિધિ નથી, પરંતુ રાષ્ટ્ર અને ધર્મ માટે સમર્પિત જીવન જીવવાની પ્રતિજ્ઞા છે.”

    આ ઉપરાંત શ્રી જ્વલિતભાઈ મહેતા (બજરંગ દળ ક્ષેત્ર સંયોજક), કિશોરસિંહ ચુડાસમા (રાષ્ટ્રીય સ્વયંસેવક સંઘ, મુન્દ્રા તાલુકા સંગચાલક), શ્રી ચંદુભાઈ રૈયાણી (કચ્છ વિભાગ મંત્રી), શ્રી હર્ષદભાઈ પરવાડિયા (પૂર્વ કચ્છ જિલ્લા મંત્રી), શ્રી જગદીશભાઈ સોરઠીયા (સૌરાષ્ટ્ર પ્રાંત સહ કોષાધ્યક્ષ), તેમજ શ્રી મહાવીરભાઈ જોષી, શ્રી ધવલભાઈ રાજગોર, શ્રી રાજેશભાઈ વેગડ, શ્રી ભગીરથસિંહ રાયજાદા, શ્રી રમેશભાઈ મરંડ અને શ્રી રાજનભાઈ જોશી સહિતના આગેવાનો દ્વારા પણ માર્ગદર્શન આપવામાં આવ્યું હતું. તમામ વક્તાઓએ સંગઠન, સંસ્કાર અને સમાજસેવાના મહત્વ પર ભાર મૂક્યો હતો.

    આ કાર્યક્રમ વિશ્વ હિન્દુ પરિષદ મુન્દ્રા નગર અધ્યક્ષ શ્રી નરેન્દ્રસિંહ ઝાલાની ઉપસ્થિતિમાં યોજાયો હતો. સમગ્ર કાર્યક્રમનું સંચાલન મંત્રી શ્રી ભાવેશભાઈ ઠક્કર દ્વારા અત્યંત શિસ્તબદ્ધ અને સુચારુ રીતે કરવામાં આવ્યું હતું, જે કાર્યક્રમની સફળતાનું મુખ્ય કારણ બન્યું હતું.

    કાર્યક્રમને સફળ બનાવવા માટે દલરામભાઈ ચૌધરી, રણજીતસિંહ જાડેજા, કેતનભાઈ પ્રજાપતિ, સુખદેવસિંહ અસવાર, જીગરભાઈ રાજગોર, મયુરભાઈ સાધુ, દલપતભાઈ મકવાણા, મનોજભાઈ શર્મા, રાજેન્દ્રસિંહ અસવાર સહિત સમગ્ર કાર્યકર્તા ટીમે મહત્વપૂર્ણ જવાબદારી નિભાવી હતી. વ્યવસ્થા, શિસ્ત અને આયોજનની ચારેય તરફ પ્રશંસા થતી જોવા મળી હતી.

    વિશ્વ હિન્દુ પરિષદ – બજરંગ દળ મુન્દ્રા નગર દ્વારા આયોજિત આ વિરાટ ત્રિશુલ દીક્ષા કાર્યક્રમ મારફતે હિન્દુ સમાજમાં એકતા, સંસ્કાર અને ધર્મજાગૃતિનો મજબૂત સંદેશ પ્રસરી રહ્યો છે તેવી લાગણી ઉપસ્થિત આગેવાનો અને કાર્યકર્તાઓએ વ્યક્ત કરી હતી. મુન્દ્રા નગર માટે આ કાર્યક્રમ એક યાદગાર અને પ્રેરણાદાયક પ્રસંગ બની રહ્યો હોવાનું પણ તેઓએ જણાવ્યું હતું.

  • દેકાવાડામાં રાજપુત સમાજે કુરિવાજો સામે ઉઠાવ્યો એક જ સ્વર:કુરિવાજો નાબુદી અભિયાન અંતર્ગત ભવ્ય મહાસંમેલન, લગ્ન અને સામાજિક પ્રસંગો માટે નવું બંધારણ ઘડાયું

    દેત્રોજ તાલુકાના દેકાવાડા ગામે રાજપુત સમાજે સામાજિક સુધારણાની દિશામાં મહત્વપૂર્ણ અને ઐતિહાસિક પગલું ભર્યું છે. 16 ગામ રાજાવત સોલંકી રાજપુત સમાજ તથા ક્ષેમ કલ્યાણી ચેરીટેબલ ટ્રસ્ટના સંયુક્ત ઉપક્રમે રવિવારે કુરિવાજો નાબુદી અભિયાન અંતર્ગત ભવ્ય મહાસંમેલનનું આયોજન કરવામાં આવ્યું હતું. સંમેલનમાં સમાજમાં લાંબા સમયથી ચાલી આવતા ખર્ચાળ અને બિનજરૂરી કુરિવાજોને દૂર કરી શિક્ષણને પ્રાથમિકતા આપવાના સંકલ્પ સાથે વ્યાપક સામાજિક સંમતિ સ્થાપિત કરવામાં આવી.

    સંમેલનમાં સમાજના અગ્રણી આગેવાનો અને સમાજ શ્રેષ્ઠીઓએ સ્પષ્ટપણે જણાવ્યું હતું કે જો કુરિવાજો દૂર કરી શિક્ષણનો વ્યાપ વધારવામાં આવે તો સમાજનો સર્વાંગી વિકાસ શક્ય બને. આ વિચાર સાથે સંમેલનમાં સમાજ માટે નવું અને સુધારણાત્મક બંધારણ ઘડી તેને અમલમાં મૂકવાની બહાલી આપવામાં આવી.

    મહાસંમેલનનો મુખ્ય એજન્ડા કુરિવાજો નાબુદી અભિયાન હેઠળ નક્કી કરાયેલા મુદ્દાઓ પર ચર્ચા અને સામાજિક સંમતિ પ્રાપ્ત કરવાનો હતો. આ અંતર્ગત લગ્ન પ્રસંગે દિકરા અને દિકરી બંને પક્ષે સગાઈ પ્રસંગે માત્ર રૂ. 2100 આપવા અને લેવા નક્કી કરવામાં આવ્યું, જ્યારે અન્ય કોઈપણ પ્રકારની પહેરામણી લેવી કે આપવી નહીં એવો સ્પષ્ટ નિર્ણય લેવાયો. દિકરાની સગાઈ પ્રસંગે મંગળસૂત્ર, સગાઈની સાડી, સાકાર પડો અને શ્રીફળ સિવાય અન્ય વસ્તુ લઈ જવા પર પ્રતિબંધ મૂકાયો.

    દિકરીના લગ્ન પ્રસંગે શુકન પેટે રૂ. 1100, એક સોનાનો દોરો, એક વિંટી અને એક જોડી કપડાં આપવા સિવાય અન્ય કોઈ મોંઘી વસ્તુ આપવા પર પ્રતિબંધ મુકવામાં આવ્યો. આ નિર્ણયથી લગ્નપ્રસંગમાં વધતા આર્થિક ભારને ઘટાડવાનો હેતુ રાખવામાં આવ્યો છે. સાથે જ સમાજમાં સાદગી અને સમાનતાનું સંદેશ પણ આપવામાં આવ્યો છે.

    આ ઉપરાંત, ડિજિટલ કંકોત્રી અપનાવવી, ગામમાં મૌખિક આમંત્રણ આપવાની પરંપરા જાળવવી, દિકરી જોવા જવા સમયે મર્યાદિત સંખ્યા રાખવી, ડી.જે. પર સંપૂર્ણ પ્રતિબંધ, સામૈયું બેઠું કરવું, જુગાર પર પ્રતિબંધ તથા મરણ પ્રસંગે અગ્નિ સંસ્કારમાં માત્ર નજીકના સગાઓને જ બોલાવવાની વ્યવસ્થા જેવા મહત્વપૂર્ણ નિયમો પણ બંધારણમાં સામેલ કરાયા.

    મહાસંમેલનમાં શિક્ષણને વિશેષ મહત્વ આપવામાં આવ્યું હતું. સમાજના દિકરા-દિકરીઓને યુપીએસસી, જીપીએસસી સહિતની સ્પર્ધાત્મક પરીક્ષાઓ માટે માર્ગદર્શન અને પ્રોત્સાહન આપવાની જાહેરાત કરવામાં આવી. સમાજ તરફથી શિક્ષણ માટે સહયોગ, માર્ગદર્શન અને માનસિક સહકાર આપવામાં આવશે તેવી ખાતરી પણ આગેવાનો દ્વારા આપવામાં આવી.

    આ મહાસંમેલનમાં પૂર્વ શિક્ષણ મંત્રી કિર્તિસિંહ વાઘેલા, ક્ષેમ કલ્યાણી ચેરીટેબલ ટ્રસ્ટના પ્રમુખ કિરિટસિંહ સોલંકી, ઈન્દ્રજીતસિંહ સોલંકી (સદાતપુરા), દેત્રોજ તાલુકા પંચાયતના પૂર્વ પ્રમુખ નવુભા સોલંકી, પૂર્વ તાલુકા સંગઠન પ્રમુખ લક્ષ્મણસિંહ સોલંકી (વાસણા), પ્રતાપસિંહ સોલંકી (ઉકરડી), રાજમલસિંહ સોલંકી (છનિયાર), દેકાવાડાના પૂર્વ ડેલિગેટ ભીખુભા સોલંકી તથા સરપંચ કાળુભા સોલંકી સહિતના અગ્રણીઓ ઉપસ્થિત રહ્યા હતા.

    ઉપરાંત 16 ગામ, ચુંવાળ 84, ઝીંઝુવાડા, દેલવાડા, ગઢવાળા, સુણસર, બનાસકાંઠા, પાટણ અને મહેસાણા વિસ્તારના મોટી સંખ્યામાં સમાજ શ્રેષ્ઠીઓ અને આગેવાનો સંમેલનમાં હાજર રહ્યા હતા. મહાસંમેલન અંતે કુરિવાજો નાબુદી અને શિક્ષણ પ્રોત્સાહન માટે સમાજ એકસાથે આગળ વધવાનો સંકલ્પ લઈને વિખૂટું પડ્યું.

    દેકાવાડામાં યોજાયેલ આ મહાસંમેલનને રાજપુત સમાજમાં સામાજિક સુધારણાની દિશામાં એક મહત્વપૂર્ણ અને પ્રેરણાદાયી પગલું માનવામાં આવી રહ્યું છે, જે આવનારા સમયમાં અન્ય સમાજો માટે પણ ઉદાહરણરૂપ સાબિત થઈ શકે છે.

  • મહેસાણા જિલ્લામાં ફરી એકવાર ભ્રષ્ટાચારનો પર્દાફાશ વડનગર સિવિલ હોસ્પિટલમાં ACBની મોટી કાર્યવાહી, સુપરિન્ટેન્ડન્ટ લાંચ લેતા રંગેહાથ ઝડપાયા

    મહેસાણા જિલ્લામાં ભ્રષ્ટાચાર સામે ACBની કાર્યવાહી સતત તેજ બની રહી છે. જિલ્લામાં વધુ એક વખત લાંચિયો અમલદાર ઝડપાતા સરકારી તંત્રમાં ખળભળાટ મચી ગયો છે. દેશના વડાપ્રધાન નરેન્દ્ર મોદીના માદરે વતન વડનગર ખાતે આવેલી સિવિલ હોસ્પિટલમાં ફરજ બજાવતા સુપરિન્ટેન્ડન્ટ ડો. હર્ષિદ પટેલને મહેસાણા ACBએ રૂ. 20,000ની લાંચ લેતા રંગેહાથ ઝડપી લીધા છે.

    પ્રાપ્ત માહિતી અનુસાર, વડનગર સિવિલ હોસ્પિટલમાં કોન્ટ્રાક્ટ આધારિત રાખવામાં આવેલી ગાડીના બિલને મંજૂરી આપવા બદલ સુપરિન્ટેન્ડન્ટ ડો. હર્ષિદ પટેલ દ્વારા લાંચની માંગ કરવામાં આવી હતી. સંબંધિત વ્યક્તિ દ્વારા આ બાબતે મહેસાણા ACBમાં ફરિયાદ નોંધાવવામાં આવી હતી. ફરિયાદની ગંભીરતા ધ્યાનમાં રાખીને ACBની ટીમે સમગ્ર મામલાની તપાસ કરી અને છટકું ગોઠવવાનો નિર્ણય લીધો.

    યોજનાબદ્ધ રીતે ગોઠવાયેલા ટ્રેપ દરમિયાન ફરિયાદી પાસેથી રૂ. 20,000ની લાંચની રકમ સ્વીકારતા સમયે ACBની ટીમે સિવિલ હોસ્પિટલ પર દરોડો પાડ્યો અને સુપરિન્ટેન્ડન્ટને સ્થળ પર જ રંગેહાથ ઝડપી લીધા. લાંચની રકમ પણ કબજે કરવામાં આવી છે.

    આ ઘટનાથી વડનગર સહિત સમગ્ર મહેસાણા જિલ્લામાં ચર્ચાનો માહોલ ગરમાયો છે. સરકારી હોસ્પિટલ જેવા જનહિતના મહત્વના વિભાગમાં બેઠેલા જવાબદાર અધિકારી દ્વારા લાંચ માંગવામાં આવતાં લોકોમાં ભારે નારાજગી જોવા મળી રહી છે. દર્દીઓ અને તેમના સ્વજનો પહેલેથી જ આરોગ્ય સેવાઓની સમસ્યાઓનો સામનો કરી રહ્યા છે, ત્યારે આવા બનાવો સરકારી તંત્રની વિશ્વસનીયતા પર સવાલ ઉભા કરે છે.

    ACB દ્વારા આરોપી સામે ભ્રષ્ટાચાર નિવારણ અધિનિયમ હેઠળ કાર્યવાહી હાથ ધરવામાં આવી છે. આરોપી ડોક્ટરની પૂછપરછ ચાલુ છે અને લાંચ સંબંધિત અન્ય કોઈ વિગતો અથવા ભ્રષ્ટાચારના વધુ તાર ખુલશે કે કેમ તેની પણ તપાસ કરવામાં આવી રહી છે.

    મહેસાણા જિલ્લામાં છેલ્લા કેટલાક સમયથી ACB દ્વારા સતત કરવામાં આવી રહેલી કાર્યવાહીથી સ્પષ્ટ સંકેત મળી રહ્યો છે કે ભ્રષ્ટાચાર સામે કડક વલણ અપનાવવામાં આવી રહ્યું છે. આ કાર્યવાહી બાદ અન્ય સરકારી અધિકારીઓમાં પણ ફફડાટનો માહોલ સર્જાયો છે.

    હાલ ACBની તપાસ આગળ વધી રહી છે અને સમગ્ર મામલે વધુ ખુલાસા થવાની શક્યતા વ્યક્ત કરવામાં આવી રહી છે.

  • રક્તની અછત વચ્ચે JCI કડીનો માનવીય અભિગમ: શપથવિધિ પહેલાં સત્તા નહીં, સેવા પસંદ કરનાર નેતૃત્વ

    જ્યારે રાજ્યભરમાં થેલેસેમિયા, અકસ્માતો, પ્રસૂતિ કેસો અને ઈમરજન્સી સર્જરી માટે રક્તની અછત એક ગંભીર પ્રશ્ન બની ચૂકી છે, ત્યારે કડીમાં યોજાયેલ એક રક્તદાન શિબિરે માત્ર રક્ત જ એકત્ર નથી કર્યું, પરંતુ સમાજ સામે એક તીખો પ્રશ્ન પણ ઊભો કર્યો છે સેવા પ્રાથમિકતા છે કે માત્ર સમારોહ

    જેસીઆઈ કડી અને સર્વોદય ચેરીટેબલ ટ્રસ્ટ બ્લડબેંક દ્વારા રિધમ મલ્ટીસ્પેશ્યાલિટી હોસ્પિટલ ખાતે યોજાયેલ બ્લડ ડોનેશન કેમ્પ, બહારથી જોવામાં એક સામાન્ય સેવાકીય કાર્યક્રમ લાગતો હશે, પરંતુ અંદરખાને તે નેતૃત્વની નવી વ્યાખ્યા લખી રહ્યો હતો.

    શપથ પહેલાં સેવા: સંકેત કે સિદ્ધાંત

    જેસીઆઈ કડીના નવનિયુક્ત પ્રમુખ જેસી ડૉ. અલ્પેશ પ્રજાપતિ અને સેક્રેટરી જેસી યોગેશ પ્રજાપતિએ તેમની 56મી શપથવિધિ સમારોહ પહેલાં જ સેવાકીય પ્રોજેક્ટનો પ્રારંભ કર્યો. સામાન્ય રીતે સંસ્થાઓમાં શપથ, ફોટોશૂટ અને ભાષણો પછી સેવા શરૂ થાય છે, પરંતુ અહીં સેવાને પ્રથમ સ્થાન અપાયું.પરંતુ લોકોમાં ચર્ચા છે એક આ માત્ર એક ઇવેન્ટ નહોતી આ કાર્યક્રમ જેસીઆઈ કડી આગામી કાર્યકાળ માટે સેવા કેન્દ્રિત એજન્ડાનો સંકેત આપી રહી છે

    56 યુનિટનું લક્ષ્ય, 80 બોટલની હકીકત

    શપથવિધિ સમારોહના દિવસે પ્રતીકાત્મક રીતે 56 યુનિટ રક્ત એકત્ર કરવાનો લક્ષ્યાંક નક્કી કરવામાં આવ્યો હતો. પરંતુ કડીના યુવાનો, સામાજિક કાર્યકરો અને સામાન્ય નાગરિકોની ભાગીદારીથી 80 બોટલ રક્ત એકત્ર થયું.આ આંકડો માત્ર સફળતા નહીં, પરંતુ એક ચેતવણી પણ છે જો યોગ્ય આયોજન અને વિશ્વાસ હોય, તો સમાજ સેવા માટે તૈયાર છે.

    ‘Need Blood Call Jaycee’ : નામ નહીં, નેટવર્ક

    આ કેમ્પ જેસીઆઈ ઇન્ડિયાના નેશનલ પ્રોજેક્ટ “Need Blood Call Jaycee” અંતર્ગત યોજાયો હતો. આ પ્રોજેક્ટનું મુખ્ય ઉદ્દેશ્ય માત્ર કેમ્પ યોજવાનું નહીં, પરંતુ રક્તદાન માટે રાષ્ટ્રીય સ્તરે એક રિસ્પોન્સ નેટવર્ક ઊભું કરવાનો છે.આજે પણ  અનેક દર્દીઓ માટે સમસ્યા રક્તની ઉપલબ્ધિ નહીં, પરંતુ સમયસર સંપર્ક અને વ્યવસ્થાનો અભાવ છે. આવા પ્રોજેક્ટ્સ જો સ્થાનિક સ્તરે સક્રિય રહે, તો આરોગ્ય વ્યવસ્થાનો ભાર નોંધપાત્ર રીતે ઓછો થઈ શકે.

    રક્તદાન: હજુ પણ કેમ ‘ઈમરજન્સી’ પર આધારિત?

    આ શિબિર એક મહત્વનો પ્રશ્ન ઊભો કરે છે રક્તદાન કેમ હજુ પણ ઈમરજન્સી કે કેમ્પ સુધી જ સીમિત છે?

    નિયમિત ડોનર સિસ્ટમ કેમ વિકસતી નથી?

    સર્વોદય ચેરીટેબલ ટ્રસ્ટ બ્લડબેંક જેવા સંસ્થાઓ સતત પ્રયત્નો છતાં, જનજાગૃતિ અને યુવા ભાગીદારી વિના આ સમસ્યા હલ થતી નથી. જેસીઆઈ કડી જેવી સંસ્થાઓ જો આ ક્ષેત્રે સતત કામ કરે, તો કડી-કલોલ પટ્ટામાં રક્તની અછતનો પ્રશ્ન ઘણો હળવો બની શકે.

    ફોટોશૂટથી આગળનું કામ જરૂરી

    સામાજિક કાર્યક્રમો ઘણીવાર એક દિવસની પ્રસિદ્ધિ સુધી સીમિત રહે છે. પરંતુ જો આ કેમ્પને એક લાંબા ગાળાની રક્તદાન ચળવળની શરૂઆત તરીકે જોવામાં આવે, તો તેની અસર માત્ર 80 બોટલ સુધી નહીં, પરંતુ સૈકડો જીવ બચાવવામાં રૂપાંતરિત થઈ શકે.

    આ માત્ર શપથવિધિ પૂર્વનો કાર્યક્રમ રહેશે નહીં પરંતુ જેસીઆઈ કડી નિયમિત બ્લડ ડોનર ડેટાબેઝ, કોલ રિસ્પોન્સ સિસ્ટમ અને યુથ કેમ્પેઈન શરૂ કરશે

    નિષ્કર્ષ: એક કેમ્પ, અનેક જવાબદારીઓ

    કડીમાં યોજાયેલ આ રક્તદાન શિબિર એક સકારાત્મક શરૂઆત છે. પરંતુ investigative દૃષ્ટિકોણે જોવામાં આવે તો, તે સાથે જવાબદારી પણ વધે છે સંસ્થા માટે, સમાજ માટે અને આરોગ્ય તંત્ર માટે.

  • SMCનો સાંતેજમાં જુગાર પર રેડ:ખુલ્લા મેદાનમાં ચાલતા જુગારનો ભાંડો ફૂટ્યો, ₹26.16 લાખનો મુદ્દામાલ જપ્ત,11 આરોપી ઝડપાયા, મુખ્ય સૂત્રધાર સહિત 6 વોન્ટેડ

    સાંતેજ વિસ્તારમાં ગેરકાયદે જુગારના ધંધાને લઈ SMC પોલીસને મોટી સફળતા મળી છે. હાજીપુર ગામના ખુલ્લા મેદાનમાં, માનાભાઈના ખેતરની બાજુમાં લાંબા સમયથી ગોઠવાયેલ જુગારના અડ્ડા પર SMC દ્વારા અચાનક દરોડો પાડવામાં આવ્યો હતો. આ કાર્યવાહીમાં કુલ ₹26.16 લાખનો મુદ્દામાલ જપ્ત કરવામાં આવ્યો છે, જ્યારે 11 આરોપીઓને ઝડપી લેવામાં આવ્યા છે. ઉપરાંત મુખ્ય આરોપી સહિત 6 શખ્સો હાલ ફરાર હોવાનું પોલીસ જણાવે છે.

    બાતમી આધારે ગોઠવાયો દરોડો

    SMC પોલીસને સાંતેજ પોલીસ સ્ટેશન વિસ્તાર હેઠળ આવેલા હાજીપુર ગામમાં ખુલ્લા મેદાનમાં મોટા પ્રમાણમાં રોકડ અને વાહનો સાથે જુગાર રમાતો હોવાની વિશ્વસનીય બાતમી મળી હતી. જેના આધારે PI એમ.એસ. ત્રિવેદીના માર્ગદર્શન હેઠળ પોલીસ ટીમે રાત્રિના સમયે દરોડો પાડ્યો હતો. દરોડા દરમિયાન જુગાર રમતા શખ્સોમાં અફરાતફરી મચી ગઈ હતી, જેમાં કેટલાક શખ્સો સ્થળ પરથી ફરાર થવામાં સફળ રહ્યા.

    ₹26.16 લાખનો મુદ્દામાલ જપ્ત

    દરોડા દરમિયાન પોલીસે જુગાર રમવા માટે ઉપયોગમાં લેવાતી ₹4.30 લાખ રોકડ, 10 મોબાઈલ ફોન (કિંમત ₹1.26 લાખ) તેમજ 5 વાહનો (કિંમત ₹20.60 લાખ) જપ્ત કર્યા છે. જપ્ત કરાયેલ મુદ્દામાલની કુલ કિંમત ₹26,16,000/- થાય છે.

    11 આરોપીઓ ઝડપાયા

    પોલીસે કુલ 11 શખ્સોને સ્થળ પરથી ઝડપી લીધા છે, જેમાં મહેસાણા જિલ્લાના કડી તાલુકાના વિવિધ ગામો તેમજ કલોલ અને સાણંદ વિસ્તારના શખ્સોનો સમાવેશ થાય છે. તમામ ઝડપાયેલા આરોપીઓને પ્રાથમિક કાર્યવાહી બાદ પોલીસ ને સોંપવામાં આવ્યા છે.

    મુખ્ય સૂત્રધાર સહિત 6 વોન્ટેડ

    આ જુગાર કૌભાંડમાં દિનેશજી સોમાજી ઠાકોર (કડી) મુખ્ય આરોપી હોવાનું સામે આવ્યું છે, જ્યારે તેનો ભાગીદાર મોહસીનખાન જરીફખાન પઠાણ પણ હાલ ફરાર છે. ઉપરાંત ચોકીદાર તરીકે કામગીરી કરતો એક શખ્સ, બે સ્થાનિક આરોપી તેમજ બે અજાણ્યા વાહનચાલકો મળીને કુલ 6 આરોપીઓને વોન્ટેડ જાહેર કરવામાં આવ્યા છે. પોલીસ દ્વારા ફરાર આરોપીઓને ઝડપી લેવા માટે સઘન શોધખોળ શરૂ કરવામાં આવી છે.

    કયા આરોપી ઝડપાયા અને કયા આરોપીઓ ફરાર થયા

    (1) રાજેન્દ્રભાઈ બાબુભાઈ પટેલ,રહે- ભવપુરા,તા-કડીમહેસાણા

    (2) ઉફમીયા હૈદરમીયા કુરેશી,રાજપુર,તા-કડી,મહેસાણા

    (3) અશોકજી કચરાજી ઠાકોર,રંગપુરાડા, તા-કડી,મહેસાણા

    (4) જતીન મધુભાઈ પટેલ,રહે.- 45, શાંતિનિકેતન સોસાયટી, અંબિકા હાઇવે પાસે, કલોલ.

    (5) નરેશભાઈ મુલજીભાઈ પરમાર,હાજીપુર,તા-કડી,મહેસાણા.

    (6) મહેશજી ઉદાજી ઠાકોર,વડાવી,તા-કડી,મહેસાણા.

    (7) ઉસ્માનભાઈ જામાભાઈ જાદવ,અગોલ,તા-કડી,મહેસાણા.

    (8) જગદીશભાઈ જયંતિભાઈ પટેલ,રહેઠાણ નં.50, નારાયણનગર કરણનગર રોડ, કડી,મહેસાણા.

    (9) દશરથજી લાલાજી ઠાકોર,હાજીપુર,તા-કડી,મહેસાણા.

    (10) સંજય મંગાજી ઠાકોર,હાજીપુર,તા-કડી,મહેસાણા.

    (11) અજીતસિંહ બાવળાભાઈ મકવાણા, રહે.વિરોચનનગર,તા-સાણંદ,અમદાવાદ.

    વોન્ટેડ આરોપી:-6

    (1) દિનેશજી સોમાજી ઠાકોર,કડી,મહેસાણા.(મુખ્ય આરોપી)

    (2) મોહસીનખાન જરીફખાન પઠાણ,કડી,મહેસાણા.(મુખ્ય આરોપીનો ભાગીદાર)

    (૩) કાદર મુજાતભાઈ કુરેશી,મેડાઆદ્રજ,તા-કડી,મહેસાણા.(ચોકીદાર)

    (૪)મુકેશ ઠાકોર, રહે.વડવી, તા-કડી,મહેસાણા

    (૫)એક અજાણ્યો વ્યક્તિ GJ-02 4364 નંબરની બાઇક પર જુગાર રમવા આવ્યો હતો.

    (૬)એક અજાણ્યો વ્યક્તિ નંબર વગરની એક્ટિવા સાથે જુગાર રમવા આવ્યો હતો.

    કાયદેસર કાર્યવાહી

    આ સમગ્ર કેસમાં જુગાર નિવારણ અધિનિયમની કલમ 12 તેમજ ભારતીય ન્યાય સંહિતા-2023ની કલમ 112(2) હેઠળ ગુનો નોંધવામાં આવ્યો છે. પોલીસનું કહેવું છે કે જિલ્લામાં ગેરકાયદે જુગાર અને અસામાજિક પ્રવૃત્તિઓ સામે આવી કાર્યવાહી આગળ પણ ચાલુ રહેશે.

    પોલીસનો કડક સંદેશ

    SMC પોલીસના અધિકારીઓએ સ્પષ્ટ સંદેશ આપ્યો છે કે જાહેર સ્થળોએ કે ખુલ્લા મેદાનમાં જુગાર જેવી ગેરકાયદે પ્રવૃત્તિઓ ચલાવનાર કોઈને પણ બક્ષવામાં નહીં આવે. આવા ધંધાઓ સમાજમાં અશાંતિ ફેલાવે છે અને કાયદો વ્યવસ્થા માટે ખતરારૂપ છે.

  • યોગ અને ધ્યાનને જનઆંદોલન બનાવવાની મુખ્યમંત્રી ભૂપેન્દ્ર પટેલની અપીલ:ગાંધીનગરના મહાત્મા મંદિરે ‘વિશ્વ ધ્યાન દિવસ’ની ઉજવણી

    અહેવાલ : ભાવિક પટેલ, અમદાવાદ

    ગુજરાત રાજ્ય યોગ બોર્ડના પ્રથમ દીક્ષાંત સમારોહમાં મુખ્યમંત્રીની ઉપસ્થિતિ

    મુખ્યમંત્રી શ્રી ભૂપેન્દ્ર પટેલે ગાંધીનગર ખાતે મહાત્મા મંદિર ખાતે યોજાયેલા **‘વિશ્વ ધ્યાન દિવસ’**ની ઉજવણી અને ગુજરાત રાજ્ય યોગ બોર્ડના પ્રથમ દીક્ષાંત સમારોહમાં ઉપસ્થિત રહી યોગ અને ધ્યાનને માત્ર કસરત નહીં પરંતુ સ્વસ્થ, સંતુલિત અને સુખી સમાજ નિર્માણ માટેનું એક ‘જનઆંદોલન’ બનાવવા માટે નાગરિકોને આહવાન કર્યું હતું.

    આ પ્રસંગે હિમાલયન સમર્પણ મેડિટેશનના પૂજ્ય શ્રી શિવકૃપાનંદ સ્વામીજીના પાવન સાનિધ્યમાં સામૂહિક ધ્યાન સત્રનું આયોજન કરવામાં આવ્યું હતું. જેમાં મોટી સંખ્યામાં નાગરિકો, યોગ ટ્રેનર્સ અને સાધકો જોડાયા હતા. સમગ્ર વાતાવરણ શાંતિ, એકાગ્રતા અને આધ્યાત્મિક ઊર્જાથી સરાબોર બન્યું હતું.

    વિકસિત ભારત માટે સ્વસ્થ મન અને શરીર અનિવાર્ય

    મુખ્યમંત્રી શ્રી ભૂપેન્દ્ર પટેલે પોતાના સંબોધનમાં જણાવ્યું હતું કે, વડાપ્રધાન શ્રી નરેન્દ્રભાઈ મોદીએ આપેલા **‘વિકસિત ભારત@2047’**ના લક્ષ્યને હાંસલ કરવા માટે દેશના નાગરિકો શારીરિક અને માનસિક રીતે સ્વસ્થ હોવા અત્યંત જરૂરી છે. તેમણે કહ્યું કે, મનની શાંતિ અને નિરોગી જીવનશૈલી જ મજબૂત રાષ્ટ્ર નિર્માણનો પાયો છે.

    યોગ અને ધ્યાન એકબીજાના પૂરક

    યોગ અને ધ્યાનના મહત્ત્વને સમજાવતા મુખ્યમંત્રીશ્રીએ જણાવ્યું હતું કે, યોગ અને ધ્યાન બંને એકબીજાના પૂરક છે.

    “યોગ શરીરને મજબૂત બનાવે છે, જ્યારે ધ્યાન મનની એકાગ્રતા, સ્થિરતા અને નિર્ણયશક્તિમાં વધારો કરે છે,” તેમ તેમણે ઉમેર્યું હતું. આજના તણાવપૂર્ણ અને સ્પર્ધાત્મક યુગમાં યોગ-ધ્યાન જીવનશૈલીનો અભિન્ન ભાગ બનવો જોઈએ તેમ પણ તેમણે જણાવ્યું.

    યોગને મળેલી વૈશ્વિક ઓળખ

    મુખ્યમંત્રીશ્રીએ વડાપ્રધાન શ્રી નરેન્દ્રભાઈ મોદીના પ્રયાસોથી યોગને મળેલી વૈશ્વિક સ્વીકૃતિને યાદ કરતાં કહ્યું હતું કે, ૨૧ જૂનને ‘વિશ્વ યોગ દિવસ’ તરીકે માન્યતા મળવી એ ભારતની સંસ્કૃતિ અને પરંપરાની વૈશ્વિક સ્વીકૃતિનું ગૌરવપૂર્ણ ઉદાહરણ છે.

    ધ્યાન : નિઃશુલ્ક અને આડઅસર રહિત ઉપચાર

    આજના ઝડપી જીવનમાં વધતા તણાવ અંગે ચિંતા વ્યક્ત કરતાં મુખ્યમંત્રીશ્રીએ જણાવ્યું હતું કે, ધ્યાન એ માનસિક શાંતિ માટેનું પ્રાચીન અને અસરકારક સાધન છે. કોઈપણ ખર્ચ કે આડઅસર વગર વ્યક્તિની આંતરિક શક્તિ જાગૃત કરવાની ક્ષમતા ધ્યાનમાં છે. દરેક નાગરિકે ધ્યાનને જીવનમાં અપનાવવું જોઈએ તેમ તેમણે જણાવ્યું.

    યોગ ટ્રેનર્સનો પ્રથમ દીક્ષાંત સમારોહ

    આ કાર્યક્રમની વિશેષતા તરીકે ગુજરાત રાજ્ય યોગ બોર્ડ દ્વારા તાલીમ પ્રાપ્ત કરેલા યોગ કોચ અને ટ્રેનર્સનો પ્રથમ દીક્ષાંત સમારોહ યોજાયો હતો. મુખ્યમંત્રીશ્રીએ સફળતાપૂર્વક તાલીમ પૂર્ણ કરનાર ટ્રેનર્સને પ્રમાણપત્રો એનાયત કરી તેમનું સન્માન કર્યું હતું અને સમાજમાં સ્વાસ્થ્ય અને યોગના પ્રચાર માટે તેમની ભૂમિકા મહત્વપૂર્ણ હોવાનું જણાવ્યું હતું.

    આયુષ્માન ભારતથી સ્વાસ્થ્ય સુરક્ષા

    મુખ્યમંત્રીશ્રીએ જણાવ્યું હતું કે, સરકાર ‘સ્વસ્થ ભારત’ના લક્ષ્ય માટે સતત કાર્યરત છે. એક તરફ યોગ અને ધ્યાન દ્વારા બીમારીઓથી દૂર રહેવાનો માર્ગ બતાવવામાં આવી રહ્યો છે, તો બીજી તરફ જો કોઈ ગંભીર બીમારી આવે તો ‘આયુષ્માન ભારત’ જેવી યોજનાઓ દ્વારા નાગરિકોને આરોગ્ય સુરક્ષા પૂરી પાડવામાં આવી રહી છે.

    યોગ બોર્ડની પ્રવૃત્તિઓની માહિતી

    કાર્યક્રમમાં ગુજરાત રાજ્ય યોગ બોર્ડના અધ્યક્ષ શ્રી શિશપાલજી રાજપુતે સ્વાગત પ્રવચન કરી યોગ બોર્ડની વિવિધ પ્રવૃત્તિઓ, તાલીમ કાર્યક્રમો અને ભવિષ્યની યોજનાઓ વિશે વિગતવાર માહિતી આપી હતી.

    મહાનુભાવો અને નાગરિકોની વિશાળ ઉપસ્થિતિ

    આ અવસરે ગાંધીનગરના મેયર શ્રીમતી મીરાંબેન પટેલ, ધારાસભ્ય શ્રીમતી રીટાબહેન પટેલ સહિત અનેક મહાનુભાવો, અધિકારીઓ, યોગ સાધકો અને નાગરિકો મોટી સંખ્યામાં ઉપસ્થિત રહ્યા હતા.

    આ સમગ્ર આયોજનનો મુખ્ય ઉદ્દેશ્ય ગુજરાતના દરેક નાગરિકને યોગ અને ધ્યાન સાથે જોડીને એક તણાવમુક્ત, સ્વસ્થ અને ઊર્જાવાન સમાજનું નિર્માણ કરવાનો છે.

  • સાપુતારામાં ‘સશક્ત નારી મેળા’નો ભવ્ય પ્રારંભ : ગુજરાત વિધાનસભા નાયબ મુખ્ય દંડક વિજયભાઈ પટેલના અધ્યક્ષસ્થાને ત્રણ દિવસીય મેળાનો આરંભ

    અહેવાલ : અશ્વિન પટેલ, ડાંગ

    ‘વોકલ ફોર લોકલ’ અને ‘હર ઘર સ્વદેશી’ અભિયાનથી મહિલા સશક્તિકરણને વેગ

    ડાંગ જિલ્લાના ગિરિમથક સાપુતારા ખાતે ‘વોકલ ફોર લોકલ’ અને ‘હર ઘર સ્વદેશી, ઘર ઘર સ્વદેશી’ થીમ આધારિત ત્રિ-દિવસીય **‘સશક્ત નારી મેળા’**નો ભવ્ય પ્રારંભ ગુજરાત વિધાનસભાના નાયબ મુખ્ય દંડક શ્રી વિજયભાઈ પટેલના અધ્યક્ષસ્થાને રીબીન કાપીને કરવામાં આવ્યો હતો. આ મેળો મહિલાઓના આર્થિક, સામાજિક અને સાંસ્કૃતિક સશક્તિકરણ માટે મહત્વપૂર્ણ મંચ પૂરું પાડે છે.

    આ પ્રસંગે ઉપસ્થિત જનસમુદાયને સંબોધતા શ્રી વિજયભાઈ પટેલે જણાવ્યું હતું કે, વડાપ્રધાન શ્રી નરેન્દ્રભાઈ મોદીએ મહિલાઓના સન્માન અને ઉત્થાનને કેન્દ્રમાં રાખી અમલમાં મૂકી રહેલી વિવિધ જનકલ્યાણકારી યોજનાઓના કારણે આજે મહિલાઓના જીવનમાં સકારાત્મક પરિવર્તન જોવા મળી રહ્યું છે. મહિલાઓ હવે માત્ર ઘર સુધી સીમિત રહી નથી, પરંતુ સ્વરોજગાર અને આત્મનિર્ભરતાની દિશામાં નોંધપાત્ર પ્રગતિ કરી રહી છે.

    સખીમંડળોને બ્રાન્ડિંગ અને ગુણવત્તા જાળવણી પર ભાર

    ડાંગ જિલ્લા વહીવટી તંત્ર દ્વારા બહેનોના સર્વાંગી વિકાસ માટે કરવામાં આવી રહેલી કામગીરીની પ્રશંસા કરતા શ્રી વિજયભાઈ પટેલે સખીમંડળની બહેનોને પ્રાકૃતિક પેદાશોનું યોગ્ય બ્રાન્ડિંગ કરવા, મધ જેવી ચીજવસ્તુઓમાં ગુણવત્તા જાળવવા તથા સમય સાથે ટેકનોલોજી અને બજારની માંગ પ્રમાણે અપડેટ રહેવા માર્ગદર્શન આપ્યું હતું. તેમણે બહેનોને સંગઠિત રહી ટીમ વર્ક સાથે કાર્ય કરવા અને એકબીજાને પ્રોત્સાહન આપવા અપીલ કરી હતી.

    મહિલા સંચાલિત દૂધ મંડળીઓથી આર્થિક સશક્તિકરણ

    શ્રી વિજયભાઈ પટેલે જણાવ્યું હતું કે, ડાંગ જિલ્લામાં મોટા ભાગે મહિલાઓ દ્વારા સંચાલિત દૂધ મંડળીઓ કાર્યરત છે, જેના કારણે મહિલાઓ પશુપાલન વ્યવસાય દ્વારા આર્થિક રીતે સ્વાવલંબન તરફ આગળ વધી રહી છે. આ તકે તેમણે ડાંગ જિલ્લાના પ્રાકૃતિક પેદાશો અપનાવવા અને સ્વદેશી ખોરાકના ઉપયોગ માટે સૌને આહ્વાન કર્યું હતું.

    નારી શક્તિને મજબૂત બનાવવા મેળાઓ જરૂરી : નિર્મળાબેન ગાઇન

    જિલ્લા પંચાયત પ્રમુખ શ્રીમતી નિર્મળાબેન ગાઇને જણાવ્યું હતું કે, સરકાર દ્વારા આયોજિત સશક્ત નારી મેળાઓ મહિલાઓના યોગદાનને પ્રદર્શન માટે ઉત્તમ પ્લેટફોર્મ પૂરું પાડે છે. સ્વદેશી ઉત્પાદનોને પ્રોત્સાહન આપવા અને નારી શક્તિને મજબૂત બનાવવા આવા મેળાઓ સમયની જરૂરિયાત છે.

    સ્વ સહાય જૂથોથી મહિલાઓની ઓળખ અને આત્મવિશ્વાસ

    જિલ્લા વિકાસ અધિકારી શ્રી કે. એસ. વસાવાએ જણાવ્યું હતું કે, સરકાર દ્વારા મહિલાઓને આર્થિક રીતે પગભર બનાવવા માટે આવા મેળાઓ ખૂબ ઉપયોગી સાબિત થાય છે. સ્વ સહાય જૂથો દ્વારા મહિલાઓની એક અલગ ઓળખ ઉભી થાય છે અને તેમનો આત્મવિશ્વાસ વધે છે.

    મિશન મંગલમ અંતર્ગત નોંધપાત્ર પ્રગતિ

    ઉલ્લેખનીય છે કે, મિશન મંગલમ યોજના અંતર્ગત ડાંગ જિલ્લામાં કુલ ૪૨૮૨ સ્વ સહાય જૂથોની રચના કરવામાં આવી છે. જિલ્લા ગ્રામ વિકાસ એજન્સી મારફતે A અને B ગ્રેડ ધરાવતા જૂથોને રૂ. ૩૦,૦૦૦ અને C ગ્રેડ ધરાવતા જૂથોને રૂ. ૨૦,૦૦૦નું રીવોલ્વીંગ ફંડ આપવામાં આવ્યું છે. અત્યાર સુધીમાં ૨૭૪૧ સ્વ સહાય જૂથોને રૂ. ૪૪૮.૫૮ લાખ રીવોલ્વીંગ ફંડ તરીકે આપવામાં આવ્યું છે. સાથે જ **૨૬૪ ગ્રામ સંગઠન (VO)**ની રચના કરવામાં આવી છે તથા ૧૭૫૦ સ્વ સહાય જૂથોને રૂ. ૧૫૬૭.૫૦ લાખ CIF ફંડ આપવામાં આવેલ છે.

    લખપતી દીદીઓનું સન્માન

    ગુજરાત લાઈવલીહુડ પ્રમોશન કંપની લિમિટેડ (ગ્રામ વિકાસ વિભાગ) દ્વારા આયોજિત આ કાર્યક્રમ દરમિયાન મહાનુભાવોના હસ્તે લખપતી દીદીઓનું સન્માન કરવામાં આવ્યું હતું, જે મહિલાઓ માટે પ્રેરણારૂપ સાબિત થયું.

    ૬૦ સખી મંડળોના સ્ટોલ્સ આકર્ષણનું કેન્દ્ર

    તા. ૨૧ થી ૨૩ ડિસેમ્બર સુધી ચાલનારા આ સશક્ત નારી મેળામાં ડાંગ જિલ્લાના કુલ ૬૦ જેટલા સખી મંડળો દ્વારા તૈયાર કરાયેલ હસ્તકલા, ખાદ્ય ચીજવસ્તુઓ, પ્રાકૃતિક ખેતી આધારિત ઉત્પાદનો, પરંપરાગત આભૂષણો તથા ગૃહ સુશોભનની સામગ્રીના સ્ટોલ્સ પ્રદર્શન અને વેચાણ માટે ઉપલબ્ધ કરાવવામાં આવ્યા છે, જે મુલાકાતીઓ માટે વિશેષ આકર્ષણ બની રહ્યા છે.

    મહાનુભાવો અને નાગરિકોની વિશાળ ઉપસ્થિતિ

    આ પ્રસંગે જિલ્લા પંચાયત પ્રમુખ શ્રીમતી નિર્મળાબેન ગાઇન, આહવા તાલુકા પંચાયત પ્રમુખ શ્રી ચંદરભાઈ ગાવિત, ભાજપ જિલ્લા પ્રમુખ શ્રી કિશોરભાઈ ગાવિત, જિલ્લા વિકાસ અધિકારી શ્રી કે. એસ. વસાવા, જિલ્લા ગ્રામ વિકાસ નિયામક શ્રી શિવાજી તબીયાર, નોટિફાઈડ એરિયા કચેરીના ચીફ ઓફિસર શ્રી આઈ.એસ. સૈયદ, જિલ્લા ખેતીવાડી અધિકારી શ્રી બાલુભાઈ પટેલ સહિત સંબંધિત વિભાગના અધિકારીઓ, કર્મચારીઓ તથા મોટી સંખ્યામાં મહિલાઓ અને નાગરિકો ઉપસ્થિત રહ્યા હતા.

  • જામનગરમાં વાહન ચોરીના સિન્ડિકેટ પર એલ.સી.બી.નો પ્રહાર

    અહેવાલ: વિશાલ હરવરા જામનગર 

    ₹1.40 લાખના ચાર ચોરાયેલા વાહન સાથે મોટરસાયકલ ચોર ઝડપાયો

    ચાર અલગ-અલગ પોલીસ સ્ટેશનના વાહન ચોરીના ગુનાઓ ઉકેલાયા

    જામનગર શહેરમાં છેલ્લા કેટલાક સમયથી વધી રહેલી મોટરસાયકલ ચોરીની ઘટનાઓ સામે લોકલ ક્રાઈમ બ્રાન્ચ (LCB) દ્વારા મોટી અને અસરકારક કાર્યવાહી હાથ ધરવામાં આવી છે. એલ.સી.બી. પોલીસે એક કુખ્યાત વાહન ચોરને ₹1,40,000/- કિંમતના ચાર ચોરાયેલા વાહનો સાથે ઝડપી પાડીને ચાર અલગ-અલગ વાહન ચોરીના ગુનાઓનો ભેદ ઉકેલ્યો છે. આ કાર્યવાહીથી જામનગર પોલીસ બેડામાં નોંધપાત્ર સફળતા મળી છે.

    પોલીસ મહાનિરીક્ષક, રાજકોટ રેન્જ અશોકકુમાર (IPS) દ્વારા વણશોધાયેલા ચોરીના ગુનાઓ શોધી કાઢવા માટે ખાસ સૂચનાઓ આપવામાં આવી હતી. જેના પગલે જામનગરના પોલીસ અધિક્ષક ડૉ. રવિ મોહન સૈની (IPS) એ એલ.સી.બી.ને આ દિશામાં સઘન કાર્યવાહી કરવા આદેશ આપ્યો હતો.

    પેટ્રોલિંગ દરમિયાન મળેલી બાતમી બની મહત્વપૂર્ણ કડી

    એલ.સી.બી. પોલીસ ઇન્સ્પેક્ટર શ્રી વી.એમ. લગારિયા ના માર્ગદર્શન હેઠળ પો.સબ ઇન્સ્પેક્ટર સી.એમ. કાંટેલીયા, પો.સબ ઇન્સ્પેક્ટર પી.એન. મોરી તથા એલ.સી.બી. સ્ટાફ જામનગર શહેર વિસ્તારમાં વણશોધાયેલા ચોરીના ગુનાઓ અંગે પેટ્રોલિંગમાં હતા. આ દરમિયાન એલ.સી.બી. સ્ટાફના દિલીપભાઈ તલાવડીયા, કાસમભાઈ બ્લોચ, હિતેન્દ્રસિંહ જાડેજા અને ઋષિરાજસિંહ વાળાને એક વિશ્વસનીય બાતમી મળી હતી કે એક ઇસમ ચોરાયેલા વાહનો સાથે ખોડીયાર કોલોની વિસ્તારમાં ફરી રહ્યો છે.

    બાતમીની ખરાઈ કરી તાત્કાલિક કાર્યવાહી કરતા એલ.સી.બી. ટીમે જામનગર શહેરના ખોડીયાર કોલોની અંધાશ્રમ આવાસ પાસેના બ્રિજ પાસેથી એક શખ્સને અટકાવ્યો. તપાસ કરતા તેના કબજામાંથી ચાર મોટરસાયકલ મળી આવી હતી, જે તમામ ચોરાયેલા હોવાનું બહાર આવ્યું.

    પકડાયેલ આરોપી અને ચોરાયેલો મુદામાલ

    પકડાયેલ આરોપીનું નામ અલબાજ ઉર્ફે અરબાજ ફારૂકભાઈ કટારીયા (રહે. કાલાવડ નાકા બહાર, ખાટકી વાડ, જામનગર) હોવાનું સામે આવ્યું છે. આરોપીના કબજામાંથી કુલ ચાર ચોરાયેલા વાહનો મળી આવ્યા હતા, જેની અંદાજિત કિંમત ₹1,40,000/- થાય છે.

    આ મામલે પો.હેડ કોન્સ્ટેબલ યુવરાજસિંહ ઝાલા દ્વારા આરોપી સામે કાયદેસરની કાર્યવાહી હાથ ધરવામાં આવી છે અને આરોપીને વધુ પૂછપરછ માટે કસ્ટડીમાં લેવામાં આવ્યો છે.

    એક નહીં, ચાર-ચાર ગુનાઓનો ભેદ ઉકેલાયો

    આ કાર્યવાહી દરમિયાન જામનગર શહેરના ચાર અલગ-અલગ પોલીસ સ્ટેશનમાં નોંધાયેલા વાહન ચોરીના ગુનાઓનો ભેદ ઉકેલાયો છે. જેમાં જામનગર સિટી A, B અને C ડિવિઝન પોલીસ સ્ટેશનમાં નોંધાયેલા ગુનાઓનો સમાવેશ થાય છે. તમામ ગુનાઓ BNS કલમ 303(2) (વાહન ચોરી) હેઠળ નોંધાયેલા હતા.

    એક આરોપી હજુ ફરાર

    આ કેસમાં એક વધુ આરોપી અનવર ઉર્ફે અનુ ઉર્ફે ચકેડી ઇસ્માઈલભાઈ સીપાઈ (રહે. ગુલાબનગર વાંઝાવાસ, જામનગર) હાલ ફરાર હોવાનું બહાર આવ્યું છે. પોલીસ દ્વારા ફરાર આરોપીને ઝડપી પાડવા માટે અલગ-અલગ ટીમો બનાવી તપાસ શરૂ કરવામાં આવી છે.

    આરોપીનો ગુનાહિત ઇતિહાસ ચોંકાવનાર

    પકડાયેલ આરોપી અલબાજ ઉર્ફે અરબાજ ફારૂકભાઈ કટારીયા સામે અગાઉ પણ અનેક ગંભીર ગુનાઓ નોંધાયેલા હોવાનું બહાર આવ્યું છે. જેમાં ચોરી, મારામારી, જાહેર વ્યવસ્થામાં ખલેલ પહોંચાડવી, GP એક્ટ તથા એટ્રોસિટી એક્ટ હેઠળના ગુનાઓનો સમાવેશ થાય છે. આરોપીનો ગુનાહિત ઇતિહાસ જોતા તે વ્યાવસાયિક વાહન ચોર હોવાનું પ્રાથમિક તપાસમાં સ્પષ્ટ થયું છે.

    એલ.સી.બી.ની કામગીરીને સરાહના

    જામનગર એલ.સી.બી. દ્વારા કરાયેલ આ કામગીરીથી શહેરમાં વાહન ચોરી કરનાર તત્વોમાં ફફડાટ ફેલાયો છે. પોલીસ તંત્ર દ્વારા સ્પષ્ટ સંદેશ આપવામાં આવ્યો છે કે ગુનાહિત પ્રવૃત્તિમાં સંડોવાયેલા કોઈપણ તત્વને બક્ષવામાં નહીં આવે. શહેરમાં કાયદો અને વ્યવસ્થા જાળવવા માટે પોલીસ સતત સક્રિય હોવાનું આ કાર્યવાહીથી સાબિત થયું છે.

  • મહેસાણા ના બે પીઆઇ નું DYSP ના પ્રમોશન સાથે રાજ્યમાં 68 પીઆઇ ને DYSP નુ પ્રમોશન :– 7 DYSP ની બદલી

    લાંબા સમયથી પ્રમોશનની રાહ જોઈ રહેલા રાજ્યભરના 68 પોલીસ ઇન્સ્પેક્ટરોને DYSP તરીકે પ્રમોશન મળતાં ગુજરાત પોલીસ બેડામાં ખુશીની લાગણી વ્યાપી ગઈ છે. રાજ્ય સરકાર દ્વારા આજે આ અંગે સત્તાવાર જાહેરાત કરવામાં આવી હતી.

    આ પ્રમોશનમાં મહેસાણા જિલ્લાના બે PIનો પણ સમાવેશ થયો છે, જે જિલ્લાવાસીઓ માટે ગૌરવની બાબત બની છે.

    હાલ ઊંઝા પોલીસ સ્ટેશનમાં PI તરીકે ફરજ બજાવતા એસ.એસ. નિનામાને DYSP તરીકે પ્રમોશન આપી મદદનીશ પોલીસ કમિશનર (SOG), અમદાવાદ તરીકે નિમણૂક કરવામાં આવી છે. જ્યારે સાયબર ક્રાઇમ PI તરીકે કાર્યરત જે.જી. વાઘેલાને DYSP તરીકે બઢતી આપી મદદનીશ પોલીસ કમિશનર, કમાન્ડ એન્ડ કંટ્રોલ સેન્ટર, અમદાવાદ શહેર ખાતે નિયુક્ત કરાયા છે.

    આ સમગ્ર પ્રક્રિયામાં ગુજરાત પોલીસના વર્ગ-૨ના કુલ 68 PIને વર્ગ-૧ના DYSP તરીકે પ્રમોશન આપવામાં આવ્યું છે. જેમાં

    9 હથિયારી PI,

    47 બિનહથિયારી PI,

    અને 12 વાયરલેસ PIનો સમાવેશ થાય છે.

    આ સાથે સાથે વર્ગ-૧ના 7 DYSPની બદલી પણ કરવામાં આવી છે.

    લાંબા સમયથી અટકેલી બઢતી પ્રક્રિયા પૂર્ણ થતાં પોલીસ અધિકારીઓમાં ઉત્સાહ અને નવી ઊર્જા જોવા મળી રહી છે, જ્યારે રાજ્ય પોલીસ તંત્રમાં પણ નવી ગતિ આવવાની આશા વ્યક્ત કરવામાં આવી રહી છે.