હોર્મુઝ સ્ટ્રેટમાં ગુજરાતના વહાણ સાથે દુર્ઘટના
દેવભૂમિ દ્વારકા જિલ્લાના સલાયા સાથે જોડાયેલું એક માલવાહક વહાણ આંતરરાષ્ટ્રીય જળસીમામાં ડૂબી જતાં દરિયાઈ વિસ્તારમાં ચકચાર મચી ગઈ છે. ઘટનામાં એક ખલાસીનું મોત થયું હોવાનું સામે આવ્યું છે, જ્યારે અન્ય 17 ખલાસીઓને સુરક્ષિત બચાવી લેવામાં આવ્યા હોવાનું જાણવા મળ્યું છે.
દુબઈથી યમન જઈ રહ્યું હતું વહાણ
માહિતી મુજબ વહાણ દુબઈથી યમન તરફ જનરલ કાર્ગો લઈને જઈ રહ્યું હતું. વહાણ પર કુલ 18 ખલાસીઓ સવાર હતા. વહેલી સવારે હોર્મુઝ સ્ટ્રેટ વિસ્તારમાં અચાનક ગોળીબાર જેવી પરિસ્થિતિ સર્જાતા વહાણને નુકસાન થયું હોવાનું કહેવાઈ રહ્યું છે.
વહાણમાં પાણી ભરાતા સર્જાઈ સ્થિતિ ગંભીર
ઘટના બાદ વહાણમાં પાણી ભરાવા લાગતાં સ્થિતિ ગંભીર બની ગઈ હતી. આ દરમિયાન એન્જિન રૂમમાં ફરજ બજાવતા સલાયાના અલ્તાફ તાલબ કેર ગંભીર રીતે ઇજાગ્રસ્ત થયા હતા અને તેમનું મોત નીપજ્યું હોવાનું સામે આવ્યું છે.
17 ખલાસીઓનો બચાવ
ઘટના બાદ બચાવ કામગીરી હાથ ધરવામાં આવી હતી, જેમાં અન્ય 17 ખલાસીઓને સુરક્ષિત બહાર કાઢવામાં આવ્યા હોવાનું જાણવા મળ્યું છે. બચાવાયેલા ખલાસીઓને સુરક્ષિત સ્થળે ખસેડવામાં આવ્યા છે.
ભારતીય દૂતાવાસ પાસે મદદની માંગ
ઇન્ડિયન સેલિંગ વેસલ્સ એસોસિયેશન દ્વારા દુબઈ સ્થિત ભારતીય દૂતાવાસનો સંપર્ક કરીને મૃતકના દસ્તાવેજી પ્રક્રિયા તેમજ બચાવાયેલા ખલાસીઓને વતન પરત લાવવા માટે મદદ માંગવામાં આવી છે.
આંતરરાષ્ટ્રીય જળસીમાની સુરક્ષા મુદ્દે ચિંતા
આ ઘટનાએ આંતરરાષ્ટ્રીય જળસીમામાં ભારતીય વહાણોની સુરક્ષા અંગે ફરી સવાલો ઉભા કર્યા છે. દરિયાઈ ક્ષેત્ર સાથે જોડાયેલા લોકોમાં પણ ચિંતા અને શોકનો માહોલ જોવા મળી રહ્યો છે.
