ટ્રમ્પે પેટ્રોલ-ડીઝલના ભાવ ઘટાડવા આપી ચેતવણી
અમેરિકી રાષ્ટ્રપતિ ડોનાલ્ડ ટ્રમ્પે પેટ્રોલ પંપ સંચાલકો અને ઓઈલ કંપનીઓને કડક ચેતવણી આપતાં જણાવ્યું છે કે ક્રૂડ ઓઈલના ભાવ ઘટી ગયા હોવા છતાં ગ્રાહકોને હજુ પણ મોંઘું પેટ્રોલ અને ડીઝલ વેચવામાં આવી રહ્યું છે. તેમણે સ્પષ્ટ શબ્દોમાં કહ્યું કે જો ઇંધણના ભાવમાં તાત્કાલિક ઘટાડો નહીં થાય તો સરકાર જરૂરી કાર્યવાહી કરશે.
‘ગ્રાહકો પાસેથી વધુ પૈસા વસૂલાઈ રહ્યા છે’
ટ્રમ્પે પોતાના સોશિયલ મીડિયા પ્લેટફોર્મ ‘Truth Social’ પર પોસ્ટ કરીને જણાવ્યું કે પેટ્રોલ પંપ સંચાલકો જરૂરિયાત કરતાં વધુ નફો કમાઈ રહ્યા છે. તેમના જણાવ્યા મુજબ જ્યારે આંતરરાષ્ટ્રીય બજારમાં કાચા તેલની કિંમતોમાં ઘટાડો થયો છે ત્યારે તેનો લાભ સીધો સામાન્ય ગ્રાહકોને મળવો જોઈએ.
ઓઈલ કંપનીઓની તપાસના પણ આદેશ
ટ્રમ્પ અગાઉ અમેરિકી ન્યાય વિભાગને મોટી ઓઈલ કંપનીઓની તપાસ કરવાનો આદેશ પણ આપી ચૂક્યા છે. તેમનો આરોપ છે કે કંપનીઓ સસ્તું ક્રૂડ ઓઈલ ખરીદી રહી છે પરંતુ પેટ્રોલ અને ડીઝલના ભાવમાં ઘટાડો કરીને તેનો લાભ ગ્રાહકો સુધી પહોંચાડતી નથી.
ઈરાન-ઈઝરાયલ તણાવ બાદ વધી હતી કિંમતો
તાજેતરમાં અમેરિકા, ઈઝરાયલ અને ઈરાન વચ્ચે વધેલા તણાવના કારણે આંતરરાષ્ટ્રીય બજારમાં ક્રૂડ ઓઈલના ભાવમાં તેજી જોવા મળી હતી. જોકે હવે સ્થિતિમાં સુધારો થતાં કાચા તેલના ભાવ ઘટી ગયા છે, છતાં અનેક વિસ્તારોમાં પેટ્રોલ અને ડીઝલના ભાવ ઊંચા જ રહ્યા છે.
હોર્મુઝ સ્ટ્રેટમાં ફરી વધી જહાજોની અવરજવર
ગયા અઠવાડિયે અમેરિકા અને ઈરાન વચ્ચે તણાવને કારણે હોર્મુઝ સ્ટ્રેટમાં જહાજોની અવરજવર ઘટી ગઈ હતી. હવે યુદ્ધવિરામ અને ચર્ચા આગળ વધતા સ્થિતિમાં સુધારો જોવા મળી રહ્યો છે. દરિયાઈ ટ્રેકિંગ કંપનીઓના જણાવ્યા મુજબ સોમવારે ફરી જહાજોની અવરજવર વધી છે, જોકે તણાવ હજુ સંપૂર્ણપણે સમાપ્ત થયો નથી.
અમેરિકા-ઈરાન વચ્ચે ચર્ચા હજુ અટવાયેલી
અમેરિકા અને ઈરાન વચ્ચે થયેલા MoU બાદ પણ અનેક મહત્વપૂર્ણ મુદ્દાઓ પર ચર્ચા અટવાયેલી છે. ઈરાન પોતાની જપ્ત થયેલી સંપત્તિ મુક્ત કરવાની માંગ પર અડગ છે, જ્યારે અમેરિકા કેટલીક શરતો પૂર્ણ થયા બાદ જ આગળ વધવા તૈયાર છે. હોર્મુઝ સ્ટ્રેટની સુરક્ષા, પરમાણુ કાર્યક્રમ અને આર્થિક પ્રતિબંધો જેવા મુદ્દાઓ પર હજુ સહમતિ થઈ નથી.
કતારમાં ટેકનિકલ ચર્ચા પર સૌની નજર
દોહામાં અમેરિકી અને ઈરાની પ્રતિનિધિમંડળ વચ્ચે મધ્યસ્થીઓ મારફતે ટેકનિકલ સ્તરની ચર્ચા યોજાઈ રહી છે. બંને દેશોના પ્રતિનિધિઓ સામસામે નહીં બેસે, પરંતુ કતાર અને અન્ય મધ્યસ્થીઓ દ્વારા વાતચીત આગળ વધારવાનો પ્રયાસ કરવામાં આવી રહ્યો છે.
આગામી દિવસોમાં ઇંધણના ભાવ પર રહેશે નજર
જો આંતરરાષ્ટ્રીય બજારમાં ક્રૂડ ઓઈલના ભાવ નીચા જ રહેશે અને ટ્રમ્પ સરકારનું દબાણ વધશે તો અમેરિકામાં પેટ્રોલ અને ડીઝલના ભાવમાં ઘટાડો થઈ શકે છે. આ નિર્ણયનો વૈશ્વિક ઓઈલ માર્કેટ અને અન્ય દેશોના ઇંધણ બજાર પર પણ પ્રભાવ પડી શકે છે.
