અમરેલી
રિપોર્ટર: સમીર ખોખર, અમરેલી
અમરેલી જિલ્લામાં આજે એક ગંભીર પરંતુ સદનસીબે જાનહાનિ વિહોણી ઘટના સામે આવી છે. રાજકોટથી અમરેલી તરફ જઈ રહેલા ટ્રકે ચિતલ ગામના જકાતનાકા નજીક અચાનક કાબુ ગુમાવી દેતા માર્ગ અકસ્માત સર્જાયો હતો.
પ્રત્યક્ષદર્શી ઓ અનુસાર, ટ્રકની સ્પીડ ખૂબ જ વધુ હતી. ડ્રાઈવરે સ્ટીયરિંગ પરથી કાબુ ગુમાવતા ટ્રક રોડની જમણી બાજુ ઉતરી ગયો અને ત્યાં પાર્ક કરેલી એક મોટરસાયકલ પર ચઢી ગયો. અથડામણ એટલી જોરદાર હતી કે મોટરસાયકલ પૂરી રીતે ચકનાચૂર થઈ ગઈ હતી.
તે બાદ ટ્રક સીધો જ પીજીવીસીએલ (PGVCL)ના વીજ પુરવઠા માટેના પોલ સાથે અથડાયો હતો. આ અથડામણમાં પોલ તૂટી પડતાં આસપાસના વિસ્તારમાં વીજ પ્રવાહ ખોરવાઈ ગયો હતો. ઘટના બાદ વીજ વિભાગના કર્મચારીઓ તાત્કાલિક ચિતલ ગામમાં પહોંચ્યા અને સાવચેતીના ભાગરૂપે પુરો વીજ પુરવઠો બંધ કરી દીધો હતો.
સ્થાનિક લોકોએ જણાવ્યું હતું કે જો વીજ પુરવઠો સમયસર બંધ ન કરાયો હોત, તો પોલ તૂટી પડવાથી મોટી દુર્ઘટના સર્જાઈ શકી હોત. આ ઘટનાથી આસપાસના વિસ્તારમાં થોડીવાર માટે ભયનું વાતાવરણ છવાઈ ગયું હતું.
પોલીસ તંત્રને અકસ્માતની જાણ થતાં જ અધિકારીઓ સ્થળ પર દોડી આવ્યા હતા. પોલીસએ તાત્કાલિક માર્ગ પર ટ્રાફિક રોકી બચાવ અને તપાસ કામગીરી હાથ ધરી હતી. બાદમાં ક્રેન ની મદદથી ટ્રકને માર્ગ પરથી હટાવવામાં આવ્યો હતો.
આ ઘટનામાં કોઈ જાનહાનિ થઈ નથી, પરંતુ મોટરસાયકલને ભારે નુકસાન થયું છે. પોલીસએ અકસ્માતના કારણોની તપાસ શરૂ કરી છે અને ટ્રક ડ્રાઈવર ની ભૂલ કે મિકેનિકલ ફેલ્યર ની દિશામાં તપાસ ચાલુ છે.
સ્થાનિક લોકોના જણાવ્યા મુજબ, આ માર્ગ પર ભારે વાહનોની ઝડપ ઘણીવાર વધુ રહે છે અને અકસ્માતોની શક્યતા વધી જાય છે. તેમણે તંત્રને વિનંતી કરી છે કે ચિતલ જકાતનાકા નજીક સ્પીડ બ્રેકર અથવા ચેતવણી બોર્ડ લગાવવામાં આવે જેથી ભવિષ્યમાં આવી દુર્ઘટનાઓ અટકે.
