જમીન ફાળવણીની પ્રક્રિયા વધુ સરળ બનાવવાનો નિર્ણય
ગુજરાત સરકારે ઈઝ ઓફ ડૂઈંગ બિઝનેસને વધુ મજબૂત બનાવવા અને વહીવટી પ્રક્રિયાને ઝડપી બનાવવા મહત્વપૂર્ણ નિર્ણય લીધો છે. મુખ્યમંત્રી ભૂપેન્દ્ર પટેલના માર્ગદર્શન હેઠળ જિલ્લા કલેક્ટર અને જિલ્લા વિકાસ અધિકારી (DDO)ની સરકારી જમીન ફાળવણી સંબંધિત નાણાકીય સત્તામાં નોંધપાત્ર વધારો કરવામાં આવ્યો છે.
આ નિર્ણયથી અનેક પ્રકારની જમીન ફાળવણીના કેસો હવે સીધા જિલ્લા કક્ષાએ જ નિકાલ થઈ શકશે.
ગાંધીનગરના ધક્કા ઘટશે
નવી વ્યવસ્થા અમલમાં આવતા સરકારી જમીન ફાળવણી માટે અરજદારો, સંસ્થાઓ અને વિવિધ વિભાગોને દરેક નિર્ણય માટે ગાંધીનગર સુધી જવું નહીં પડે.
જિલ્લા કક્ષાએ જ નિર્ણય લેવાતા અરજીઓનો નિકાલ ઝડપથી થશે અને સંબંધિત વિભાગો સાથેનું અનુસરણ (ફોલોઅપ) પણ સરળ બનશે.
વિકાસ પ્રોજેક્ટ્સને મળશે ગતિ
સરકારના જણાવ્યા અનુસાર આ નિર્ણયથી ઈન્ફ્રાસ્ટ્રક્ચર વિકાસ, ઔદ્યોગિક પ્રોજેક્ટ્સ, જાહેર ઉપયોગના કામો, સામાજિક યોજનાઓ અને ગ્રામ વિકાસના કાર્યો માટે જમીન ફાળવણીની પ્રક્રિયા વધુ ઝડપી બનશે.
સ્થાનિક સ્તરે જમીનની વિગતો અને રેકોર્ડ ઉપલબ્ધ હોવાથી નિર્ણય પ્રક્રિયામાં પણ ઓછો સમય લાગશે.
સરકારી આવકમાં પણ થશે વધારો
સરકારનું માનવું છે કે જમીન ફાળવણીમાં ઝડપ આવવાથી વિકાસ કાર્યોને વેગ મળશે અને રોજગારીની નવી તકો પણ ઊભી થશે.
આ ઉપરાંત સરકારી જમીનની કબજાકિંમત અથવા પ્રીમિયમની રકમ પણ ઝડપથી સરકારી તિજોરીમાં જમા થશે, જેના કારણે વહીવટી પ્રક્રિયામાં કાર્યક્ષમતા વધશે.
કલેક્ટરને મળ્યો વધુ એક મહત્વનો અધિકાર
રાજ્ય સરકારના બોર્ડ, કોર્પોરેશન અને કેન્દ્ર સરકારના વિભાગોને જમીન ફાળવણીના કેસોમાં હવે કલેક્ટરને વધુ સત્તા આપવામાં આવી છે.
જો ઈન્ટિમેશન જનરેટ થયા બાદ 90 દિવસમાં કબજાકિંમત અથવા પ્રીમિયમની રકમ ભરપાઈ ન થાય, તો જિલ્લા જમીન મૂલ્યાંકન સમિતિની ત્રણ વર્ષની મુદત પૂર્ણ થાય ત્યાં સુધી સમયમર્યાદા વધારવાનો અધિકાર પણ હવે કલેક્ટર પાસે રહેશે.
સરકારના મતે આથી એક જ પ્રક્રિયાને વારંવાર શરૂ કરવાની જરૂર નહીં રહે અને વહીવટી સમયનો બચાવ થશે.
