Category: ટોચના સમાચાર

રિપોર્ટ: વિજયભાઈ કુનિતયા, ભાયાવદર

      નવી શિક્ષણ નીતિ – 2020 (NEP-2020) ના અમલીકરણ બાદ દેશભરમાં શિક્ષણ વ્યવસ્થામાં વ્યાપક બદલાવ જોવા મળી રહ્યો છે. પરંપરાગત રીતે માત્ર પાઠ્યપુસ્તકો અને પરીક્ષાઓ સુધી સીમિત રહેલું શિક્ષણ હવે કૌશલ્ય, પ્રેક્ટિકલ જ્ઞાન અને રોજગારક્ષમતાને કેન્દ્રમાં રાખીને આગળ વધી રહ્યું છે. આ દિશામાં એક મહત્વપૂર્ણ અને પ્રશંસનીય પહેલ ભાયાવદર સ્થિત શ્રી એચ.એલ. પટેલ આર્ટસ એન્ડ કોમર્સ કોલેજ દ્વારા કરવામાં આવી છે.

કોલેજ દ્વારા ધોરાજી વિસ્તારના ત્રણ પ્રતિષ્ઠિત ઔદ્યોગિક એકમો સાથે મેમોરેન્ડમ ઓફ અન્ડરસ્ટેન્ડિંગ (MOU) કરવામાં આવ્યો છે, જેના અંતર્ગત આર્ટસ અને કોમર્સ વિભાગના કુલ 63 વિદ્યાર્થીઓ માટે ઇન્ટર્નશિપ અને ઓન-જોબ ટ્રેનિંગ (OJT) ની વ્યવસ્થા ઊભી કરવામાં આવી છે. આ MOUના પરિણામે વિદ્યાર્થીઓને અભ્યાસ સાથેસાથે ઉદ્યોગોના વાસ્તવિક કામકાજનો અનુભવ પ્રાપ્ત થશે.

આ સમજૂતી કરાર હેઠળ ત્રણ અગ્રણી કંપનીઓને “સ્કિલ નોલેજ પ્રોવાઇડર” તરીકે જોડવામાં આવી છે. જેમાં પટેલ એગ્રી એક્સપોર્ટ (નટ બટ) દ્વારા એગ્રી એક્સપોર્ટ અને પ્રોસેસિંગ ક્ષેત્રે પ્રેક્ટિકલ તાલીમ આપવામાં આવશે. રંગોલી ડેલાઈટ્સ પ્રાઈવેટ લિમિટેડ દ્વારા ફૂડ ઇન્ડસ્ટ્રીના સંચાલન, વહીવટ અને ગુણવત્તા નિયંત્રણની સમજ આપવામાં આવશે, જ્યારે ઝપોલી ફૂડ્સ (ઝપોલી બેકર્સ) દ્વારા મેન્યુફેક્ચરિંગ, માર્કેટિંગ અને સપ્લાય ચેન મેનેજમેન્ટ સંબંધિત તાલીમ આપવામાં આવશે. દરેક એકમમાં 21 વિદ્યાર્થીઓને ઇન્ટર્નશિપનો અવસર આપવામાં આવશે.

NEP-2020 ના માર્ગદર્શિકા મુજબ, આ ઇન્ટર્નશિપ વિદ્યાર્થીઓના અભ્યાસક્રમનો અભિન્ન ભાગ રહેશે. વિદ્યાર્થીઓ દરેક સેમેસ્ટર દીઠ ન્યૂનતમ 120 કલાક ઉદ્યોગોમાં ઇન્ટર્નશિપ કરશે, જેને શૈક્ષણિક ક્રેડિટ તરીકે ગણવામાં આવશે. આ વ્યવસ્થાનો મુખ્ય ઉદ્દેશ્ય વિદ્યાર્થીઓને માત્ર થિયરી જ્ઞાન પૂરતું નહીં રાખી, પરંતુ ઉદ્યોગોની વાસ્તવિક કાર્યપદ્ધતિ સાથે પરિચિત કરી તેમને રોજગારક્ષમ બનાવવાનો છે.

આ સમગ્ર પહેલને સફળ બનાવવા માટે કોલેજના આચાર્ય ડો. એમ.ડી. સવસાણી અને કેમ્પસ ડિરેક્ટર પ્રો. વી.વી. સુતરીયાનું સતત માર્ગદર્શન અને પ્રોત્સાહન મળ્યું છે. MOU ની સમગ્ર પ્રક્રિયાને સુચારૂ રીતે અમલમાં લાવવામાં નોડલ ઓફિસર પ્રો. ડો. ધવલ આરદેશણાએ મહત્વની ભૂમિકા ભજવી છે. કંપનીઓ તરફથી એચ.આર. મેનેજર રેનિશ વચ્છાણી (પટેલ એગ્રી એક્સપોર્ટ) તથા કોમલ મહેતા (રંગોલી ડેલાઈટ્સ અને ઝપોલી ફૂડ્સ) એ વિદ્યાર્થીઓને ગુણવત્તાપૂર્ણ તાલીમ અને શીખવાનું ઉત્તમ પ્લેટફોર્મ પૂરુ પાડવાની ખાતરી આપી છે.

આ નિર્ણય ખાસ કરીને ગ્રામ્ય અને અર્ધગ્રામ્ય વિસ્તારના વિદ્યાર્થીઓ માટે આશાસ્પદ સાબિત થવાનો છે. સ્થાનિક ઉદ્યોગોમાં જ આધુનિક તાલીમ મળતા વિદ્યાર્થીઓને મોટા શહેરોમાં સ્થળાંતર કર્યા વિના જ કૌશલ્ય વિકાસ અને રોજગારની તકો મળશે. કોલેજની આ પહેલ NEP-2020 ના “શિક્ષણ સાથે કૌશલ્ય” ના ઉદ્દેશ્યને સાકાર કરતી એક ઉદાહરણરૂપ કામગીરી તરીકે જોવામાં આવી રહી છે.

રિપોર્ટર: પ્રદીપ ઠાકોર ( બહુચરાજી)

બહુચરાજી તાલુકાના બેચર ગામમાં રસ્તાના મુદ્દે સર્જાયેલી ઘટના હવે માત્ર સ્થાનિક વિવાદ નહીં રહી, પરંતુ પ્રશાસનની કાર્યપદ્ધતિ, કાયદાની પ્રક્રિયા અને માનવ અધિકારો પર ગંભીર પ્રશ્નો ઉભા કરતી ઘટના બની ગઈ છે. મામલતદાર દ્વારા કોઈપણ પ્રકારની પૂર્વ નોટિસ વિના JCB મશીનથી મકાન તોડવાની કાર્યવાહી હાથ ધરાતા સમગ્ર ગામમાં ભારે રોષ ફાટી નીકળ્યો છે.

કાયદેસર રસ્તો હોવા છતાં વિવાદ ઊભો થયો

સ્થાનિકોની માહિતી મુજબ, બેચર ગામમાં વર્ષોથી અસ્તિત્વમાં રહેલો એક કાયદેસર રસ્તો છે, જેનો ઉપયોગ પ્રજાપતિ વાસ અને ઠાકોર વાસના રહેવાસીઓ નિયમિત રીતે કરતા આવ્યા છે. જોકે, આ રસ્તાની વચ્ચે ચંદુજી પ્રતાપજી ઠાકોર દ્વારા મકાનનું બાંધકામ કરવામાં આવતાં રસ્તો બંધ થઈ ગયો હોવાનું સામે આવ્યું હતું. આ બાબતે રસ્તાના ઉપયોગકર્તાઓએ મામલતદાર કચેરીમાં લેખિત ફરિયાદ કરી યોગ્ય કાર્યવાહી કરવાની માંગ કરી હતી.

મામલતદાર પોલીસ બંદોબસ્ત સાથે પહોંચ્યા, JCBથી તોડફોડ

ફરિયાદના આધારે આજરોજ બહુચરાજી મામલતદાર પોલીસ બંદોબસ્ત સાથે JCB મશીન લઈ ગામમાં પહોંચ્યા હતા. કાર્યવાહી દરમિયાન મકાનના આગળના ભાગને તોડવામાં આવ્યો હતો. પરંતુ વિવાદ અહીં વધુ ગંભીર ત્યારે બન્યો, જ્યારે રસ્તાના હકદારોની હાજરી વગર જ ચમનજી ઠાકોરના બાથરૂમની ચોકડી દિવાલ તોડી નાખવામાં આવી.

સૌથી ગંભીર મુદ્દો: પૂર્વ નોટિસ વિના તોડફોડ

આ સમગ્ર ઘટનાનો સૌથી ચિંતાજનક પાસો એ છે કે મકાન માલિકને તોડફોડ પહેલાં કોઈપણ પ્રકારની લેખિત કે મૌખિક નોટિસ આપવામાં આવી ન હતી. મકાન માલિકની ગેરહાજરીમાં સરકારી મશીનરીથી થયેલી આ કાર્યવાહી કાયદેસરની પ્રક્રિયાના મૂળભૂત સિદ્ધાંતોને પડકારતી હોવાનું ગામજનો જણાવી રહ્યા છે.

કાયદાના જાણકારો જણાવે છે કે કોઈપણ બાંધકામ હટાવવાની કાર્યવાહી પહેલાં સંબંધિત પક્ષને નોટિસ આપવી, જવાબ આપવા તક આપવી અને યોગ્ય પ્રક્રિયા અનુસરવી અનિવાર્ય છે. આ નિયમોની અવગણના થવાથી કાર્યવાહી પર કાયદાકીય પ્રશ્નો ઊભા થાય છે.

“આ રસ્તો અમારો નથી” – રસ્તાના હકદારોનો સ્પષ્ટ ઈન્કાર

સ્થાનિક લોકોનું કહેવું છે કે જે રસ્તો હાલ બનાવવામાં આવ્યો છે તે તેમનો કાયદેસર રસ્તો નથી. રસ્તાના હકદારોએ મામલતદારને સ્પષ્ટ રીતે જણાવ્યું હતું કે વર્ષોથી જે રસ્તો તેઓ ઉપયોગમાં લેતા આવ્યા છે તે અન્ય સ્થળે આવેલો છે. તેમણે વિનંતી કરી હતી કે અમને અમારો કાયદેસર રસ્તો જ ખુલ્લો કરી આપવામાં આવે.

રસ્તાના હકદારોનું કહેવું છે કે,

“અમે આ રસ્તે ચાલવા માંગતા નથી. અમને જ્યાં કાયદેસર હક છે ત્યાં જ રસ્તો ખુલ્લો કરવામાં આવે.”

મામલતદારના નિવેદનથી વિવાદ વધુ ઘેરો

સ્થાનિકો અનુસાર, મામલતદાર દ્વારા જવાબ આપવામાં આવ્યો હતો કે,

“હું તમારા માટે નવરો નથી. રસ્તો કરી આપ્યો છે, ચાલવું હોય તો ચાલો, નહીં તો ના ચાલશો.”

આ પ્રકારનું નિવેદન સરકારી અધિકારીની જવાબદારી અને સંવેદનશીલતા સામે પ્રશ્નો ઉભા કરે છે. ગ્રામજનોમાં આ નિવેદનને લઈને પણ ભારે નારાજગી જોવા મળી રહી છે.

માનવતા અને પ્રશાસનની કાર્યપદ્ધતિ પર સવાલ

બીજી તરફ, ચમનજી ઠાકોરના મકાનને કોઈપણ પ્રકારની નોટિસ કે જાણ કર્યા વિના અને તેમની ગેરહાજરીમાં તોડી નાખવામાં આવતાં માનવતા અને કાયદાની પ્રક્રિયા પર ગંભીર પ્રશ્નો ઊભા થયા છે. ગામજનોનું કહેવું છે કે જો બાંધકામ ગેરકાયદેસર હતું તો પણ કાયદેસરની પ્રક્રિયા અપનાવવી જરૂરી હતી.

ગામમાં તણાવપૂર્ણ માહોલ, ઉચ્ચ અધિકારીઓ સમક્ષ રજૂઆતની તૈયારી

આ સમગ્ર ઘટનાને પગલે બેચર ગામમાં ભારે રોષ અને તણાવપૂર્ણ માહોલ સર્જાયો છે. લોકો હવે મામલતદારની કાર્યવાહી સામે ઉચ્ચ અધિકારીઓ, જિલ્લા કલેક્ટર અને રાજ્ય સરકાર સમક્ષ રજૂઆત કરવાની તૈયારી કરી રહ્યા છે.

ગ્રામજનો દ્વારા દોષિત અધિકારીઓ સામે તપાસ હાથ ધરવાની, જવાબદારી નક્કી કરવાની અને ભવિષ્યમાં આવી મનમાની કાર્યવાહી ન થાય તે માટે કડક પગલાં ભરવાની માંગ ઉઠી છે.

હવે નજર ઉચ્ચ તંત્ર પર

બેચર ગામની આ ઘટના હવે સ્થાનિક પ્રશાસન માટે એક કસોટી બની છે. જો યોગ્ય તપાસ અને ન્યાય નહીં મળે તો આ મુદ્દો વધુ ઉગ્ર બનવાની શક્યતા પણ સ્થાનિકો વ્યક્ત કરી રહ્યા છે.