એરપોર્ટ પર કસ્ટમ્સની મોટી સફળતા
અમદાવાદ ઇન્ટરનેશનલ એરપોર્ટ પર કસ્ટમ્સ વિભાગે નશીલા પદાર્થોની દાણચોરી સામે મોટી કાર્યવાહી કરતાં બેંગકોકથી આવેલા એક મુસાફર પાસેથી મોટી માત્રામાં હાઇડ્રોપોનિક ગાંજો જપ્ત કર્યો છે. આંતરરાષ્ટ્રીય બજાર મૂલ્ય મુજબ આ જથ્થાની કિંમત અંદાજે ₹11 કરોડ હોવાનું માનવામાં આવે છે.
સ્નિફર ડોગે આપ્યો મહત્વનો સંકેત
ચેક-ઇન બેગેજની નિયમિત તપાસ દરમિયાન કસ્ટમ્સના કેનાઇન યુનિટના સ્નિફર ડોગે એક ટ્રોલી બેગ અંગે શંકાસ્પદ સંકેત આપ્યો હતો. ત્યારબાદ અધિકારીઓએ બેગને અલગ રાખીને વિગતવાર તપાસ હાથ ધરી હતી.
બેગમાંથી પાંચ પેકેટ મળી આવ્યા
તપાસ દરમિયાન ટ્રોલી બેગની અંદર ચાંદીના રંગના પાંચ અલગ-અલગ પેકેટ મળી આવ્યા હતા. તેમાં રહેલા લીલા છોડ જેવા પદાર્થનું પ્રાથમિક પરીક્ષણ કરતાં તે હાઇડ્રોપોનિક ગાંજો હોવાનું બહાર આવ્યું.
આરોપીની ધરપકડ, તપાસ શરૂ
કસ્ટમ્સ અધિકારીઓએ મુસાફરની ઓળખ કરીને તેની અટકાયત કરી છે. આરોપી જૂનાગઢ જિલ્લાના માંગરોળ વિસ્તારનો રહેવાસી હોવાનું સામે આવ્યું છે. નાર્કોટિક ડ્રગ્સ એન્ડ સાઇકોટ્રોપિક સબસ્ટન્સ (NDPS) અધિનિયમ હેઠળ ગુનો નોંધીને વધુ તપાસ શરૂ કરવામાં આવી છે.
તપાસમાં હવે આ નશીલો જથ્થો ક્યાંથી લાવવામાં આવ્યો હતો, તેનો અંતિમ પ્રાપ્તકર્તા કોણ હતો અને તેની પાછળ કોઈ આંતરરાષ્ટ્રીય નેટવર્ક કાર્યરત છે કે નહીં તે દિશામાં તપાસ ચાલી રહી છે.
નવા કેનાઇનની પ્રથમ કામગીરી જ સફળ
આ કાર્યવાહીમાં સૌથી ખાસ વાત એ રહી કે કસ્ટમ્સ વિભાગના નવા સ્નિફર ડોગ માટે આ પ્રથમ મોટો કેસ હતો. તાલીમ પૂર્ણ કર્યા બાદ તાજેતરમાં જ અમદાવાદ એરપોર્ટ પર તેની નિમણૂક કરવામાં આવી હતી અને પહેલી જ કામગીરીમાં તેણે કરોડો રૂપિયાના ડ્રગ્સ પકડાવવામાં મહત્વની ભૂમિકા ભજવી.
