samachardiary24x7.in

Category: ગુજરાત

  • અમદાવાદમાં પ્રથમ સફળ CAR-T સેલ થેરાપી, બ્લડ કેન્સરના દર્દીને મળ્યું નવું જીવન

    ગુજરાતમાં પ્રથમ સફળ CAR-T સેલ થેરાપીનો માઇલસ્ટોન
    અમદાવાદ સ્થિત HCG આસ્થા કેન્સર સેન્ટરે કેન્સરની સારવારના ક્ષેત્રમાં ઐતિહાસિક સિદ્ધિ નોંધાવી છે. હોસ્પિટલમાં પ્રાઈમરી રિફ્રેક્ટરી લિમ્ફોમા (જટિલ બ્લડ કેન્સર)થી પીડાતા દર્દી પર ગુજરાતની પ્રથમ સફળ CAR-T સેલ થેરાપી કરવામાં આવી છે.
    દર્દી પર અગાઉ કીમોથેરાપી અને ઈમ્યુનોથેરાપી જેવી પરંપરાગત સારવાર અસરકારક સાબિત થઈ નહોતી. ત્યારબાદ CAR-T સેલ થેરાપી અપાતા સારવાર સફળ રહી હોવાનું હોસ્પિટલ દ્વારા જણાવાયું છે.
    નિષ્ણાત ટીમે સફળતાપૂર્વક પૂર્ણ કરી સારવાર
    આ સારવારનું નેતૃત્વ હેમેટોલોજી અને બોન મેરો ટ્રાન્સપ્લાન્ટ (BMT) નિષ્ણાત ડૉ. કૌમિલ પટેલ અને તેમની મલ્ટિડિસિપ્લિનરી એડવાન્સ્ડ સેલ્યુલર થેરાપી ટીમે કર્યું હતું.
    ડૉ. કૌમિલ પટેલના જણાવ્યા મુજબ, આ સફળતા દર્શાવે છે કે બ્લડ કેન્સરની સારવાર હવે પરંપરાગત પદ્ધતિઓથી આગળ વધીને સેલ્યુલર થેરાપીના નવા યુગમાં પ્રવેશી રહી છે. ખાસ કરીને જેમને કીમોથેરાપીથી લાભ મળતો નથી, તેમના માટે CAR-T થેરાપી આશાનું નવું કિરણ બની શકે છે.
    શું છે CAR-T સેલ થેરાપી?
    CAR-T સેલ થેરાપી એ વ્યક્તિગત (Personalized) અને અત્યાધુનિક કેન્સર સારવાર પદ્ધતિ છે.
    તેની પ્રક્રિયામાં—
    • દર્દીના શરીરમાંથી T-Cells એકત્રિત કરવામાં આવે છે.
    • લેબોરેટરીમાં આ કોષોને જિનેટિક રીતે એ રીતે બદલવામાં આવે છે કે તેઓ કેન્સરના કોષોને ઓળખીને નાશ કરી શકે.
    • ત્યારબાદ આ સુધારેલા T-Cells ફરી દર્દીના શરીરમાં દાખલ કરવામાં આવે છે.
    • સારવાર બાદ દર્દીનું સતત સઘન મોનિટરિંગ કરવામાં આવે છે.
    ગુજરાતના દર્દીઓને મળશે ઘરઆંગણે અદ્યતન સારવાર
    આ સિદ્ધિ બાદ હવે ગુજરાત અને આસપાસના રાજ્યોના બ્લડ કેન્સરના દર્દીઓને આવી આંતરરાષ્ટ્રીય સ્તરની સારવાર માટે અન્ય શહેરોમાં જવાની જરૂરિયાત ઓછી થશે.
    HCG આસ્થા કેન્સર સેન્ટરના રીજનલ ડિરેક્ટર ડૉ. ભરત ગઢવી અને ચીફ ઓપરેટિંગ ઓફિસર સુદર્શન ભામરેએ જણાવ્યું કે હોસ્પિટલ વૈજ્ઞાનિક પુરાવા આધારિત અને આંતરરાષ્ટ્રીય ધોરણોની કેન્સર સારવાર દર્દીઓને ઉપલબ્ધ કરાવવા પ્રતિબદ્ધ છે.
    સારવાર બાદ દર્દીએ પણ ડૉક્ટરો અને સમગ્ર મેડિકલ ટીમનો આભાર વ્યક્ત કરતાં જણાવ્યું કે આ સારવારથી તેને જીવનની નવી આશા મળી છે.

  • ગુજરાત હાઇકોર્ટનો મહત્વપૂર્ણ ચુકાદો: દુષ્કર્મ પીડિત બે સગીરાઓને ગર્ભપાતની મંજૂરી

    દુષ્કર્મ પીડિત બે સગીરાઓને ગુજરાત હાઇકોર્ટથી રાહત
    ગુજરાત હાઇકોર્ટે એક મહત્વપૂર્ણ અને સંવેદનશીલ ચુકાદામાં સાબરકાંઠા અને કચ્છની બે દુષ્કર્મ પીડિત સગીરાઓને ગર્ભપાત કરવાની મંજૂરી આપી છે. કોર્ટે પીડિતાઓના શારીરિક અને માનસિક હિતને પ્રાથમિકતા આપતાં સુપ્રીમ કોર્ટના અગાઉના ચુકાદાઓના આધારે આ નિર્ણય કર્યો છે.
    સાબરકાંઠાની 16 વર્ષની સગીરાને 26 સપ્તાહનો ગર્ભ
    પ્રથમ કેસ સાબરકાંઠાના હિંમતનગરનો છે, જ્યાં 16 વર્ષની સગીરા સાથે થયેલા કથિત દુષ્કર્મના કેસમાં ગર્ભપાતની મંજૂરી માગવામાં આવી હતી. મેડિકલ રિપોર્ટ મુજબ સગીરાને 26 સપ્તાહ અને 3 દિવસનો ગર્ભ હતો. હાઇકોર્ટે હિંમતનગર સિવિલ હોસ્પિટલમાં નિષ્ણાત તબીબોની દેખરેખ હેઠળ ગર્ભપાત કરવાની મંજૂરી આપી છે.
    કચ્છની 17 વર્ષની સગીરાને પણ મંજૂરી
    બીજો કેસ કચ્છ જિલ્લાના ગાંધીધામનો છે. 17 વર્ષની સગીરાને 16 સપ્તાહનો ગર્ભ છે અને તે એનિમિયા જેવી તબીબી સમસ્યાથી પણ પીડાય છે. તમામ તબીબી અહેવાલોને ધ્યાનમાં રાખીને કોર્ટે ગાંધીધામ જનરલ હોસ્પિટલમાં ગર્ભપાતની મંજૂરી આપી છે.
    નિષ્ણાત તબીબોની પેનલ રહેશે હાજર
    કોર્ટે બંને કેસમાં ગર્ભપાતની પ્રક્રિયા નિષ્ણાત ડૉક્ટરોની વિશેષ પેનલની દેખરેખ હેઠળ કરવાના નિર્દેશ આપ્યા છે. સાથે જ પીડિતા અને તેના પરિવારને સર્જરી માટે પોતાના જોખમે સંમતિપત્ર (Undertaking) આપવાનો પણ આદેશ કર્યો છે.
    DNA સેમ્પલ સાચવવાનો આદેશ
    ભવિષ્યની ફોજદારી તપાસ અને પુરાવા માટે હાઇકોર્ટે ગર્ભમાંથી વૈજ્ઞાનિક પદ્ધતિથી DNA ટિશ્યૂ સેમ્પલ એકત્ર કરીને તપાસ અધિકારીને સોંપવાનો નિર્દેશ પણ આપ્યો છે.
    બાળક જીવિત જન્મે તો સરકાર સંભાળશે જવાબદારી
    ચુકાદામાં કોર્ટે સ્પષ્ટ કર્યું છે કે જો ગર્ભપાત દરમિયાન બાળક જીવિત જન્મે અને પરિવાર તેની જવાબદારી લેવા તૈયાર ન હોય, તો રાજ્ય સરકાર અને સંબંધિત એજન્સીઓએ જુવેનાઇલ જસ્ટિસ એક્ટ હેઠળ બાળકની સંપૂર્ણ જવાબદારી સંભાળવાની રહેશે. હોસ્પિટલને પણ નવજાતને શ્રેષ્ઠ તબીબી સારવાર આપવાનો આદેશ આપવામાં આવ્યો છે.

  • અમદાવાદની 149મી જગન્નાથ રથયાત્રાનો ત્રિ-દિવસીય કાર્યક્રમ જાહેર, 16 જુલાઈએ સવારે 7 વાગ્યે નીકળશે ભવ્ય નગરયાત્રા

    149મી જગન્નાથ રથયાત્રાની ભવ્ય તૈયારીઓ પૂર્ણ
    અમદાવાદના અસ્મિતા પર્વ સમાન અને દેશભરમાં પુરી બાદ સૌથી વધુ આતુરતાથી જોવાતી ભગવાન જગન્નાથજીની 149મી પરંપરાગત રથયાત્રા માટે મંદિર પ્રશાસને ત્રિ-દિવસીય કાર્યક્રમ જાહેર કર્યો છે. 14 જુલાઈથી ધાર્મિક વિધિઓનો પ્રારંભ થઈ ગયો છે, જ્યારે 16 જુલાઈ, ગુરુવારે સવારે 7:00 વાગ્યે ભગવાન જગન્નાથજી, બહેન સુભદ્રાજી અને ભાઈ બળદેવજી ભવ્ય નગરયાત્રા માટે પ્રસ્થાન કરશે.
    નેત્રોત્સવ અને ધ્વજારોહણથી શરૂઆત
    પ્રથમ દિવસે વહેલી સવારે ગર્ભગૃહમાં ત્રણેય મૂર્તિઓની રત્નવેદી પર શાસ્ત્રોક્ત પ્રતિષ્ઠા બાદ નેત્રોત્સવ વિધિ યોજાઈ હતી. ધ્વજારોહણ બાદ મંદિરના કપાટ ખુલતા મોટી સંખ્યામાં ભક્તોએ દર્શન કર્યા. રાજ્યના ગૃહમંત્રી હર્ષ સંઘવીએ મહાઆરતીમાં હાજરી આપી હતી અને બાદમાં દેશભરના સાધુ-સંતો માટે ભંડારા તથા વસ્ત્રદાન કાર્યક્રમ યોજાયો હતો.
    15 જુલાઈએ સોનાવેશ અને રથ પ્રતિષ્ઠા
    રથયાત્રાની પૂર્વસંધ્યાએ 15 જુલાઈએ સવારે 10:30 વાગ્યે ભગવાનનો ભવ્ય સોનાવેશ કરવામાં આવશે. સાથે ગજરાજોની વિશેષ પૂજા યોજાશે. સવારે 11:30 વાગ્યે ત્રણેય રથોની પ્રતિષ્ઠા થશે, જ્યારે બપોરે રથપૂજન અને રાત્રે વિશેષ પૂજા તથા સંધ્યા આરતી યોજાશે.
    16 જુલાઈએ સવારે 4 વાગ્યેથી ધાર્મિક કાર્યક્રમો
    રથયાત્રાના દિવસે સવારે 4 વાગ્યે મંગળા આરતીથી કાર્યક્રમની શરૂઆત થશે. ત્યારબાદ ખીચડી ભોગ, રથમાં શાહી પ્રવેશ અને સવારે 7 વાગ્યે પહિંદ વિધિ બાદ ઐતિહાસિક 149મી રથયાત્રા નગરચર્યાએ નીકળશે.
    સુરક્ષા માટે 30 હજારથી વધુ પોલીસનો બંદોબસ્ત
    ગૃહમંત્રી હર્ષ સંઘવીએ જણાવ્યું કે રથયાત્રા માટે તમામ તૈયારીઓ પૂર્ણ થઈ ગઈ છે. સમગ્ર રૂટનું નિરીક્ષણ કરવામાં આવ્યું છે અને તમામ સમાજના લોકોના સહયોગથી યાત્રા શાંતિપૂર્ણ રીતે યોજાશે.
    • 30 હજારથી વધુ પોલીસકર્મીઓ
    • 100થી વધુ ડ્રોન દ્વારા સર્વેલન્સ
    • 65 હજારથી વધુ ફેસ રેકગ્નિશન ડેટાબેઝ
    • AI આધારિત મોનિટરિંગ સિસ્ટમ
    તૈનાત રહેશે. ઉપરાંત મિલિટરી અને પેરામિલિટરી દળ પણ સુરક્ષામાં જોડાશે.
    નાગરિકોને ખાસ અપીલ
    પ્રશાસને નાગરિકોને ભયજનક અને જર્જરિત ઇમારતોની નજીક ઊભા ન રહેવા અપીલ કરી છે. ગજરાજ પસાર થાય ત્યાં સુધી ડીજે ન વગાડવા પણ સૂચના આપવામાં આવી છે.
    મેડિકલ ઈમરજન્સી માટે વિશેષ વ્યવસ્થા
    અમદાવાદ મ્યુનિસિપલ કોર્પોરેશન દ્વારા રથયાત્રા રૂટ પર 7 મેડિકલ વાન તૈનાત કરાઈ છે. ઉપરાંત 11 જેટલી 108 એમ્બ્યુલન્સ, શારદાબેન, એલ.જી. અને SVP હોસ્પિટલ સહિત તમામ અર્બન હેલ્થ સેન્ટરોમાં ડોક્ટરો અને સ્ટાફ સ્ટેન્ડબાય રાખવામાં આવ્યો છે.

  • જોટાણા મામલતદાર કચેરી કે લાંચિયા અધિકારીઓનો અડ્ડો? ભાજપના જ સિનિયર નેતાના સનસનીખેજ આક્ષેપથી ખળભળાટ!

    જોટાણા:

      મહેસાણા જિલ્લાની જોટાણા મામલતદાર કચેરી હાલ ભ્રષ્ટાચારનો ગઢ બની ચૂકી હોય તેવા ગંભીર દ્રશ્યો સામે આવ્યા છે. ભાજપના જ એક સિનિયર આગેવાને પોતાની જ સરકારના વહીવટીતંત્રની પોલ ખોલી નાખતા સમગ્ર પંથકમાં ભારે ખળભળાટ મચી ગયો છે. ભાજપના તાલુકા પંચાયત સદસ્યના પતિ અને સિનિયર નેતા દિલીપસિંહ સોલંકીએ વહીવટીતંત્ર પર ગંભીર આરોપ લગાવતા ખુલ્લેઆમ જણાવ્યું છે કે, “આ કચેરીમાં પૈસા આપો તો જ કામ થાય છે, બાકી ધક્કા ખાવા સિવાય કોઈ આરો નથી!”

    લાંચ ન આપતા ભાજપ નેતાની જ જમીનની એન્ટ્રી રદ કરી, બાબુઓની દાદાગીરી!

      મળતી માહિતી મુજબ, સરકારી બાબુઓની હિંમત એટલી વધી ગઈ છે કે તેઓ હવે સત્તાધારી પક્ષના નેતાઓને પણ નથી ગણકારતા. દિલીપસિંહ સોલંકીએ આક્ષેપ કર્યો છે કે લાંચની રકમ ન ચૂકવતા સરકારી બાબુઓએ પોતાની દાદાગીરી બતાવીને તેમની જમીનની કાચી એન્ટ્રી રદ કરી નાખી હતી.

    કચેરીમાં ચાલી રહેલા કાળાબજારની વિગતો આપતા તેમને જણાવ્યું કે, એકત્રીકરણના નામે જૂના હુકમોને જાણીજોઈને લટકાવી રાખવામાં આવે છે. બીજી તરફ, જે નવી અરજીઓમાં અંડર ટેબલ ‘વહીવટ’ (પૈસા) થઈ જાય છે, તેને ફટાફટ મંજૂરી આપી દેવામાં આવે છે!

    સર્કલ ઓફિસર પર સીધો આરોપ, મામલતદારનું ભેદી મૌન!

      આ સમગ્ર કૌભાંડમાં સર્કલ ઓફિસર સહદેવભાઈ સામે સીધો આંગળી ચીંધવામાં આવી છે. આક્ષેપ છે કે સહદેવભાઈને મનધારી રકમ ન મળતા તેમણે કામ બગાડ્યું હતું. આટલું જ નહીં, આ ગંભીર બાબતે જ્યારે મામલતદારને રજૂઆત કરવામાં આવી, ત્યારે જવાબદાર અધિકારીએ કોઈ પગલાં લેવાના બદલે ‘ભેદી મૌન’ ધારણ કરી લીધું હતું, જે ક્યાંક ને ક્યાંક મોટા આશીર્વાદ હોવાની શંકા જન્માવે છે.

    *મોટો સવાલ*: 

        જો સત્તાધારી પક્ષના સિનિયર નેતાઓ પાસે પણ સરકારી બાબુઓ આ રીતે ખુલ્લેઆમ લાંચ માંગતા હોય, તો પછી બિચારી સામાન્ય જનતાની હાલત કેવી થતી હશે? સામાન્ય નાગરિકો તો આ કચેરીમાં પીસાઈ રહ્યા છે.

    *મુખ્યમંત્રી સુધી પહોંચશે ફરિયાદ*

      જોટાણા તાલુકાને આ ભ્રષ્ટાચારના અડ્ડામાંથી મુક્ત કરાવવા અને બેફામ બનેલા લાંચિયા બાબુઓ પર કડક કાનૂની સકંજો કસવા માટે હવે છેક મુખ્યમંત્રી સુધી લેખિત રજૂઆત કરવાની તૈયારીઓ કરી લેવામાં આવી છે. હવે જોવાનું એ રહેશે કે આ સનસનીખેજ ખુલાસા બાદ ગાંધીનગરથી કોઈ કડક પગલાં લેવાય છે કે પછી ભ્રષ્ટાચારનો આ ખેલ આમ જ ચાલતો રહેશે?

  • અમદાવાદમાં નર્મદા કેનાલમાંથી એક જ દિવસે બે યુવકોના મૃતદેહ મળતા ચકચાર

    અમદાવાદમાં નર્મદા કેનાલમાંથી બે યુવકોના મૃતદેહ મળ્યા
    અમદાવાદની બહારથી પસાર થતી નર્મદા કેનાલમાંથી એક જ દિવસમાં બે અલગ-અલગ સ્થળેથી બે અજાણ્યા યુવકોના મૃતદેહ મળી આવતા વિસ્તારમાં ચકચાર મચી ગઈ છે. ઘટનાની જાણ થતાં પોલીસ અને સ્થાનિક વહીવટી તંત્ર તાત્કાલિક સ્થળ પર પહોંચી તપાસ શરૂ કરી છે.
    જમીયતપુરા અને ખોરજ ગામ નજીક મળી લાશ
    પ્રાથમિક માહિતી મુજબ પહેલો મૃતદેહ જમીયતપુરા ગામની હદ નજીક કેનાલના વહેતા પાણીમાંથી મળી આવ્યો હતો. જ્યારે બીજો મૃતદેહ ખોરજ ગામની સીમ પાસે પસાર થતી નર્મદા કેનાલમાંથી બહાર કાઢવામાં આવ્યો હતો.
    સ્થાનિકોની નજરે ચડ્યા મૃતદેહ
    કેનાલ કિનારેથી પસાર થઈ રહેલા સ્થાનિક લોકોને પાણીમાં શંકાસ્પદ વસ્તુ તરતી દેખાઈ હતી. નજીક જઈ તપાસ કરતાં તે યુવકોના મૃતદેહ હોવાનું સામે આવ્યું હતું. ત્યારબાદ સ્થાનિકોએ તાત્કાલિક પોલીસને જાણ કરી હતી.
    તરવૈયાઓની મદદથી બહાર કાઢાયા મૃતદેહ
    માહિતી મળતા જ પોલીસનો કાફલો ઘટનાસ્થળે પહોંચ્યો હતો. સ્થાનિક તરવૈયાઓની મદદથી ભારે જહેમત બાદ બંને મૃતદેહોને કેનાલમાંથી બહાર કાઢી પોસ્ટમોર્ટમ માટે મોકલવામાં આવ્યા છે.
    મૃત્યુનું કારણ જાણવા તપાસ શરૂ
    એક જ દિવસમાં બે યુવકોના મૃતદેહ મળવાના બનાવને લઈને અનેક સવાલો ઊભા થયા છે. બંનેના મોત અકસ્માતે ડૂબી જવાથી થયા છે, આત્મહત્યાનો મામલો છે કે અન્ય કોઈ ગુનાહિત કારણ છે તે અંગે પોલીસે વિવિધ દિશામાં તપાસ શરૂ કરી છે. હાલ મૃતકોની ઓળખ અને મૃત્યુનું ચોક્કસ કારણ જાણવા કાયદેસરની કાર્યવાહી ચાલી રહી છે.

  • સ્માર્ટ મીટર માટે ગ્રાહકની મંજૂરી જરૂરી નથી, GERCના વીજ લોકપાલનો મહત્વપૂર્ણ ચુકાદો

    સ્માર્ટ મીટરને લઈને મહત્વપૂર્ણ ચુકાદો
    ગુજરાત વિદ્યુત નિયામક આયોગ (GERC)ના વીજ લોકપાલે સ્માર્ટ મીટર અંગે મહત્વપૂર્ણ ચુકાદો આપ્યો છે. આદેશમાં સ્પષ્ટ કરવામાં આવ્યું છે કે વીજ વિતરણ કંપનીઓ પ્રવર્તમાન કાયદા અને નિયમો મુજબ ગ્રાહકના પરંપરાગત મીટરની જગ્યાએ સ્માર્ટ મીટર લગાવી શકે છે. આ પ્રક્રિયા માટે ગ્રાહકની પૂર્વ સંમતિ લેવી ફરજિયાત નથી.
    શું હતો સમગ્ર કેસ?
    આ ચુકાદો મહેન્દ્રકુમાર ડી. પટેલ વિરુદ્ધ MGVCL (લાલબાગ ડિવિઝન, વડોદરા) કેસમાં આપવામાં આવ્યો છે. અરજદારે દાવો કર્યો હતો કે તેમની મંજૂરી વિના સ્માર્ટ મીટર લગાવવામાં આવ્યું, જેના કારણે બેંકની ઓટો-ડેબિટ સુવિધા ખોરવાઈ અને બાદમાં વીજ પુરવઠો પણ કાપી નાખવામાં આવ્યો.
    બીજી તરફ MGVCLએ રજૂઆત કરી હતી કે સ્માર્ટ મીટરનું સ્થાપન Electricity Act, 2003, CEA Metering Regulations, Electricity (Rights of Consumers) Rules અને GERC Supply Code મુજબ કરવામાં આવ્યું છે. ઉપરાંત બેંકની ઓટો-ડેબિટની સમસ્યાનો મીટરના પ્રકાર સાથે કોઈ સંબંધ નથી.
    વીજ લોકપાલે શું કહ્યું?
    વીજ લોકપાલે ગ્રાહકની અપીલ ફગાવી દેતાં ગ્રાહક તકરાર નિવારણ ફોરમ (CGRF)ના નિર્ણયને યથાવત્ રાખ્યો છે. સાથે જ કેટલાક મહત્વના મુદ્દા સ્પષ્ટ કર્યા છે.
    • સ્માર્ટ મીટર માટે ગ્રાહકની પૂર્વ મંજૂરી જરૂરી નથી.
    • ગ્રાહક સ્માર્ટ મીટરમાં કોઈ ટેક્નિકલ ખામી કે ખોટા બિલિંગના પુરાવા રજૂ કરી શક્યા નથી.
    • જો મીટરની ચોકસાઈ અંગે શંકા હોય તો GERC Supply Code મુજબ થર્ડ-પાર્ટી લેબોરેટરીમાં ટેસ્ટિંગ કરાવી શકાય છે.
    • માત્ર વિરોધના આધારે જૂનું મીટર ફરીથી લગાવવાની માંગ સ્વીકારી શકાશે નહીં.
    ક્વૉસી-જ્યુડિશિયલ આદેશ શું છે?
    GERCના વીજ લોકપાલ દ્વારા આપવામાં આવેલો આ આદેશ ક્વૉસી-જ્યુડિશિયલ (Quasi-Judicial) એટલે કે અર્ધ-ન્યાયિક આદેશ છે. આવી સંસ્થાઓ કાયદાકીય વિવાદોમાં બંને પક્ષોની દલીલો અને પુરાવાઓના આધારે નિર્ણય લે છે. GERC વીજ લોકપાલ, ગ્રાહક ફોરમ અને વિવિધ ટ્રિબ્યુનલના આદેશો કાનૂની રીતે બંધનકર્તા માનવામાં આવે છે.

  • રથયાત્રા પહેલાં અમદાવાદ પોલીસનો ‘એકતા ક્રિકેટ કપ’ શરૂ, પોલીસ કમિશનરે બેટિંગમાં ફટકારી સિક્સ

    રથયાત્રા પહેલાં એકતાનો સંદેશ
    અમદાવાદમાં યોજાનારી ઐતિહાસિક રથયાત્રા પહેલા શહેર પોલીસ દ્વારા કોમી એકતા અને સામાજિક સૌહાર્દને પ્રોત્સાહન આપવા માટે **’એકતા ક્રિકેટ કપ’**નું આયોજન કરવામાં આવ્યું છે. સરસપુરના બોમ્બે હાઉસિંગ ખાતે યોજાયેલી ટૂર્નામેન્ટનું ઉદ્ઘાટન અમદાવાદ શહેર પોલીસ કમિશનર અનુપમસિંહ ગેહલોતે કર્યું હતું.
    પોલીસ કમિશનરે ફટકારી સિક્સર
    ઉદ્ઘાટન બાદ પોલીસ કમિશનર અનુપમસિંહ ગેહલોતે બેટિંગ કરી હતી, જ્યારે ધારાસભ્ય દિનેશ કુશવાહે બોલિંગ કરી હતી. કમિશનરે પ્રથમ જ ઓવરમાં આકર્ષક સિક્સર ફટકારી હાજર લોકોનું ધ્યાન ખેંચ્યું હતું. ત્યારબાદ તેમણે બોલિંગમાં પણ હાથ અજમાવ્યો.
    મહંત સહિત આગેવાનો રહ્યા હાજર
    આ કાર્યક્રમમાં જગન્નાથ મંદિરના મહંત, ધારાસભ્ય દિનેશ કુશવાહ, સેક્ટર-1ના JCP, ઝોન-3ના DCP સહિત પોલીસ અધિકારીઓ અને મોટી સંખ્યામાં સ્થાનિક નાગરિકો ઉપસ્થિત રહ્યા હતા. મહંતે પણ બેટિંગ કરીને ખેલાડીઓનું ઉત્સાહવર્ધન કર્યું હતું.
    હિન્દુ-મુસ્લિમ યુવાનોને એક મંચ પર લાવવાનો પ્રયાસ
    અમદાવાદ શહેર પોલીસ દ્વારા દર વર્ષે રથયાત્રા પહેલા યોજાતો આ ક્રિકેટ કપ કોમી એકતા, ભાઈચારો અને રમતગમતની ભાવનાને મજબૂત બનાવવાના હેતુથી આયોજિત કરવામાં આવે છે. ટૂર્નામેન્ટમાં હિન્દુ, મુસ્લિમ સહિત વિવિધ સમાજના યુવાનો એકસાથે ભાગ લઈ રહ્યા છે.
    7 દિવસ બાદ વિજેતા ટીમને મળશે ટ્રોફી
    આ ક્રિકેટ ટૂર્નામેન્ટ આગામી સાત દિવસ સુધી ચાલશે. સ્પર્ધા પૂર્ણ થયા બાદ વિજેતા ટીમને અમદાવાદ શહેર પોલીસના અધિકારીઓ અને જગન્નાથ મંદિરના મહંતના હસ્તે ટ્રોફી એનાયત કરવામાં આવશે.

  • ધુમ્મસની ચાદરમાં ઢંકાયું પાવાગઢ, રવિવારે મહાકાળી માતાના દર્શને ઉમટ્યા હજારો ભક્તો

    ધુમ્મસ અને ભક્તિનો અનોખો સંગમ
    પંચમહાલ જિલ્લાના પ્રસિદ્ધ યાત્રાધામ પાવાગઢ ખાતે રવિવારે વહેલી સવારથી જ ભક્તોની ભારે ભીડ જોવા મળી હતી. રજાના દિવસને કારણે રાજ્યના વિવિધ વિસ્તારોમાંથી હજારો યાત્રિકો મહાકાળી માતાના દર્શન માટે પાવાગઢ પહોંચ્યા હતા. સમગ્ર મંદિર પરિસર “જય માતાજી”ના જયઘોષથી ગુંજી ઉઠ્યું હતું.
    ધુમ્મસની ચાદરમાં ઢંકાયું પાવાગઢ
    સવારથી જ વરસાદી માહોલ અને ઘેરા વાદળોને કારણે સમગ્ર પાવાગઢ ડુંગર ધુમ્મસની ચાદરમાં લપેટાઈ ગયો હતો. ઠંડકભર્યા વાતાવરણ અને કુદરતી સૌંદર્ય વચ્ચે ભક્તોએ માતાજીના દર્શન કરીને આધ્યાત્મિક અનુભૂતિ કરી હતી.
    લાંબી કતારો છતાં શ્રદ્ધામાં ઘટાડો નહીં
    મંદિરમાં દર્શન માટે ભક્તોની લાંબી કતારો જોવા મળી હતી. વરસાદ અને ધુમ્મસ છતાં ભક્તોની શ્રદ્ધામાં કોઈ ઘટાડો જોવા મળ્યો નહોતો. અનેક યાત્રિકોએ પાવાગઢના મનમોહક નજારાઓને પોતાના મોબાઇલમાં કેદ કર્યા હતા.
    ગરબાથી ગુંજ્યું મંદિર પરિસર
    દર્શન બાદ કેટલાક ભક્તો મંદિર પરિસરમાં માતાજીની આરાધનામાં ગરબા રમતા પણ જોવા મળ્યા હતા. ભક્તિ, સંગીત અને કુદરતી સૌંદર્યના સંગમથી સમગ્ર પાવાગઢ ભક્તિમય બની ગયો હતો.
    તંત્ર દ્વારા સુરક્ષાની પૂરતી વ્યવસ્થા
    ભીડને ધ્યાનમાં રાખીને સ્થાનિક પ્રશાસન અને મંદિર તંત્ર દ્વારા સુરક્ષા અને વ્યવસ્થાના ખાસ આયોજન કરવામાં આવ્યા હતા. યાત્રિકોને સરળ અને સુરક્ષિત રીતે દર્શન મળી રહે તે માટે જરૂરી વ્યવસ્થાઓ ગોઠવવામાં આવી હતી.

  • વીજ ટાવર વળતર નીતિમાં મોટો ફેરફાર: ખેડૂતોને હવે બજારભાવના બમણા દરે મળશે વળતર

    ખેડૂતોના વિરોધ બાદ સરકારનો મોટો નિર્ણય
    રાજ્યમાં વીજ ટ્રાન્સમિશન ટાવર અને હાઈટેન્શન લાઈનને લઈને ખેડૂતોના લાંબા સમયથી ચાલી રહેલા વિરોધ બાદ ગુજરાત સરકારે વળતર નીતિમાં મહત્વપૂર્ણ ફેરફાર કર્યો છે. હવે અસરગ્રસ્ત ખેડૂતોને જંત્રીને બદલે જમીનના વર્તમાન બજારભાવના બમણા દરે વળતર ચૂકવવાનો નિર્ણય લેવામાં આવ્યો છે.
    જંત્રીને બદલે બજારભાવ આધારિત વળતર
    રાજ્ય સરકારના પ્રવક્તા મંત્રી જીતુ વાઘાણીએ જણાવ્યું કે જમીનની કિંમત નક્કી કરવા માટે હવે ‘માર્કેટ રેટ કમિટી’ (MRC) બનાવવામાં આવશે. આ સમિતિમાં જિલ્લા કલેક્ટર, અસરગ્રસ્ત ખેડૂતોના પ્રતિનિધિઓ અને ટ્રાન્સમિશન કંપનીના પ્રતિનિધિઓનો સમાવેશ કરવામાં આવશે.
    વીજ ટાવર માટે વળતરમાં વધારો
    નવી નીતિ મુજબ 765 KV ટ્રાન્સમિશન લાઈન માટે ટાવર વિસ્તારનું વળતર અગાઉના 625 ચોરસ મીટરની જગ્યાએ હવે 729 ચોરસ મીટર સુધી ચૂકવવામાં આવશે. ઉપરાંત, અગાઉ તબક્કાવાર મળતું વળતર હવે એકસાથે 100 ટકા ચૂકવવાનો નિર્ણય પણ લેવામાં આવ્યો છે.
    રાઇટ ઓફ વે માટે અલગ-અલગ દર
    સરકારે ‘રાઇટ ઓફ વે કોરિડોર’ માટે પણ નવા વળતર દર જાહેર કર્યા છે. ગ્રામ્ય વિસ્તારમાં બજાર કિંમતના 30 ટકા, નગરપાલિકા વિસ્તારમાં 45 ટકા અને મહાનગરપાલિકા વિસ્તારમાં 60 ટકા વળતર ચૂકવવાની જોગવાઈ કરવામાં આવી છે.
    ખેડૂત સંગઠનોમાં હજુ પણ અસંતોષ
    સરકારના નિર્ણય છતાં કેટલાક ખેડૂત સંગઠનોનું માનવું છે કે વીજ ટાવર ઉભા થયા બાદ આસપાસની જમીનની ખેતી, ઉપયોગિતા અને બજાર કિંમત પર લાંબા ગાળાની અસર થાય છે. તેથી માત્ર વળતરમાં વધારો ખેડૂતોને થતા કાયમી નુકસાનની સંપૂર્ણ ભરપાઈ કરી શકશે નહીં તેવી દલીલ પણ થઈ રહી છે.

  • ગુજરાતમાં મેઘતાંડવ: 172 તાલુકામાં વરસાદ, માંગરોળમાં 13 ઇંચ તો કડીમાં 2 કલાકમાં 8 ઇંચ

    172 તાલુકામાં વરસાદ, અનેક વિસ્તારો જળબંબાકાર
    છેલ્લા 24 કલાકમાં ગુજરાતના 172 તાલુકામાં નોંધપાત્ર વરસાદ વરસ્યો છે. સૌથી વધુ જૂનાગઢ જિલ્લાના માંગરોળમાં 13 ઇંચ વરસાદ નોંધાતા અનેક વિસ્તારોમાં પૂર જેવી સ્થિતિ સર્જાઈ છે. રાજ્યના અનેક શહેરો અને ગામોમાં જનજીવન પ્રભાવિત બન્યું છે.
    કડીમાં માત્ર 2 કલાકમાં 8 ઇંચ વરસાદ
    મહેસાણા જિલ્લાના કડી શહેરમાં મધરાત્રે વાવાઝોડા અને વીજળીના કડાકા સાથે માત્ર બે કલાકમાં અંદાજે 8 ઇંચ વરસાદ વરસ્યો હતો. 25થી વધુ સોસાયટીઓમાં ઘૂંટણથી કમર સુધી પાણી ઘૂસી જતાં લોકો અડધી રાત્રે ઘરનો સામાન બચાવવા મજબૂર બન્યા હતા.
    ત્રણ અંડરબ્રિજ બંધ, અનેક વિસ્તારો પાણીમાં ગરકાવ
    કડીના થોળ રોડ, મામલતદાર કચેરી અને સુજાતપુરા રોડના ત્રણેય અંડરબ્રિજ પાણીમાં ગરકાવ થતાં વાહનવ્યવહાર બંધ કરવો પડ્યો હતો. માર્કેટ યાર્ડ, સર્વ વિદ્યાલય કેમ્પસ સહિતના વિસ્તારોમાં પણ પાણી ભરાતા ભારે ટ્રાફિકજામ સર્જાયો હતો.
    ડાંગ, નવસારી અને વલસાડમાં પણ ભારે વરસાદ
    બપોરે 4 વાગ્યા સુધી રાજ્યના 134 તાલુકામાં વરસાદ નોંધાયો હતો. ડાંગના વધઇમાં 12.99 ઇંચ વરસાદ નોંધાયો હતો, જ્યારે નવસારીના ચીખલીમાં માત્ર બે કલાકમાં 8 ઇંચ વરસાદથી પૂર જેવી સ્થિતિ સર્જાઈ હતી. વલસાડમાં 6.10 ઇંચ વરસાદ બાદ શહેરના અનેક વિસ્તારો પાણીમાં ગરકાવ થતાં NDRFની ટીમ તૈનાત કરાઈ છે.
    સુરત, ભરૂચ અને ગીર સોમનાથમાં પણ મેઘમહેર
    છેલ્લા બે કલાક દરમિયાન સુરતના માંગરોળમાં 4.17 ઇંચ, જૂનાગઢના માળિયા હાટીનામાં 3.82 ઇંચ, માંગરોળમાં 3.39 ઇંચ તેમજ ભરૂચના વાલિયામાં 3.11 ઇંચ વરસાદ નોંધાયો હતો. સુત્રાપાડામાં પણ અનેક મકાનોમાં પાણી ઘૂસી જતાં સ્થાનિકોને મુશ્કેલીનો સામનો કરવો પડ્યો.