Category: ગુજરાત

ગુજરાતમાં વિકાસને નવી દિશા: વાયર ફ્રી સિટી મિશન અને સર્વિસ કમિશનરેટની મોટી જાહેરાત

મુખ્યમંત્રીની અધ્યક્ષતામાં કેબિનેટ બેઠક યોજાઈ

મુખ્યમંત્રી ભૂપેન્દ્ર પટેલની અધ્યક્ષતામાં યોજાયેલી રાજ્ય કેબિનેટ બેઠકમાં ગુજરાતના શહેરી વિકાસ, આધુનિક સુવિધાઓ અને સેવા ક્ષેત્રને નવી ઊંચાઈએ પહોંચાડતા અનેક મહત્વપૂર્ણ નિર્ણયો લેવામાં આવ્યા છે. બેઠકની શરૂઆતમાં વડોદરાના માંજલપુરના ધારાસભ્ય અને પૂર્વ મંત્રી સ્વર્ગસ્થ યોગેશ પટેલને શ્રદ્ધાંજલિ અર્પણ કરવામાં આવી હતી.

2030 સુધી ગુજરાતના તમામ શહેરો બનશે વાયર ફ્રી

રાજ્ય સરકારે ‘ગુજરાત વાયર ફ્રી સિટી મિશન’ શરૂ કરવાની જાહેરાત કરી છે. વડાપ્રધાન નરેન્દ્ર મોદીના સ્માર્ટ અને ગ્રીન સિટી વિઝનને આગળ વધારવાના ઉદ્દેશ સાથે આ યોજના અમલમાં મુકવામાં આવશે. મિશનના પ્રથમ તબક્કા માટે 500 કરોડ રૂપિયાની જોગવાઈ કરવામાં આવી છે. યોજના હેઠળ રાજ્યની 17 મહાનગરપાલિકા અને 151 નગરપાલિકા વિસ્તારોમાં હાલના ઓવરહેડ વીજ વાયર નેટવર્કને તબક્કાવાર રીતે ભૂમિગત કેબલમાં પરિવર્તિત કરવામાં આવશે.

હજારો કિલોમીટર નેટવર્ક થશે અંડરગ્રાઉન્ડ

આ પ્રોજેક્ટ અંતર્ગત અંદાજે 14,600 સર્કિટ કિલોમીટર હાઈ ટેન્શન અને 31,400 સર્કિટ કિલોમીટર લો ટેન્શન વીજ નેટવર્કને અંડરગ્રાઉન્ડ કરવામાં આવશે. સરકારના જણાવ્યા મુજબ આ કામગીરીથી ચોમાસા અને વાવાઝોડા દરમિયાન વાયર તૂટવા, શોર્ટ સર્કિટ થવા અને વીજ પુરવઠો ખોરવાવાની સમસ્યામાં નોંધપાત્ર ઘટાડો થશે. સાથે જ શહેરોની સુંદરતા, ટ્રાફિક સલામતી અને જાહેર સુરક્ષામાં પણ વધારો થવાની અપેક્ષા વ્યક્ત કરવામાં આવી છે.

દેશનું પ્રથમ સર્વિસ કમિશનરેટ ગુજરાતમાં શરૂ થશે

કેબિનેટ બેઠકમાં લેવાયેલો બીજો મહત્વપૂર્ણ નિર્ણય સેવા ક્ષેત્ર સાથે જોડાયેલો છે. રાજ્ય સરકારે દેશનું પ્રથમ ‘સર્વિસ કમિશનરેટ’ સ્થાપવાનો નિર્ણય લીધો છે. ઉદ્યોગ ક્ષેત્ર માટે જેમ અલગ કમિશનરેટ કાર્યરત છે, તેવી જ રીતે હવે પ્રવાસન, માહિતી પ્રૌદ્યોગિકી, ડિજિટલ સેવાઓ, કન્સલ્ટિંગ, ફિનટેક અને અન્ય સેવા ક્ષેત્રોના વિકાસ માટે વિશેષ કમિશનરેટ બનાવવામાં આવશે.

રોકાણ અને રોજગારીને મળશે વેગ

સર્વિસ કમિશનરેટ દ્વારા નવી નીતિઓ ઘડવામાં આવશે, વૈશ્વિક રોકાણ આકર્ષવા માટે પ્રયાસો થશે અને સેવા ક્ષેત્રમાં નવા પ્રોજેક્ટ્સને પ્રોત્સાહન આપવામાં આવશે. સરકારનું માનવું છે કે આ પગલાથી રાજ્યમાં રોજગારીની તકો વધશે અને ગુજરાતના કુલ આર્થિક વિકાસમાં મહત્વપૂર્ણ ફાળો મળશે.

નીતિ આયોગ બેઠક માટે તૈયારીઓ તેજ

રાજ્ય સરકાર દ્વારા આગામી નીતિ આયોગની બેઠકમાં ગુજરાતનો વિકાસ રોડમેપ રજૂ કરવાની તૈયારીઓ પણ શરૂ કરી દેવામાં આવી છે. કેબિનેટ બેઠક દરમિયાન તમામ વિભાગોને તેમના ક્ષેત્ર મુજબના વિકાસ સૂચનો અને યોજનાઓ તૈયાર કરવા સૂચના આપવામાં આવી છે.

સૂર્યઘર યોજનામાં ગુજરાતને રાષ્ટ્રીય ગૌરવ

પ્રધાનમંત્રી સૂર્યઘર યોજના હેઠળ શ્રેષ્ઠ કામગીરી બદલ ગુજરાતને દેશના શ્રેષ્ઠ રાજ્ય તરીકે પસંદ કરવામાં આવ્યું છે. 4 જૂને નવી દિલ્હીમાં યોજાનારા સમારોહમાં રાજ્યને આ સન્માન એનાયત કરવામાં આવશે.

પ્રાકૃતિક ખેતી માટે મહાભિયાન શરૂ

કૃષિ વિભાગ દ્વારા 1 જૂનથી 30 જૂન સુધી ‘ખેતી બચાવો’ અભિયાન શરૂ કરવામાં આવ્યું છે. સંકલ્પ મિશન અંતર્ગત આગામી એક વર્ષમાં વધુ પાંચ લાખ ખેડૂતોને પ્રાકૃતિક ખેતી સાથે જોડવાનો લક્ષ્યાંક નક્કી કરવામાં આવ્યો છે. આ અભિયાનને સફળ બનાવવા માટે મુખ્યમંત્રી અને રાજ્યપાલ જિલ્લા કલેક્ટરો તથા જિલ્લા વિકાસ અધિકારીઓ સાથે વીડિયો કોન્ફરન્સ દ્વારા માર્ગદર્શન આપશે.

ખેડૂતોના પ્રશ્નો અને ટેકાના ભાવ મુદ્દે ચર્ચા

ખેડૂતો દ્વારા ટેકાના ભાવે ખરીદી સંબંધિત ઉઠાવવામાં આવેલા પ્રશ્નોને લઈને રાજ્ય સરકાર કેન્દ્ર સાથે સતત સંપર્કમાં છે. નોંધાયેલા ખેડૂતોની સંખ્યા વધતા રાજ્યને મળતો ખરીદી ક્વોટા પણ વધ્યો છે. વધુ ક્વોટા મેળવવા માટે કેન્દ્ર સરકાર સાથે ચર્ચા ચાલુ હોવાનું જણાવાયું છે.

બાંગ્લાદેશી ઘૂસણખોરી મુદ્દે ગૃહ વિભાગ આપશે માહિતી

રાજ્યમાં ચાલી રહેલા બાંગ્લાદેશી નાગરિકો વિરુદ્ધના સર્ચ અભિયાન અંગે પૂછાયેલા પ્રશ્નના જવાબમાં સરકારે જણાવ્યું કે આ મામલે વિગતવાર માહિતી ગૃહ વિભાગ દ્વારા સત્તાવાર રીતે જાહેર કરવામાં આવશે.

વિકાસ, ટેક્નોલોજી અને સેવા ક્ષેત્રને પ્રાધાન્ય

વાયર ફ્રી સિટી મિશન અને સર્વિસ કમિશનરેટ જેવા નિર્ણયો રાજ્યના આધુનિક વિકાસ માટે મહત્વપૂર્ણ માનવામાં આવી રહ્યા છે. આગામી વર્ષોમાં ગુજરાતને વધુ સ્માર્ટ, સુરક્ષિત અને રોકાણમૈત્રી રાજ્ય બનાવવા માટે આ નિર્ણયો મહત્વપૂર્ણ સાબિત થઈ શકે છે.

ગુજરાતમાં છેલ્લા કેટલાક દિવસથી પડી રહેલી કાળઝાળ ગરમી વચ્ચે હવે હવામાનમાં મોટો પલટો જોવા મળી રહ્યો છે. રાજ્યના અનેક વિસ્તારોમાં પ્રિમોન્સૂન એક્ટિવિટી સક્રિય બનતા વરસાદી માહોલ જામ્યો છે.

11 જિલ્લામાં ઓરેન્જ એલર્ટ જાહેર

હવામાન વિભાગના અનુમાન મુજબ બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, પંચમહાલ, દાહોદ, મહીસાગર અને કચ્છ જિલ્લામાં ગાજવીજ સાથે મધ્યમ વરસાદ પડી શકે છે.

દક્ષિણ ગુજરાત અને સૌરાષ્ટ્રમાં પણ અસર

ઉત્તર ગુજરાત ઉપરાંત દક્ષિણ ગુજરાત અને સૌરાષ્ટ્રના કેટલાક જિલ્લાઓમાં પણ હવામાન પલટાવાની શક્યતા છે. સુરત, વલસાડ, આણંદ અને વડોદરા સહિતના વિસ્તારોમાં વરસાદી માહોલ સર્જાઈ શકે છે.

ગરમીમાં નોંધપાત્ર ઘટાડો

રાજ્યમાં સક્રિય થયેલી વરસાદી સિસ્ટમના કારણે તાપમાનમાં નોંધપાત્ર ઘટાડો નોંધાયો છે. છેલ્લા કેટલાક દિવસની સરખામણીએ અનેક શહેરોમાં મહત્તમ તાપમાન 3થી 4 ડિગ્રી સુધી ઘટ્યું છે.

અમદાવાદમાં વાદળછાયું વાતાવરણ

અમદાવાદ શહેરમાં આગામી 24 કલાક દરમિયાન વાદળછાયું વાતાવરણ રહેવાની સંભાવના છે. શહેરમાં ગાજવીજ સાથે હળવાથી મધ્યમ વરસાદના એકથી બે રાઉન્ડ આવી શકે છે. હવામાન વિભાગના અનુમાન મુજબ આગામી થોડા દિવસ વરસાદી માહોલ યથાવત રહેશે. જોકે 6 જૂન બાદ વરસાદનું પ્રમાણ ઘટી શકે છે.

કેરળમાં ચોમાસાની એન્ટ્રીના એંધાણ

દક્ષિણ-પશ્ચિમ ચોમાસું હવે કેરળની નજીક પહોંચી ગયું છે. આગામી દિવસોમાં તેની સત્તાવાર એન્ટ્રી થવાની શક્યતા વ્યક્ત કરવામાં આવી છે.

અલ નીનોને લઈને વૈશ્વિક ચિંતા

વિશ્વ હવામાન વિજ્ઞાન સંગઠને આગામી મહિનાઓ માટે હવામાન સંબંધિત ચેતવણી જાહેર કરી છે. અલ નીનોની સ્થિતિ મજબૂત બનવાની સંભાવના વ્યક્ત કરવામાં આવી છે.

કેન્દ્ર સરકારે રાજ્યોને કર્યા સતર્ક

સંભવિત હવામાન પરિવર્તનને ધ્યાનમાં રાખીને કેન્દ્ર સરકારે રાજ્યોને આગોતરી તૈયારીઓ રાખવા સૂચના આપી છે.

તથ્ય પટેલને જામીન બાદ સુપ્રીમ કોર્ટની મોટી શરત

અમદાવાદના બહુચર્ચિત ઇસ્કોન બ્રિજ અકસ્માત કેસમાં આરોપી તથ્ય પટેલને નિયમિત જામીન મળ્યા બાદ હવે સુપ્રીમ કોર્ટે વધુ એક મહત્વપૂર્ણ નિર્દેશ આપ્યો છે. જામીન આપતા પહેલા કોર્ટે તથ્ય પટેલની બોનાફાઈડ દર્શાવવા માટે નોંધપાત્ર રકમ જમા કરાવવાની શરત મૂકી છે.

સુપ્રીમ કોર્ટમાં રકમ અંગે ચર્ચા

જામીન અરજીની સુનાવણી દરમિયાન સુપ્રીમ કોર્ટે તથ્ય પટેલ તરફથી કોઈ વળતર કે નાણાકીય જવાબદારી દર્શાવવા અંગે અભિપ્રાય માંગ્યો હતો. જેના જવાબમાં તથ્ય પટેલના વકીલે ગુજરાત સરકારના વકીલનો અભિપ્રાય લેવા પ્રસ્તાવ મૂક્યો હતો.

સરકારના વકીલે મૃતક દીઠ 10 લાખની માંગ કરી

ગુજરાત સરકાર તરફથી રજૂઆત કરતા સરકારી વકીલે અકસ્માતમાં મૃત્યુ પામેલા દરેક વ્યક્તિ દીઠ 10 લાખ રૂપિયા જમા કરાવવાની સૂચનાત્મક માંગ કરી હતી. ઇસ્કોન બ્રિજ અકસ્માતમાં કુલ 9 લોકોના મોત થયા હતા. આ રજૂઆત દરમિયાન તથ્ય પટેલના વકીલે પણ વાંધો વ્યક્ત કર્યો નહોતો.

સુપ્રીમ કોર્ટનો 1 કરોડ જમા કરાવવાનો આદેશ

બંને પક્ષોની દલીલો સાંભળ્યા બાદ સુપ્રીમ કોર્ટે તથ્ય પટેલને ટ્રાયલ કોર્ટ સમક્ષ કુલ 1 કરોડ રૂપિયાની લમ્પસમ રકમ જમા કરાવવાનો આદેશ આપ્યો છે. આ રકમ જામીનની શરતના ભાગરૂપે જમા કરાવવાની રહેશે.

પોણા ત્રણ વર્ષ બાદ મળ્યા નિયમિત જામીન

તથ્ય પટેલને લગભગ પોણા ત્રણ વર્ષ બાદ નિયમિત જામીન મળ્યા છે. જુલાઈ 2023માં બનેલી આ દુર્ઘટના બાદ તે સતત જેલમાં હતો. સુપ્રીમ કોર્ટે નોંધ્યું હતું કે ટ્રાયલ હજુ પૂર્ણ થઈ નથી અને આરોપી હજુ દોષિત જાહેર થયો નથી.

આંખે દેખ્યા સાક્ષીઓની તપાસ પૂર્ણ

હાલ અમદાવાદ ગ્રામ્ય સેશન્સ કોર્ટમાં કેસની ટ્રાયલ ચાલી રહી છે. કેસમાં કુલ 191 જેટલા સાક્ષીઓ નોંધાયેલા છે. જેમાંથી ઘટનાના આંખે દેખ્યા મહત્વપૂર્ણ સાક્ષીઓની તપાસ પૂર્ણ થઈ ચૂકી છે.

7 દિવસમાં દાખલ થઈ હતી ચાર્જશીટ

અકસ્માતની ગંભીરતાને ધ્યાનમાં રાખીને પોલીસે ઘટના બન્યાના માત્ર 7 દિવસમાં જ ચાર્જશીટ દાખલ કરી હતી. તથ્ય પટેલ સામે IPCની વિવિધ ગંભીર કલમો હેઠળ ગુનો નોંધાયો હતો અને ત્યારથી કેસ કોર્ટમાં ચાલી રહ્યો છે.

શું હતો ઇસ્કોન બ્રિજ અકસ્માત?

19 જુલાઈ 2023ની મધરાત્રિએ અમદાવાદના ઇસ્કોન બ્રિજ પર સર્જાયેલા અકસ્માત બાદ લોકો ઘટનાસ્થળે ભેગા થયા હતા. તે દરમિયાન તથ્ય પટેલની જેગુઆર કાર પૂરપાટ ઝડપે આવી અને અનેક લોકોને અડફેટે લીધા હતા. આ ભયાનક ઘટનામાં 9 લોકોના મોત થયા હતા જ્યારે અનેક લોકો ગંભીર રીતે ઇજાગ્રસ્ત બન્યા હતા. ઘટનાએ સમગ્ર ગુજરાત સહિત દેશભરમાં ભારે ચર્ચા જગાવી હતી.

હવે સૌની નજર ટ્રાયલ પર

સુપ્રીમ કોર્ટમાંથી જામીન મળ્યા બાદ હવે સૌની નજર ટ્રાયલ કોર્ટમાં ચાલી રહેલી કાર્યવાહી પર છે. આગામી દિવસોમાં બાકીના સાક્ષીઓની તપાસ અને પુરાવાઓના આધારે કેસમાં મહત્વપૂર્ણ વળાંક આવી શકે છે.

કોકરોચ જનતા પાર્ટી (CJP)ને દિલ્હી હાઈકોર્ટમાંથી મોટો કાનૂની ઝટકો લાગ્યો છે. કોર્ટે પાર્ટીના બ્લોક કરાયેલા X (અગાઉ ટ્વિટર) એકાઉન્ટને તાત્કાલિક પુનઃસ્થાપિત કરવાની માંગ ફગાવી દીધી છે. સાથે જ કોર્ટે સ્પષ્ટ કર્યું છે કે મામલાની સંપૂર્ણ સુનાવણી અને તમામ પક્ષોની દલીલો સાંભળ્યા બાદ જ કોઈ અંતિમ નિર્ણય લેવામાં આવશે.

તાત્કાલિક રાહત આપવાનો ઇનકાર

કોકરોચ જનતા પાર્ટીના સ્થાપક અભિજીત દીપકે પોતાના X એકાઉન્ટ પર લાગેલા પ્રતિબંધ સામે દિલ્હી હાઈકોર્ટમાં અરજી દાખલ કરી હતી. સુનાવણી દરમિયાન તેમની તરફથી રજૂઆત કરવામાં આવી હતી કે ઓછામાં ઓછું એકાઉન્ટ તો ફરી શરૂ કરવામાં આવે અને જો જરૂરી હોય તો વાંધાજનક ગણાતી પોસ્ટ્સ અસ્થાયી રીતે બ્લોક રાખવામાં આવે. પરંતુ હાઈકોર્ટે આ દલીલ સ્વીકારી નહોતી અને જણાવ્યું હતું કે પ્રથમ નજરે એકાઉન્ટ પરની કેટલીક સામગ્રી વાંધાજનક જણાઈ રહી છે. તેથી તાત્કાલિક કોઈ રાહત આપી શકાય નહીં.

કેન્દ્ર સરકાર અને X પાસેથી માંગ્યો જવાબ

કોર્ટે કેન્દ્ર સરકાર અને X પ્લેટફોર્મને આ સમગ્ર મામલે વિગતવાર સોગંદનામું દાખલ કરવાનો આદેશ આપ્યો છે. હાઈકોર્ટે કહ્યું કે બંને પક્ષોનો જવાબ મળ્યા બાદ જ આગળની કાર્યવાહી અંગે નિર્ણય લેવામાં આવશે.

6 જુલાઈએ થશે આગામી સુનાવણી

દિલ્હી હાઈકોર્ટે કેસની આગામી સુનાવણી 6 જુલાઈ સુધી મુલતવી રાખી છે. તે દરમિયાન કેન્દ્ર સરકારની રિવ્યુ કમિટી સમક્ષ પણ અભિજીત દીપક પોતાનો પક્ષ રજૂ કરી શકશે. કોર્ટે રિવ્યુ કમિટીને પણ એકાઉન્ટ બ્લોક કરવાના નિર્ણયની સમીક્ષા કરવા અને આગામી સુનાવણી દરમિયાન તેનો અહેવાલ રજૂ કરવા સૂચના આપી છે.

વર્ચ્યુઅલ હાજરીની મંજૂરી

સુનાવણી દરમિયાન અભિજીત દીપક વર્ચ્યુઅલી હાજર રહ્યા હતા. કોર્ટે તેમને વ્યક્તિગત રીતે અથવા અધિકૃત પ્રતિનિધિ મારફતે પણ પોતાની રજૂઆત કરવાની છૂટ આપી છે.

શું છે કોકરોચ જનતા પાર્ટી?

કોકરોચ જનતા પાર્ટી એટલે કે CJPની શરૂઆત મે મહિનામાં થઈ હતી. પાર્ટીના સ્થાપક અભિજીત દીપક અગાઉ આમ આદમી પાર્ટી સાથે સંકળાયેલા રહ્યા હતા. ચીફ જસ્ટિસની એક ટિપ્પણી બાદ સોશિયલ મીડિયા પર શરૂ થયેલા વિવાદ વચ્ચે 15 મેના રોજ આ નવા રાજકીય-સામાજિક પ્લેટફોર્મની શરૂઆત કરવામાં આવી હતી. પાર્ટીનો દાવો છે કે તેનો મુખ્ય હેતુ યુવાનોના મુદ્દાઓને અવાજ આપવાનો અને સરકારને જવાબદાર બનાવવાનો છે.

21 મેના રોજ X એકાઉન્ટ બ્લોક થયું

કોકરોચ જનતા પાર્ટીનું મૂળ X એકાઉન્ટ 21 મેના રોજ ભારતમાં બ્લોક કરવામાં આવ્યું હતું. ત્યારબાદ પાર્ટીએ ‘Cockroach Is Back’ નામથી નવું એકાઉન્ટ શરૂ કર્યું હતું. નવા એકાઉન્ટને થોડા જ દિવસોમાં લાખો લોકોનો પ્રતિસાદ મળ્યો હતો અને તેના ફોલોઅર્સની સંખ્યા ઝડપથી વધી હતી.

NEET મુદ્દે પણ અભિયાન શરૂ કર્યું

પાર્ટીએ તાજેતરમાં NEET-UG 2026 પેપર લીક મુદ્દે અભિયાન શરૂ કર્યું હતું. સાથે જ કેન્દ્રીય શિક્ષણ મંત્રીના રાજીનામાની માંગ પણ ઉઠાવી હતી.

ચીફ જસ્ટિસે અગાઉ આપી હતી સ્પષ્ટતા

ઉલ્લેખનીય છે કે વિવાદની શરૂઆત ચીફ જસ્ટિસની એક ટિપ્પણી બાદ થઈ હતી. જોકે બાદમાં ચીફ જસ્ટિસે સ્પષ્ટતા કરતા જણાવ્યું હતું કે તેમની ટિપ્પણીઓ યુવાનો માટે નહોતી, પરંતુ કાયદાકીય વ્યવસાયમાં ગેરરીતિથી પ્રવેશ કરનારા લોકો માટે હતી.

તેમણે એવો પણ આક્ષેપ કર્યો હતો કે મીડિયાના કેટલાક વર્ગોએ તેમની ટિપ્પણીઓને ખોટી રીતે રજૂ કરી હતી.

હવે સૌની નજર 6 જુલાઈની સુનાવણી પર છે, જ્યાં કોકરોચ જનતા પાર્ટીના X એકાઉન્ટના ભવિષ્ય અંગે મહત્વપૂર્ણ નિર્ણય આવી શકે છે.

ગાંધીનગરના કુડાસણ વિસ્તારમાં એક હૃદયદ્રાવક ઘટના સામે આવી છે, જ્યાં 42 વર્ષીય યુવાને ઝેરી દવા પી જીવન ટૂંકાવી લીધું. સૌથી કરુણ બાબત એ રહી કે આપઘાત પહેલાં તેણે પોતાની દીકરી અને પરિવારની સુરક્ષાની ચિંતા કરતા ઘરના દરવાજા પર ચેતવણીભરી ચિઠ્ઠી ચોંટાડી હતી. ઘટના બાદ લગભગ પાંચ દિવસ સુધી લાશ ઘરમાં જ પડી રહી હતી.

કુડાસણની પૂનમ રેસિડેન્સીમાં બની ઘટના

મળતી માહિતી મુજબ કુડાસણ સ્થિત પૂનમ રેસિડેન્સીમાં રહેતા 42 વર્ષીય પંકજ સુરેન્દ્રભાઈ ભણસાલીએ ઝેરી દવા પી આપઘાત કર્યો હતો. મૂળ મુંબઈના બોરીવલીના રહેવાસી પંકજભાઈ ગાંધીનગરમાં રહેતા હતા અને સ્ટોક માર્કેટ સંબંધિત કંપનીમાં નોકરી કરતા હતા.

નોકરી છૂટતાં વધ્યો માનસિક તણાવ

પરિવારજનો અને પોલીસની પ્રાથમિક તપાસમાં સામે આવ્યું છે કે છેલ્લા પાંચ મહિનાથી તેમની નોકરી છૂટી ગઈ હતી. આ ઉપરાંત શેરબજારમાં આર્થિક નુકસાન અને દેવાના કારણે તેઓ ભારે માનસિક તણાવમાં જીવતા હતા. આર્થિક સંકડામણ સતત વધતા તેમણે આ પગલું ભર્યું હોવાનું અનુમાન છે.

પરિવાર પિયર ગયો, એકલા ઘરમાં હતા

ગત 13 મેના રોજ તેમની પત્ની અને પુત્રી પિયર ગયા હતા. ત્યારબાદ 22 મેના રોજ પતિ-પત્ની વચ્ચે છેલ્લી વખત ફોન પર વાતચીત થઈ હતી. તે પછી પંકજભાઈનો મોબાઈલ ફોન સતત સ્વીચ ઓફ આવતો હતો. પરિવારજનો દ્વારા વારંવાર સંપર્ક કરવાનો પ્રયાસ કરવામાં આવ્યો હતો, પરંતુ કોઈ જવાબ મળ્યો નહોતો. જેના કારણે પરિવારને શંકા જાગી હતી.

દરવાજા પરની ચિઠ્ઠીએ બધાને હચમચાવી દીધા

27 મેના રોજ પત્ની પોતાના ભાઈ સાથે ઘરે પહોંચી હતી. ત્યારે મુખ્ય દરવાજા બહાર ચોંટાડેલી એક ચિઠ્ઠી જોઈ તેઓ સ્તબ્ધ થઈ ગયા હતા.

ચિઠ્ઠીમાં લખવામાં આવ્યું હતું: “દીકરી અંદર ના આવતી… પાણી પીવું નહીં… ઘરમાં ઝેરી દવા છે… માસ્ક પહેરવું…” આ શબ્દો વાંચીને પરિવારજનો ગભરાઈ ગયા હતા.

પાંચ દિવસ જૂની લાશ મળી

ઘરમાં પ્રવેશતા જ પંકજભાઈ મૃત હાલતમાં મળી આવ્યા હતા. અંદાજે પાંચ દિવસ સુધી લાશ ઘરમાં જ પડેલી રહેતા શરીર ફૂલી ગયું હતું. ઝેરી ગેસ અને દવાની અસરના કારણે ચહેરો પણ કાળો પડી ગયો હતો.

સેલફોસ નામની ઝેરી દવા મળી

પોલીસને સ્થળ પરથી ઘઉંમાં ઉપયોગમાં લેવાતી ‘સેલફોસ’ નામની અત્યંત ઝેરી દવાની ખાલી પડીકીઓ મળી આવી હતી. પ્રાથમિક તપાસ મુજબ આ જ દવા પી આપઘાત કરવામાં આવ્યો હોવાનું માનવામાં આવી રહ્યું છે.

22 મેના રોજ આપઘાત થયો હોવાનો અંદાજ

પોલીસના અનુમાન મુજબ ઘટના 22 મેના રોજ બની હોઈ શકે છે. કારણ કે તે દિવસે પરિવાર સાથે છેલ્લો સંપર્ક થયો હતો અને ત્યારબાદ ફોન બંધ થઈ ગયો હતો.

પોલીસે શરૂ કરી તપાસ

ઘટનાની જાણ થતાં ઇન્ફોસિટી પોલીસ ઘટનાસ્થળે પહોંચી હતી અને જરૂરી કાયદેસરની કાર્યવાહી હાથ ધરી હતી. હાલ અકસ્માત મોતનો ગુનો નોંધી આપઘાત પાછળના ચોક્કસ કારણોની તપાસ કરવામાં આવી રહી છે.