samachardiary24x7.in

Category: નવીનતમ સમાચાર

  • બહુચરાજી ની યશ ગેસ એજન્સી ફરી વિવાદમાં દિવાળીના તહેવારો પહેલા બહુચરાજી ખાતે ગેસની અછત – ગ્રાહકોમાં રોષ, ખાનગી વેચાણના આક્ષેપ

    અહેવાલ.– પ્રદીપ ઠાકોર. ( બહુચરાજી )

    બહુચરાજી…

      દિવાળીના તહેવારો નજીક આવતા જ રાંધણ ગેસની માંગમાં ભારે વધારો નોંધાયો છે, પરંતુ બહુચરાજી ખાતે આવેલી HP કંપનીની. યશ ગેસ એજન્સી ફરી એકવાર ચર્ચાના કેન્દ્રમાં આવી છે. ગ્રાહકોનો આક્ષેપ છે કે એજન્સી પર “સ્ટોક નથી”ના બહાને વારંવાર લોકોને પાછા ધકેલવામાં આવે છે, જ્યારે ગેસ બોટલોના ખાનગી વેચાણ થવાના આક્ષેપો પણ સામે આવ્યા છે.

     

     સ્ટોક નહીં હોવાના બહાને ગ્રાહકોને મુશ્કેલી

      સ્થાનિક લોકોનો દાવો છે કે એજન્સી પર રોજ સવારે લાંબી લાઈનો લાગી રહી છે. લોકો કલાકો સુધી તડકામાં રાહ જોતા રહે છે, પરંતુ અંતે “સ્ટોક ખતમ” કહીને તેમને ખાલી હાથે પાછા મોકલી દેવામાં આવે છે.લોકો બે થી ત્રણ દિવસ કામધંધો મૂકીને ગેસ ની બોટલ મેળવવા માટે લાઇનમાં લાગે છે પરંતુ તેમને સ્ટોક નહીં હોવાના બહાને ગેસ બોટલ મળતો નથી.

    એક ગ્રાહકે ન્યૂઝ પોર્ટલને જણાવ્યું:

    “અમે વહેલી સવાર થી લાઇનમાં ઊભા રહ્યા, પણ ઓફિસ ખુલી એટલામાં કહેવામાં આવ્યું કે ગેસ નથી. અને ઓફિસ બહાર સ્ટોક નહીં હોવાનું બોર્ડ પણ મારી દેવામાં આવ્યું. છતાં કેટલાક ઓળખાણ વાળા લોકોને બોટલ મળી ગઈ. સ્પષ્ટ છે કે ખાનગીમાં વેચાણ ચાલી રહ્યું છે.”

     અગાઉ પણ આવી ચૂક્યો છે વિવાદ

    યશ ગેસ એજન્સી સામે આ પહેલી વાર આક્ષેપો નથી. થોડા મહિના પહેલા પણ સમાન પરિસ્થિતિ સર્જાઈ હતી, જ્યારે તડકામાં કલાકો સુધી રાહ જોઈ રહેલા ગ્રાહકોને ગેસ મળ્યો નહોતો.

    તે સમયે પણ સ્થાનિકો દ્વારા રજૂઆત થયા બાદ પણ કોઈ કડક કાર્યવાહી થઈ નહોતી. હાલની પરિસ્થિતિએ એજન્સી પર વહીવટી તંત્રના નિયંત્રણ પર સવાલો ઊભા કર્યા છે.

     ગ્રાહકોમાં ચિંતા – “ગરીબ માણસને ગેસ માટે ધક્કા ખાવા પડે છે”

    દિવાળીના દિવસોમાં રસોડાના ખર્ચમાં વધારો થતો હોય છે. ખાસ કરીને ગામડાઓમાંથી આવતા લોકો માટે આ અછત વધુ તકલીફરૂપ બની છે.

    એક વૃદ્ધ મહિલાએ ગુસ્સામાં કહ્યું:

    “તહેવાર પહેલાં ગેસ ન મળે તો શું રાંધવું? દર વખતે એજન્સી એક જ જવાબ આપે – ‘સ્ટોક નથી’, પણ ગેસ બોટલો કઈ રીતે તો અન્ય જગ્યાએ પહોંચે છે.”

     તપાસની માગ – પુરવઠો સુનિશ્ચિત કરવા પ્રશાસનને વિનંતી

    ગ્રાહકોની મુખ્ય માંગ છે કે યશ ગેસ એજન્સી સામે તાત્કાલિક તપાસ હાથ ધરવામાં આવે અને ગેસ વિતરણ પ્રક્રિયામાં પારદર્શિતા લાવવામાં આવે.

    તહેવારના દિવસોમાં સામાન્ય પરિવારોને રાંધણ ગેસની અછતનો ભોગ ન બનવો પડે તે માટે પુરવઠો વધારવો અને વિતરણ વ્યવસ્થાની ચકાસણી કરવી જરૂરી બની છે.

     વહીવટી તંત્ર સામે પ્રશ્ન

    સ્થાનિક નાગરિકો કહે છે કે એજન્સીઓ પર દેખરેખ નબળી પડી છે. જો દરેક સપ્લાયનું રેકોર્ડ અને વિતરણ માહિતી જાહેર રૂપે ઉપલબ્ધ થાય તો આવી ગેરરીતિઓ અટકાવી શકાય.

    તંત્ર હવે કેવી કાર્યવાહી કરે છે તે જોવાનું રહેશે, પરંતુ હાલની સ્થિતિએ લોકોમાં વિશ્વાસનો ભંગ અને અસંતોષની લાગણી ઊભી થઈ છે.

  • નંદાસણની કંપનીના પ્રદૂષણથી ઉમાનગરના ગામજનો ત્રાહિમામ — કડક કાર્યવાહી કરવા ઊઠી લોક માંગણી

    કંપની સંચાલકોનો દાદાગીરી ભર્યો દાવો – “પ્રદૂષણ વિભાગ અમારા ખિસ્સામાં છે

    ગામલોકોએ GPCB અને જિલ્લા કલેક્ટરને રજૂઆત કરી કાર્યવાહી કરવાની માગણી કરી

    નંદાસણ ..

    મહેસાણા-અમદાવાદ હાઈવે પર આવેલા નંદાસણ ગામની સીમમાં આવેલી હેમી ઈન્ટરનેશનલ પ્રા.લી. નામની એરંડા મીલ કંપનીના બેફામ ધુમાડા અને દુર્ગંધથી ઉમાનગર ગામના રહેવાસીઓ ત્રાહિમામ પોકારી રહ્યા છે.

      આ કંપનીમાં એરંડા પીલાણનું કામ થાય છે, જેમાંથી નીકળતા ધુમાડા અને રસાયણિક દુર્ગંધના કારણે ગામના લોકો છેલ્લા અનેક મહિનાથી શ્વાસ લેવામાં મુશ્કેલી, આંખોમાં ચમચામાટ અને ચામડીની સમસ્યાઓ જેવી તકલીફોનો સામનો કરી રહ્યા છે.

        ગામલોકોએ અનેકવાર કંપનીના મેનેજરો અને સંચાલકોને રજૂઆત કરી હોવા છતાં કોઈ સુધારાત્મક પગલા લેવામાં આવ્યા નથી. સંચાલકોનો દાદાગીરી ભર્યો દાવો છે કે “પ્રદૂષણ વિભાગ તો અમારા ખિસ્સામાં છે, તમારાથી થાય તે કરી લો”, જે સાંભળીને લોકોમાં ગુસ્સો વ્યાપી ગયો છે.

       કંપની દ્વારા ઉત્સર્જન માટેની માન્ય મર્યાદાઓ

    ગુજરાત પ્રદૂષણ નિયંત્રણ બોર્ડ (GPCB) અનુસાર દરેક ઉદ્યોગ માટે ઉત્સર્જન અને પ્રદૂષણની નિર્ધારિત મર્યાદા છે.

    વિગત મુજબ:ઉત્સર્જનનું માપદંડ.માન્ય મર્યાદા (Industrial Stack). Particulate Matter (PM)

    મહત્તમ 150 mg/Nm³ સુધી માન્ય

    Sulphur Dioxide (SO₂)

    80 µg/m³ સુધી માન્ય

    Nitrogen Oxides (NOx)

    80 µg/m³ સુધી માન્ય

    Noise Level (Industrial Zone)

    દિવસમાં 75 dB(A), રાત્રે 70 dB(A)

    Chemical Emission (Organic Units)

    COD, VOC વગેરે માટે GPCB નિયમો પ્રમાણે નિયંત્રણ જરૂરી

    આ મર્યાદા કરતાં વધુ ઉત્સર્જન થવું કાયદેસર ગુનો ગણાય છે અને તેના માટે Air (Prevention and Control of Pollution) Act, 1981 હેઠળ પગલા લઈ શકાય છે.

       ક્યાં રજૂઆત કરવી – ગામલોકો માટે માર્ગદર્શિકા

    જો ઉદ્યોગો પ્રદૂષણ ફેલાવે અને GPCBના નિયમોનું પાલન ન કરે, તો નીચે મુજબ કાર્યવાહી કરી શકાય:

    ગ્રામ પંચાયત / તાલુકા કચેરીમાં રજૂઆત

    ગામલોકો સમૂહમાં લખિત અરજી કરીને તાલુકા વિકાસ અધિકારીને માહિતી આપી શકે.

    જિલ્લા કલેક્ટર અથવા જિલ્લા વિકાસ અધિકારી (DDO)

    મહેસાણા જિલ્લા કલેક્ટરને લેખિત રજૂઆત કરી તપાસની માંગ કરી શકાય છે.

    ગુજરાત પ્રદૂષણ નિયંત્રણ બોર્ડ (GPCB), મહેસાણા રીજનલ ઓફિસ

    સરનામું : Paryavaran Bhavan, Mehsana Regional Office

    ફોન : (02762) 258294

    ઈમેઈલ : gpcb-meh@gujarat.gov.in

    વેબસાઈટ : https://gpcb.gujarat.gov.in

    કેન્દ્રિય પ્રદૂષણ નિયંત્રણ બોર્ડ (CPCB)

    જો રાજ્ય બોર્ડ કાર્યવાહી ન કરે તો સીધી ફરિયાદ https://cpcb.nic.in/query-form1.php પર કરી શકાય છે.

    ન્યાયિક વિકલ્પ – National Green Tribunal (NGT)

    જો લાંબા સમય સુધી કોઈ ઉકેલ ન મળે, તો લોકો NGT, પશ્ચિમ ઝોન બેન્ચ (પુણે) માં અરજી કરી શકે છે.

      કાયદાકીય પગલાં શક્ય

     

    GPCB દ્વારા તાત્કાલિક તપાસ અને ઉત્સર્જનના નમૂના એકત્રિત કરી શકાય.

    કંપનીને નોટિસ આપી પ્રદૂષણ નિયંત્રણ સાધનો લગાવવા ફરમાન આપી શકાય.

    નિયમોનો ભંગ સાબિત થાય તો ઉદ્યોગના લાઈસન્સ સસ્પેન્ડ અથવા રદ કરી શકાય.

    આરોગ્ય પર અસર થતી હોય તો પીડિત લોકો NGT મારફતે નુક્શાનની ભરપાઈ (Compensation) પણ માગી શકે છે.

     ગામલોકોની માંગ

    ઉમાનગરના ગ્રામજનોની સ્પષ્ટ માંગ છે કે“કંપની દ્વારા લગાવવામાં ન આવેલા ફિલ્ટર અને કંટ્રોલ યંત્રો તાત્કાલિક લગાવવામાં આવે, અને ત્યાં સુધી ફેક્ટરીના ધુમાડા ઉત્સર્જન પર રોક મૂકવામાં આવે.”

    સ્થાનિક લોકોનો દાવો છે કે પ્રદૂષણના કારણે બાળકોમાં શ્વાસ અને ચામડીની સમસ્યાઓ વધી છે, અને પાકોમાં પણ અસર જોવા મળી રહી છે.

     પર્યાવરણવિદો ની સલાહ

    પર્યાવરણ નિષ્ણાતોના જણાવ્યા મુજબ ઉદ્યોગો માટે માત્ર મંજૂરી મેળવવી પૂરતી નથી — તેઓએ નિયમિત રીતે “Emission Monitoring Report” GPCB ને સોંપવી ફરજિયાત છે. જો તે કરવામાં આવતું નથી, તો તે ગંભીર કાયદાકીય ઉલ્લંઘન છે.

     તંત્રી સ્થાને થી 

    નંદાસણની આ ફેક્ટરી સામે ગામજનોની લડત માત્ર એક ગામની નહીં, પરંતુ સમગ્ર વિસ્તારના સ્વાસ્થ્ય અને પર્યાવરણની લડત બની છે. લોકો હવે આશા રાખી રહ્યા છે કે તંત્ર તાત્કાલિક તપાસ કરશે, પ્રદૂષણ રોકશે અને દોષિતો સામે કડક કાર્યવાહી કરશે.

  • કડીમાં ઝોલા છાપ ડોક્ટરોનો આતંક — ડિગ્રી વિના દવા આપતા તબીબો સામે આરોગ્ય તંત્ર સુતેલું! નવા તાલુકા હેલ્થ ઓફિસર ડો. બ્રિજેશ પ્રજાપતિની કસોટી – શું તંત્ર ખરેખર પગલાં લેશે?

    કડી…..

         કડી શહેર તથા તાલુકાના ગામડાઓમાં “ઝોલા છાપ” ડોક્ટરોનો ધંધો ધડાધડ ચાલે છે. પૂરતી મેડિકલ ડિગ્રી વિના એલોપથી દવાઓ આપતા આ લોકો ગામડાંના ગરીબ લોકોના આરોગ્ય સાથે સીધી રમત કરી રહ્યા છે. પરંતુ આરોગ્ય વિભાગ હજુ પણ કુંભકર્ણની નિંદ્રામાં મસ્ત છે.

     અંદાજિત આંકડા – કેટલી ક્લિનિક્સ બિનરજીસ્ટર્ડ?

           સ્થાનિક સ્તરે મળેલી માહિતી અનુસાર કડી શહેર તથા આસપાસના ગામોમાં મળીને આશરે ૬૦થી વધુ બિનરજીસ્ટર્ડ “ક્લિનિક” અથવા દવા દુકાનો ચાલી રહી છે.આમાંથી મોટાભાગના તબીબો પાસે કોઈ મેડિકલ ડિગ્રી નથી – ફક્ત અગાઉ કોઈ હોસ્પિટલ કે પેથોલોજી લેબમાં કામ કરીને “અનુભવ” મેળવી પોતાને ડોક્ટર કહે છે.

          અંદાજ મુજબ દરરોજ ૩૦૦ થી ૪૦૦ દર્દીઓ આવા ઝોલા છાપ તબીબો પાસે સારવાર લે છે – કારણ કે લોકો પાસે સસ્તું અને નજીક વિકલ્પ અન્યત્ર નથી.

     આરોગ્ય તંત્રની ઉદાસીનતા

    તાલુકા આરોગ્ય વિભાગ પાસે પૂરતી ટીમ અને સત્તા હોવા છતાં અત્યાર સુધી કોઈ મોટી કાર્યવાહી હાથ ધરવામાં આવી નથી.

    સ્થાનિક લોકોના મતે, દરેકને આ ક્લિનિક્સની ખબર છે, પરંતુ “રાજકીય દબાણ” અને “સ્થાનિક ઓળખાણ” અને અધિકારી ને મળતા માલના કારણે તંત્ર ચુપ છે.

        તાજેતરમાં જ નિમણૂક થયેલા તાલુકા હેલ્થ ઓફિસર ડો. બ્રિજેશ પ્રજાપતિ સામે હવે સૌથી મોટો પડકાર આ ઝોલા છાપ તબીબોની ગેરકાયદેસર પ્રેક્ટિસ પર રોક લગાવવાનો છે.

     લોકોનો અભિપ્રાય 

    રાજેશ પટેલ (નોકરી, કડી): “આ ડોક્ટરો રૂ. ૫૦-૧૦૦માં ઈન્જેક્શન આપી દે છે. ક્યારેક દવા ખોટી પડે તો દર્દી બેભાન થઈ જાય. છતાં કોઈ તપાસ આવતી નથી.”

     

    હિરાબેન ઠાકોર (ગ્રામીણ મહિલાઃ): “હોસ્પિટલ દૂર છે, અમને ગામમાં દવા આપતા હોવાથી આપણે ત્યાં જ જઈએ. પરંતુ એક વાર ખોટી દવા ખાઈને મારા દીકરાને ચક્કર આવ્યા હતા.”

    વિજયસિંહ (સામાજિક કાર્યકર): “આ મામલામાં આરોગ્ય વિભાગ જો કાર્યવાહી નહીં કરે તો અમે કલેક્ટર સુધી રજૂઆત કરીશું.”

    ( તમામ નામની ગુપ્તતા જાળવવા માટે ઓળખ છુપાવવામાં આવી છે )

    શું કહે છે કાયદો..

     

    Indian Medical Council Act, 1956 અને Clinical Establishments (Registration and Regulation) Act, 2010 મુજબ 

    ➡️ કોઈપણ વ્યક્તિ માન્ય મેડિકલ ડિગ્રી વિના એલોપથી દવા આપી શકતો નથી.

    ➡️ બિનરજીસ્ટર્ડ ક્લિનિક ચલાવવી ગુનો ગણાય છે.

    ➡️ દંડ સાથે ૩ વર્ષ સુધીની જેલ સજા થઈ શકે છે.

      તાલુકા હેલ્થ ઓફિસર, જિલ્લા હેલ્થ ઓફિસર તથા પોલીસ તંત્રને આવા કેસોમાં કાર્યવાહી કરવાનો કાયદાકીય અધિકાર છે.

     અંતિમ વાત

    કડીની આ સ્થિતિ એ સ્પષ્ટ કરે છે કે ગરીબ અને મધ્યવર્ગીય લોકોની “સસ્તી સારવાર”ની જરૂરિયાતને બહાનાં બનાવી અણધાર્યા જોખમો ઉઠાવવામાં આવી રહ્યા છે.

    હવે તંત્ર સામે સૌથી મોટો પ્રશ્ન એ છે 

    શું નવા તાલુકા હેલ્થ ઓફિસર ડો. બ્રિજેશ પ્રજાપતિ ખરેખર મેદાનમાં ઉતરી પગલાં લેશે, કે પછી અગાઉની જેમ જ કાર્યવાહી ફાઈલો પુરતી રહેશે?

  • 🇮🇳 અતલનગરમાં રાષ્ટ્રીય સ્વયંસેવક સંઘની ભવ્ય વિજયાદશમી રેલી 🚩

    સ્થળ: અતલનગર, કચ્છ

    રિપોર્ટર: હિમાંશુ પટેલ

    કચ્છ જિલ્લાના અટલ બિહારી બાજપેયીના નામ પરથી ઓળખાતા અટલનગર ગામે આજે વિજયાદશમીના પાવન અવસરે રાષ્ટ્રીય સ્વયંસેવક સંઘ (RSS) દ્વારા ભવ્ય રેલી અને સાંસ્કૃતિક કાર્યક્રમનું આયોજન કરવામાં આવ્યું.

    ગામમાં રાષ્ટ્રપ્રેમની લહેર સાથે યુવાનો, બાળકો અને વરિષ્ઠ નાગરિકોએ ઉત્સાહભેર ભાગ લીધો. દર વર્ષની જેમ આ વર્ષે પણ રેલીમાં મોટી સંખ્યામાં ગ્રામજનો જોડાયા અને દેશભક્તિનો માહોલ સર્જાયો.

    🕉️ સંઘની પરંપરા અને કાર્યક્રમ

    સંઘના પ્રધાનએ જણાવ્યું કે વિજયાદશમીનો દિવસ શક્તિ અને શિસ્તનું પ્રતિક છે. આ અવસરે રાષ્ટ્રપ્રેમ, એકતા અને સેવા ભાવના જગાવવા માટે રેલીનું આયોજન કરવામાં આવે છે.

    રેલી બાદ શસ્ત્રપૂજન, રાષ્ટ્રગીત અને સંસ્કૃતિક કાર્યક્રમો યોજાયા, જેમાં વિદ્યાર્થીઓએ દેશભક્તિના ગીતો અને નૃત્ય રજૂ કર્યા.

    🌾 અટલનગરનું ગ્રામજીવન

    અતલનગર ગામમાં લગભગ 90 ટકા આયર સમાજના લોકો વસે છે અને મોટાભાગે ખેતી સાથે સંકળાયેલા છે. ગામના લોકો સંઘના કાર્યક્રમો સાથે વર્ષોથી જોડાયેલા છે. આ કાર્યક્રમ માત્ર ધાર્મિક નહીં પરંતુ સામાજિક એકતા અને સંસ્કૃતિનો ઉત્સવ તરીકે પણ ઉજવાય છે.

    📖 રાષ્ટ્રીય સ્વયંસેવક સંઘનો ઉદ્દેશ

    રાષ્ટ્રીય સ્વયંસેવક સંઘ (RSS) એક સામાજિક અને સાંસ્કૃતિક સંસ્થા છે, જેનો મુખ્ય ઉદ્દેશ રાષ્ટ્રની એકતા, શિસ્ત અને સેવાભાવનું સંવર્ધન કરવાનો છે. સંઘ સમગ્ર ભારતમાં શાખાઓ ચલાવી યુવાઓમાં નૈતિકતા, સેવા અને સંસ્કારનું સંસ્કારણ કરે છે.

    📸 સમાપન

    રેલી દરમિયાન ઉત્સાહભેર લોકોમાં રાષ્ટ્રપ્રેમની લાગણી છલકાઈ. ગામમાં કાર્યક્રમ બાદ લોકો એકબીજાને શુભેચ્છા પાઠવી વિજયાદશમીનો આનંદ મનાવ્યો.

  • કડી,જોટાણા સહિતના વિસ્તારોમાં ઝોલા છાપ તબીબોનો રાફડો ફાટ્યો :– પૂરતી ડિગ્રી વિના સારવાર,દર્દીઓના જીવ સાથે ખેલ

    મહેસાણા…

       મહેસાણા જિલ્લાના કડી, બહુચરાજી, જોટાણા સહિતના તાલુકાઓમાં આરોગ્ય ક્ષેત્રનો ચોંકાવનારો મુદ્દો પ્રકાશમાં આવ્યો છે. અહીં અનેક સ્થળોએ જેમ કે નાના ગામડાઓમાં,શહેરની સોસાયટી ની પાસે આવેલી દુકાનોમાં તથા નાના નાના ગલી મહોલ્લામાં એવા લોકો દર્દીઓને સારવાર આપતા જોવા મળી રહ્યા છે જેમણે M.B.B.S. ની ડિગ્રી નથી હોતી, છતાં તેઓ પોતાને “તબીબ” કહીને એલોપથી દવાઓ લખતા, ઇન્જેક્શન આપતા તથા બોટલ ચડાવતાં જોવા મળે છે.

          ડિગ્રી વિના એલોપથી પ્રેક્ટિસ

    અમારી તપાસમાં ખુલ્યું છે કે આવા તબીબો મોટાભાગે કોઈ પણ ડિગ્રી ધરાવતા નથી અથવા **B.A.M.S. (આયુર્વેદ) અથવા B.H.M.S. (હોમિયોપથી)**ની ડિગ્રી ધરાવે છે. કાયદા પ્રમાણે તેમને પોતાના ક્ષેત્ર સુધી મર્યાદિત રહેવું જોઈએ, પરંતુ તેઓ એલોપથી દવાઓની પ્રેક્ટિસ કરી રહ્યા છે.આથી તેઓ નાગરિકોના આરોગ્યને જોખમમાં મૂકે છે.

      દર્દીઓ પર ખતરનાક અસર

    યોગ્ય જ્ઞાન વગર દવાઓ આપવાથી દર્દીઓને ગંભીર સાઇડ ઈફેક્ટ્સ થાય છે.

    ખોટી સારવારથી દર્દીની હાલત બગડવાની ઘટનાઓ પણ જોવા મળે છે.

    બોટલ ચડાવવાની આડમાં અયોગ્ય રીતે રૂપિયા વસૂલવાની ફરિયાદો સામે આવી રહી છે.

          કાયદેસર કાર્યવાહી શક્ય

          કાયદો આવા ઝોલા છાપ તબીબો સામે કડક છે:

    1. Indian Medical Council Act / NMC Act – માત્ર M.B.B.S. અને રજીસ્ટર્ડ ડોક્ટરોને જ એલોપથી પ્રેક્ટિસનો અધિકાર છે.

    2. Drugs and Cosmetics Act – ગેરકાયદેસર દવા આપનાર સામે ફોજદારી કેસ થઈ શકે છે.

    3. Indian Penal Code (IPC) – બેદરકારીથી મોત કે છેતરપિંડીના કેસમાં 304A અને 420 જેવી કલમો લાગુ થઈ શકે છે.

    4. Consumer Protection Act – દર્દી કે તેમના પરિવારજનોએ થયેલા નુકસાન બદલ સીધી ફરિયાદ કરી શકે છે.

                    ફરિયાદ ક્યાં કરવી?

    ગુજરાત મેડિકલ કાઉન્સિલ (GMC) – https://www.gmcgujarat.org પર ઓનલાઇન ફરિયાદ કરી શકાય છે.

    National Medical Commission (NMC), ન્યુ દિલ્હી – https://www.nmc.org.in પર રજૂઆત કરી શકાય છે.

    જિલ્લા આરોગ્ય અધિકારી (CDHO/CMO) – મહેસાણા જિલ્લા આરોગ્ય કાર્યાલયમાં લેખિત અરજી.

    પોલીસ સ્ટેશન – અનધિકૃત પ્રેક્ટિસ ગુનાહિત કૃત્ય હોવાથી FIR નોંધાવી શકાય છે.

    કન્ઝ્યુમર ફોરમ – ખોટી સારવારથી આર્થિક કે શારીરિક નુકસાન થયું હોય તો કેસ કરી શકાય છે.

                નાગરિકોની માંગ

    જિલ્લાના નાગરિકો હવે આવા નકલી તબીબો સામે કડક પગલા લેવાની માંગ ઉઠાવી રહ્યા છે. આરોગ્ય સેવાઓમાં પારદર્શિતા લાવવા માટે આરોગ્ય વિભાગ, પોલીસ અને મેડિકલ કાઉન્સિલને એકસાથે કાર્યવાહી કરવી જરૂરી છે.

    ✦ તારણ…

        “ઝોલા છાપ” તબીબોની ગેરકાયદેસર પ્રેક્ટિસ માત્ર કાયદાની વિરુદ્ધ નથી પરંતુ દર્દીઓના જીવ સાથે સીધી રમખાણ છે.

      મહેસાણા જિલ્લામાં આરોગ્ય વિભાગે હવે જાગૃત થઈને કડક કાર્યવાહી કરવી જરૂરી છે જેથી આવનારા સમયમાં કોઈ નિર્દોષ દર્દીનો જીવ આ પ્રકારની ગેરરીતિના કારણે જોખમમાં ન આવે.

  • ઊંઝામાં લોખંડી પુરુષ સરદાર પટેલની 150મી જન્મજયંતિ નિમિતે ભવ્ય લોકડાયરોનું આયોજન

    ઊંઝા..

    ભારત દેશના લોખંડી પુરુષ સરદાર વલ્લભભાઈ પટેલની 150મી જન્મજયંતિ નિમિતે ઊંઝા શહેરમાં એક અનોખો સાંસ્કૃતિક મહોત્સવ યોજાશે. શ્રી સરદાર પટેલ સેવાદળ (SPG ગ્રુપ) દ્વારા આ કાર્યક્રમનું આયોજન કરવામાં આવ્યું છે, જેમાં લોકકલાના રંગો સાથે રાષ્ટ્રપ્રેમ અને એકતાનો સંદેશ ગુંજશે.

    આ પ્રસંગે ઊંઝા શહેરમાં બનેલી નવિન શૈક્ષણિક લાયબ્રેરી બિલ્ડિંગના લાભાર્થે આ લોકડાયરો યોજવામાં આવ્યો છે. સાંસ્કૃતિક અને સામાજિક હેતુ જોડતો આ કાર્યક્રમ સ્થાનિક નાગરિકો, વિદ્યાર્થી મિત્રો અને કલા પ્રેમીઓ માટે પ્રેરણારૂપ બનશે.

    લોકસંગીતની રાત્રિ – ઉર્વશી રાદડિયા કરશે સૌને મંત્રમુગ્ધ

    આ ભવ્ય લોકડાયરોમાં લોકસંગીત જગતમાં લોકપ્રિય ઉર્વશી રાદડિયા તથા સાથી કલાકારો પોતાની મધુર અવાજમાં ગરબા, ડાયરાના ગીતો અને લોકગીતોની મનોહર રજૂઆત કરશે.
    તેમના ગીતો અને સૂર સાથે કાર્યક્રમમાં ઉપસ્થિત શ્રોતાઓ માટે અવિસ્મરણીય અનુભૂતિ સર્જાશે.

    31 ઓક્ટોબર ના રોજ રાત્રે 8 વાગે
    પાટણ રોડ ઉપર નવદુર્ગા નવરંગી ગ્રાઉન્ડ ખાતે કાર્યક્રમનું આયોજન થશે.

    આ કાર્યક્રમને શહેરના વિવિધ વિસ્તારોમાંથી મોટી સંખ્યામાં લોકો ઉપસ્થિત રહેવાની શક્યતા છે.
    સામાજિક સંગઠનો, વિદ્યાર્થીઓ અને સરદાર પ્રેમીઓ આ કાર્યક્રમમાં જોડાઈ સરદાર પટેલના વિચારોને નमन કરશે.

    સરદાર પટેલ…
    એકતા, સંઘર્ષ અને પ્રેરણાનું પ્રતિક
    સરદાર વલ્લભભાઈ પટેલે સ્વતંત્ર ભારતને એકતા અને અખંડિતતાની ડોરમાં બાંધવામાં મહત્વની ભૂમિકા ભજવી હતી.
    તેમના જન્મના 150મા વર્ષ પર દેશભરમાં વિવિધ કાર્યક્રમો યોજાઈ રહ્યા છે.
    ઊંઝા ખાતે યોજાનાર આ લોકડાયરો પણ એ જ સંદેશ આપશે

    “એકતા જ આપણી શક્તિ છે, સરદાર જ આપણી પ્રેરણા છે.”

    સમાજ (more…)

  • કડીમાં 7 વર્ષના ત્રાસ બાદ જોટાણા ની યુવતીને પતિએ આપ્યા ત્રણ તલાક.. કેન્દ્ર સરકાર ના કાયદા નો સરેઆમ ભંગ

    🔴કડી..

    કેન્દ્ર સરકાર ના કાયદા નો જાહેર માં ભંગ શું સરકાર કોઈ પગલાં લેશે ??? 

    કડી શહેરમાં લગ્ન જીવનના સાત વર્ષ થી ચાલી રહેલા શારીરિક અને માનસિક ત્રાસ બાદ પતિ દ્વારા પત્નીને ત્રિપલ આપવાની ચોંકાવનારી ઘટના સામે આવી છે.


    મળતી માહિતી મુજબ મૂળ જોટાણા ની રહેવાસી અને હાલ કડી ના અલકૌશર ફ્લેટ ખાતે રહેતી નસરીન બાનુ ઉં.26 વર્ષ છેલ્લા સાત વર્ષ થી તેના પતિ અશફાક હુસૈન મહેબૂબભાઈ ટાંક તથા સાસુ મહેરુનિશા બાનુ અને નણંદ રીજવાનું બાનુ તરફથી શારીરિક અને માનસિક ત્રાસ નો ભોગ બની રહી હતી.

    1 ઓગસ્ટ ના રોજ રાત્રિના સમયે આશરે 9 વાગ્યા ના સમયગાળામાં પતિ અશફાક હુસેન નસરીન બાનુ ના પિતાના ઘરે પહોંચી ગુસ્સામાં આવી ને તલ્લાક,તલ્લાક,તલ્લાક બોલીને ત્રિપલ તલાક આપી દીધા.

    આ દરમ્યાન પતિ દ્વારા નસરીન બાનુને જાન થી મારી નાખવાની ધમકી પણ આપવામાં આવી.

    ફરીયાદી બેનની ફરિયાદના આધારે કડી પોલીસ સ્ટેશનમાં ગુન્હો નોંધાયો છે.

    પોલીસે હવે આરોપીઓ સામે કાયદેસરની કાર્યવાહી શરૂ કરી છે અને વધુ તપાસ હાથ ધરી છે.

    સ્થાનિક લોકો અને નાગરિક સંગઠનો આ ઘટના અંગે ચકિત છે અને મહિલાઓ માટે સુરક્ષા સુનિશ્ચિત કરવા પોલીસની કડક કાર્યવાહીની માંગ કરી રહ્યા છે. કાયદાના દ્રષ્ટિકોણથી, ત્રિપલ તલાક જેવી ઘટના ગંભીર ગુનો ગણાય છે, અને મહિલાઓના હિત માટે કાયદાકીય પગલાં લેવામાં આવે છે.

  • ‘N.A.’ના નામે ‘નોટો’નો ખેલ: મહેસાણા કલેક્ટર કચેરીનો ક્લાર્ક ₹9 લાખની લાંચ લેતા ઝડપાયો!

    📍 અમદાવાદ / મહેસાણા

    મહેસાણા કલેક્ટર કચેરી ખાતે જમીન શાખામાં (N.A. ટેબલ) ફરજ બજાવતા રેવન્યુ ક્લાર્ક (વર્ગ-૩) વિશ્વજીત ખેંગારભાઈ કમલેકરને એન્ટિ કરપ્શન બ્યુરો (ACB)એ આજે જાહેર માર્ગ ઉપરથી રૂ. **૯,૦૦,૦૦૦/-ની લાંચ સ્વીકારતા રંગેહાથે ઝડપી લીધો છે.

    લાંચની માંગણી કેવી રીતે થઈ?

    ફરીયાદી એક જાગૃત નાગરિક છે, જેમની માલિકીની ખેતીની જમીન જોટાણા તાલુકાના ઇજપુરા (જેઠાજી) ગામે આવેલ છે. આ જમીનને બીનખેતી (N.A.) કરવા માટે ફરીયાદીએ મહેસાણા કલેક્ટર કચેરીમાં અરજી કરી હતી.
    જમીનનું N.A. કરવા માટે આરોપી કમલેકરે શરૂઆતમાં એક ચોરસફૂટ દીઠ રૂ. ૫૦/- પ્રમાણે કુલ રૂ. ૨૩ લાખની લાંચની માંગણી કરી હતી.

    ફરીયાદીએ વાંધો ઉઠાવતા આરોપીએ માગેલી લાંચની રકમ રૂ. ૧૨ લાખ સુધી ઘટાડીને અંતે રૂ. ૧૦ લાખ પર લાવી.આખરે બંને વચ્ચે રૂ.૯ લાખમાં સમજૂતી થઈ.

    પરંતુ ફરીયાદી લાંચ આપવાની ના પાડી ACBનો સંપર્ક કર્યો. ફરીયાદીની ફરિયાદને આધારે અમદાવાદ ACBની ટીમે સુચના પ્રમાણે ટ્રેપ ગોઠવ્યો.

    ટ્રેપ દરમ્યાનની કાર્યવાહી

    ૦૪/૧૦/૨૦૨૫ના રોજ, નક્કી થયેલી વાતચીત મુજબ આર.ટી.ઓ. સર્કલ નજીક, સુભાષ બ્રિજ, અમદાવાદ ખાતે ફરીયાદી અને આરોપી વચ્ચે મુલાકાત થઈ. આ સમયે આરોપીએ ફરીયાદી પાસેથી રૂ.૯ લાખની લાંચની રકમ સ્વીકારી લીધી.
    તુરંત જ હાજર ACBની ટીમે આરોપીને રંગેહાથે ઝડપી પાડી, તેના કબજામાંથી નાણાં જપ્ત કર્યા.

    જવાબદાર અધિકારીઓની ટીમ

    ટ્રેપીંગ અધિકારી: શ્રી એસ.એન. બારોટ, પોલીસ ઇન્સ્પેકટર, ફિલ્ડ-૩ (ઇન્ટેલિજન્સ વિંગ), ACB અમદાવાદ
    મદદમાં: શ્રી ડી.બી. મહેતા, પોલીસ ઇન્સ્પેકટર, ફિલ્ડ-૩ (ઇન્ટેલિજન્સ વિંગ), ACB અમદાવાદ
    સુપરવિઝન અધિકારી: શ્રી એસ.એન. બારોટ, ઇ.ચા. મદદનિશ નિયામક, ફિલ્ડ-૩ (ઇન્ટેલિજન્સ વિંગ), ACB અમદાવાદ

    ACBની કડક કાર્યવાહી

    ACB દ્વારા આરોપી સામે ભ્રષ્ટાચાર નિવારણ કાયદાની જોગવાઈઓ હેઠળ ગુનો દાખલ કરવામાં આવ્યો છે. આરોપીની ધરપકડ કરી કાયદેસરની કાર્યવાહી હાથ ધરવામાં આવી છે.

    ભ્રષ્ટાચાર સામેનો ચેતવણી સંદેશ

    આ ઘટના ફરી એકવાર સાબિત કરે છે કે રાજ્ય સરકારની એન્ટિ કરપ્શન બ્યુરો નાગરિકોની ફરિયાદોને ગંભીરતાથી લઈ કડક પગલાં ભરી રહી છે. જમીન જેવા સંવેદનશીલ મામલામાં અધિકારીઓ દ્વારા કરવામાં આવતી લાંચની માંગણી સામે હવે સામાન્ય નાગરિકો પણ જાગૃત થઈ આગળ આવી રહ્યા છે.

    “લાંચ લેશો તો હાથમાં કડકડી, નહીંતર સજા ભોગવવી પડશે” – એવો ચેતવણીસભર સંદેશ ACBએ આ સફળ ટ્રેપ દ્વારા આપ્યો છે.

  • ભાજપના નવા પ્રદેશ પ્રમુખની રણનીતિ પર ‘AAP’ નો પડકાર, સૌરાષ્ટ્રમાં ગોપાલ ઈટાલિયાની પકડ!

    જગદીશ વિશ્વકર્માના પ્રમુખ બનવા છતાં ભાજપ માટે સૌરાષ્ટ્રમાં ‘AAP’ અને ગોપાલ ઈટાલિયાનો પડકાર યથાવત? શું છે જગદીશ મહેતાનું આકલન?

    ગુજરાત ભાજપના નવા પ્રદેશ અધ્યક્ષ તરીકે જગદીશ વિશ્વકર્માની તાજેતરમાં થયેલી વરણી રાજ્યના રાજકારણનું સૌથી મોટું કેન્દ્ર બની છે. મુખ્યમંત્રી ભૂપેન્દ્ર પટેલ (પાટીદાર) અને નવા પ્રમુખ જગદીશ વિશ્વકર્મા (ઓબીસી)નું આ ‘બેલેન્સિંગ એક્ટ’ આગામી સ્થાનિક સ્વરાજ્યની ચૂંટણીઓ અને 2027ની વિધાનસભા ચૂંટણી પહેલા ભાજપની મોટી રણનીતિ માનવામાં આવે છે.

    જોકે, આ રણનીતિ સામે વિપક્ષી આમ આદમી પાર્ટી (AAP) સૌરાષ્ટ્રમાં પોતાની જમીન મજબૂત કરી રહી હોવાના અહેવાલો છે. ખાસ કરીને પાટીદાર નેતા ગોપાલ ઇટાલિયાની સૌરાષ્ટ્રના રાજકારણમાં વધતી પકડ અને તેમને મળી રહેલું પાટીદાર સમુદાયનું સમર્થન ભાજપ માટે ચિંતાનો વિષય છે.

    વરિષ્ઠ પત્રકાર જગદીશ મહેતાના તાજા નિવેદનોએ આ મુદ્દે રાજકીય ગરમાવો લાવી દીધો છે. ‘સમાચાર ડાયરી 24X7’ને મળેલા સમાચાર સંકેત મુજબ, જગદીશ મહેતાએ સૂચવ્યું છે કે:

    જગદીશ વિશ્વકર્માના પ્રમુખ તરીકે આવવાથી ભાજપે ભલે ઓબીસી કાર્ડ રમ્યું હોય, પરંતુ સૌરાષ્ટ્રના ગ્રામ્ય વિસ્તારોમાં જ્યાં પાટીદાર મતદારો નિર્ણાયક છે, ત્યાં ગોપાલ ઇટાલિયાની આગેવાનીમાં ‘AAP’ એક મોટો પડકાર બનીને ઉભરી રહી છે.

    વિશ્વકર્માની વરણીથી ઓબીસી સમુદાયમાં સકારાત્મક સંદેશ જશે, પરંતુ સૌરાષ્ટ્રમાં ગોપાલ ઇટાલિયાને પાટીદાર સમાજનું જે સમર્થન મળી રહ્યું છે, તે ભાજપના ગઢ ગણાતા આ વિસ્તારમાં રાજકીય સમીકરણો બદલી શકે છે.

    જગદીશ મહેતાના આકલન મુજબ, નવા સંગઠન પ્રમુખની રણનીતિને હવે સૌરાષ્ટ્રમાં AAPના વધતા પ્રભાવ અને ગોપાલ ઇટાલિયાની અસરને નિષ્ફળ બનાવવા માટે વિશેષ ધ્યાન આપવું પડશે.

    જગદીશ વિશ્વકર્માને પ્રમુખ બનાવ્યા બાદ હવે ભાજપ સૌરાષ્ટ્રમાં ગોપાલ ઇટાલિયાના નેતૃત્વમાં AAPના ઉભરતા પડકારનો સામનો કરવા માટે શું નવી રણનીતિ અપનાવે છે, તેના પર સૌની નજર ટકેલી છે. ‘સમાચાર ડાયરી 24X7’ આ સમગ્ર રાજકીય ઘટનાક્રમ પર સતત નજર રાખી રહ્યું છે.

  • મિશન ૨૦૨૭ માટે ભાજપનો ‘વિશ્વકર્મા પ્લાન’: જ્વલંત વિજયનો સંકલ્પ!

    ગાંધીનગર: (તા. ૦૪ ઓક્ટોબર, ૨૦૨૫)

    ગુજરાત ભાજપના નવા પ્રદેશ પ્રમુખ તરીકે આજે **જગદીશ વિશ્વકર્મા (પંચાલ)**એ વિધિવત રીતે પદભાર સંભાળતાની સાથે જ, પાર્ટીએ આગામી મિશન ૨૦૨૭ની વિધાનસભા ચૂંટણી અને નજીકના ભવિષ્યમાં આવનારી સ્થાનિક સ્વરાજ્યની ચૂંટણીઓ માટેનો સ્પષ્ટ ‘વિશ્વકર્મા પ્લાન’ જાહેર કરી દીધો છે.

    પ્રમુખ તરીકે જગદીશ વિશ્વકર્માનો વ્યૂહ:

    સંગઠન સશક્તિકરણ: પદગ્રહણ બાદ જગદીશ વિશ્વકર્માએ સ્પષ્ટ સંકેત આપ્યો છે કે તેમની પ્રથમ પ્રાથમિકતા બૂથ સ્તરથી લઈને પ્રદેશ સ્તર સુધી સંગઠનને વધુ મજબૂત બનાવવાની રહેશે. તેઓ પક્ષના કાર્યકરોમાં નવો જોમ પૂરવા અને જમીની સ્તરે સરકારની યોજનાઓ પહોંચાડવા પર ભાર મૂકશે.

    OBC સમુદાય પર ફોકસ: વિશ્વકર્મા પોતે OBC (અન્ય પછાત વર્ગ) સમુદાયમાંથી આવે છે. ભાજપની આ પસંદગી આગામી ચૂંટણીઓમાં OBC વોટબેંકને વધુ મજબૂત રીતે પક્ષ સાથે જોડવાના વ્યૂહનો ભાગ છે.

    જ્વલંત વિજયનો સંકલ્પ: પ્રમુખ બનતા જ વિશ્વકર્માએ મિશન ૨૦૨૭માં પણ ૨૦૨૨ કરતાં પણ વધુ બેઠકો જીતવાનો સંકલ્પ વ્યક્ત કર્યો છે. તેમનો મુખ્ય લક્ષ્ય પ્રદેશ ભાજપના રથને વિજય તરફ દોરી જવાનો રહેશે.

    સ્થાનિક ચૂંટણીઓનો પડકાર: નવા પ્રમુખ સામે ટૂંક સમયમાં આવનારી મહાનગરપાલિકાઓ, જિલ્લા અને તાલુકા પંચાયતોની ચૂંટણીઓમાં ભાજપના વર્ચસ્વને જાળવી રાખવાનો તાત્કાલિક પડકાર છે. અમદાવાદ શહેર ભાજપના ભૂતપૂર્વ પ્રમુખ તરીકેનો તેમનો અનુભવ શહેરી એકમોમાં નિર્ણાયક સાબિત થઈ શકે છે.

    યુવા અને આક્રમક નેતૃત્વ: ભાજપે અનુભવી હોવા છતાં યુવા ગણાતા જગદીશ વિશ્વકર્માને કમાન સોંપીને યુવા નેતૃત્વને પ્રોત્સાહન આપ્યું છે. તેમના નેતૃત્વમાં પક્ષના કાર્યમાં નવી ઊર્જા અને આક્રમકતા જોવા મળશે તેવી અપેક્ષા છે.

    જગદીશ વિશ્વકર્માએ સ્પષ્ટ કર્યું છે કે તેઓ સરકાર અને સંગઠન વચ્ચે વધુ સારું સંકલન સ્થાપિત કરીને વડાપ્રધાન નરેન્દ્ર મોદી અને ગૃહમંત્રી અમિત શાહના ‘નવા ગુજરાત’ના વિઝનને આગળ વધારશે.

    સમાચાર ડાયરી 24×7 ન્યૂઝ