વસ્ત્રાલ બ્લાસ્ટ બાદ પોલીસનો કડક એક્શન
અમદાવાદના વસ્ત્રાલ ગામની સીમમાં આવેલી ફટાકડાની ફેક્ટરીમાં 18 જુલાઈએ થયેલા ભયાનક બ્લાસ્ટ બાદ પોલીસ અને વહીવટી તંત્ર એક્શન મોડમાં આવ્યું છે. આ દુર્ઘટનામાં 9 લોકોના મોત થયા હતા, જ્યારે 6 લોકો ગંભીર રીતે ઇજાગ્રસ્ત થયા હતા. સમગ્ર ઘટનાને લઈને રામોલ પોલીસ સ્ટેશનમાં ફેક્ટરીના સંચાલકો સામે ભારતીય ન્યાય સંહિતા (BNS) તેમજ વિસ્ફોટક કાયદા હેઠળ ગુનો નોંધવામાં આવ્યો છે.
પાસ-પરમિટ વિના ચાલતી હતી ફેક્ટરી
પોલીસ ફરિયાદ મુજબ, વસ્ત્રાલના સર્વે નં. 629/1/2/3 પર આવેલી જગ્યામાં જરૂરી પરવાનગી અને લાયસન્સ વિના ગેરકાયદેસર રીતે ફટાકડાનું ઉત્પાદન કરવામાં આવતું હતું. FIRમાં મેહુલ ડોડીયા, રમીલાબેન ડોડીયા અને સાદીક સૈયદ સહિતના આરોપીઓના નામ નોંધાયા છે. પોલીસે જણાવ્યું છે કે તપાસ દરમિયાન જવાબદાર જણાશે તે તમામ વ્યક્તિઓ સામે પણ કાયદેસરની કાર્યવાહી કરવામાં આવશે.
આર્થિક લાભ માટે સુરક્ષા નિયમોની અવગણના કરવાનો આરોપ
પોલીસના જણાવ્યા મુજબ, ફેક્ટરીમાં પૂરતી સુરક્ષા વ્યવસ્થા, કાયદેસર મંજૂરી અને જરૂરી સલામતીના ધોરણો વિના વિસ્ફોટક સામગ્રીનું ઉત્પાદન કરવામાં આવતું હતું. આ જ બેદરકારીના કારણે થયેલા વિસ્ફોટમાં અનેક પરિવારો પર આફત આવી પડી અને નવ લોકોએ જીવ ગુમાવ્યા.
BNS અને વિસ્ફોટક કાયદા હેઠળ ગુનો નોંધાયો
રામોલ પોલીસે આરોપીઓ સામે BNSની કલમ 105, 287, 288 અને 61(2) હેઠળ ગુનો નોંધ્યો છે. આ ઉપરાંત Explosive Substances Act, 1908 તથા Explosives Act, 1884ની સંબંધિત કલમો હેઠળ પણ કાર્યવાહી હાથ ધરવામાં આવી છે. પોલીસ હાલ ફેક્ટરીમાંથી મળેલા પુરાવા, વિસ્ફોટક સામગ્રી અને દસ્તાવેજોની તપાસ કરી રહી છે.
ગ્યાસપુર અને નારોલમાં વધુ ગેરકાયદે ફેક્ટરીઓ ઝડપાઈ
વસ્ત્રાલ બ્લાસ્ટ બાદ અમદાવાદ પોલીસ, AMC અને ફાયર વિભાગે શહેરના છેવાડાના વિસ્તારોમાં વિશેષ ચેકિંગ અભિયાન શરૂ કર્યું છે. 18 જુલાઈની મોડી રાત્રે ગ્યાસપુરમાં ‘કિંગ્સ ફાયર વર્ક્સ’ અને નારોલના ગુલાબ પ્લોટ વિસ્તારમાં ચાલતી એક ફટાકડાની ફેક્ટરી સીલ કરવામાં આવી હતી. ફેક્ટરીમાંથી મળી આવેલા ફટાકડાના જથ્થાને જપ્ત કરીને સલામતીના ભાગરૂપે પાણી વડે નાશ કરવામાં આવ્યો હતો.
ગ્યાસપુરમાં વધુ એક ફેક્ટરી સીલ
19 જુલાઈની સવારે ગ્યાસપુર વિસ્તારમાં ચાલતી ‘જોય એન્ડ એન્જોય વર્કર’ નામની વધુ એક ફટાકડાની ફેક્ટરી સામે પણ કાર્યવાહી કરવામાં આવી છે. AMC, પોલીસ અને ફાયર વિભાગે સંયુક્ત ઓપરેશન ચલાવી એકમને સીલ કરી દીધું છે. નારોલ સહિતના વિસ્તારોમાં હજુ પણ ગેરકાયદે ફટાકડાની ફેક્ટરીઓ અંગે તપાસ અને ચેકિંગ ચાલુ છે.
તપાસનો વ્યાપ વધારાયો
બ્લાસ્ટ બાદ તંત્ર હવે શહેરમાં ગેરકાયદેસર રીતે ચાલતા ફટાકડાના એકમોની યાદી તૈયાર કરી રહ્યું છે. BNપોલીસ સાથે ફાયર વિભાગ અને AMC સંયુક્ત રીતે આવા તમામ એકમોની તપાસ કરી રહ્યા છે જેથી ભવિષ્યમાં આવી દુર્ઘટનાઓ અટકાવી શકાય.
