વડોદરાની SSG હોસ્પિટલમાં સારવાર અર્થે લાવવામાં આવેલો દુષ્કર્મ અને પોક્સો કેસનો આરોપી ગોવિંદ રમેશભાઈ મહોણીયા ઈન્જેક્શન આપવા માટે હાથકડી ખોલતાં જ પોલીસ કર્મચારીને ધક્કો મારીને ફિલ્મી સ્ટાઈલમાં ફરાર થઈ ગયો હતો. રાવપુરા પોલીસ અને ડ્રોનની મદદથી પાંચ કલાકની શોધખોળ બાદ પણ તે હાથ લાગ્યો નહોતો. આખરે વડોદરા ક્રાઇમ બ્રાન્ચે સીસીટીવી ફૂટેજ અને બાતમીના આધારે 11 કલાકમાં જ આરોપીને છાણી કેનાલ વિસ્તારમાંથી ઝડપી પાડ્યો છે.
સારવાર દરમિયાન હાથકડી ખોલતા જ ભાગી ગયો
પોલીસના જણાવ્યા અનુસાર, ગોવિંદ મહોણીયા વડોદરા સેન્ટ્રલ જેલમાં બંધ હતો. ચામડીની તકલીફને કારણે 6 ઓગસ્ટે તેને પોલીસ જાપ્તા હેઠળ SSG હોસ્પિટલમાં સારવાર માટે લાવવામાં આવ્યો હતો. હોસ્પિટલના વોર્ડ નંબર-5 પાસે ઈન્જેક્શન આપવા માટે હાથકડી ખોલવામાં આવતા આરોપીએ તકનો લાભ લઈ પોલીસ કર્મચારીને ધક્કો મારી ફિલ્મી અંદાજમાં ફરાર થઈ ગયો હતો.
- વડોદરાની SSG હોસ્પિટલમાંથી પોક્સો કેસનો આરોપી ફરાર
- ઈન્જેક્શન આપવા હાથકડી ખોલતા પોલીસને ધક્કો મારી ભાગ્યો
- ડ્રોન અને સર્ચ ઓપરેશન છતાં 5 કલાક સુધી હાથ લાગ્યો નહીં
- હોસ્પિટલ નજીકની નિર્માણાધીન બિલ્ડિંગમાં ઘૂસી ગયો હતો આરોપી
ડ્રોનથી શોધખોળ છતાં પોલીસને સફળતા મળી નહીં
ફરાર થયા બાદ આરોપી હોસ્પિટલ નજીક આવેલી નિર્માણાધીન બિલ્ડિંગમાં ઘૂસી ગયો હોવાની માહિતી મળતા રાવપુરા પોલીસે સમગ્ર વિસ્તારને કોર્ડન કર્યો હતો. ડ્રોન કેમેરા અને જાહેર અનાઉન્સમેન્ટની મદદથી લગભગ પાંચ કલાક સુધી સર્ચ ઓપરેશન ચલાવવામાં આવ્યું હતું, પરંતુ આરોપી હાથ લાગ્યો નહોતો. ઘટનાને લઈને BNS કલમ 262 હેઠળ અલગ ગુનો પણ નોંધવામાં આવ્યો હતો.
ક્રાઇમ બ્રાન્ચે છાણી કેનાલ વિસ્તારમાંથી ઝડપી પાડ્યો
બાદમાં તપાસ વડોદરા ક્રાઇમ બ્રાન્ચને સોંપવામાં આવી હતી. ટીમે સીસીટીવી ફૂટેજ અને હ્યુમન ઇન્ટેલિજન્સના આધારે આરોપી પોતાના રહેઠાણ નજીક આવવાની શક્યતા વ્યક્ત કરી હતી. છાણી કેનાલ વિસ્તારમાં વોચ ગોઠવવામાં આવી હતી. રાત્રે આશરે 10:30 વાગ્યે આરોપી ત્યાં પહોંચતા જ ક્રાઇમ બ્રાન્ચે તેને ઘેરીને ઝડપી લીધો.
આરોપીને ફરી પોલીસ કસ્ટડીમાં સોંપાયો
ધરપકડ બાદ આરોપીને વધુ કાયદેસરની કાર્યવાહી માટે રાવપુરા પોલીસને સોંપવામાં આવ્યો છે. હોસ્પિટલમાંથી ફરાર થયેલો આરોપી 11 કલાકમાં જ ઝડપાતા પોલીસ તંત્રએ રાહતનો શ્વાસ લીધો છે.
Leave a Reply