Category: Uncategorized

ચૈતર વસાવાને કોર્ટનો મોટો ઝટકો

ગુજરાતના રાજકારણમાંથી એક મોટા સમાચાર સામે આવ્યા છે. આમ આદમી પાર્ટીના ડેડીયાપાડા ધારાસભ્ય ચૈતર વસાવાને નર્મદા સેશન્સ કોર્ટે વન વિભાગના કર્મચારીઓ પર હુમલો અને ધમકી આપવાના કેસમાં દોષિત જાહેર કર્યા છે. આ ચુકાદા બાદ રાજ્યના રાજકીય વર્તુળોમાં ભારે ચર્ચા શરૂ થઈ ગઈ છે.

પત્ની સહિત કુલ 9 આરોપીઓ દોષિત

આ કેસમાં માત્ર ચૈતર વસાવા જ નહીં,  કુલ 10 આરોપીઓને કોર્ટે દોષિત ઠેરવ્યા છે. તમામ સામે વન વિભાગના કર્મચારીઓ પર હુમલો, સરકારી ફરજમાં અવરોધ ઉભો કરવો અને ધમકી આપવાના આરોપો હતા.

શું હતો સમગ્ર મામલો?

નવેમ્બર 2023 દરમિયાન નોંધાયેલી ફરિયાદ મુજબ, ચૈતર વસાવા પર આરોપ હતો કે તેમણે વન વિભાગના કર્મચારીઓને પોતાના ઘરે બોલાવીને તેમની સાથે મારપીટ કરી હતી. આ કેસમાં હવામાં ફાયરિંગ કરીને ધમકાવવાનો પણ ગંભીર આરોપ લગાવવામાં આવ્યો હતો. ઘટનાના બાદ ચૈતર વસાવાએ કોર્ટમાં સરેન્ડર કર્યું હતું.

10 વર્ષ સુધીની સજાની જોગવાઈ

સરકારી વકીલ વંદનાબેન ભટ્ટના જણાવ્યા અનુસાર, કેસમાં લાગુ થયેલી કેટલીક કલમો હેઠળ આરોપીઓને મહત્તમ 10 વર્ષ સુધીની જેલ સજા થઈ શકે છે. હાલ કોર્ટમાં સજાની સુનાવણી ચાલી રહી છે અને બપોર બાદ તમામ આરોપીઓને કેટલી સજા ફટકારવામાં આવશે તેની જાહેરાત કરવામાં આવશે.

કોર્ટ બહાર ચુસ્ત પોલીસ બંદોબસ્ત

ચુકાદાને ધ્યાનમાં રાખીને રાજપીપળા સ્થિત નર્મદા જિલ્લા કોર્ટ બહાર ચુસ્ત પોલીસ બંદોબસ્ત ગોઠવવામાં આવ્યો છે. કોર્ટ પરિસરમાં કોઈ અનિચ્છનીય ઘટના ન બને તે માટે સુરક્ષા વ્યવસ્થા વધુ કડક બનાવવામાં આવી છે.

રાજકીય ભવિષ્ય પર સવાલો

ચૈતર વસાવા ગુજરાતમાં AAPના અગ્રણી આદિવાસી નેતા તરીકે ઓળખાય છે. કોર્ટના આ ચુકાદા બાદ તેમના ધારાસભ્ય પદ અને રાજકીય ભવિષ્યને લઈને પણ અનેક સવાલો ઉભા થયા છે. હવે સૌની નજર કોર્ટ દ્વારા જાહેર થનારી સજા પર ટકેલી છે.

કતાર બ્લાસ્ટ બાદ સુરતનો યુવક લાપતા

કતારના સૌથી મોટા રાસ લાફાન LNG ગેસ પ્લાન્ટમાં થયેલા ભીષણ વિસ્ફોટ બાદ દક્ષિણ ગુજરાત માટે ચિંતાજનક સમાચાર સામે આવ્યા છે. સુરતનો યુવાન સની ચંપકભાઈ પટેલ બ્લાસ્ટ બાદથી લાપતા હોવાનું સામે આવ્યું છે. છેલ્લા 24 કલાકથી વધુ સમયથી તેનો પરિવાર સાથે કોઈ સંપર્ક થયો નથી.

બ્લાસ્ટ સમયે નાઇટ ડ્યુટી પર હતો

સની પટેલ કતારમાં સ્ટેક (Steq) કંપનીમાં સપ્લાય હેઠળ મિકેનિકલ ફિટર તરીકે કામ કરતો હતો. દુર્ઘટના સમયે તે ગેસ પ્લાન્ટમાં નાઇટ ડ્યુટી પર તૈનાત હતો. બ્લાસ્ટ બાદથી તેનો મોબાઇલ બંધ આવી રહ્યો છે અને તેની કોઈ ભાળ મળી નથી.

પત્નીને કર્યો હતો છેલ્લો ફોન

સનીનો નિયમ હતો કે તે રોજ નોકરી પર જતા પહેલાં અને ડ્યુટી પૂર્ણ થયા બાદ પત્નીને ફોન કરતો હતો. દુર્ઘટના બને તે દિવસે પણ તેણે પત્નીને ફોન કરીને કહ્યું હતું કે, “હું નોકરી પર જઉં છું.” ત્યારબાદથી તેનો કોઈ ફોન આવ્યો નથી. કતારમાં બ્લાસ્ટના સમાચાર સામે આવતા જ પરિવારજનો ચિંતામાં ગરકાવ થઈ ગયા છે.

મોટો ભાઈ કતારમાં શોધખોળમાં

સનીનો મોટો ભાઈ રવિ પટેલ પણ કતારમાં જ નોકરી કરે છે. ઘટનાની જાણ થતાં જ તે પોતાના ભાઈની શોધમાં હોસ્પિટલો, ભારતીય દૂતાવાસ અને પ્લાન્ટ વિસ્તાર સુધી પહોંચી ગયો હતો. જોકે સુરક્ષા કારણોસર પ્લાન્ટમાં પ્રવેશ ન મળતા હજુ સુધી સની અંગે કોઈ સત્તાવાર માહિતી મળી શકી નથી.

પરિવારે સરકાર પાસે મદદ માંગી

સનીના કાકા અનિલભાઈ ખાટાએ જણાવ્યું કે બ્લાસ્ટની માહિતી મળતા જ પરિવાર ચિંતામાં મુકાઈ ગયો છે. કતારમાં રહેલા સનીના ભાઈએ હોસ્પિટલ અને દૂતાવાસમાં તપાસ કરી છે, પરંતુ હજુ સુધી કોઈ સ્પષ્ટ માહિતી મળી નથી. પરિવારે ભારત સરકાર અને વિદેશ મંત્રાલય પાસે સનીને શોધવા માટે મદદની અપીલ કરી છે.

દક્ષિણ ગુજરાતના અન્ય યુવાનો પણ ટીમમાં હતા

પ્રાથમિક માહિતી મુજબ સની જે મેન્ટેનન્સ ટીમમાં કામ કરતો હતો તેમાં નવસારીના બે યુવાનો અને દમણનો એક યુવક પણ સામેલ હતો. તેમની સ્થિતિ અંગે પણ હજુ સ્પષ્ટતા થઈ નથી. આ કારણે નવસારી, દમણ અને દક્ષિણ ગુજરાતના અન્ય વિસ્તારોમાં પણ ચિંતા અને પ્રાર્થનાઓનો માહોલ જોવા મળી રહ્યો છે.

ગામમાં પ્રાર્થનાઓનો દોર

સની પટેલના વતન ગામમાં પરિવારજનો, મિત્રો અને સ્થાનિક લોકો સતત તેના સુરક્ષિત પરત ફરવાની પ્રાર્થના કરી રહ્યા છે. પરિવારજનોને આશા છે કે સની સુરક્ષિત હશે અને ટૂંક સમયમાં તેના સારા સમાચાર મળશે.

લખનઉમાં તક્ષશીલા જેવી કરુણ દુર્ઘટના

ઉત્તર પ્રદેશની રાજધાની લખનઉમાં સોમવારે બપોરે અલીગંજ વિસ્તારમાં આવેલી એક બહુહેતુક બિલ્ડિંગમાં ભીષણ આગ લાગતા હાહાકાર મચી ગયો હતો. આ દુર્ઘટનામાં અત્યાર સુધીમાં 15 લોકોના મોત થયા છે, જેમાં મોટાભાગના વિદ્યાર્થીઓ હોવાનું સામે આવ્યું છે. આ ઘટનાએ સુરતના તક્ષશીલા અગ્નિકાંડની કરુણ યાદ તાજી કરી દીધી છે.

બિલ્ડિંગમાં કોચિંગ અને એનિમેશન સ્ટુડિયો ચાલતો હતો

માહિતી અનુસાર બિલ્ડિંગના બેઝમેન્ટ, ગ્રાઉન્ડ ફ્લોર અને પ્રથમ માળ પર પેટ શોપ અને ક્લિનિક કાર્યરત હતા. જ્યારે બીજા માળે ‘લર્નિંગ સ્પેસ’ નામની લાઇબ્રેરી અને કોચિંગ સેન્ટર તેમજ ‘હેડ હોપર સ્ટુડિયો’ નામનું 3D આર્ટ અને ગેમ ડિઝાઇનિંગ સેન્ટર ચાલતું હતું. આગ ફેલાતા ઉપરના માળે હાજર વિદ્યાર્થીઓ ધુમાડામાં ફસાઈ ગયા હતા.

બચવા માટે વિદ્યાર્થીઓ બાથરૂમમાં છુપાયા

પ્રાથમિક માહિતી મુજબ આગ અને ધુમાડાથી બચવા માટે અનેક વિદ્યાર્થીઓએ પોતાને બાથરૂમમાં બંધ કરી દીધા હતા. ભારે ધુમાડાના કારણે બહાર નીકળવાનો રસ્તો ન મળતા ઘણા વિદ્યાર્થીઓ ગૂંગળાઈ ગયા હોવાનું માનવામાં આવી રહ્યું છે. એક વિદ્યાર્થીએ જીવ બચાવવા માટે પ્રથમ માળેથી છલાંગ મારી હતી, પરંતુ નીચે આવેલી લોખંડની ગ્રીલ પર પટકાતા ગંભીર રીતે ઘાયલ થયો હતો.

શોર્ટ સર્કિટથી આગ લાગી હોવાની આશંકા

હાલ આગ લાગવાનું ચોક્કસ કારણ સામે આવ્યું નથી. જોકે બેઝમેન્ટમાં આવેલા એર કન્ડીશનરમાં શોર્ટ સર્કિટ થવાના કારણે આગ લાગી હોવાની આશંકા વ્યક્ત કરવામાં આવી રહી છે. ફાયર બ્રિગેડની આશરે 10થી વધુ ગાડીઓ, NDRF અને SDRFની ટીમોએ ઘટનાસ્થળે પહોંચી રેસ્ક્યૂ ઓપરેશન હાથ ધર્યું હતું.

દીવાલ તોડીને મૃતદેહો બહાર કાઢવા પડ્યા

બિલ્ડિંગમાં ભારે ધુમાડો ભરાઈ જતાં બચાવ ટીમોને અંદર પ્રવેશવામાં મુશ્કેલી પડી હતી. જેના કારણે ફાયર ફાઈટરોએ બિલ્ડિંગની પાછળની દીવાલ તોડી અંદર પ્રવેશ કર્યો હતો. રેસ્ક્યૂ દરમિયાન અનેક મૃતદેહો બહાર કાઢવામાં આવ્યા હતા.

ગૂંગળામણથી મોત થયાની આશંકા

કિંગ જ્યોર્જ મેડિકલ યુનિવર્સિટી (KGMU)ના તબીબોના જણાવ્યા મુજબ મૃતદેહો પર બહારથી દાઝ્યાના નિશાન ખૂબ ઓછા જોવા મળ્યા છે. જેના આધારે પ્રાથમિક રીતે ગૂંગળામણ અને ઝેરી ધુમાડાના કારણે મોત થયાની આશંકા વ્યક્ત કરવામાં આવી રહી છે. અંતિમ કારણ પોસ્ટમોર્ટમ રિપોર્ટ બાદ સ્પષ્ટ થશે.

ડેપ્યુટી CM બ્રજેશ પાઠક રડી પડ્યા

ઘટનાસ્થળે પહોંચેલા ઉત્તર પ્રદેશના ડેપ્યુટી મુખ્યમંત્રી બ્રજેશ પાઠક ઘટના જોઈને ભાવુક બની ગયા હતા. તેમણે કહ્યું કે, “મારી નજર સામે મૃતદેહો બહાર કાઢવામાં આવી રહ્યા હતા. આ અત્યંત પીડાદાયક ઘટના છે.”

PM મોદીની સહાયની જાહેરાત

વડાપ્રધાન નરેન્દ્ર મોદીએ ઘટનાને લઈને દુઃખ વ્યક્ત કર્યું છે. તેમણે મૃતકોના પરિવારજનોને PM રાહત ભંડોળમાંથી 2 લાખ રૂપિયાની સહાય અને ઘાયલોને 50 હજાર રૂપિયાની આર્થિક મદદ આપવાની જાહેરાત કરી છે.

CM યોગીએ ઉચ્ચ સ્તરીય તપાસના આદેશ આપ્યા

ઉત્તર પ્રદેશના મુખ્યમંત્રી યોગી આદિત્યનાથે અલીગઢનો કાર્યક્રમ અધવચ્ચે છોડીને લખનઉ પરત ફરવાનો નિર્ણય લીધો હતો. તેમણે DGP અને ગૃહ વિભાગના ઉચ્ચ અધિકારીઓને ઘટનાની તાત્કાલિક તપાસ કરીને અહેવાલ સોંપવાના નિર્દેશ આપ્યા છે અને દોષિતો સામે કડક કાર્યવાહી કરવાની ખાતરી આપી છે.

ગુજરાતભરમાં યોગ દિવસની ભવ્ય ઉજવણી

12મા આંતરરાષ્ટ્રીય યોગ દિવસ નિમિત્તે સમગ્ર ગુજરાત યોગમય બની ગયું. અમદાવાદ, ગાંધીનગર, રાજકોટ, સુરત, વડોદરા સહિત રાજ્યના વિવિધ શહેરો અને ગામોમાં સામૂહિક યોગાભ્યાસના કાર્યક્રમો યોજાયા હતા. લાખો લોકોએ એકસાથે યોગ કરીને સ્વસ્થ જીવનનો સંદેશ આપ્યો.

અમદાવાદમાં અમિત શાહે પ્રબુદ્ધ નાગરિકો સાથે યોગ કર્યા

અમદાવાદ મ્યુનિસિપલ કોર્પોરેશન દ્વારા પ્રહલાદનગર ગાર્ડન ખાતે વિશેષ યોગ કાર્યક્રમનું આયોજન કરવામાં આવ્યું હતું. જેમાં કેન્દ્રીય ગૃહ અને સહકારિતા મંત્રી અમિત શાહે પોતાના ગાંધીનગર લોકસભા વિસ્તારના આશરે 100 પ્રબુદ્ધ નાગરિકો સાથે યોગાભ્યાસ કર્યો હતો. આ પ્રસંગે રાજ્યના ગૃહમંત્રી હર્ષ સંઘવી સહિતના આગેવાનો પણ ઉપસ્થિત રહ્યા હતા. અમદાવાદ શહેરમાં કુલ 48થી વધુ સ્થળોએ યોગ કાર્યક્રમો યોજાયા હતા.

માણસામાં રાજ્ય કક્ષાનો મુખ્ય યોગ મહોત્સવ

ગાંધીનગર જિલ્લાના માણસા ખાતે રાજ્ય કક્ષાના મુખ્ય યોગ મહોત્સવનું આયોજન કરવામાં આવ્યું હતું. સાયન્સ કોલેજના વિશાળ મેદાનમાં યોજાયેલા કાર્યક્રમમાં મુખ્યમંત્રી ભૂપેન્દ્ર પટેલે હજારો નાગરિકો સાથે યોગ કર્યો હતો. કાર્યક્રમમાં યુવાનો, મહિલાઓ, વડીલો અને વિદ્યાર્થીઓએ ઉત્સાહભેર ભાગ લીધો હતો. સમગ્ર વિસ્તાર યોગમય વાતાવરણમાં રંગાઈ ગયો હતો.

યોગને જીવનશૈલી બનાવવાનો મુખ્યમંત્રીનો સંદેશ

કાર્યક્રમને સંબોધતા મુખ્યમંત્રી ભૂપેન્દ્ર પટેલે જણાવ્યું કે યોગ માત્ર એક દિવસની ઉજવણી નહીં પરંતુ જીવનભરની આરોગ્ય સુરક્ષાનું કવચ છે. તેમણે લોકોને યોગને રોજિંદી જીવનશૈલીનો ભાગ બનાવવા અપીલ કરી હતી. સાથે જ ‘એક પેડ મા કે નામ’ અભિયાન હેઠળ વૃક્ષારોપણ અને ઓક્સિજન વન ઊભાં કરવા માટે પણ જનજાગૃતિ ફેલાવવાની હાકલ કરી હતી.

રાજ્યમાં 24 હજાર સ્થળોએ યોગાભ્યાસ

મુખ્યમંત્રીએ જણાવ્યું કે સમગ્ર ગુજરાતમાં 330થી વધુ મુખ્ય સ્થળો સહિત કુલ 24,000 જેટલા સ્થળોએ યોગ કાર્યક્રમો યોજાયા હતા. આ કાર્યક્રમોમાં અંદાજે 1.15 કરોડથી વધુ લોકોએ ભાગ લીધો હતો, જે રાજ્ય માટે ગૌરવની બાબત છે.

દેશમાં સૌથી વધુ યોગ ટ્રેનર્સ ગુજરાતમાં

ગુજરાત યોગ ક્ષેત્રે દેશનું અગ્રણી રાજ્ય બન્યું છે. રાજ્યમાં હાલમાં 1.50 લાખથી વધુ યોગ ટ્રેનર્સ કાર્યરત છે. આ ઉપરાંત 5,000થી વધુ નિઃશુલ્ક યોગ ક્લાસ દ્વારા અંદાજે 8 લાખ લોકો નિયમિત યોગ સાથે જોડાયેલા છે.

રાજકોટમાં પાણીમાં યોગ, અનોખું આકર્ષણ બન્યું

રાજકોટના માધવરાવ સિંધિયા ક્રિકેટ ગ્રાઉન્ડ ખાતે હજારો લોકોએ સામૂહિક યોગ કર્યો હતો. બીજી તરફ બાળકો અને મહિલાઓએ પાણીમાં યોગાસન કરીને સૌનું ધ્યાન ખેંચ્યું હતું.આ અનોખા યોગ કાર્યક્રમોની તસવીરો સોશિયલ મીડિયા પર પણ વાયરલ થઈ રહી છે.

યોગથી સ્વસ્થ અને નિરોગી જીવનનો સંદેશ

વિશ્વ યોગ દિવસ નિમિત્તે ગુજરાતભરમાં યોજાયેલા કાર્યક્રમોએ સ્વસ્થ જીવન, માનસિક શાંતિ અને પર્યાવરણ જાગૃતિનો સંદેશ આપ્યો હતો. યોગને જીવનનો અભિન્ન ભાગ બનાવવા માટે રાજ્યભરમાં ઉત્સાહ અને જાગૃતિનું અનોખું દૃશ્ય જોવા મળ્યું.

લેટેન્ટ-2 સાથે સમય રૈનાની વાપસી

ગયા વર્ષે વિવાદોમાં સપડાયેલા ‘ઇન્ડિયાઝ ગોટ લેટેન્ટ’ શો હવે નવા સીઝન સાથે પરત ફર્યો છે. ‘ઇન્ડિયાઝ ગોટ લેટેન્ટ 2’ના પહેલા એપિસોડમાં અભિનેત્રી આલિયા ભટ્ટ અને શર્વરી વાઘ મહેમાન તરીકે પહોંચ્યા હતા. એપિસોડ દરમિયાન સમય રૈના અને આલિયા ભટ્ટ વચ્ચે થયેલી રોસ્ટિંગ અને મજાક-મસ્તી સોશિયલ મીડિયા પર ભારે વાયરલ થઈ રહી છે.

‘મને અહીં આવીને પસ્તાવો થાય છે’

શો દરમિયાન સમય રૈનાએ આલિયા ભટ્ટનું સ્વાગત કરતાં કહ્યું કે તેને વિશ્વાસ નથી થતો કે આલિયા શોના પહેલા એપિસોડમાં આવી છે. જવાબમાં આલિયાએ મજાકીય અંદાજમાં કહ્યું, “મને હવે થોડો પસ્તાવો થઈ રહ્યો છે.” આ સાંભળીને સમય રૈનાએ તરત જ કટાક્ષ કર્યો, “મને પણ ‘જિગરા’ જોઈને પસ્તાવો થયો હતો.” સમયની આ ટિપ્પણી સાંભળીને આલિયા અને શર્વરી બંને હસી પડ્યા હતા.

આલિયાએ પણ આપ્યો ચપળ જવાબ

સમયની ટિપ્પણી બાદ આલિયાએ પણ તરત જવાબ આપતાં કહ્યું, “ઓછામાં ઓછું તમે ફિલ્મ તો જોઈ.” આ જવાબ બાદ સ્ટેજ પર હાજર તમામ લોકો હસવા લાગ્યા હતા.

‘ક્યાં કાન, ક્યાં લેટેન્ટ’

સમય રૈનાએ આગળ આલિયાને કહ્યું કે, “તમારી ફિલ્મોએ હજારો કરોડની કમાણી કરી છે, તમારી પાસે ફિલ્મફેર અને નેશનલ એવોર્ડ છે, તો પછી તમે અહીં શા માટે આવ્યા છો? ક્યાં કાન ફિલ્મ ફેસ્ટિવલ અને ક્યાં લેટેન્ટ. અને અહીં કેમેરા તમારી ઉપર છે.” સમયનો આ કટાક્ષ કાન ફિલ્મ ફેસ્ટિવલ દરમિયાન વાયરલ થયેલા એક વીડિયોને લઈને હતો, જેમાં કેટલાક કેમેરામેન આલિયાને અવગણતા દેખાયા હતા.

કપિલ શર્માનો ઉલ્લેખ કરી આલિયાએ લીધો જવાબ

સમયના કટાક્ષ બાદ આલિયા ભટ્ટે કહ્યું, “અમે બધા લોકોને હસાવવા માટે કપિલ શર્માના ખૂબ આભારી છીએ.” આ સાંભળીને સમય રૈનાએ ફરી મજાક કરતાં કહ્યું, “આલિયા જી, અહીં તમે ફની થઈ ગયા. ઝાકિર ભાઈ સાથે શું થઈ ગયું હતું?” તાજેતરમાં એક એવોર્ડ શોમાં આલિયા ભટ્ટ અને કોમેડિયન ઝાકિર ખાને સાથે હોસ્ટિંગ કરી હતી, જેને લઈને સોશિયલ મીડિયા પર ચર્ચા થઈ હતી.

શર્વરી વાઘને પણ બનાવી મજાકનો વિષય

એપિસોડમાં હાજર શર્વરી વાઘને સમય રૈનાએ મજાકમાં ઓળખવાનો ઇનકાર કરી દીધો હતો. જ્યારે શર્વરીને પૂછવામાં આવ્યું કે તેણે લેટેન્ટના અગાઉના એપિસોડ જોયા છે કે નહીં, ત્યારે તેણે જવાબ આપ્યો કે તેણે શોના વીડિયો ન્યૂઝ ચેનલો પર જોયા છે. આ જવાબ સાંભળીને સમય સહિત સમગ્ર પેનલ હસી પડી હતી.

ટ્રમ્પ બની આવેલા સ્પર્ધકે રણબીરની ઉડાવી મજાક

એપિસોડનો સૌથી ચર્ચાસ્પદ ભાગ ત્યારે આવ્યો જ્યારે એક સ્પર્ધક અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના ગેટઅપમાં સ્ટેજ પર આવ્યો. તેણે મજાકમાં કહ્યું, “હું ખુશ છું કે આ એક્ટ્રેસ રણબીર બર્બાદિયા સાથે નથી, કારણ કે તે મને ખૂબ ડરાવે છે.” આ વાત સાંભળીને આલિયા થોડા સમય માટે ચોંકી ગઈ હતી. પછી સ્પર્ધકે સ્પષ્ટતા કરી કે તે અભિનેતા રણબીર કપૂરની નહીં પરંતુ ‘ઇન્ડિયાઝ ગોટ લેટેન્ટ’ વિવાદમાં ચર્ચામાં આવેલા રણવીર અલાહાબાદિયાની વાત કરી રહ્યો હતો. ત્યારબાદ આલિયાએ રાહતનો શ્વાસ લીધો.

‘એક્ટ્રેસને સ્ક્રિપ્ટ અને ડિરેક્ટર આપો’

બાદમાં આલિયાને ટ્રમ્પ બનેલા સ્પર્ધકને પ્રશ્ન પૂછવાની તક આપવામાં આવી હતી. જોકે આલિયા તરત કોઈ પ્રશ્ન વિચારી શકી નહીં. આ જોઈને સ્પર્ધકે કહ્યું,”એક્ટ્રેસને સ્ક્રિપ્ટ અને ડિરેક્ટર આપો.” આ ટિપ્પણી બાદ સ્ટેજ પર હાજર લોકો જોરદાર હસી પડ્યા હતા અને સ્પર્ધકને સ્ટેન્ડિંગ ઓવેશન પણ મળ્યું હતું.

વિવાદ બાદ ફરી ચર્ચામાં લેટેન્ટ

નોંધનીય છે કે ગયા વર્ષે ‘ઇન્ડિયાઝ ગોટ લેટેન્ટ’ શો વિવાદોમાં સપડાયો હતો અને મામલો કોર્ટ સુધી પહોંચ્યો હતો. હવે નવા સીઝનના પહેલા જ એપિસોડે ફરી સોશિયલ મીડિયા પર ચર્ચા જગાવી છે અને સમય રૈનાની રોસ્ટિંગ સ્ટાઈલ ફરી એકવાર દર્શકોને પસંદ આવી રહી છે.

 

ભારતીય નૌકાદળને મળી નવી તાકાત

ભારતીય નૌકાદળમાં ત્રણ નવા સ્વદેશી યુદ્ધ જહાજો INS દૂનાગીરી, INS સંશોધક અને INS અગ્રયનો સમાવેશ કરવામાં આવ્યો છે. કોલકાતાના શ્યામા પ્રસાદ મુખર્જી પોર્ટ ખાતે યોજાયેલા વિશેષ સમારોહમાં વડાપ્રધાન નરેન્દ્ર મોદીની હાજરીમાં ત્રણેય જહાજો સત્તાવાર રીતે નેવીમાં સામેલ થયા હતા. દેશમાં ડિઝાઇન અને નિર્માણ કરાયેલા આ યુદ્ધ જહાજો ભારતીય નૌકાદળની દરિયાઈ સુરક્ષા અને ઓપરેશનલ ક્ષમતામાં મોટો વધારો કરશે.

પીએમ મોદીએ આત્મનિર્ભર ભારત પર ભાર મૂક્યો

કાર્યક્રમને સંબોધતા વડાપ્રધાન નરેન્દ્ર મોદીએ જણાવ્યું કે ભારત હવે માત્ર સંરક્ષણ સાધનો ખરીદનાર દેશ બની રહેવા માંગતું નથી. તેમણે કહ્યું કે આ જહાજો ભારતીય ઇજનેરોની કુશળતા અને આત્મનિર્ભર ભારતની શક્તિનું પ્રતિક છે. ભારત હવે સંરક્ષણ ક્ષેત્રમાં ઉત્પાદક અને વૈશ્વિક સ્તરે નિર્ણાયક ભૂમિકા ભજવવા માટે આગળ વધી રહ્યું છે.

INS દૂનાગીરી: બ્રહ્મોસ મિસાઇલોથી સજ્જ સ્ટીલ્થ ફ્રિગેટ

INS દૂનાગીરી પ્રોજેક્ટ-17Aનું પાંચમું સ્ટીલ્થ ફ્રિગેટ યુદ્ધ જહાજ છે.

આ જહાજની મુખ્ય વિશેષતાઓ:

• 8 બ્રહ્મોસ સુપરસોનિક મિસાઇલોથી સજ્જ
• દુશ્મનના રડારથી બચી શકે તેવી સ્ટીલ્થ ટેક્નોલોજી
• હેલિકોપ્ટર ઓપરેશન ક્ષમતા
• પૂર્વીય નૌકા કમાન્ડમાં તહેનાત કરાશે

INS દૂનાગીરી બંગાળની ખાડી અને હિન્દ મહાસાગર ક્ષેત્રમાં ભારતની વ્યૂહાત્મક તાકાત વધારશે.

INS સંશોધક: સમુદ્રનો નકશો તૈયાર કરનાર જહાજ

INS સંશોધકનું મુખ્ય કાર્ય યુદ્ધ નહીં પરંતુ સમુદ્રનો સર્વે અને સંશોધન કરવાનું છે.

આ જહાજ:

• 12,000 કિલોમીટર સુધી સતત સફર કરી શકે છે
• દરિયાઈ નકશા (Nautical Charts) તૈયાર કરે છે
• સમુદ્રની ઊંડાઈ અને ભૂગર્ભ માહિતી એકત્ર કરે છે
• Autonomous Underwater Vehicle અને Remote Operated Vehicle જેવી સિસ્ટમથી સજ્જ છે

આ જહાજ બંદરો, દરિયાઈ માર્ગો અને સુરક્ષા કામગીરી માટે મહત્વપૂર્ણ માહિતી પૂરી પાડશે.

INS અગ્રય: દુશ્મન સબમરીન માટે કાળ

INS અગ્રય અર્નાલા ક્લાસનું એન્ટી-સબમરીન વોરફેર શેલો વોટર ક્રાફ્ટ છે.

તેની મુખ્ય ક્ષમતાઓ:

• દુશ્મન સબમરીન શોધી નષ્ટ કરી શકે
• હળવા ટોર્પિડો અને રોકેટ લોન્ચરથી સજ્જ
• અત્યાધુનિક સોનાર સિસ્ટમ
• સાયલન્ટ મોડ ટેક્નોલોજીથી દુશ્મનના રડારથી બચી શકે

ભારતીય કિનારાની સુરક્ષા માટે INS અગ્રય મહત્વપૂર્ણ ભૂમિકા ભજવશે.

ભારતીય નૌકાદળ પાસે કેટલા યુદ્ધ જહાજો છે?

હાલ ભારતીય નૌકાદળ પાસે અંદાજે 140થી 145 સક્રિય યુદ્ધ જહાજો છે.

ભારતનું લક્ષ્ય 2030 સુધીમાં:

• 150થી 160 યુદ્ધ જહાજોનો કાફલો તૈયાર કરવાનો
• હિન્દ મહાસાગરમાં વ્યૂહાત્મક પ્રભુત્વ વધારવાનો
• ચીન અને પાકિસ્તાનની દરિયાઈ ગતિવિધિઓ પર વધુ અસરકારક નજર રાખવાનો

ચીન અને પાકિસ્તાન માટે કેમ મહત્વપૂર્ણ?

પૂર્વીય નૌકા કમાન્ડમાં તહેનાત INS દૂનાગીરી જેવા જહાજો બંગાળની ખાડી અને મલક્કા સ્ટ્રેટ વિસ્તારમાં ચીનની દરિયાઈ હલચલ પર નજર રાખશે. જ્યારે પશ્ચિમ કમાન્ડના જહાજો અરબ સાગરમાં પાકિસ્તાનની ગતિવિધિઓ પર સતત નજર રાખે છે. નવી ક્ષમતાઓ સાથે ભારતીય નૌકાદળની દરિયાઈ સુરક્ષા વધુ મજબૂત બનશે..

જેતપરમાં વીજપોલ વળતર મુદ્દે ખેડૂતોનો વિરોધ તેજ

મોરબી જિલ્લાના જેતપર ગામે ખાનગી વીજ કંપની દ્વારા ખેતરોમાં ઉભા કરાતા વીજપોલ અને તેના વળતરને લઈને ખેડૂતોનું આંદોલન વધુ ઉગ્ર બન્યું છે. ખેડૂતોનો આક્ષેપ છે કે કંપની દ્વારા આપવામાં આવતું વળતર ખૂબ જ ઓછું છે અને ખેતરોને થતા નુકસાનની કોઈ યોગ્ય ભરપાઈ કરવામાં આવી રહી નથી. આંદોલનના ભાગરૂપે ખેડૂતો દ્વારા અનોખી રીતે વિરોધ નોંધાવવામાં આવ્યો હતો.

મુંડન કરાવી વિરોધ, ઉપવાસી છાવણીમાં બેસણું યોજાયું

શનિવારે રાત્રે ઉપવાસી છાવણી ખાતે ખેડૂતો દ્વારા પ્રતિકાત્મક બેસણું અને મોકાણનો કાર્યક્રમ યોજાયો હતો. ખેડૂતોનું કહેવું હતું કે ખાનગી વીજ કંપનીના સંચાલક ગૌતમ અદાણીની “માનવતા મરી પરવારી છે”, જેના વિરોધ સ્વરૂપે આ કાર્યક્રમ યોજવામાં આવ્યો હતો. આ પહેલા પણ 15થી વધુ ખેડૂતો મુંડન કરાવી ચૂક્યા છે. શનિવારે વધુ ખેડૂતો આ વિરોધમાં જોડાતા આંદોલનને નવી ગતિ મળી હતી.

‘નરેન્દ્ર મોદી દેશદ્રોહી છે’ લખેલા પોસ્ટરો સાથે વિરોધ

વિરોધ પ્રદર્શન દરમિયાન કેટલાક ખેડૂતો ગળામાં રાજકીય સૂત્રો લખેલા પોસ્ટરો પહેરીને દેખાયા હતા. જેના કારણે સમગ્ર વિરોધ કાર્યક્રમ ચર્ચાનો વિષય બન્યો હતો. ખેડૂતોનું કહેવું છે કે તેમની માંગણીઓ સાંભળવામાં આવતી નથી અને યોગ્ય વળતર વિના જ કામગીરી આગળ ધપાવવામાં આવી રહી છે.

ત્રણ મહિલાઓ સહિત નવ લોકો આમરણાંત ઉપવાસ પર

ગામમાં ગુરુવારથી આમરણાંત ઉપવાસ આંદોલન શરૂ કરવામાં આવ્યું છે. હાલમાં ત્રણ મહિલાઓ સહિત કુલ નવ લોકો ઉપવાસ પર બેઠા હોવાનું ખેડૂત આગેવાનોનું કહેવું છે. ખેડૂતોનો દાવો છે કે જ્યાં સુધી યોગ્ય વળતર અંગે નિર્ણય નહીં આવે ત્યાં સુધી આંદોલન ચાલુ રહેશે.

‘પહેલા વળતર, પછી વીજપોલ’ની માંગ

આંદોલનકારીઓની મુખ્ય માંગ છે કે ખેતરોમાં વીજપોલ ઉભા કરતા પહેલાં ખેડૂતોને સંપૂર્ણ વળતર ચૂકવવામાં આવે. તેમનું કહેવું છે કે વીજપોલના કારણે ખેતીલાયક જમીનને નુકસાન થઈ રહ્યું છે અને કેટલીક જગ્યાએ વાવણી પણ શક્ય નથી રહી.

મોરબી જિલ્લાના ખેડૂતોનું સમર્થન

શનિવારે યોજાયેલા કાર્યક્રમમાં મોરબી તાલુકા ઉપરાંત જિલ્લાના વિવિધ ગામોના ખેડૂતો મોટી સંખ્યામાં જોડાયા હતા. ખેડૂતોએ આ લડતને તન, મન અને ધનથી ટેકો આપવાની જાહેરાત કરી હતી. વિવિધ સામાજિક સંગઠનો અને ખેડૂત આગેવાનોએ પણ આંદોલનને સમર્થન આપ્યું હતું.

ધવલ પટેલનો આક્ષેપ

વિરોધ દરમિયાન મુંડન કરાવનાર ધવલ પટેલે જણાવ્યું હતું કે કંપની દ્વારા ખેડૂતોને પૂરતું વળતર આપવામાં આવતું નથી. તેમણે કહ્યું કે શરૂઆતમાં 11 લોકો મુંડન કરવાના હતા, પરંતુ ખેડૂતોમાં રોષ એટલો વધુ હતો કે 17થી વધુ લોકો સ્વયંસ્ફૂર્ત રીતે વિરોધમાં જોડાયા.

રાકેશ અમૃતિયાએ આપી ચીમકી

આંદોલનમાં જોડાયેલા રાકેશ અમૃતિયાએ જણાવ્યું હતું કે ખેડૂતોના ખેતરોમાં વીજપોલ ઉભા કરવામાં આવી રહ્યા છે, પરંતુ હજુ સુધી કોઈને યોગ્ય વળતર મળ્યું નથી. તેમણે કહ્યું કે હાલ આંદોલન ગાંધી ચિંધ્યા માર્ગે ચાલી રહ્યું છે, પરંતુ જો માંગણીઓ સંતોષવામાં નહીં આવે તો આગામી સમયમાં વધુ કડક કાર્યક્રમો પણ આપવામાં આવી શકે છે.

ખેડૂતો માગ પર અડગ

ખેડૂતોનું સ્પષ્ટ કહેવું છે કે પૂરતું વળતર ચૂકવ્યા વગર વીજપોલની કામગીરી સ્વીકારવામાં નહીં આવે. આંદોલનકારીઓએ ચેતવણી આપી છે કે જ્યાં સુધી પ્રશ્નનો ઉકેલ નહીં આવે ત્યાં સુધી લડત યથાવત્ રહેશે.

ગુજરાતમાં Re-NEET પરીક્ષા વચ્ચે અમદાવાદમાં હિજાબ મુદ્દે વિવાદ

NEET-UG પેપર લીક બાદ રદ કરાયેલી પરીક્ષાનું આજે રાજ્યભરમાં પુનઃ આયોજન કરવામાં આવ્યું છે. ગુજરાતના 211 પરીક્ષા કેન્દ્રો પર કુલ 79,411 વિદ્યાર્થીઓ પરીક્ષામાં હાજર રહ્યા છે. આ દરમિયાન અમદાવાદના એક પરીક્ષા કેન્દ્ર પર હિજાબ મુદ્દે વિવાદ ઉભો થતા વાલીઓએ હોબાળો મચાવ્યો હતો. અમદાવાદની આર.જે. ટીબ્રવાલ કોલેજ ખાતે કેટલાક વાલીઓએ આક્ષેપ કર્યો કે હિજાબ પહેરીને આવેલી વિદ્યાર્થીનીને પરીક્ષા કેન્દ્રમાં પ્રવેશ આપવામાં આવ્યો, જ્યારે અગાઉ અન્ય વિદ્યાર્થીઓ પાસેથી ધાર્મિક ચિહ્નો દૂર કરાવવામાં આવ્યા હતા.

વાલીઓએ ઉઠાવ્યા ભેદભાવના સવાલો

વિદ્યાર્થીનીના વાલી ખુશ્બુ મહેશ્વરીએ જણાવ્યું કે તેમની દીકરી તમામ ગાઈડલાઈનનું પાલન કરીને પરીક્ષા આપવા આવી હતી. હાથના દોરા, કંઠી સહિતની તમામ વસ્તુઓ કાઢી રાખી હતી. તેમણે આક્ષેપ કરતાં કહ્યું કે કેટલાક વિદ્યાર્થીઓની કંઠી અને દોરા ઉતરાવવામાં આવ્યા હતા, જ્યારે હિજાબ પહેરેલી વિદ્યાર્થીનીને અંતે પરીક્ષા આપવા દેવામાં આવી હતી. આથી વાલીઓમાં પ્રશ્નો ઊભા થયા કે નિયમો દરેક માટે સમાન કેમ નથી.

કોઈપણ પ્રકારની ગેરરીતિ ન થાય તે માટે કડક ચેકિંગ

Re-NEET પરીક્ષાને ધ્યાનમાં રાખીને અમદાવાદ સહિત રાજ્યભરના કેન્દ્રો પર કડક સુરક્ષા વ્યવસ્થા ગોઠવવામાં આવી હતી. વિદ્યાર્થીઓનું મેટલ ડિટેક્ટરથી ચેકિંગ કરવામાં આવ્યું હતું. મોજાં ઉતરાવીને તપાસ, ડબલ લેયર ચેકિંગ, બાયોમેટ્રિક વેરિફિકેશન અને પ્રતિબંધિત વસ્તુઓ અંગે વિશેષ ધ્યાન રાખવામાં આવ્યું હતું. કેન્દ્રોની બહાર NTAની ગાઈડલાઈન અને પ્રતિબંધિત વસ્તુઓની યાદી પણ લગાવવામાં આવી હતી.

અમદાવાદમાં 23 કેન્દ્રો પર 10 હજારથી વધુ વિદ્યાર્થીઓ

અમદાવાદ શહેરમાં કુલ 23 પરીક્ષા કેન્દ્રો પર 10 હજારથી વધુ વિદ્યાર્થીઓએ પરીક્ષા આપી હતી. પરીક્ષા દરમિયાન કોઈ ગેરરીતિ ન થાય તે માટે પોલીસ કંટ્રોલ રૂમથી સતત મોનિટરિંગ કરવામાં આવ્યું હતું. ડ્રોન સર્વેલન્સ, CCTV મોનિટરિંગ અને સાયબર ટીમ દ્વારા સોશિયલ મીડિયા પર પણ નજર રાખવામાં આવી હતી.

પેપર લીક બાદ વિદ્યાર્થીઓમાં તણાવ

અગાઉ પેપર લીકના કારણે પરીક્ષા રદ થતાં વિદ્યાર્થીઓ અને વાલીઓમાં ભારે તણાવ જોવા મળ્યો હતો. વિદ્યાર્થીઓએ જણાવ્યું કે વધારાના એક મહિનાના સમય દરમિયાન તૈયારી માટે વધુ તક મળી હતી, પરંતુ ફરી કોઈ ગેરરીતિ ન થાય અને પેપર લીક ન થાય તેવી ચિંતા હજુ પણ યથાવત્ હતી.

વાલીઓએ જવાબદારી નક્કી કરવાની માગ કરી

કેટલાક વાલીઓએ NEET પેપર લીક જેવી ઘટનાઓ માટે જવાબદારો સામે કડક કાર્યવાહી કરવાની માંગ કરી હતી. વાલીઓનું કહેવું છે કે વિદ્યાર્થીઓની મહેનત અને ભવિષ્ય સાથે વારંવાર ચેડાં ન થવા જોઈએ અને પરીક્ષા પ્રક્રિયા સંપૂર્ણપણે પારદર્શક તથા વિશ્વસનીય બનાવવી જોઈએ.

ગુજરાતમાં વરસાદી માહોલ, દરિયાકાંઠે એલર્ટ જાહેર

રાજ્યમાં આગામી 26 જૂન સુધી સૌરાષ્ટ્ર, દક્ષિણ ગુજરાત સહિતના અનેક જિલ્લાઓમાં ગાજવીજ સાથે વરસાદની આગાહી વચ્ચે કેન્દ્ર સરકારના ગૃહ મંત્રાલય હેઠળ કાર્યરત ઇન્ટિગ્રેટેડ કંટ્રોલ રૂમ ફોર ઈમરજન્સી રિસ્પોન્સ (ICR-ER) દ્વારા માછીમારો માટે ખાસ ચેતવણી જાહેર કરવામાં આવી છે. પરિપત્ર મુજબ આગામી દિવસોમાં ગુજરાતના દરિયાકાંઠે ખરાબ હવામાન અને તોફાની પવનની સ્થિતિ સર્જાઈ શકે છે, જેના કારણે દરિયામાં જનારાઓએ ખાસ સાવચેતી રાખવાની જરૂર છે.

20 જૂને અનેક જિલ્લાઓમાં વરસાદની આગાહી

હવામાન વિભાગના અનુમાન મુજબ બનાસકાંઠા, પાટણ, સાબરકાંઠા, કચ્છ, રાજકોટ, જામનગર, પોરબંદર, જૂનાગઢ, અમરેલી, ભાવનગર, ગીર સોમનાથ, આણંદ, પંચમહાલ, વડોદરા, છોટા ઉદેપુર, ભરુચ, નર્મદા, સુરત, તાપી, નવસારી, ડાંગ અને વલસાડ જિલ્લામાં છૂટાછવાયા સ્થળોએ ગાજવીજ સાથે મધ્યમ વરસાદ પડી શકે છે. કેટલાક વિસ્તારોમાં ભારે પવન અને વીજળીના કડાકા-ભડાકા સાથે વાતાવરણ અસ્થિર રહેવાની સંભાવના છે.

દરિયામાં 60 કિમી પ્રતિ કલાક સુધી પવન ફૂંકાઈ શકે

હવામાન વિભાગના જણાવ્યા મુજબ 20થી 21 જૂન દરમિયાન ગુજરાતના દરિયાકાંઠે 35થી 45 કિલોમીટર પ્રતિ કલાકની ઝડપે પવન ફૂંકાવાની શક્યતા છે.  કેટલાક સમયે તેની ઝડપ વધીને 55 કિલોમીટર પ્રતિ કલાક સુધી પહોંચી શકે છે. ત્યારબાદ 23થી 24 જૂન દરમિયાન સ્થિતિ વધુ ગંભીર બની શકે છે. ગુજરાત અને કોંકણ કાંઠે 40થી 50 કિલોમીટર પ્રતિ કલાકની ઝડપે પવન ફૂંકાશે, જ્યારે વરસાદી ઝાપટાં દરમિયાન તેની ઝડપ 60 કિલોમીટર પ્રતિ કલાક સુધી પહોંચી શકે છે.

24થી 25 જૂન સુધી ખરાબ હવામાન યથાવત્ રહેશે

હવામાન વિભાગે જણાવ્યું છે કે 24થી 25 જૂન દરમિયાન પણ ગુજરાત તથા ઉત્તર કોંકણના દરિયાકાંઠે તોફાની પવન અને ખરાબ હવામાનની સ્થિતિ યથાવત્ રહી શકે છે. આ સમયગાળા દરમિયાન દરિયામાં ઊંચા મોજા અને જોખમી પરિસ્થિતિ સર્જાવાની સંભાવના હોવાથી માછીમારોને વિશેષ સાવચેતી રાખવા જણાવાયું છે.

માછીમારોને ઊંડા દરિયામાં ન જવા સૂચના

ગુજરાતમાં અંદાજે 36 હજારથી વધુ માછીમારી બોટ કાર્યરત છે અને રાજ્યની માછીમાર વસ્તી લગભગ 5.86 લાખ જેટલી છે. રાજ્ય દર વર્ષે 7થી 8.7 લાખ મેટ્રિક ટન જેટલું મત્સ્ય ઉત્પાદન કરે છે. આ વિશાળ માછીમારી વ્યવસાયને ધ્યાનમાં રાખીને તંત્ર દ્વારા માછીમારોને દરિયો ન ખેડવા અને ઊંડા સમુદ્રમાં ન જવા માટે ખાસ સૂચના આપવામાં આવી છે.

અરબી સમુદ્ર અને બંગાળની ખાડીમાં પણ એલર્ટ

ગુજરાત ઉપરાંત અરબી સમુદ્રના અનેક વિસ્તારો અને બંગાળની ખાડીમાં પણ ભારે પવન અને ખરાબ હવામાનની આગાહી કરવામાં આવી છે. તંત્રે તમામ બંદરો, ફિશિંગ હાર્બર અને દરિયાકાંઠાના વિસ્તારોમાં સતત મોનિટરિંગ શરૂ કર્યું છે.

તંત્રની અપીલ

હવામાન વિભાગ અને રાજ્ય તંત્ર દ્વારા માછીમારો, બોટ સંચાલકો અને દરિયાકાંઠાના રહેવાસીઓને સત્તાવાર સૂચનાઓનું પાલન કરવા, હવામાન અપડેટ પર નજર રાખવા અને જોખમી હવામાન દરમિયાન દરિયાકાંઠે બિનજરૂરી અવરજવર ટાળવા અપીલ કરવામાં આવી છે.

53 વર્ષ પહેલા મૃત્યુ પામેલા ખેડૂતના નામે દસ્તાવેજનો દાવો

અરવલ્લી જિલ્લાના બાયડ તાલુકાના વાસણીરેલ ગામની કરોડો રૂપિયાની જમીનના સોદાને લઈને મોટો વિવાદ સામે આવ્યો છે. સામાજિક કાર્યકર યુવરાજસિંહ જાડેજાએ દાવો કર્યો છે કે જે ખેડૂતનું વર્ષ 1972માં અવસાન થઈ ચૂક્યું છે, તેના નામે વર્ષ 2025માં પાવર ઓફ એટર્ની અને વેચાણ દસ્તાવેજ નોંધાયા છે. આ સમગ્ર મામલે યુવરાજસિંહે દસ્તાવેજી વિગતો જાહેર કરીને ઉચ્ચસ્તરીય તપાસની માંગ કરી છે.

1972માં અવસાન, 2025માં પાવર ઓફ એટર્ની?

યુવરાજસિંહના જણાવ્યા મુજબ વાસણીરેલ ગામના મૂળ ખાતેદાર છગનભાઈ જીવણભાઈ પટેલનું 14 જાન્યુઆરી 1972ના રોજ અવસાન થયું હતું. મૃત્યુની સત્તાવાર નોંધ પણ ઉપલબ્ધ હોવાનું તેમણે જણાવ્યું છે. તેમ છતાં 8 એપ્રિલ 2025ના રોજ બાયડ સબ-રજિસ્ટ્રાર કચેરીમાં તેમના નામે પાવર ઓફ એટર્ની અને વેચાણ દસ્તાવેજ નોંધાયો હોવાનું દસ્તાવેજોમાંથી સામે આવતું હોવાનું યુવરાજસિંહનો દાવો છે.

આધાર કાર્ડ અને જમીન રેકોર્ડ વચ્ચે વિસંગતતા

યુવરાજસિંહે વધુમાં આક્ષેપ કર્યો છે કે દસ્તાવેજમાં રજૂ કરાયેલા આધાર કાર્ડમાં છગનભાઈની જન્મ તારીખ 1 જાન્યુઆરી 1971 દર્શાવવામાં આવી છે. જ્યારે મહેસૂલી રેકોર્ડ મુજબ આ જમીન વર્ષ 1950થી તેમના નામે નોંધાયેલી હોવાનું સામે આવે છે. જન્મ વર્ષ અને જમીનની માલિકી વચ્ચેની આ વિસંગતતા અનેક સવાલો ઉભા કરે છે.

વારસદારોને બાજુએ રાખી વેચાણ થયું હોવાનો આક્ષેપ

દાવા મુજબ મૂળ ખાતેદારના કાયદેસરના વારસદારો હયાત હોવા છતાં વારસાઈ પેઢીનામું નોંધ્યા વગર સીધો વેચાણ વ્યવહાર કરવામાં આવ્યો હોવાની આશંકા વ્યક્ત કરવામાં આવી છે. આ ઉપરાંત દસ્તાવેજમાં દર્શાવાયેલા સાક્ષીઓનો ગામ સાથે સીધો સંબંધ ન હોવાનું પણ યુવરાજસિંહે જણાવ્યું છે.

20.60 લાખના ચેક ટ્રાન્ઝેક્શનની તપાસની માંગ

જમીનના સોદામાં રૂ.20.60 લાખના ચેક દ્વારા નાણાકીય વ્યવહાર દર્શાવવામાં આવ્યો હોવાનું સામે આવ્યું છે. યુવરાજસિંહે માંગ કરી છે કે આ રકમ કયા ખાતામાં જમા થઈ, કોના દ્વારા ઉપાડવામાં આવી અને સમગ્ર વ્યવહાર દરમિયાન કઈ પ્રક્રિયા અપનાવવામાં આવી તેની પણ વિગતવાર તપાસ થવી જોઈએ.

SIT રચી ફોજદારી ગુનો નોંધવાની માંગ

યુવરાજસિંહ જાડેજાએ સમગ્ર મામલે જમીન ખરીદનાર, દસ્તાવેજ સાથે સંકળાયેલા વ્યક્તિઓ તેમજ સંભવિત રીતે જવાબદાર અધિકારીઓ સામે ફોજદારી ગુનો નોંધવાની માંગ કરી છે. તેમણે વિવાદિત દસ્તાવેજ રદ કરીને સમગ્ર પ્રકરણની તપાસ માટે સ્પેશિયલ ઈન્વેસ્ટિગેશન ટીમ (SIT)ની રચના કરવાની પણ માંગ કરી છે.

સત્તાવાર પ્રતિક્રિયાની રાહ

આક્ષેપો સામે હજુ સુધી સંબંધિત સરકારી વિભાગો અથવા સંકળાયેલા વ્યક્તિઓ તરફથી કોઈ સત્તાવાર નિવેદન બહાર આવ્યું નથી. જો કે સમગ્ર મામલાની ગંભીરતાને ધ્યાનમાં રાખીને નિષ્પક્ષ અને ઉચ્ચસ્તરીય તપાસની માંગ વધુ જોર પકડી રહી છે.