રાજ્યમાં આગ ઝરતી ગરમી યથાવત
ગુજરાતમાં કાળઝાળ ગરમીનો પ્રકોપ યથાવત રહ્યો છે. બુધવારે રાજ્યના અનેક શહેરોમાં તાપમાન 43 ડિગ્રીને પાર પહોંચી ગયું હતું. સુરેન્દ્રનગર સતત બીજા દિવસે 44°C સાથે રાજ્યનું સૌથી ગરમ શહેર રહ્યું હતું.
અમદાવાદ સહિત અનેક શહેરોમાં તાપમાન ઉંચું
અમદાવાદ શહેરમાં મહત્તમ તાપમાન 43.6°C નોંધાયું હતું, જે સામાન્ય કરતા વધુ હતું. રાજકોટમાં 43.3°C, ગાંધીનગરમાં 42.5°C, અમરેલીમાં 42.1°C અને ડીસામાં 41.8°C તાપમાન નોંધાતા લોકો ગરમીથી ત્રાહિમામ પોકારી ઉઠ્યા હતા.
દરિયાકાંઠાના ભેજવાળા પવનોને કારણે અકળામણ
અમદાવાદ, ગાંધીનગર, વડોદરા, રાજકોટ અને સુરેન્દ્રનગર સહિતના વિસ્તારોમાં દરિયાકાંઠાના ભેજવાળા પવનો ફૂંકાતા રાત્રિના સમયે પણ ભારે અકળામણ અનુભવાઈ રહી છે. લોકો ગરમી અને ભેજના ડબલ એટેકથી પરેશાન બન્યા છે.
ચાર દિવસ વરસાદ અને વાવાઝોડાની આગાહી
હવામાન વિભાગે 30 મેથી 2 જૂન દરમિયાન ગુજરાતના વિવિધ વિસ્તારોમાં ગાજવીજ સાથે વરસાદ અને વાવાઝોડાની આગાહી વ્યક્ત કરી છે. 40થી 50 કિલોમીટર પ્રતિ કલાકની ઝડપે પવન ફૂંકાઈ શકે છે.
30 મેના રોજ આ જિલ્લાઓમાં વરસાદની શક્યતા
30 મેના રોજ બનાસકાંઠા, પાટણ, સાબરકાંઠા, અરવલ્લી, મહીસાગર અને કચ્છ જિલ્લામાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદ વરસી શકે છે.
31 મે અને 1 જૂને વધશે વરસાદી માહોલ
31 મેના રોજ ઉત્તર અને મધ્ય ગુજરાતના અનેક જિલ્લાઓમાં પવન અને ગાજવીજ સાથે વરસાદની શક્યતા છે. જ્યારે 1 જૂને વડોદરા, નર્મદા, પંચમહાલ, દાહોદ તેમજ સૌરાષ્ટ્રના અમરેલી અને ભાવનગર જિલ્લામાં પણ વરસાદી માહોલ સર્જાઈ શકે છે.
2 જૂને દક્ષિણ ગુજરાતમાં પણ અસર
2 જૂને પંચમહાલ, દાહોદ, મહીસાગર, નર્મદા, ડાંગ, તાપી સહિતના વિસ્તારોમાં ગાજવીજ અને પવન સાથે વરસાદ થવાની આગાહી કરવામાં આવી છે.
તાપમાનમાં 2થી 4 ડિગ્રી ઘટાડાની શક્યતા
હવામાન વિભાગ અનુસાર આગામી 24 કલાક સુધી ગરમીમાં ખાસ ફેરફાર નહીં થાય, પરંતુ ત્યારબાદ રાજ્યના મહત્તમ તાપમાનમાં 2થી 4 ડિગ્રી સુધી ઘટાડો થઈ શકે છે.
ચોમાસાની ગતિમાં તેજી
દક્ષિણ-પશ્ચિમ ચોમાસું અરબી સમુદ્ર અને બંગાળની ખાડીના વધુ વિસ્તારોમાં આગળ વધ્યું છે. આગામી 2થી 3 દિવસમાં ચોમાસું દેશના અન્ય ભાગોમાં પણ આગળ વધે તેવી શક્યતા વ્યક્ત કરવામાં આવી છે.
