ભાવનગરમાં ચાંદીપુરા વાયરસનો પ્રથમ મૃત્યુ કેસ
ગુજરાતમાં ચાંદીપુરા વાયરસના કેસો વચ્ચે હવે ભાવનગર જિલ્લામાં પણ પ્રથમ મૃત્યુનો કેસ સામે આવ્યો છે.
વલભીપુર તાલુકાના મેલાણા ગામમાં રહેતા 6 વર્ષના બાળકનું સારવાર દરમિયાન મોત થયું હતું. બાદમાં ગાંધીનગર ખાતે થયેલા લેબ પરીક્ષણમાં બાળકનું મૃત્યુ ચાંદીપુરા વાયરસના સંક્રમણથી થયું હોવાની પુષ્ટિ થઈ છે.
તાવ અને ચાલવામાં તકલીફ બાદ હોસ્પિટલમાં દાખલ કરાયો
જિલ્લા આરોગ્ય અધિકારી ડૉ. કે.એમ. સોલંકીના જણાવ્યા અનુસાર, બાળકનો પરિવાર મૂળ મધ્યપ્રદેશનો છે અને હાલમાં મેલાણા ગામમાં ખેતી મજૂરી કરીને જીવનનિર્વાહ કરે છે.
બાળક 6 જુલાઈએ જામનગરથી મેલાણા ગામ આવ્યો હતો. ત્યારબાદ તેને તાવ અને ચાલવામાં તકલીફ થતાં પ્રથમ વલભીપુરમાં સારવાર અપાઈ હતી. સ્થિતિ ગંભીર બનતાં 8 જુલાઈએ ભાવનગરની સર ટી. હોસ્પિટલમાં દાખલ કરવામાં આવ્યો હતો.
ICUમાં સઘન સારવાર છતાં જીવ બચાવી શકાયો નહીં
સર ટી. જનરલ હોસ્પિટલના બાળરોગ વિભાગના વડા ડૉ. મેહુલ ગોસાઈના જણાવ્યા મુજબ, બાળકને હોસ્પિટલમાં લાવવામાં આવ્યો ત્યારે તેને ભારે તાવ, ઉલ્ટી અને સતત આંચકી આવતી હતી.
બાળકને ICUમાં રાખીને વેન્ટિલેટર પર સારવાર આપવામાં આવી હતી. સાથે જ આંચકી નિયંત્રણ માટે જરૂરી દવાઓ અને અન્ય તમામ તબીબી સારવાર આપવામાં આવી હતી. જોકે સારવાર શરૂ થયાના બીજા દિવસે વહેલી સવારે બાળકનું મોત થયું હતું.
સેમ્પલ ગાંધીનગર મોકલ્યા બાદ થઈ પુષ્ટિ
હોસ્પિટલમાં પ્રાથમિક પરીક્ષણ બાદ બાળકના બ્લડ અને અન્ય જરૂરી સેમ્પલ વિશેષ તપાસ માટે ગાંધીનગરની GBRC લેબોરેટરીમાં મોકલવામાં આવ્યા હતા.
લેબ રિપોર્ટમાં ચાંદીપુરા વાયરસના સંક્રમણની પુષ્ટિ થતાં આ કેસને જિલ્લાનો પ્રથમ સત્તાવાર ચાંદીપુરા મૃત્યુ કેસ તરીકે નોંધવામાં આવ્યો છે.
મેલાણા ગામમાં આરોગ્ય વિભાગની કાર્યવાહી
ઘટના બાદ આરોગ્ય વિભાગે મેલાણા ગામમાં સર્વેલન્સ, આરોગ્ય તપાસ, દવાનો છંટકાવ અને અન્ય નિયંત્રણાત્મક પગલાં શરૂ કર્યા છે.
સાથે જ ગામના બાળકો અને આસપાસના વિસ્તારોમાં આરોગ્યની સ્થિતિ પર સતત નજર રાખવામાં આવી રહી છે.
રાજ્યમાં વધતી ચિંતા
આ કેસ સાથે ગુજરાતમાં ચાંદીપુરા વાયરસથી પુષ્ટિ થયેલા મૃત્યુની સંખ્યા 4 પર પહોંચી છે.
આ ઉપરાંત વાયરસ જેવા લક્ષણો ધરાવતા અન્ય કેટલાક બાળકોના મૃત્યુના કેસોની પણ તપાસ ચાલી રહી છે. પંચમહાલ અને સાબરકાંઠા બાદ હવે ભાવનગરમાં પણ આ વાયરસનો કેસ નોંધાતા રાજ્યનું આરોગ્ય તંત્ર વધુ સતર્ક બન્યું છે.
