સ્માર્ટફોનથી લઈને આર્ટિફિશિયલ ઈન્ટેલિજન્સ સુધી ટેક જગતમાં ઝડપથી બદલાવ આવી રહ્યા છે. આગામી પેઢીના સ્માર્ટફોન, વધુ શક્તિશાળી પ્રોસેસર, યુટ્યુબના નવા AI ટૂલ્સ અને ભારતીય ભાષાઓ માટે વિકસાવાયેલા AI મોડલ્સ ટેક દુનિયાને નવી દિશા આપી રહ્યા છે. આજે જાણીએ આવા પાંચ મોટા ટેક અપડેટ વિશે.
185Hz ડિસ્પ્લે અને અલ્ટ્રા-સ્લિમ બોર્ડરનું ટેસ્ટિંગ
સ્માર્ટફોન ઉત્પાદકો આગામી ફ્લેગશિપ ડિવાઇસ માટે 185Hz રિફ્રેશ રેટવાળી ડિસ્પ્લેનું પરીક્ષણ કરી રહ્યા છે. હાલમાં મોટા ભાગના પ્રીમિયમ ફોનમાં 120Hz અથવા 144Hz સુધીની ડિસ્પ્લે જોવા મળે છે, જ્યારે 185Hz ટેક્નોલોજી ગેમિંગ અને સ્ક્રોલિંગને વધુ સ્મૂથ બનાવી શકે છે. સાથે જ માત્ર 1 મીલીમીટર જેટલી પાતળી બોર્ડર ધરાવતી ડિસ્પ્લે પણ વિકસાવવામાં આવી રહી છે. નવી ટેક્નોલોજીના કારણે ફોનની સાઇઝ વધાર્યા વગર મોટી સ્ક્રીન આપવામાં મદદ મળશે.
200 મેગાપિક્સલ ઝૂમ કેમેરાથી ફોટોગ્રાફીમાં નવી ક્રાંતિ
સ્માર્ટફોન કેમેરા ક્ષેત્રમાં પણ મોટો બદલાવ જોવા મળી શકે છે. કંપનીઓ હવે 200 મેગાપિક્સલ પેરિસ્કોપ ટેલિફોટો લેન્સ પર કામ કરી રહી છે. આ ટેક્નોલોજીથી લાંબા અંતરના ફોટોગ્રાફ્સ વધુ સ્પષ્ટ મળી શકશે. ઝૂમ કર્યા બાદ પણ ફોટોની ગુણવત્તા જળવાઈ રહેશે. ઓછા પ્રકાશમાં પણ વધુ સારી તસવીરો લેવા મદદ મળશે.
AI માટે અલગ બટન મળવાની શક્યતા
આગામી સ્માર્ટફોનમાં AI માટે અલગ ફિઝિકલ બટન આપવામાં આવી શકે છે. આ બટનની મદદથી સ્ક્રીન પર દેખાતી માહિતીનું વિશ્લેષણ, ફોટો એડિટિંગ અને કેમેરા ઓપ્ટિમાઇઝેશન જેવા કાર્યો ઝડપથી કરી શકાશે.
5GHz પ્રોસેસર અને 7000mAh બેટરીનો યુગ
પ્રોસેસર ક્ષેત્રમાં પણ નવા રેકોર્ડ બનવાની તૈયારી છે. આગામી હાઈ-એન્ડ ચિપસેટ 5GHz સુધીની ઝડપ ઓફર કરી શકે છે.આવી શક્તિશાળી કામગીરીને સપોર્ટ કરવા માટે સ્માર્ટફોનમાં 7000mAh ક્ષમતાની બેટરીનો ઉપયોગ વધવાની શક્યતા છે. નવી સિલિકોન-કાર્બન ટેક્નોલોજીથી મોટી બેટરી હોવા છતાં ફોનની જાડાઈમાં વધારો નહીં થાય.
YouTubeનું AI આધારિત Smart Edit ટૂલ લોન્ચ
વિડિયો બનાવનારાઓ માટે YouTube નવી AI સુવિધા લઈને આવ્યું છે. Smart Edit નામનું આ ટૂલ લાંબા વીડિયોમાંથી આપોઆપ મહત્વપૂર્ણ ભાગ પસંદ કરીને ટૂંકા વીડિયો તૈયાર કરી શકશે.આ ટૂલ ચહેરાને કેન્દ્રમાં રાખવું, અવાજ સુધારવો અને ઓટોમેટિક સબટાઇટલ્સ ઉમેરવા જેવી કામગીરી પણ કરી શકશે. જેના કારણે કન્ટેન્ટ ક્રિએટર્સનો ઘણો સમય બચી શકશે.
ભારતીય ભાષાઓ માટે Sarvam AIનું Gajendra 2.0 મોડલ
ભારતીય AI ક્ષેત્રમાં Sarvam AI દ્વારા Gajendra 2.0 નામનું નવું મોડલ રજૂ કરવામાં આવ્યું છે. આ મોડલ ગુજરાતી સહિત અનેક ભારતીય ભાષાઓને વધુ સારી રીતે સમજવા માટે તૈયાર કરવામાં આવ્યું છે.આ ઓપન-સોર્સ મોડલ હોવાથી સ્ટાર્ટઅપ, શૈક્ષણિક સંસ્થાઓ અને સરકારી વિભાગો તેનો ઉપયોગ કરીને પોતાના AI આધારિત સોલ્યુશન્સ વિકસાવી શકશે. સાથે જ ડેટા સુરક્ષા અને સ્થાનિક ભાષાઓના વિકાસને પણ પ્રોત્સાહન મળશે.
ટેક જગતનો આગામી સમય વધુ સ્માર્ટ, ઝડપી અને AI આધારિત બનવાનો સંકેત આપી રહ્યો છે. સ્માર્ટફોન, વિડિયો ક્રિએશન અને કૃત્રિમ બુદ્ધિમત્તા ક્ષેત્રે આવી રહેલા બદલાવો સામાન્ય યુઝર્સથી લઈને વ્યવસાયિક ક્ષેત્ર સુધી મોટો પ્રભાવ પાડી શકે છે.
