રિપોર્ટ: મહેશ ખેર, કચ્છ
હળવદથી કચ્છ તરફ નીકળતી હાઈ ટેન્શન પાવર લાઇનના કાર્ય દરમ્યાન અદાણી કંપની દ્વારા ખેડુતોને યોગ્ય વળતર ન આપવાના મુદ્દે ઉગ્ર રોષ ફાટી નીકળ્યો છે. વાંઢીયા ગામના ખેડુતો પર બળજબરીથી કામગીરી થતી હોવાની ફરિયાદો વચ્ચે ઘટના વધુ ગંભીર બની જ્યારે આ સમગ્ર પ્રક્રિયાનો કવરેજ કરવા ગયેલા જનતા દસ્તકના પત્રકાર મહેશ રાજગોર પર જ લૂંટનો ગુન્હો નોંધાઈ ગયો.
કંપનીના પાવર સામે ખેડૂતો – અને હવે પત્રકારો પણ!?
ખેડુતો લાંબા સમયથી દાવો કરે છે કે કંપની યોગ્ય વાટાઘાટ કર્યા વગર, વળતર નક્કી કર્યા વગર, અને બળજબરીથી જમીનમાં પોલ ઉભા કરી રહી છે.આ આક્ષેપો વચ્ચે પત્રકારો ઘટનાસ્થળે પહોંચતા માહોલ વધુ તંગ બન્યો.આક્ષેપ છે કે
➡️ અદાણી કંપનીના કમલેશ મોદી અને ટીમે સેંકડો ખેડુતો અને પોલીસની હાજરી વચ્ચે પત્રકારને ધમકાવ્યો
➡️ કવરેજ દરમિયાન પત્રકારની ચેન છીનવી લેવાનો પ્રયાસ થયો
➡️ અને આશ્ચર્યજનક રીતે, પોલીસે પત્રકારને બદલે કંપનીના વ્યક્તિની જ ફરિયાદ લઈને લૂંટનો કેસ નોંધ્યો
પ્રથમ ફરિયાદી પત્રકાર હોવા છતાં FIR કંપનીના માણસની?
સ્થાનિકોમાં પ્રશ્ન ઉઠ્યો છે કે—
“જે વ્યક્તિ પીડિત છે, જેના પર હુમલો થયો છે, તેના બદલે કંપનીના પાવર ધરાવતા કર્મચારીની એફઆઇઆર કેમ? શું પોલીસ કોઈ દબાણ હેઠળ છે?”
સામખીયાળી પોલીસે કંપનીના કમલેશ મોદીની ફરિયાદ તરત જ સ્વીકારી, પરંતુ પત્રકારની ફરિયાદ અંગે કોઈ કાર્યવાહી થઈ નથી.આ મામલે પોલીસની નિષ્પક્ષતા પર ગંભીર સવાલો ઊભા થયા છે.
ખેડૂતોનો ગુસ્સો – “અમને અભણ સમજી કંપની બળજબરી કરે છે”
વાંઢીયા અને આસપાસના ગામોના ખેડૂતોનો આક્ષેપ છે કે અદાણી કંપની તેમને અભણ અને અજાણ માનીને, વળતર વિના હાઈ ટેન્શન લાઇન પસાર કરાવવા માગે છે.
એક ખેડૂતનું નિવેદન—“વળતર તો આપે નહીં, ઉપરથી વિરોધ કરીએ તો કેસ, ધમકી અને હવે તો પત્રકારો પર પણ ગુન્હો!”
પોલીસ-કંપની ગઠબંધનનો આરોપ
પત્રકારોને ટાર્ગેટ કરવાનું ગણતરીપૂર્વકનું કામ હોવાનું ખેડૂતોનું કહેવું છે.
“અમારી વાત બહાર ન જાય, ખેડૂતોનો સત્ય ન દેખાય, એ માટે પત્રકારોને ડરાવવા FIR નો હથિયાર વપરાયું છે.”પોલીસે આત્મમંથન કરવું જરૂરી,આઈનાની રક્ષા કરનાર એજન્સી તરીકે પોલીસની ભૂમિકા નિષ્પક્ષ હોવી જોઈએ.પરંતુ અહીં—પત્રકાર પર હુમલા છતાં તપાસ નહીં
પત્રકારને બદલે કંપનીના કર્મચારીની જ ફરિયાદ
સ્થળ પર મોટી સંખ્યામાં લોકો સમક્ષ થયેલી ઘટના છતાં પત્રકારના વિડિઓ – સાક્ષીઓને અવગણવો
આ તમામ પ્રશ્નો સામખીયાળી પોલીસ માટે આત્મમંથનનો મુદ્દો છે.
