samachardiary24x7.in

Category: ગુજરાત

  • 24 કલાકમાં 24 તાલુકામાં વરસાદ, 1થી 7 સપ્ટેમ્બર હળવાથી મધ્યમ વરસાદની આગાહી

    છેલ્લા 24 કલાકમાં ગુજરાતના 24 તાલુકામાં 1થી 10 મિમી સુધીનો વરસાદ નોંધાયો છે. નવસારી અને વલસાડ જિલ્લામાં વરસાદનું પ્રમાણ વધુ રહ્યું છે. અમદાવાદ સહિત સમગ્ર રાજ્યમાં આગામી સાત દિવસ દરમિયાન હળવાથી મધ્યમ વરસાદી માહોલ રહેવાની આગાહી કરવામાં આવી છે.

    1થી 7 સપ્ટેમ્બર વરસાદની આગાહી
    હવામાન વિભાગ મુજબ 1થી 7 સપ્ટેમ્બર દરમિયાન રાજ્યમાં ગાજવીજ સાથે હળવાથી મધ્યમ વરસાદ પડી શકે છે. જોકે, આ સમયગાળા દરમિયાન કોઈપણ જિલ્લામાં ભારે વરસાદનું એલર્ટ આપવામાં આવ્યું નથી. અમદાવાદમાં આજે વાદળછાયા વાતાવરણ વચ્ચે હળવા વરસાદની શક્યતા છે.

    અમદાવાદમાં તાપમાન વધ્યું
    અમદાવાદમાં ગઈકાલે મહત્તમ તાપમાન 33.3 ડિગ્રી અને લઘુત્તમ તાપમાન 26.7 ડિગ્રી નોંધાયું હતું. મહત્તમ તાપમાન સામાન્ય કરતાં 0.7 ડિગ્રી અને લઘુત્તમ તાપમાન સામાન્ય કરતાં 1.6 ડિગ્રી વધુ રહ્યું છે.

    સિઝનનો વરસાદ 14% ઓછો
    1 જૂનથી અત્યાર સુધી રાજ્યમાં સિઝનનો કુલ વરસાદ સામાન્ય કરતાં 14% ઓછો નોંધાયો છે. સૌરાષ્ટ્રમાં વરસાદની 35% ઘટ જોવા મળી છે. અમદાવાદમાં અત્યાર સુધી 595.3 મિમી વરસાદ નોંધાયો છે, જે સામાન્ય કરતાં 3% ઓછો છે.

    1થી 4 સપ્ટેમ્બરની આગાહી
    ઉત્તર ગુજરાતના તમામ જિલ્લાઓમાં છૂટાછવાયા સ્થળોએ હળવાથી મધ્યમ વરસાદ અથવા ગાજવીજ સાથે વરસાદની શક્યતા છે. અમદાવાદ ઉપરાંત ગાંધીનગર, મહેસાણા, પાટણ, સાબરકાંઠા, અરવલ્લી, ખેડા, આણંદ, પંચમહાલ, દાહોદ અને મહીસાગરમાં વરસાદ પડી શકે છે. દક્ષિણ ગુજરાતના કેટલાક વિસ્તારોમાં પણ વરસાદની આગાહી છે.

    5 અને 6 સપ્ટેમ્બરે વરસાદની શક્યતા
    5 અને 6 સપ્ટેમ્બરે ઉત્તર તથા દક્ષિણ ગુજરાતના તમામ જિલ્લાઓમાં કેટલાક સ્થળોએ હળવાથી મધ્યમ વરસાદ પડી શકે છે. સૌરાષ્ટ્ર-કચ્છમાં છૂટાછવાયા સ્થળોએ વરસાદની શક્યતા છે.

    7 સપ્ટેમ્બરે પણ વરસાદી માહોલ
    7 સપ્ટેમ્બરે રાજ્યના વિવિધ વિસ્તારોમાં છૂટાછવાયા સ્થળોએ હળવાથી મધ્યમ વરસાદની આગાહી કરવામાં આવી છે. ભારે વરસાદની કોઈ ચેતવણી આપવામાં આવી નથી.

    વેલ-માર્ક્ડ લો-પ્રેશર સક્રિય
    હાલ ગંગેટિક વેસ્ટ બંગાળ અને ઉત્તર ઓડિશાની આસપાસ વેલ-માર્ક્ડ લો-પ્રેશર એરિયા સક્રિય છે. તેની સાથેનું સાયક્લોનિક સર્ક્યુલેશન 7.6 કિલોમીટર સુધી વિસ્તરેલું છે. આગામી 24 કલાકમાં આ સિસ્ટમ પશ્ચિમ-ઉત્તરપશ્ચિમ દિશામાં આગળ વધે તેવી શક્યતા છે. ગુજરાતથી આ સિસ્ટમ તરફ ટ્રફ પણ સક્રિય છે.

  • ‘સિવિલ પોસ્ટ પર બીમારીના આધારે પ્રમોશન રોકી શકાય નહીં’: HIV ગ્રસ્ત CRPF મહિલા કર્મચારીના કેસમાં હાઇકોર્ટની કેન્દ્રને ટકોર

    ગુજરાત હાઇકોર્ટે HIV ગ્રસ્ત CRPF મહિલા કર્મચારીને પ્રમોશન અને એરિયર્સના લાભ ન આપવાના મામલે કેન્દ્રીય ગૃહ મંત્રાલય સામે સખત નારાજગી વ્યક્ત કરી છે. મહિલા કર્મચારીએ CRPFમાં આસિસ્ટન્ટ કમાન્ડન્ટ (મિનિસ્ટ્રીઅલ) પોસ્ટના પ્રમોશન માટેના નિયમોને પડકાર્યા હતા. HIV ગ્રસ્ત હોવાના કારણે મેડિકલ બોર્ડે તેમને ‘શેપ-01’ કેટેગરીમાં નહીં આવતા હોવાનું જણાવી પ્રમોશનથી વંચિત રાખ્યા હતા.

    2016ના બદલે 2019થી પ્રમોશન આપવાની તૈયારીથી વિવાદ
    હાઇકોર્ટે અગાઉ મહિલા કર્મચારી સાથે ભેદભાવ થયો હોવાનું નોંધ્યું હતું અને તેમના જુનિયર્સને જે તારીખે પ્રમોશન મળ્યું હતું તે તારીખથી તમામ પ્રમોશનલ લાભ અને એરિયર્સ ચૂકવવાનો આદેશ આપ્યો હતો. જોકે, તંત્ર દ્વારા વર્ષ 2016ના બદલે વર્ષ 2019થી પ્રમોશન આપવાની તૈયારી દર્શાવવામાં આવી હતી. કેન્દ્ર તરફથી મેડિકલ રિપોર્ટ અને મેડિકલ કેટેગરીના નિયમોનો હવાલો આપવામાં આવ્યો હતો, જેને કોર્ટે સ્વીકાર્યો નહોતો.

    સિવિલ પોસ્ટમાં બીમારીના આધારે પ્રમોશન રોકી શકાય નહીં
    હાઇકોર્ટે સ્પષ્ટ ટકોર કરી હતી કે કોમ્બેટ રોલમાં શારીરિક ક્ષમતાની શરતો અલગ હોઈ શકે છે, પરંતુ સિવિલ અથવા મિનિસ્ટ્રીઅલ ડેસ્ક જોબમાં માત્ર ક્લિનિકલ કન્ડિશનના આધારે પ્રમોશન રોકી શકાય નહીં. કોર્ટે સવાલ કર્યો હતો કે હૃદયરોગ કે ડાયાબિટીસ ધરાવતા કર્મચારીઓ માટે આવા નિયમો કેવી રીતે લાગુ થશે. અદાલતે HIVના આધારે ભેદભાવને બંધારણીય અધિકારોના ભંગ સાથે જોડીને તંત્રની નીતિ સામે સવાલો ઉઠાવ્યા હતા.

    3 અઠવાડિયામાં આદેશનો અમલ નહીં થાય તો કન્ટેમ્પ્ટની ચીમકી
    હાઇકોર્ટે કેન્દ્ર સરકારને અગાઉના આદેશનો યોગ્ય અમલ કરવા માટે 3 અઠવાડિયાનો આખરી સમય આપ્યો છે. જો નિર્ધારિત સમયમાં કોર્ટના આદેશનું પાલન નહીં થાય તો કેન્દ્રીય ગૃહ સચિવ સામે કન્ટેમ્પ્ટ ઓફ કોર્ટની કાર્યવાહી હાથ ધરવાની ચીમકી આપવામાં આવી છે.

  • નેપાળમાં ફરી પૂરનું એલર્ટ, મૃત્યુઆંક 1 હજારને પાર; 4,400થી વધુ લોકો ગુમ

    નેપાળમાં નદીઓનું જળસ્તર વધ્યા બાદ 7 જિલ્લામાં ફરી પૂરનું એલર્ટ જાહેર કરવામાં આવ્યું છે. રસુવા, નુવાકોટ, ધાદિંગ, ગોરખા, તનહું, નવલપરાસી અને ચિતવન જિલ્લામાં નદી કિનારે આવેલા વિસ્તારો માટે ચેતવણી જાહેર કરાઈ છે.

    મૃત્યુઆંક 1 હજારને પાર
    26 ઓગસ્ટે તિબેટમાં ગ્લેશિયર તૂટ્યા બાદ નેપાળના અનેક વિસ્તારોમાં અચાનક પૂર અને ભૂસ્ખલન સર્જાયું હતું. આ આફતમાં નેપાળમાં 987 અને તિબેટમાં 16 લોકોનાં મોત થયા છે. જ્યારે 4,400થી વધુ લોકો હજુ ગુમ છે.

    ચિતવનમાં સૌથી વધુ મૃતદેહ
    ચિતવનમાં અત્યાર સુધીમાં સૌથી વધુ 321 મૃતદેહ મળી આવ્યા છે. મોટી સંખ્યામાં મૃતદેહ મળતાં તેમની ઓળખ કરવી મુશ્કેલ બની રહી છે.

    એક મૃતદેહ પર ત્રણ પરિવારોનો દાવો
    પોખરાની એક હોસ્પિટલમાં રાખવામાં આવેલા એક મૃતદેહ પર ત્રણ પરિવારોએ દાવો કર્યો છે. હવે DNA ટેસ્ટ દ્વારા મૃતદેહની ઓળખ કરવામાં આવશે. કેટલાક પરિવારો ફોટા, કપડાં, ઘરેણાં, ટેટૂ અને શરીરના નિશાનના આધારે પણ ઓળખ કરવાનો પ્રયાસ કરી રહ્યા છે.

    અજાણ્યા મૃતદેહોને સામૂહિક કબરોમાં દફનાવાયા
    ચિતવનમાં મોર્ચ્યુરીમાં જગ્યા ઓછી પડતાં અને સ્વાસ્થ્ય સંબંધિત જોખમ વધતાં અજાણ્યા મૃતદેહોને સામૂહિક કબરોમાં દફનાવવાની કામગીરી શરૂ કરવામાં આવી છે. ભવિષ્યમાં ઓળખ થઈ શકે તે માટે દરેક મૃતદેહને અલગ ઓળખ નંબર આપવામાં આવી રહ્યો છે.

    11 હજારથી વધુ લોકોનું રેસ્ક્યૂ
    પૂરગ્રસ્ત વિસ્તારોમાંથી અત્યાર સુધીમાં 11 હજારથી વધુ લોકોને સુરક્ષિત બહાર કાઢવામાં આવ્યા છે. બચાવ કામગીરીમાં નેપાળ સેના સહિત 22 હજારથી વધુ સુરક્ષાકર્મીઓ અને 16 હેલિકોપ્ટર તૈનાત કરવામાં આવ્યા છે.

    પ્રિન્સિપાલે બચાવ્યા 900 વિદ્યાર્થીઓના જીવ
    ત્રિશુલી સેકન્ડરી સ્કૂલના પ્રિન્સિપાલ રાજેન્દ્ર દવાડીએ પૂર પહેલાં સમયસર શાળા ખાલી કરાવીને લગભગ 900 વિદ્યાર્થીઓના જીવ બચાવ્યા હતા. વિદ્યાર્થીઓને નજીકની ટેકરી પર લઈ જવાયા બાદ થોડા જ સમયમાં પાણી, કાદવ અને કાટમાળનો તેજ પ્રવાહ શાળાની આખી ઇમારતને વહાવી ગયો હતો.

    8 વર્ષનો બાળક વૃક્ષ પર ચઢીને બચ્યો
    પૂર દરમિયાન વૃક્ષ પર ચઢીને જીવ બચાવનાર 8 વર્ષનો જોયલ ઘાલે તેની માતાને મળી આવ્યો છે. પૂર બાદ ઈજાગ્રસ્ત હાલતમાં મળેલા જોયલને એરલિફ્ટ કરીને સારવાર માટે કાઠમંડુ મોકલવામાં આવ્યો હતો.

    તિબેટમાં પણ બચાવ અભિયાન ચાલુ
    તિબેટમાં પૂર અને ભૂસ્ખલનના એક અઠવાડિયા બાદ પણ બચાવ અભિયાન ચાલુ છે. ચીન-નેપાળ સરહદ સુધીના છેલ્લા એક કિલોમીટરના રસ્તાને ફરી જોડવાના પ્રયાસો થઈ રહ્યા છે. ભારે વરસાદ અને પાણીના વહેણ વચ્ચે નવા ભૂસ્ખલન અને ગ્લેશિયર તૂટવાના જોખમને કારણે રાહત કામગીરીમાં મુશ્કેલી પડી રહી છે.

  • SCO સમિટમાં PM મોદી અને શી જિનપિંગની અચાનક મુલાકાત: હાથ મિલાવી કરી વાતચીત, આતંકવાદ સામે એકજૂટ કાર્યવાહીની અપીલ

    કિર્ગિસ્તાનના બિશ્કેકમાં યોજાયેલી 26મી શાંઘાઈ કોઓપરેશન ઓર્ગેનાઈઝેશન (SCO) સમિટ દરમિયાન વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગની અચાનક મુલાકાત થઈ હતી. બંને નેતાઓએ એકબીજા સાથે હાથ મિલાવ્યા અને થોડા સમય સુધી વાતચીત કરી હતી. બંને વચ્ચે અલગથી દ્વિપક્ષીય બેઠક અગાઉથી નક્કી કરવામાં આવી નહોતી. આ દરમિયાન રશિયાના રાષ્ટ્રપતિ વ્લાદિમીર પુતિન પણ બંને નેતાઓ સાથે જોવા મળ્યા હતા.

    SCOમાં PM મોદીએ આતંકવાદ મુદ્દે આપ્યો સ્પષ્ટ સંદેશ
    SCO સમિટમાં પોતાના સંબોધન દરમિયાન PM મોદીએ આતંકવાદ સામે તમામ દેશોને એકજૂટ કાર્યવાહી કરવાની અપીલ કરી હતી. પાકિસ્તાનના વડાપ્રધાન શાહબાઝ શરીફની હાજરીમાં તેમણે કહ્યું કે આતંકવાદના મુદ્દે કોઈ બેવડો અભિગમ ન હોવો જોઈએ. PM મોદીએ આતંકવાદને નીતિના સાધન તરીકે ઉપયોગ કરનારા અને આતંકવાદીઓને આશ્રય આપનારા દેશોને સ્પષ્ટ સંદેશ આપવાની જરૂરિયાત પર ભાર મૂક્યો હતો.

    આતંકવાદીઓ સાથે સમગ્ર નેટવર્કને ખતમ કરવા ભાર
    PM મોદીએ કહ્યું કે માત્ર આતંકવાદીઓ સામે કાર્યવાહી કરવી પૂરતી નથી. આતંકવાદને મળતું ફંડિંગ, ભરતીનું નેટવર્ક, કટ્ટરવાદ અને આતંકવાદીઓને મળતા સુરક્ષિત આશ્રયસ્થાનો સહિત સમગ્ર તંત્રને ખતમ કરવું જરૂરી છે. તેમણે કહ્યું કે કોઈ દેશ માટે આતંકવાદ ખોટો અને બીજા દેશ માટે યોગ્ય હોઈ શકે નહીં, તમામ દેશોએ આતંકવાદ સામે એકસરખી અને કડક નીતિ અપનાવવી પડશે.

    યુદ્ધ નહીં, વાતચીત અને કૂટનીતિથી ઉકેલની અપીલ
    પશ્ચિમ એશિયામાં ચાલી રહેલા સંઘર્ષનો ઉલ્લેખ કરતાં PM મોદીએ કહ્યું કે યુદ્ધની અસર દૂર સુધી પહોંચે છે. દેશો વચ્ચે કોઈ વિવાદ હોય તો તેનો ઉકેલ યુદ્ધના બદલે વાતચીત અને કૂટનીતિના માધ્યમથી શોધવો જોઈએ. તેમણે SCOને વિવિધ દેશોની સંસ્કૃતિ, સભ્યતા અને વિચારોને જોડવાનું મહત્વપૂર્ણ મંચ ગણાવ્યું હતું.

    પુતિને SCOને વિશ્વનું સૌથી મોટું ક્ષેત્રીય સંગઠન ગણાવ્યું
    રશિયાના રાષ્ટ્રપતિ વ્લાદિમીર પુતિને SCOની વધતી વૈશ્વિક ભૂમિકાનો ઉલ્લેખ કરતા કહ્યું કે શરૂઆતમાં કેટલાક દેશોના નાના સંગઠન તરીકે શરૂ થયેલું SCO હવે વિશ્વનું સૌથી મોટું ક્ષેત્રીય સંગઠન બની ગયું છે. તેમના જણાવ્યા મુજબ SCOના સભ્ય દેશોમાં વિશ્વની લગભગ અડધી વસ્તી રહે છે અને આ દેશો વૈશ્વિક GDPના આશરે એક-તૃતીયાંશ ભાગનું પ્રતિનિધિત્વ કરે છે. પુતિને બીજા વિશ્વયુદ્ધની યાદ અપાવતા નવા વૈશ્વિક સંઘર્ષોને રોકવા માટે દેશોએ સાથે મળીને કામ કરવાની જરૂરિયાત પર પણ ભાર મૂક્યો હતો.

  • ગોવા-દિલ્હી ઈન્ડિગો ફ્લાઇટના એન્જિનમાં ખામી: 14 હજાર ફૂટની ઊંચાઈએ જાણ થઈ, ગોવા એરપોર્ટ પર ઇમરજન્સી લેન્ડિંગ

    ગોવાથી દિલ્હી જઈ રહેલી ઈન્ડિગોની ફ્લાઇટ 6E 2102ના એન્જિનમાં ઉડાન ભર્યાના થોડા સમય બાદ ટેક્નિકલ ખામીની જાણ થતાં ફ્લાઇટને ગોવા તરફ પરત વાળવામાં આવી હતી. ફ્લાઇટે સવારે આશરે 9:16 વાગ્યે ઉડાન ભરી હતી અને 9:30 વાગ્યે ગોવાના મનોહર ઇન્ટરનેશનલ એરપોર્ટ પર સુરક્ષિત લેન્ડિંગ કરાવવામાં આવ્યું હતું. ફ્લાઇટ ટ્રેકિંગ ડેટા અનુસાર, પરત ફરવાનું શરૂ કર્યું ત્યારે વિમાન આશરે 14 હજાર ફૂટની ઊંચાઈએ હતું.

    મુસાફરોને ટેક્નિકલ ખામીની જાણ નહોતી

    ફ્લાઇટમાં કેટલા મુસાફરો સવાર હતા અને એન્જિનમાં કયા પ્રકારની ટેક્નિકલ ખામી સર્જાઈ હતી તેની વિગતવાર માહિતી હાલ સામે આવી નથી. મળતી માહિતી મુજબ, ફ્લાઇટમાં સવાર મુસાફરોને ટેક્નિકલ ખામી અંગે જાણ કરવામાં આવી ન હતી. જોકે, પાઇલટ્સે પરિસ્થિતિને ધ્યાનમાં રાખીને જરૂરી પ્રક્રિયા હાથ ધરી હતી.

    SOP મુજબ પાઇલટે ફ્લાઇટને ગોવા પરત વાળી

    ઘટના અંગે ઈન્ડિગોએ નિવેદન જાહેર કરીને જણાવ્યું કે 1 સપ્ટેમ્બર 2026ના રોજ નોર્થ ગોવાથી દિલ્હી જઈ રહેલી ફ્લાઇટ 6E 2102માં ઉડાન ભર્યાના થોડા સમય બાદ ટેક્નિકલ ખામીની જાણ થઈ હતી. એરલાઇનના જણાવ્યા મુજબ, SOP એટલે કે સ્ટાન્ડર્ડ ઓપરેટિંગ પ્રોસિજરનું પાલન કરીને સંબંધિત અધિકારીઓને જાણ કરવામાં આવી હતી.

    મનોહર એરપોર્ટ પર ફ્લાઇટનું સુરક્ષિત લેન્ડિંગ

    ટેક્નિકલ ખામીની જાણ થયા બાદ પાઇલટ્સે વિમાનને પાછું મનોહર ઇન્ટરનેશનલ એરપોર્ટ તરફ વાળ્યું હતું. ફ્લાઇટનું સુરક્ષિત લેન્ડિંગ કરાવવામાં આવ્યું હતું. હાલ એન્જિનમાં સર્જાયેલી ખામીનું ચોક્કસ કારણ જાણવા માટે તપાસ હાથ ધરવામાં આવી રહી છે.

  • PM મોદીની ફરી અપીલ: ‘જરૂર ન હોય તો સોનાની ખરીદી ટાળો’, 7.8% આર્થિક વૃદ્ધિ પર દેશવાસીઓને અભિનંદન

    PM નરેન્દ્ર મોદીએ ભારતની 7.8% આર્થિક વૃદ્ધિને લઈને દેશવાસીઓને અભિનંદન પાઠવ્યા છે. સોશિયલ મીડિયા પર વીડિયો જાહેર કરીને PM મોદીએ કહ્યું કે વૈશ્વિક પડકારો વચ્ચે ભારતે આ વિકાસદર હાંસલ કર્યો છે અને આ સિદ્ધિ દેશવાસીઓની ઈચ્છાશક્તિ, મહેનત અને સામૂહિક તાકાતનું પરિણામ છે.

    ‘જરૂર ન હોય તો સોનું ન ખરીદો’
    PM મોદીએ ફરી એકવાર દેશવાસીઓને સોનાની ખરીદી અંગે અપીલ કરી છે. તેમણે કહ્યું કે જો જરૂર ન હોય તો સોનું ખરીદવું જોઈએ નહીં. આ અગાઉ પણ PM મોદીએ લોકોને બિનજરૂરી સોનાની ખરીદી ટાળવાની અપીલ કરી હતી. ભારત પોતાની સોનાની જરૂરિયાતનો મોટો હિસ્સો વિદેશમાંથી આયાત કરે છે, જેના કારણે દેશમાંથી મોટા પ્રમાણમાં વિદેશી હૂંડિયામણ બહાર જાય છે.

    વિદેશ પ્રવાસ અને વિદેશી લગ્નને લઈને પણ અપીલ
    PM મોદીએ લોકોને બિનજરૂરી વિદેશ પ્રવાસ ટાળવા અને વિદેશમાં લગ્ન કરવાને બદલે દેશમાં જ આવા આયોજન કરવા અપીલ કરી છે. તેમણે **‘મેક ઇન ઇન્ડિયા’ના મંત્ર સાથે સ્વદેશી વસ્તુઓને પ્રોત્સાહન આપવા પર પણ ભાર મૂક્યો છે.

    સોનાની આયાતથી વિદેશી હૂંડિયામણ પર દબાણ
    સોનાની સ્થાનિક અને વૈશ્વિક કિંમતોમાં થયેલા વધારાને કારણે તેની આયાતનું બિલ પણ વધી રહ્યું છે. ભારત પોતાની સોનાની માંગનો મોટો હિસ્સો આયાત દ્વારા પૂરો કરે છે. આવી સ્થિતિમાં બિનજરૂરી સોનાની ખરીદી ઘટે તો આયાત પાછળ થતો વિદેશી હૂંડિયામણનો ખર્ચ ઘટાડવામાં મદદ મળી શકે છે અને રૂપિયાની સ્થિરતા જાળવવામાં પણ સહાય થઈ શકે છે.

    2047 સુધીમાં વિકસિત ભારતનું લક્ષ્ય
    PM મોદીએ કહ્યું કે ભારતે આર્થિક વિકાસની ગતિ જાળવી રાખવી પડશે અને તેને વધુ ઝડપી બનાવવી પડશે. તેમણે વિશ્વાસ વ્યક્ત કર્યો કે જ્યારે ભારત આઝાદીના 100 વર્ષ પૂર્ણ કરશે, ત્યારે દેશની યુવા પેઢીને એક વિકસિત ભારત સોંપવામાં આવશે.

  • ભાવનગર લઠ્ઠાકાંડમાં મૃત્યુઆંક 9 થયો, 46 અસરગ્રસ્ત સારવાર હેઠળ; 21 સામે ફરિયાદ, 13ની ધરપકડ

    ભાવનગરમાં નકલી ઇંગ્લિશ દારૂ પીવાથી સર્જાયેલા લઠ્ઠાકાંડમાં મૃત્યુઆંક 9 પર પહોંચ્યો છે, જ્યારે 46 જેટલા લોકો અસરગ્રસ્ત થતાં વિવિધ હોસ્પિટલમાં સારવાર હેઠળ છે. સમગ્ર મામલે પોલીસ અને એજન્સીઓએ તપાસ તેજ કરી છે.19 ઓગસ્ટની રાત્રે ગાંધી કોલોની સામે આવેલા ગિલ્બર્ટ એપાર્ટમેન્ટના બીજા માળેથી સોનગઢની સરકારી શાળાના શિક્ષક હિતેશ પરમારની શંકાસ્પદ હાલતમાં લાશ મળી હતી. પોલીસે ઘરના રસોડામાંથી રોયલ સ્ટેગની અડધી ભરેલી બોટલ પણ જપ્ત કરી હતી. કાળીયાબીડ વિસ્તારમાં ભગવતી સર્કલ પાસે રહેતા 35 વર્ષીય જય જીતેન્દ્રભાઈ ભટ્ટીનું પણ મોત થયું છે

    નકલી દારૂથી 9નાં મોત
     ભાવનગરમાં મિથેનોલયુક્ત નકલી દારૂ પીવાના કારણે અત્યાર સુધીમાં 9 લોકોના મોત થયા છે, જ્યારે 46 લોકો અસરગ્રસ્ત થયા હોવાનું સામે આવ્યું છે.

    21 સામે ફરિયાદ, 13ની ધરપકડ
     લઠ્ઠાકાંડ મામલે પોલીસે 21 લોકો વિરુદ્ધ ફરિયાદ નોંધી છે. અત્યાર સુધીમાં 13 આરોપીની ધરપકડ કરવામાં આવી છે. મુખ્ય સૂત્રધાર રઈસને SMCએ ઇન્દોરથી ઝડપી પાડ્યો છે.

    મિથેનોલયુક્ત દારૂ બનાવવાનો ખુલાસો
     પોલીસ તપાસમાં સામે આવ્યું છે કે ઉજ્જૈનથી નરેન્દ્રસિંહ યાદવ ઉર્ફે ડૉક્ટરને બોલાવી મિથેનોલયુક્ત દારૂ તૈયાર કરવામાં આવ્યો હતો. આ દારૂ તૈયાર કરનાર નરેન્દ્રસિંહે પણ તેનું સેવન કર્યું હતું અને બાદમાં તેનું મોત થયું હતું.

    સુરતમાં પણ ગંભીર અસર
     ભાવનગરથી નકલી દારૂ પીને સુરત આવેલા સંજયસિંહની તબિયત લથડી હતી. હાલ તે છેલ્લા ત્રણ દિવસથી બેભાન અવસ્થામાં સારવાર હેઠળ છે. તેના રિપોર્ટમાં ઇથેનોલ-મિથેનોલ પોઈઝનની અસર હોવાની માહિતી સામે આવી છે.

    પોલીસ કાર્યવાહી તેજ
     મોડી રાત સુધી SMC, LCB અને સ્થાનિક પોલીસે બુટલેગરોના ઠેકાણે સર્ચ ઓપરેશન હાથ ધર્યું હતું. બોટાદ અને અમરેલીથી 100 પોલીસ કર્મચારીઓને પણ બંદોબસ્તમાં તહેનાત કરવામાં આવ્યા છે.

    પોલીસ અધિકારીઓ સામે પણ કાર્યવાહી
     ભાવનગર રેન્જ IGએ વરતેજ પોલીસ મથકના PI A.B. પઢેરિયાને સસ્પેન્ડ કર્યા છે. અગાઉ વરતેજ પોલીસ મથકના ચાર પોલીસ કર્મીઓને પણ સસ્પેન્ડ કરવામાં આવ્યા હતા.

    હોસ્પિટલમાં ખાસ સારવારની વ્યવસ્થા
     ભાવનગરની સર ટી. હોસ્પિટલમાં અસરગ્રસ્ત દર્દીઓની સંખ્યા વધતા તબીબોની ચાર ટીમો રાઉન્ડ ધ ક્લોક સારવાર આપી રહી છે. કિડની અને લીવરના નિષ્ણાતોને પણ સારવાર માટે બોલાવવામાં આવ્યા છે અને ફોમેપિઝોલ ઇન્જેક્શન મંગાવવાની પ્રક્રિયા હાથ ધરાઈ છે.

  • વંદે માતરમ પર ભાજપ-કોંગ્રેસ આમને-સામને: અમિત શાહે કોંગ્રેસના બે પંક્તિના નિર્ણયને ગણાવ્યો તુષ્ટિકરણ

    ગૃહમંત્રી અમિત શાહે કોંગ્રેસના કાર્યક્રમોમાં વંદે માતરમની માત્ર શરૂઆતની બે પંક્તિઓ ગાવાના નિર્ણયની ટીકા કરી છે. શાહે કોંગ્રેસના આ નિર્ણયને તુષ્ટિકરણ ગણાવી કહ્યું કે દેશમાં તુષ્ટિકરણની રાજનીતિ નહીં ચાલે. તેમણે 1937માં કોંગ્રેસ દ્વારા લેવાયેલા નિર્ણયનો ઉલ્લેખ કરતાં કહ્યું કે આઝાદીના 80 વર્ષ બાદ વડાપ્રધાન નરેન્દ્ર મોદીએ તેમાં સુધારો કર્યો છે.

    કોંગ્રેસનો બે પંક્તિઓ ગાવાનો નિર્ણય

    કોંગ્રેસ વર્કિંગ કમિટીએ બુધવારે નિર્ણય લીધો હતો કે પાર્ટીના તમામ કાર્યક્રમોમાં વંદે માતરમની શરૂઆતની બે પંક્તિઓ જ ગાવામાં આવશે. વંદે માતરમમાં કુલ છ પંક્તિઓ હોવાનું જણાવવામાં આવ્યું છે. આ નિર્ણય બાદ ભાજપ અને કોંગ્રેસ વચ્ચે રાજકીય નિવેદનબાજી શરૂ થઈ છે.

    નિતિન નવીનનો કોંગ્રેસ પર પ્રહાર

    અમિત શાહ પહેલા ભાજપ અધ્યક્ષ નિતિન નવીને પણ કોંગ્રેસના નિર્ણયની ટીકા કરી હતી. તેમણે આરોપ લગાવ્યો કે કોંગ્રેસ વોટબેંકની રાજનીતિ માટે રાષ્ટ્રીય ગીતનું અપમાન કરી રહી છે. નવીને કોંગ્રેસને ‘નવી મુસ્લિમ લીગ’ ગણાવી આ નિર્ણયને સ્વાતંત્ર્ય સંગ્રામના શહીદોનું અપમાન ગણાવ્યો.

    15 ઓગસ્ટના કાર્યક્રમ બાદ વિવાદ

    વંદે માતરમને લઈને વિવાદ 15 ઓગસ્ટે કોંગ્રેસ મુખ્યાલય ખાતે યોજાયેલા સ્વતંત્રતા દિવસના કાર્યક્રમ બાદ વધુ વકર્યો હતો. ભાજપે આરોપ લગાવ્યો હતો કે કાર્યક્રમ દરમિયાન વંદે માતરમની શરૂઆતની પંક્તિઓ બાદ સોનિયા ગાંધીએ ગીત રોકવાનો સંકેત આપ્યો હતો. ભાજપે આ અંગે સોશિયલ મીડિયા પર કાર્યક્રમનો વીડિયો પણ શેર કર્યો હતો.

    કોંગ્રેસે ભાજપના આરોપોને ફગાવ્યા

    કોંગ્રેસ મહાસચિવ જયરામ રમેશે ભાજપના આરોપોને ફગાવી દીધા હતા. તેમણે કહ્યું હતું કે વંદે માતરમ રોકવાનો કોઈ પ્રયાસ થયો નહોતો. તેમના જણાવ્યા મુજબ, સોનિયા ગાંધી લાંબા સમયથી ઊભા હતા અને તેમના માટે ખુરશી લાવવાનું કહેવામાં આવ્યું હતું. જયરામ રમેશે દાવો કર્યો કે કોંગ્રેસ મુખ્યાલયમાં વંદે માતરમનું સંપૂર્ણ સંસ્કરણ ગવાયું હતું.

    1937થી પરંપરા હોવાનો કોંગ્રેસનો દાવો

    જયરામ રમેશે જણાવ્યું કે 28 ઓક્ટોબર 1937ના રોજ કોંગ્રેસ કાર્યસમિતિની બેઠકમાં વંદે માતરમના ઉપયોગ અંગે ચર્ચા થઈ હતી. તેમના જણાવ્યા મુજબ, મહાત્મા ગાંધી, સુભાષચંદ્ર બોઝ, સરદાર પટેલ, મૌલાના અબુલ કલામ આઝાદ, જવાહરલાલ નેહરુ અને સી. રાજગોપાલાચારી સહિતના નેતાઓની હાજરીમાં આ અંગે નિર્ણય લેવાયો હતો. રવીન્દ્રનાથ ટાગોરની સલાહ બાદ કોંગ્રેસના કાર્યક્રમોમાં વંદે માતરમની શરૂઆતની પંક્તિઓ ગાવાની પરંપરા શરૂ થઈ હોવાનું કોંગ્રેસનું કહેવું છે.

    વંદે માતરમને કાનૂની રક્ષણનો મુદ્દો

    વંદે માતરમને લઈને ચાલી રહેલા વિવાદ વચ્ચે તાજેતરમાં તેને કાનૂની રક્ષણ આપવાની જોગવાઈ પણ ચર્ચામાં આવી છે. દાવા મુજબ, વંદે માતરમને જન ગણ મન સમાન કાનૂની રક્ષણ આપવામાં આવ્યું છે અને જાણી જોઈને તેના અપમાન અથવા ગાયનમાં અવરોધ ઊભો કરવા બદલ જેલ, દંડ અથવા બંનેની જોગવાઈ છે.

    પહેલા વંદે માતરમ, પછી જન ગણ મન

    ગૃહ મંત્રાલયે વંદે માતરમ અને જન ગણ મનના ગાન અંગે પ્રોટોકોલ પણ જાહેર કર્યો છે. જો કોઈ કાર્યક્રમમાં બંને ગવાય કે વગાડવામાં આવે તો પહેલા વંદે માતરમ અને ત્યારબાદ રાષ્ટ્રગાન જન ગણ મન રહેશે. રાજ્ય ગીતનો પણ સમાવેશ હોય તો ક્રમ રાજ્ય ગીત, વંદે માતરમ અને અંતે જન ગણ મન રહેશે.

    રાજકીય વિવાદ વધુ ગરમાયો

    વંદે માતરમની પંક્તિઓ અને તેના ગાનની પરંપરાને લઈને ભાજપ અને કોંગ્રેસના નેતાઓ આમને-સામને આવી ગયા છે. એક તરફ ભાજપ કોંગ્રેસના નિર્ણયને તુષ્ટિકરણ અને વોટબેંકની રાજનીતિ સાથે જોડી રહ્યું છે, જ્યારે કોંગ્રેસ 1937થી ચાલી આવતી પરંપરાનો હવાલો આપી પોતાના નિર્ણયનો બચાવ કરી રહી છે.

     

  • વડોદરા: બસના ઓટોમેટિક દરવાજામાં 7 વર્ષના બાળકનું ગળું ફસાતા મોત, 15 મિનિટનું CCTV ફૂટેજ ગાયબ

    વડોદરાના સૂર્યનગર-તરસાલી બાયપાસથી ધન્યાવી તરફ જવાના રસ્તા પર એક ચોંકાવનારી ઘટના સામે આવી છે. રિપેરિંગ કારખાનામાં ઊભેલી લક્ઝરી બસના ઓટોમેટિક દરવાજામાં 7 વર્ષીય બાળકનું ગળું ફસાઈ જતાં તેનું મોત થયું છે. ઘરેથી પ્રસાદ લેવા માટે નીકળેલા બાળક સાથે બનેલી આ ઘટનાથી પરિવાર સહિત સમગ્ર વિસ્તારમાં શોકની લાગણી પ્રસરી છે.

    બસના દરવાજા પાસે ગંભીર હાલતમાં મળ્યો બાળક
    મળતી માહિતી મુજબ, દિવ્યેશ નામનો 7 વર્ષીય બાળક બપોરના સમયે પ્રસાદ લેવા માટે ઘરેથી બહાર નીકળ્યો હતો. થોડા સમય બાદ પરિવારજનોને બાળક સાથે અજુગતી ઘટના બની હોવાની જાણ કરવામાં આવી હતી. સ્થળ પર પહોંચતા બાળક બસના દરવાજા પાસે ગંભીર હાલતમાં મળી આવ્યો હતો. જોકે, બાળક બસના દરવાજામાં કયા સંજોગોમાં ફસાયો તે અંગે હજુ સ્પષ્ટતા થઈ નથી.

    સયાજી હોસ્પિટલમાં તબીબોએ મૃત જાહેર કર્યો

    ઘટનાની જાણ થતાં પરિવારજનો તાત્કાલિક સ્થળ પર દોડી આવ્યા હતા. ગંભીર હાલતમાં મળેલા બાળકને 108 એમ્બ્યુલન્સ મારફતે વડોદરાની સયાજી હોસ્પિટલ ખાતે સારવાર માટે ખસેડવામાં આવ્યો હતો. જોકે, હોસ્પિટલમાં ફરજ પરના તબીબોએ પ્રાથમિક તપાસ બાદ બાળકને મૃત જાહેર કર્યો હતો.

    ધોરણ-2માં અભ્યાસ કરતો હતો દિવ્યેશ
    મૃતક બાળક દિવ્યેશ તરસાલી-2 વિસ્તારમાં આવેલી ડૉ. એ.પી.જે. અબ્દુલ કલામ પ્રાથમિક શાળામાં ધોરણ-2માં અભ્યાસ કરતો હતો. પરિવાર મૂળ છોટાઉદેપુર જિલ્લાના જેતપુર પાવી તાલુકાનો હોવાનું સામે આવ્યું છે અને હાલ સૂર્યનગર વિસ્તારમાં રહે છે. બાળકના અચાનક મોતથી પરિવાર પર દુઃખનો પહાડ તૂટી પડ્યો છે.

    ઘટના સમયે 15 મિનિટનું CCTV ફૂટેજ ગાયબ
    આ સમગ્ર મામલામાં સૌથી ચોંકાવનારી બાબત CCTV ફૂટેજને લઈને સામે આવી છે. પોલીસ તપાસ દરમિયાન ઘટના પહેલાં અને બાદના CCTV ફૂટેજ મળી આવ્યા છે, પરંતુ જે સમયગાળા દરમિયાન બાળક બસના દરવાજામાં ફસાયું હોવાનું માનવામાં આવે છે તે સમયના આશરે 15 મિનિટના ફૂટેજ ગાયબ હોવાનું જાણવા મળ્યું છે.

    વીજળી ગુલ થવાનું કારણ સામે આવ્યું
    પ્રાથમિક તપાસમાં ઘટના સમયે વિસ્તારમાં વીજળી ગુલ થઈ હોવાના કારણે CCTV ફૂટેજ રેકોર્ડ ન થયું હોવાનું કારણ સામે આવી રહ્યું છે. જોકે, ઘટનાના મહત્વના સમયના જ ફૂટેજ ઉપલબ્ધ ન હોવાથી સમગ્ર મામલે અનેક સવાલો ઊભા થયા છે. બાળક ખરેખર અકસ્માતે દરવાજામાં ફસાયું હતું કે અન્ય કોઈ કારણ હતું, તે અંગે તપાસ જરૂરી બની છે.

    પરિવારની CCTV તપાસી ન્યાયની માંગ
    મૃતક બાળકના પિતાએ સમગ્ર ઘટનાની નિષ્પક્ષ તપાસ કરવાની માંગ કરી છે. પરિવારનું કહેવું છે કે CCTV ફૂટેજની તપાસ કરવામાં આવે અને બાળક સાથે ખરેખર શું બન્યું તે સામે લાવવામાં આવે. પરિવારને આશંકા છે કે ઘટનાની સંપૂર્ણ હકીકત CCTV અને અન્ય પુરાવાની તપાસ બાદ જ સ્પષ્ટ થઈ શકે છે.

    કપુરાઈ પોલીસે શરૂ કરી ઊંડાણપૂર્વક તપાસ
    ઘટનાની જાણ થતાં કપુરાઈ પોલીસની ટીમ સયાજી હોસ્પિટલ પહોંચી હતી. પોલીસે મૃતદેહનું પંચનામું કરી પોસ્ટમોર્ટમ સહિતની કાયદેસરની કાર્યવાહી હાથ ધરી છે. સાથે જ CCTV ફૂટેજ, બસના ઓટોમેટિક દરવાજાની ટેક્નિકલ તપાસ અને ઘટના સ્થળના અન્ય પુરાવાઓના આધારે તપાસ શરૂ કરવામાં આવી છે. પોલીસ તપાસ પૂર્ણ થયા બાદ જ બાળકના મોતનું ચોક્કસ કારણ અને ઘટના કેવી રીતે બની તે સ્પષ્ટ થશે.

  • LPG e-KYC માટે 16 ઓગસ્ટની ડેડલાઇન, જાણો ઘરે બેઠા કેવી રીતે પૂર્ણ કરશો પ્રક્રિયા

    LPG સિલિન્ડરનો ઉપયોગ કરતા ગ્રાહકો માટે મહત્વપૂર્ણ સમાચાર સામે આવ્યા છે. જો તમે હજુ સુધી LPG કનેક્શનની e-KYC કરાવી નથી, તો 16 ઓગસ્ટ સુધીમાં આ પ્રક્રિયા પૂર્ણ કરવાની સૂચના આપવામાં આવી રહી છે. ઇન્ડેન, HP અને ભારત ગેસના ગ્રાહકોને કંપનીઓ દ્વારા SMS અને સોશિયલ મીડિયા મારફતે e-KYC પૂર્ણ કરવા માટે એલર્ટ કરવામાં આવી રહ્યા છે.

    16 ઓગસ્ટની ડેડલાઇન ભૂલશો નહીં

    ઓઇલ માર્કેટિંગ કંપનીઓ દ્વારા LPG ગ્રાહકોના રજિસ્ટર્ડ મોબાઇલ નંબર પર e-KYCને લઈને મેસેજ મોકલવામાં આવી રહ્યા છે. આ ઉપરાંત સોશિયલ મીડિયા પર પણ ગ્રાહકોને નિર્ધારિત સમયમર્યાદામાં e-KYC પૂર્ણ કરવાની અપીલ કરવામાં આવી રહી છે.ગ્રાહકોને છેલ્લી તારીખની રાહ જોયા વગર e-KYC પ્રક્રિયા પૂર્ણ કરવાની સલાહ આપવામાં આવી છે, જેથી LPG કનેક્શન સંબંધિત સેવાઓમાં મુશ્કેલી ન સર્જાય.

    LPG સિલિન્ડરના ભાવ કેટલા?

     14 કિલોગ્રામના ઘરેલું LPG સિલિન્ડરની કિંમતની વાત કરીએ તો દિલ્હીમાં એક સિલિન્ડરનો ભાવ ₹942, કોલકાતામાં ₹968, મુંબઈમાં ₹941.50 અને ચેન્નઈમાં ₹957.50 હોવાનું જણાવાયું છે.આ ઉપરાંત પ્રધાનમંત્રી ઉજ્જવલા યોજનાના પાત્ર લાભાર્થીઓને દર વર્ષે ચાર LPG સિલિન્ડરના રિફિલ પર ₹300ની ડાયરેક્ટ બેનિફિટ ટ્રાન્સફર (DBT) સબસિડી આપવામાં આવે છે.

    ઘરે બેઠા પણ કરી શકાશે e-KYC

    LPG ગ્રાહકો ઘરે બેઠા પણ e-KYCની પ્રક્રિયા પૂર્ણ કરી શકે છે. ઇન્ડેનના ગ્રાહકો માટે IndianOil One એપ મારફતે e-KYC કરવાની સુવિધા ઉપલબ્ધ છે.આ ઉપરાંત ગ્રાહકો પોતાના LPG ડિસ્ટ્રિબ્યુટર પાસે જઈને અથવા સિલિન્ડરની ડિલિવરી કરવા આવતા કર્મચારી મારફતે પણ e-KYC કરાવી શકે છે.જો તમે હજુ સુધી LPG e-KYC પૂર્ણ કરી નથી, તો છેલ્લી તારીખની રાહ જોયા વગર સમયસર પ્રક્રિયા પૂર્ણ કરી લેવી વધુ યોગ્ય રહેશે.