UN મુખ્યાલય બહાર વ્યક્તિએ કરી આત્મવિલોપન: હાથમાં હતો તિબેટનો ધ્વજ, સારવાર દરમિયાન મોત

UN મુખ્યાલય બહાર આત્મવિલોપનની ઘટના

અમેરિકાના ન્યૂયોર્કમાં સંયુક્ત રાષ્ટ્ર (UN)ના મુખ્યાલય બહાર ગુરુવારે એક 52 વર્ષના વ્યક્તિએ પોતાને આગ ચાંપી દીધી હતી. ઘટનાની જાણ થતાં જ પોલીસ અને ઇમરજન્સી સેવાઓ ઘટનાસ્થળે પહોંચી હતી. ગંભીર રીતે દાઝેલા વ્યક્તિને હોસ્પિટલમાં ખસેડવામાં આવ્યો હતો, જ્યાં સારવાર દરમિયાન તેનું મોત થયું હતું.

હાથમાં હતો તિબેટનો ધ્વજ

પ્રત્યક્ષદર્શીઓના જણાવ્યા અનુસાર વ્યક્તિના હાથમાં તિબેટનો ધ્વજ હતો. ઘટનાસ્થળેથી ‘China Out of Tibet’ લખેલી પત્રિકાઓ પણ મળી આવી હતી. હાલ મૃતકની ઓળખ સત્તાવાર રીતે જાહેર કરવામાં આવી નથી, કારણ કે તેના પરિવારને પહેલા જાણ કરવામાં આવી રહી છે.

વિડિયો સોશિયલ મીડિયા પર વાયરલ

ઘટનાનો વીડિયો સોશિયલ મીડિયા પર વાયરલ થયો છે. વીડિયોમાં વ્યક્તિ પરંપરાગત બૌદ્ધ ભિક્ષુ જેવા વસ્ત્રોમાં દેખાય છે. તેણે પહેલા ફૂટપાથ પર તિબેટનો ધ્વજ મૂક્યો અને ત્યારબાદ પોતાને આગ લગાવી દીધી હતી.

20 વર્ષથી અમેરિકામાં રહેતો હોવાનો દાવો

કેટલાક મીડિયા અહેવાલો અનુસાર મૃતકની ઓળખ લોબગા રાંગજેન તરીકે કરવામાં આવી રહી છે અને તે છેલ્લા લગભગ 20 વર્ષથી અમેરિકામાં રહેતો હતો. જોકે આ અંગે હજુ સુધી સત્તાવાર પુષ્ટિ કરવામાં આવી નથી.

UNના કામકાજ પર પડી નહીં અસર

સંયુક્ત રાષ્ટ્રના પ્રવક્તાએ જણાવ્યું કે ઘટના સમયે તમામ સત્તાવાર બેઠકો પૂર્ણ થઈ ચૂકી હતી, તેથી UNના નિયમિત કામકાજ પર કોઈ અસર પડી નથી.

તિબેટ મુદ્દે આત્મવિલોપનની લાંબી પરંપરા

2009થી અત્યાર સુધીમાં ચીનના તિબેટ પરના નિયંત્રણના વિરોધમાં 150થી વધુ તિબેટીયનોએ આત્મવિલોપન કર્યું હોવાનું વિવિધ તિબેટીયન સંગઠનોનું કહેવું છે. આમાં બૌદ્ધ ભિક્ષુઓ, સાધ્વીઓ, વિદ્યાર્થીઓ, ખેડૂતો અને સામાન્ય નાગરિકોનો સમાવેશ થાય છે.

શું છે તિબેટ વિવાદ?

તિબેટને લઈને ચીન અને તિબેટીયન સમુદાય વચ્ચે લાંબા સમયથી વિવાદ ચાલી રહ્યો છે. ચીન તિબેટને પોતાનો અભિન્ન ભાગ માને છે, જ્યારે નિર્વાસિત તિબેટીયન નેતૃત્વ સાંસ્કૃતિક અને ધાર્મિક સ્વાયત્તતાની માંગ કરે છે. 1959માં 14મા દલાઈ લામા ભારત આવ્યા બાદ આ મુદ્દો આંતરરાષ્ટ્રીય સ્તરે વધુ ચર્ચામાં આવ્યો હતો.