નિસર્ગ પટેલ. મહેસાણા
મહેસાણા શહેરમાં છેલ્લા બે મહિનાથી ચાલી રહેલા વાહન ટોઈંગ કામગીરીને લઈને નાગરિકોમાં ભારે નારાજગી જોવા મળી રહી હતી. ટોઈંગ માટે વસૂલાત થતા ઊંચા ચાર્જ, પાવતીમાં મનપાનો ઉલ્લેખ ન હોવો અને દંડની રકમ સીધી જ ખાનગી વ્યક્તિના ખાતામાં જમા થતી હોવા અંગે 15 નવેમ્બરે સમાચાર ડાયરી દ્વારા ખુલાસો કરવામાં આવ્યો હતો. આ અહેવાલ બાદ આખરે મનપા તંત્ર હરકતમાં આવ્યું છે અને ટોઈંગ ચાર્જ સાથે દંડ વસૂલાતની પ્રક્રિયામાં નોંધપાત્ર બદલાવ કર્યો છે.
ટોઈંગ ચાર્જમાં ઘટાડો : ટુ-વ્હીલર 300→250, ગાડી 800→600
મહેસાણા મહાનગરપાલિકાએ ટોઈંગ કામગીરી માટે નિયુક્ત ખાનગી એજન્સી સાથે બેઠક યોજી અને નવી દરખાસ્ત મંજૂર કરી છે. નવા દર મુજબ:
ટુ-વ્હીલર ટોઈંગ ચાર્જ : રૂ. 300 → હવે 250
ફોર-વ્હીલર ટોઈંગ ચાર્જ : રૂ. 800 → હવે 600
ભારે વાહનો માટેનો રૂ. 1100નો ચાર્જ યથાવત
બે મહિનાથી નાગરિકો રજૂઆતો કરતા હતા છતાં પાલિકા કાર્યવાહી કરતી ન હતી, પરંતુ સાંસદના પત્ર બાદ મનપા ‘સફાળ ઊંઘ’માંથી જાગી અને રાતોરાત બેઠક બોલાવી ટોઈંગ ચાર્જ ઘટાડવાનો નિર્ણય લીધો.
સમાચાર ડાયરીના અહેવાલ બાદ સિસ્ટમમાં મોટા ફેરફાર
મનપાએ માત્ર રૂ.1.50 લાખના ડિપોઝિટ પર ટોઈંગ કામગીરી એક ખાનગી એજન્સીને સોંપી હતી. આ એજન્સી પાવતી આપતી હતી પરંતુ પાવતીમાં પાલિકાનું નામ કે લોગો નહોતો, જેના કારણે દંડની સાચી વસૂલાત વિશે નાગરિકોમાં શંકા ઉભી થઈ હતી.
સમાચાર ડાયરીના 15 નવેમ્બરના અહેવાલ મુજબ બે મહિનામાં:
572 ટુ વ્હીલર
1306 ફોર વ્હીલર
ને ટોઈંગ કરવામાં આવ્યા હતા અને એજન્સીએ કુલ રૂ. 12,18,800 દંડ વસૂલી લીધો હતો. વસૂલાતની આ રકમ સીધા જ ખાનગી માણસના ખાતામાં જતી હોવાનો મુદ્દો પ્રકાશમાં આવ્યો હતો.
હવે પાવતી પર મનપાનો લોગો ફરજિયાત – દંડની રકમ સીધી જ મનપા ખાતામાં
સમાચાર ડાયરી ના અહેવાલ બાદ હવે મનપાએ સ્પષ્ટ કરી દીધું છે કે:
પાવતીમાં મહેસાણા મનપાનો અને એજન્સીનો લોગો ફરજિયાત રહેશે
બધા દંડની વસૂલાત સીધી જ મહેસાણા મહાનગરપાલિકાના બેંક ખાતામાં જમા થશે
એજન્સી માત્ર કામગીરી કરશે, પરંતુ નાણાંકીય વ્યવહાર મનપા દ્વારા નિયંત્રિત થશે
આ નિર્ણયને કારણે હવે નાગરિકોમાં પારદર્શિતા વધશે અને દંડ વસૂલાત અંગેની શંકા દૂર થશે.
