સઈઝ ગુરુકુળ પાસે ટ્રાફિકમાં ફસાયા નીતિન પટેલ
અમદાવાદ-મહેસાણા હાઈવે પર કલોલ નજીક સઈઝ ગુરુકુળ પાસે ચાલી રહેલા મુખ્ય ડ્રેનેજ લાઇનના કામને કારણે મંગળવારે ભારે ટ્રાફિક જામ સર્જાયો હતો. સઈઝ ગુરુકુળથી લઈને શેરથા સુધી વાહનોની લાંબી કતારો લાગી ગઈ હતી અને હજારો વાહનચાલકો કલાકો સુધી રસ્તા પર અટવાઈ ગયા હતા. આ જ ટ્રાફિકમાં રાજ્યના પૂર્વ નાયબ મુખ્યમંત્રી નીતિન પટેલની ગાડી પણ ફસાઈ ગઈ હતી.
ટ્રાફિક પોલીસ ન દેખાતા અકળાયા પૂર્વ નાયબ મુખ્યમંત્રી
કલાકો સુધી ટ્રાફિકમાં ફસાયા બાદ નીતિન પટેલે નોંધ્યું કે હાઈવે પર ટ્રાફિક નિયંત્રણ માટે એક પણ પોલીસ કર્મચારી હાજર નહોતો. ટ્રાફિકની આ અવ્યવસ્થા જોઈ તેઓ સીધા કલોલ DySP કચેરીએ પહોંચ્યા હતા. ત્યાં હાજર પોલીસ કર્મચારીઓને તેમણે સવાલ કર્યો કે આટલો મોટો ટ્રાફિક જામ હોવા છતાં કોઈ ટ્રાફિક પોલીસ રસ્તા પર કેમ જોવા મળતી નથી.
‘મોદી સાહેબ પેટ્રોલ-ડીઝલ બચાવવાનું કહે છે, આ રીતે બચાવવાનું?’
કલોલ DySP કચેરી બહાર નીતિન પટેલે પોલીસ કર્મચારીઓ સામે નારાજગી વ્યક્ત કરતા કહ્યું કે, “મોદી સાહેબ બૂમો પાડે છે કે પેટ્રોલ-ડીઝલ બચાવો, શું આ રીતે બચાવવાનું?” તેમણે વધુમાં ઉમેર્યું કે, “હું તમારા DSPને કહું છું, કોઈ જવાબદારી જ નથી.” તેમના આ નિવેદનનો વીડિયો સોશિયલ મીડિયામાં પણ ચર્ચાનો વિષય બન્યો છે.
SPને ફરિયાદ કરવાની ચીમકી
પૂર્વ નાયબ મુખ્યમંત્રીએ પોલીસ તંત્રને કડક શબ્દોમાં ચેતવણી આપતા જણાવ્યું કે જો મોટા કામકાજ દરમિયાન ટ્રાફિક મેનેજમેન્ટની યોગ્ય વ્યવસ્થા ન કરવામાં આવે તો સામાન્ય જનતાને ભારે હાલાકી ભોગવવી પડે છે. તેમણે જિલ્લા પોલીસ વડાને ફરિયાદ કરવાની પણ ચીમકી આપી હતી.
ડ્રેનેજની કામગીરીને કારણે સર્જાયો ટ્રાફિક જામ
સઈઝ ગુરુકુળ પાસે મુખ્ય ડ્રેનેજ લાઇનનું કામ ચાલી રહ્યું હોવાથી રોડ ડાયવર્ઝન અને સાંકડા રસ્તાના કારણે ટ્રાફિકની સમસ્યા ઊભી થઈ હતી. સવારથી જ વાહનોની અવરજવર ધીમી બનતા લાંબો ટ્રાફિક જામ સર્જાયો હતો. ઘટના બાદ કલોલ પોલીસ અને ટ્રાફિક વિભાગે તાત્કાલિક કાર્યવાહી હાથ ધરી ટ્રાફિક હળવો કરવાનો પ્રયાસ કર્યો હતો.
ટ્રાફિક વ્યવસ્થાને લઈને ઉઠ્યા સવાલ
આ સમગ્ર ઘટનાએ ટ્રાફિક મેનેજમેન્ટ અને આયોજનને લઈને અનેક સવાલો ઉભા કર્યા છે. સ્થાનિકો અને વાહનચાલકોનું કહેવું છે કે અગાઉથી પૂરતી વ્યવસ્થા કરવામાં આવી હોત તો હજારો લોકોને કલાકો સુધી રસ્તા પર અટવાવું ન પડત.
