અમદાવાદ-ગાંધીનગર વચ્ચેનો પ્રથમ કેબલ સ્ટેડ બ્રિજ શરૂ
અમદાવાદ અને ગાંધીનગર વચ્ચેના ટ્રાફિકને સરળ બનાવવા માટે રાજ્ય સરકારે મહત્વપૂર્ણ પ્રોજેક્ટ પૂર્ણ કર્યો છે. ભાટ ચાર રસ્તા ખાતે 175 કરોડના ખર્ચે નિર્માણ પામેલો જિલ્લાના પ્રથમ કેબલ સ્ટેડ બ્રિજ આજે મુખ્યમંત્રી ભૂપેન્દ્ર પટેલના હસ્તે લોકાર્પણ બાદ વાહનવ્યવહાર માટે ખુલ્લો મૂકવામાં આવ્યો છે.
દરરોજ લાખો વાહનચાલકોને મળશે સીધો લાભ
અમદાવાદ-ગાંધીનગર હાઈવે પર ભાટ ચોકડી અને એપોલો સર્કલ વિસ્તાર દૈનિક ભારે ટ્રાફિક માટે જાણીતો છે. અહીંથી દરરોજ અંદાજે 1.50 લાખથી વધુ વાહનો પસાર થાય છે, જ્યારે ગાંધીનગર-એરપોર્ટ રોડ અને એસ.પી. રિંગ રોડ મળીને આશરે 1.93 લાખ વાહનોની અવરજવર રહે છે. નવા 1.48 કિલોમીટર લાંબા બ્રિજથી ટ્રાફિક બે સ્તરે વહેંચાઈ જશે, જેના કારણે જામમાં નોંધપાત્ર ઘટાડો થવાની અપેક્ષા છે.
6 સર્વિસ લેનથી ટ્રાફિક વધુ સરળ બનશે
નવા ફ્લાયઓવર સાથે એસ.પી. રિંગ રોડ, વડોદરા અને સુરત તરફ જતા વાહનો માટે બંને બાજુ ત્રણ-ત્રણ લેનની કુલ 6 સર્વિસ રોડ પણ બનાવવામાં આવ્યા છે. પરિણામે વાહનોને અવરોધ વગર ઝડપી અવરજવર કરવાની સુવિધા મળશે અને સમય તેમજ ઇંધણ બંનેની બચત થશે.
નર્મદા કેનાલ બ્રિજ પણ બનશે 12 લેનનો
આ કાર્યક્રમ દરમિયાન ભાટ નજીક નર્મદા કેનાલ ઉપર આવેલા હાલના 6 લેન બ્રિજને વધુ પહોળો બનાવવાના પ્રોજેક્ટનું પણ ખાતમુહૂર્ત કરવામાં આવ્યું. બ્રિજની બંને બાજુ 3-3 નવી લેન ઉમેરાશે, જેથી ભવિષ્યમાં કુલ 12 લેનનો વિશાળ બ્રિજ તૈયાર થશે અને બોટલનેક ટ્રાફિકની સમસ્યા દૂર થશે.
700 ટન વજનથી થયો બ્રિજનો લોડ ટેસ્ટ
બ્રિજ શરૂ કરતા પહેલાં તેની મજબૂતાઈ ચકાસવા માટે 700 ટનથી વધુ વજન ધરાવતા 18 ટ્રકો દ્વારા વિશેષ લોડ ટેસ્ટ કરવામાં આવ્યો હતો. કેબલ્સ અને મુખ્ય માળખા પર પડતા દબાણનું તબક્કાવાર નિરીક્ષણ કરીને બ્રિજને સુરક્ષિત જાહેર કરવામાં આવ્યો હતો.
જાપાન-ચીન જેવી ટેકનોલોજી, 24 કલાક થશે મોનિટરિંગ
38 મીટર ઊંચા પાયલોન અને સ્ટીલ કેબલ્સથી બનેલો આ કેબલ સ્ટેડ બ્રિજ અત્યાધુનિક ટેકનોલોજી પર આધારિત છે, જે જાપાન અને ચીન જેવા દેશોમાં જોવા મળે છે. બ્રિજ શરૂ થયા બાદ તેની સુરક્ષા અને માળખાકીય સ્થિતિ પર સતત નજર રાખવા માટે અંદાજે અઢી કરોડના ખર્ચે આધુનિક હેલ્થ મોનિટરિંગ સિસ્ટમ પણ સ્થાપિત કરવામાં આવશે.
