ગુજરાતમાં ભારે વરસાદનો નવો રાઉન્ડ શરૂ
હવામાન વિભાગ (IMD)એ આગામી 5 જુલાઈ સુધી સમગ્ર ગુજરાતમાં ભારેથી અતિભારે વરસાદની આગાહી કરી છે. ખાસ કરીને દક્ષિણ ગુજરાતમાં વરસાદનું જોર વધુ રહેવાની શક્યતા છે. આજે 1 જુલાઈ માટે સુરત, નવસારી, વલસાડ, દમણ અને દાદરા નગર હવેલીમાં રેડ એલર્ટ જાહેર કરવામાં આવ્યું છે.
આ જિલ્લાઓમાં રેડ, ઓરેન્જ અને યલો એલર્ટ
હવામાન વિભાગના વૈજ્ઞાનિક એ.કે. દાસના જણાવ્યા મુજબ, સુરત, નવસારી, વલસાડ, દમણ અને દાદરા નગર હવેલીમાં અતિભારે વરસાદની સંભાવના છે.
ઓરેન્જ એલર્ટ હેઠળ ગીર સોમનાથ, અમરેલી, ભાવનગર, ભરૂચ, નર્મદા, તાપી અને ડાંગ જિલ્લાઓનો સમાવેશ થાય છે. જ્યારે રાજકોટ, જૂનાગઢ, વડોદરા અને છોટાઉદેપુરમાં યલો એલર્ટ જાહેર કરવામાં આવ્યું છે.
40થી 50 કિમીની ઝડપે ફૂંકાશે પવન
આગામી પાંચ દિવસ દરમિયાન ગાજવીજ સાથે વરસાદ અને 40થી 50 કિલોમીટર પ્રતિ કલાકની ઝડપે પવન ફૂંકાવાની શક્યતા છે. દરિયો તોફાની રહેવાની આગાહીને પગલે માછીમારોને દરિયો ન ખેડવા સૂચના આપવામાં આવી છે.
જૂનમાં વરસાદની 80% ઘટ નોંધાઈ
આ વર્ષે જૂન મહિનામાં ગુજરાતમાં સામાન્ય વરસાદની સરખામણીએ લગભગ 80 ટકા ઓછો વરસાદ નોંધાયો છે. જોકે હવે જુલાઈની શરૂઆત સાથે રાજ્યમાં ચોમાસું જોર પકડે તેવી સંભાવના વ્યક્ત કરવામાં આવી રહી છે.
દેશના અન્ય ભાગોમાં પણ વરસાદનો કહેર
ગુજરાત ઉપરાંત ઉત્તર ભારતમાં પણ ભારે વરસાદથી સ્થિતિ ગંભીર બની છે. જમ્મુ-કાશ્મીરમાં વાદળ ફાટવાના બનાવો બાદ પૂર જેવી સ્થિતિ સર્જાઈ છે અને અનેક વિસ્તારોમાં જનજીવન પ્રભાવિત થયું છે.
