વડોદરાના સૂર્યનગર-તરસાલી બાયપાસથી ધન્યાવી તરફ જવાના રસ્તા પર એક ચોંકાવનારી ઘટના સામે આવી છે. રિપેરિંગ કારખાનામાં ઊભેલી લક્ઝરી બસના ઓટોમેટિક દરવાજામાં 7 વર્ષીય બાળકનું ગળું ફસાઈ જતાં તેનું મોત થયું છે. ઘરેથી પ્રસાદ લેવા માટે નીકળેલા બાળક સાથે બનેલી આ ઘટનાથી પરિવાર સહિત સમગ્ર વિસ્તારમાં શોકની લાગણી પ્રસરી છે.
બસના દરવાજા પાસે ગંભીર હાલતમાં મળ્યો બાળક
મળતી માહિતી મુજબ, દિવ્યેશ નામનો 7 વર્ષીય બાળક બપોરના સમયે પ્રસાદ લેવા માટે ઘરેથી બહાર નીકળ્યો હતો. થોડા સમય બાદ પરિવારજનોને બાળક સાથે અજુગતી ઘટના બની હોવાની જાણ કરવામાં આવી હતી. સ્થળ પર પહોંચતા બાળક બસના દરવાજા પાસે ગંભીર હાલતમાં મળી આવ્યો હતો. જોકે, બાળક બસના દરવાજામાં કયા સંજોગોમાં ફસાયો તે અંગે હજુ સ્પષ્ટતા થઈ નથી.
સયાજી હોસ્પિટલમાં તબીબોએ મૃત જાહેર કર્યો
ઘટનાની જાણ થતાં પરિવારજનો તાત્કાલિક સ્થળ પર દોડી આવ્યા હતા. ગંભીર હાલતમાં મળેલા બાળકને 108 એમ્બ્યુલન્સ મારફતે વડોદરાની સયાજી હોસ્પિટલ ખાતે સારવાર માટે ખસેડવામાં આવ્યો હતો. જોકે, હોસ્પિટલમાં ફરજ પરના તબીબોએ પ્રાથમિક તપાસ બાદ બાળકને મૃત જાહેર કર્યો હતો.
ધોરણ-2માં અભ્યાસ કરતો હતો દિવ્યેશ
મૃતક બાળક દિવ્યેશ તરસાલી-2 વિસ્તારમાં આવેલી ડૉ. એ.પી.જે. અબ્દુલ કલામ પ્રાથમિક શાળામાં ધોરણ-2માં અભ્યાસ કરતો હતો. પરિવાર મૂળ છોટાઉદેપુર જિલ્લાના જેતપુર પાવી તાલુકાનો હોવાનું સામે આવ્યું છે અને હાલ સૂર્યનગર વિસ્તારમાં રહે છે. બાળકના અચાનક મોતથી પરિવાર પર દુઃખનો પહાડ તૂટી પડ્યો છે.
ઘટના સમયે 15 મિનિટનું CCTV ફૂટેજ ગાયબ
આ સમગ્ર મામલામાં સૌથી ચોંકાવનારી બાબત CCTV ફૂટેજને લઈને સામે આવી છે. પોલીસ તપાસ દરમિયાન ઘટના પહેલાં અને બાદના CCTV ફૂટેજ મળી આવ્યા છે, પરંતુ જે સમયગાળા દરમિયાન બાળક બસના દરવાજામાં ફસાયું હોવાનું માનવામાં આવે છે તે સમયના આશરે 15 મિનિટના ફૂટેજ ગાયબ હોવાનું જાણવા મળ્યું છે.
વીજળી ગુલ થવાનું કારણ સામે આવ્યું
પ્રાથમિક તપાસમાં ઘટના સમયે વિસ્તારમાં વીજળી ગુલ થઈ હોવાના કારણે CCTV ફૂટેજ રેકોર્ડ ન થયું હોવાનું કારણ સામે આવી રહ્યું છે. જોકે, ઘટનાના મહત્વના સમયના જ ફૂટેજ ઉપલબ્ધ ન હોવાથી સમગ્ર મામલે અનેક સવાલો ઊભા થયા છે. બાળક ખરેખર અકસ્માતે દરવાજામાં ફસાયું હતું કે અન્ય કોઈ કારણ હતું, તે અંગે તપાસ જરૂરી બની છે.
પરિવારની CCTV તપાસી ન્યાયની માંગ
મૃતક બાળકના પિતાએ સમગ્ર ઘટનાની નિષ્પક્ષ તપાસ કરવાની માંગ કરી છે. પરિવારનું કહેવું છે કે CCTV ફૂટેજની તપાસ કરવામાં આવે અને બાળક સાથે ખરેખર શું બન્યું તે સામે લાવવામાં આવે. પરિવારને આશંકા છે કે ઘટનાની સંપૂર્ણ હકીકત CCTV અને અન્ય પુરાવાની તપાસ બાદ જ સ્પષ્ટ થઈ શકે છે.
કપુરાઈ પોલીસે શરૂ કરી ઊંડાણપૂર્વક તપાસ
ઘટનાની જાણ થતાં કપુરાઈ પોલીસની ટીમ સયાજી હોસ્પિટલ પહોંચી હતી. પોલીસે મૃતદેહનું પંચનામું કરી પોસ્ટમોર્ટમ સહિતની કાયદેસરની કાર્યવાહી હાથ ધરી છે. સાથે જ CCTV ફૂટેજ, બસના ઓટોમેટિક દરવાજાની ટેક્નિકલ તપાસ અને ઘટના સ્થળના અન્ય પુરાવાઓના આધારે તપાસ શરૂ કરવામાં આવી છે. પોલીસ તપાસ પૂર્ણ થયા બાદ જ બાળકના મોતનું ચોક્કસ કારણ અને ઘટના કેવી રીતે બની તે સ્પષ્ટ થશે.
Leave a Reply