ખેડાના કપડવંજમાં કરુણ ઘટના, માતા-પિતા સહિત બે માસૂમ દીકરીઓના નહેરમાં ડૂબી જવાથી મોત

કપડવંજ નજીક સર્જાઈ હૃદયદ્રાવક ઘટના
ખેડા જિલ્લાના કપડવંજ તાલુકાના ફતિયાવાદ ગામ નજીકથી પસાર થતી નર્મદા મુખ્ય નહેરમાં એક જ પરિવારના ચાર સભ્યોના મોત થતાં સમગ્ર વિસ્તારમાં શોકનો માહોલ છવાઈ ગયો છે. ઘટનાની જાણ થતાં સ્થાનિક લોકો અને તંત્રમાં પણ દોડધામ મચી ગઈ હતી.

માતા બે માસૂમ દીકરીઓ સાથે નહેરમાં કૂદી પડ્યાની આશંકા
પ્રાથમિક માહિતી મુજબ બાવાના મુવાડા ગામની રહેવાસી સપનાબેન સોલંકી પોતાની ત્રણ વર્ષની પુત્રી અને ત્રણ માસની બાળકી સાથે નહેરના પુલ નજીક પહોંચી હતી. ત્યારબાદ મહિલા અને બંને બાળકીઓ નહેરના પાણીમાં ગરકાવ થઈ ગયા હોવાનું સામે આવ્યું છે. બનાવ પાછળનું કારણ હજુ સ્પષ્ટ થયું નથી.

પરિવારને બચાવવા ગયેલા પિતા પણ ડૂબ્યા
ઘટનાની જાણ થતાં મહિલાના પતિ વિનુભાઈ સોલંકી તાત્કાલિક સ્થળ પર પહોંચ્યા હતા. પત્ની અને દીકરીઓને બચાવવાના પ્રયાસમાં તેઓ પણ નહેરમાં ઉતર્યા હતા, પરંતુ પાણીનો પ્રવાહ વધુ હોવાના કારણે તેઓ પણ ડૂબી ગયા હતા.

ફાયર ટીમ અને તરવૈયાઓએ હાથ ધરી શોધખોળ
સ્થાનિક લોકો દ્વારા બનાવ અંગે પોલીસ અને ફાયર વિભાગને જાણ કરવામાં આવી હતી. ત્યારબાદ કપડવંજ ફાયર બ્રિગેડની ટીમ અને સ્થાનિક તરવૈયાઓએ નહેરમાં શોધખોળ શરૂ કરી હતી. ભારે જહેમત બાદ ચારેયના મૃતદેહ બહાર કાઢવામાં આવ્યા હતા.

પોલીસે મૃતદેહ પોસ્ટમોર્ટમ માટે ખસેડ્યા
આતરસુંબા પોલીસ ઘટના સ્થળે પહોંચી આગળની કાર્યવાહી હાથ ધરી હતી. ચારેય મૃતદેહોને પોસ્ટમોર્ટમ માટે હોસ્પિટલ ખસેડવામાં આવ્યા છે. હાલ પોલીસ દ્વારા પરિવારિક કારણો સહિત વિવિધ દિશામાં તપાસ કરવામાં આવી રહી છે.

ગામમાં શોકનો માહોલ
એક જ પરિવારના ચાર સભ્યોના મોતથી ગામ અને આસપાસના વિસ્તારમાં શોકની લાગણી ફેલાઈ ગઈ છે. સ્થાનિક લોકો આ ઘટનાથી ભારે વ્યથિત બન્યા છે.