અહેવાલ: અશ્વિન પટેલ, ડાંગ
ડાંગ જિલ્લાના મુખ્ય મથક આહવા ખાતે આજે સવારે 11 વાગ્યાથી સર્કિટ હાઉસમાં નાનાં-મોટાં તમામ વેપારીઓ, લારી-ગલ્લા ચલાવતા લોકો તથા રસ્તા-ફૂટપાથ પર વેપાર કરતા નાગરિકોની એક મહત્વપૂર્ણ બેઠક યોજાઈ. શહેરમાં તાજેતરમાં અપાયેલી દબાણ હટાવવાની નોટિસો તથા સંભવિત ડિમોલિશન કાર્યવાહી વચ્ચે વેપારીઓમાં ઊભી થયેલી વ્યાકુલતાને ધ્યાને લઈને આ બેઠક બોલાવવામાં આવી હતી.
આગેવાનો, સામાજિક સેવકો અને વેપારીઓની વિશાળ ઉપસ્થિતિ
આહવા શહેરના આગેવાનો અને સામાજિક સેવકો જેમ કે—
હરીશભાઈ પોપટભાઈ
હરીરામભાઈ
તુષારભાઈ
બાલુભાઈ
પપ્પુ શેઠ (જલેબીવાળા)
આસિફભાઈ
અનિલભાઈ
ભગરે ભાઈ
તથા શહેરની મા-બહેનો, વડીલો અને મોટી સંખ્યામાં વેપારીઓ બેઠકમાં હાજર રહ્યા.
બેઠકમાં લેવાયેલા ચાર મુખ્ય નિર્ણયો
વેપારીઓમાં સંભવિત ડિમોલિશનના ડર વચ્ચે તણાવ ઓસરાવવા અને સૌહાર્દપૂર્ણ રસ્તો શોધવા બેઠકમાં નીચે મુજબના મહત્વપૂર્ણ નિર્ણયો લેવાયા:
૧. સ્વૈચ્છિક રીતે દબાણ હટાવવાનો નિર્ણય
મેન રોડ અને આહવાના અન્ય વિસ્તારોમાં જેમને સરકારી નોટિસ મળી છે, એ તમામ વેપારીઓએ સોમવાર સુધી પોતાનું દબાણ સ્વેચ્છાએ હટાવવાની પ્રતિજ્ઞા કરી.
૨. જગ્યા ન હોય તે વેપારીઓને પડોશીઓ દ્વારા સહયોગ
કેટલાંક વેપારીઓ પાસે હટવા માટે પૂરતી જગ્યા ન હોય, ત્યારે આસપાસની દુકાનમાં વધારાની જગ્યા ધરાવતા વેપારીઓએ ભાઈભાવથી સેટિંગ કરી સહાય કરવાનો નિર્ણય કર્યો.
૩. મનફાવે તેમ વધુ જગ્યાનો કબજો રાખનારા લોકો સામે વેપારીઓનો વિરોધ
બેઠકમાં સ્પષ્ટ કરવામાં આવ્યું કે જે વેપારીઓ મનસ્વીરીતે જરૂર કરતાં વધારે જગ્યા કબજે રાખે છે અને દબાણ હટાવતા નથી, તેમના વિરુદ્ધ વેપારીઓ જ સામૂહિક વિરોધ કરશે. પ્રશાસન કાર્યવાહી કરશે તો તેમની કોઈ મદદ નહીં થાય—એવું પણ નક્કી કરાયું.
૪. આહવા–વઘઈ રોડ પર પેટ્રોલ પંપથી સાપુતારા ચાર રસ્તા સુધીની દુકાનો આગળનાં દબાણ હટાવવાના
આ વિસ્તારોમાં સેડ, વધારાના છાપરાં કે ફૂટપાથ ઉપરના સ્થાયી-અસ્થાયી દબાણો તાત્કાલિક દૂર કરવા સૂચના અપાઈ.
MLA, જિલ્લા પ્રમુખ અને તાલુકા પ્રમુખને રજૂઆત
ડિમોલિશન ટાળવા વ્યવસાયીઓની સંયુક્ત કમિટી દ્વારા માનનીય MLA વિજયભાઈ, જિલ્લા પ્રમુખ અને તાલુકા પ્રમુખને રજૂઆત કરવામાં આવી.
વિજયભાઈએ સોમવારે કલેક્ટરશ્રીને મળી વેપારીઓને નુકસાન ન થાય તે રીતે સમાધાન લાવવા માટે સહાય કરવાનો વિશ્વાસ આપ્યો.
મહત્વપૂર્ણ સૂચના: સ્વૈચ્છિક દબાણ હટાવવાની કડક અપીલ
બેઠક બાદ વેપારીઓને જણાવાયું કે—
જે દુકાનની પાછળ ગટર હોય, તેમણે ઓછામાં ઓછું 3 મીટર પાછળ થઈ જવું.
શહેરમાં ગમે ત્યાં લારીઓ, કેબિન અથવા ગેરકાયદેસર સેટિંગ મૂકેલું હોય તો તાત્કાલિક હટાવી લેવું.
જો સોમવાર સુધી દબાણ ન હટાવાશે તો તેની સંપૂર્ણ જવાબદારી વ્યક્તિગત રહેશે, કોઈ વેપારી સમૂહ તરફથી મદદ નહીં મળે.
આગેવાનોનો સહકાર અને આભાર વ્યક્ત
આહવાના વિવિધ આગેવાનો દ્વારા વેપારીઓને મળતો સહકાર અભિનંદનીય હોવાનું જણાવાયું.
ખાસ કરીનેવિજયભાઈ, નિર્મલાબેન, સુરેશભાઈ ચૌધરી અને હરીશભાઈ બછાવ નો ખાસ આભાર માનવામાં આવ્યો.
