NEET પેપર લીક બાદ સરકારે લીધો મોટો નિર્ણય
દેશની સૌથી મોટી મેડિકલ પ્રવેશ પરીક્ષા NEET-UG 2026 પેપર લીક મામલે કેન્દ્ર સરકારે મોટો નિર્ણય લીધો છે. કેન્દ્રીય શિક્ષણ મંત્રી ધર્મેન્દ્ર પ્રધાને સ્વીકાર્યું કે પરીક્ષામાં ગડબડ અને પ્રશ્નપત્ર લીકની ઘટના બની હતી. જેના કારણે 3 મેના રોજ લેવાયેલી પરીક્ષા રદ કરીને હવે ફરીથી પરીક્ષા લેવાનો નિર્ણય કરવામાં આવ્યો છે.
21 જૂને ફરી યોજાશે પરીક્ષા
નેશનલ ટેસ્ટિંગ એજન્સી (NTA) દ્વારા જાહેરાત કરવામાં આવી છે કે NEET-UG 2026 હવે 21 જૂનના રોજ યોજાશે. દેશભરમાં 551 શહેરો અને વિદેશના 14 શહેરોમાં યોજાયેલી આ પરીક્ષામાં અંદાજે 22.79 લાખ વિદ્યાર્થીઓ સામેલ થયા હતા.
આવતા વર્ષથી ઓનલાઈન મોડમાં NEET
પેપર લીક વિવાદ બાદ સરકારે પરીક્ષા પદ્ધતિમાં પણ મોટા ફેરફારની જાહેરાત કરી છે. શિક્ષણ મંત્રીએ જણાવ્યું કે આગામી વર્ષથી NEET સંપૂર્ણ કમ્પ્યુટર આધારિત ઓનલાઈન મોડમાં લેવામાં આવશે, જેથી પ્રશ્નપત્ર લીક જેવી ઘટનાઓ અટકાવી શકાય.
વિદ્યાર્થીઓને મળશે વધારાનો સમય
ફરી યોજાનારી પરીક્ષામાં વિદ્યાર્થીઓને 15 મિનિટનો વધારાનો સમય આપવામાં આવશે. પરીક્ષા બપોરે 2 વાગ્યે શરૂ થઈ સાંજે 5:15 વાગ્યા સુધી ચાલશે. નવા એડમિટ કાર્ડ 14 જૂનથી ડાઉનલોડ કરી શકાશે.
ફરી પસંદ કરી શકશે પરીક્ષા શહેર
વિદ્યાર્થીઓને ફરીથી પોતાની પસંદનું પરીક્ષા શહેર પસંદ કરવાની તક આપવામાં આવશે. NTA દ્વારા આ માટે અલગ પોર્ટલ ખુલશે, જેમાં ઉમેદવારોને 7 દિવસનો સમય આપવામાં આવશે.
પેપર લીક કેસમાં 7 આરોપીઓ ઝડપાયા
CBI અને વિવિધ રાજ્ય પોલીસની તપાસમાં અત્યાર સુધીમાં કુલ 7 આરોપીઓની ધરપકડ કરવામાં આવી છે. જેમાં મહારાષ્ટ્ર અને રાજસ્થાનમાંથી 3-3 લોકો તેમજ હરિયાણાના એક યુવકનો સમાવેશ થાય છે.
રાજસ્થાનમાં મોટું નેટવર્ક હોવાની શંકા
રાજસ્થાન પોલીસના સ્પેશિયલ ઓપરેશન ગ્રુપ (SOG) અનુસાર લીક થયેલું પ્રશ્નપત્ર અંદાજે 1000 ઉમેદવારો સુધી પહોંચ્યું હોવાની આશંકા વ્યક્ત કરવામાં આવી છે. તપાસમાં કોચિંગ સેન્ટર, કન્સલ્ટન્સી અને એજન્ટ નેટવર્કની ભૂમિકા પણ સામે આવી રહી છે.
‘ક્વેશ્ચન બેંક’થી ફેલાયું પેપર?
તપાસ દરમિયાન હાથથી લખાયેલી એક કથિત “ક્વેશ્ચન બેંક” સામે આવી છે, જેમાં 300થી વધુ પ્રશ્નો હતા. તપાસ એજન્સીઓના દાવા મુજબ તેમાંના 150 પ્રશ્નો મૂળ NEET પરીક્ષામાં પણ પૂછાયા હતા.
લાખો રૂપિયામાં સોદાની ચર્ચા
સૂત્રો મુજબ કેટલાક ઉમેદવારો સુધી પ્રશ્નપત્ર પહોંચાડવા માટે લાખો રૂપિયાની લેવડદેવડ કરવામાં આવી હતી. તપાસ દરમિયાન ડિજિટલ ડેટા, મોબાઇલ અને દસ્તાવેજો પણ જપ્ત કરાયા છે.
સુપ્રીમ કોર્ટ સુધી પહોંચ્યો મામલો
ફેડરેશન ઓફ ઓલ ઇન્ડિયા મેડિકલ એસોસિએશન (FAIMA) દ્વારા સુપ્રીમ કોર્ટમાં અરજી દાખલ કરવામાં આવી છે. જેમાં સુપ્રીમ કોર્ટની દેખરેખ હેઠળ પરીક્ષા યોજવાની અને NTAની જવાબદારી નક્કી કરવાની માંગ કરવામાં આવી છે.
દેશની સૌથી મોટી મેડિકલ પ્રવેશ પરીક્ષા
NEET દ્વારા દેશની MBBS, BDS, આયુષ અને અન્ય મેડિકલ કોર્સિસમાં પ્રવેશ આપવામાં આવે છે. હાલમાં દેશભરમાં 1 લાખથી વધુ MBBS અને 27 હજારથી વધુ BDS સીટો માટે આ પરીક્ષા લેવામાં આવે છે.
