અમદાવાદ ન્યૂ રાણીપમાં PCBનો દરોડો: ફ્લેટમાં ચાલતા મોટા જુગારધામનો પર્દાફાશ, ₹38.15 લાખનો મુદ્દામાલ જપ્ત

અમદાવાદના ન્યૂ રાણીપ વિસ્તારમાં PCB દ્વારા મોટી કાર્યવાહી કરીને રહેણાંક ફ્લેટમાં ચાલતા જુગારધામનો પર્દાફાશ કરવામાં આવ્યો છે. કલાસાગર હાઈટ્સના બ્લોક નંબર H/501માં PCBની ટીમે દરોડો પાડીને રોકડ, મોબાઈલ ફોન અને વાહનો સહિત કુલ ₹38,15,100નો મુદ્દામાલ જપ્ત કર્યો છે.

PCBની ટીમ રાત્રિ પેટ્રોલિંગમાં હતી ત્યારે મળેલી બાતમીના આધારે આ કાર્યવાહી કરવામાં આવી હતી. પોલીસ પાંચમા માળે પહોંચી ત્યારે ફ્લેટનો દરવાજો અડધો ખુલ્લો હતો. અંદર કેટલાક લોકો જુગાર રમતા મળી આવતા પોલીસે તેમને રંગેહાથ ઝડપી પાડ્યા હતા.

પોલીસની પૂછપરછમાં ફ્લેટ માલિક ગૌતમ કાંતિ પટેલે બહારથી લોકોને બોલાવી પોતાના ફ્લેટમાં જુગાર રમાડતો હોવાની કબૂલાત કરી હોવાનું સામે આવ્યું છે. એક વ્યક્તિ પાસેથી ₹12 હજાર લઈને જુગાર રમાડવામાં આવતો હોવાની માહિતી પણ સામે આવી છે.

રોકડ સહિત વાહનો અને મોબાઈલ જપ્ત

પોલીસે સ્થળ પરથી ₹3,55,100 રોકડા જપ્ત કર્યા હતા. આ ઉપરાંત જુગારમાં રકમ હારી ગયા બાદ ગીરવે મૂકીને ફરી રમવા માટે ઉપયોગમાં લેવાતા 10 મોબાઈલ ફોન, 3 ફોર-વ્હીલર અને 1 ટુ-વ્હીલર પણ કબજે કરવામાં આવ્યા છે.

દરોડા દરમિયાન જુગાર રમવાના 104 પાના, 13 કોરા ચેક સ્લિપ, 4 ગાદલા, એક એલ્યુમિનિયમનું તગારું અને પુરાવા તરીકે એક લાઇટ બિલ પણ મળી આવ્યું હતું.

PCBએ કુલ ₹38.15 લાખના મુદ્દામાલ સાથે ફ્લેટ માલિક સહિત અન્ય આરોપીઓ સામે કાયદેસરની કાર્યવાહી હાથ ધરી છે. આ સમગ્ર મામલે સાબરમતી પોલીસની ભૂમિકા અંગે પણ સવાલો ઉઠી રહ્યા છે.