રિપોર્ટર: કુલદીપ ભાટીયા, સાબરકાંઠા
સાબરકાંઠા જિલ્લામાં મતદાર યાદીને વધુ ચોક્કસ, પારદર્શક અને ભૂલરહિત બનાવવા માટે ભારતના ચૂંટણી પંચ દ્વારા જાહેર કરાયેલા “મતદારયાદી ખાસ સઘન સુધારણા કાર્યક્રમ” અંતર્ગત આગામી 22 અને 23 નવેમ્બર 2025ના રોજ તમામ મતદાન મથકો ખાતે ખાસ કેમ્પો યોજાશે. આ અભિયાનનો હેતુ 1 જાન્યુઆરી 2026ની લાયકાત તારીખને આધારે પાત્ર મતદારોનો 100% સમાવેશ કરાવવાનો છે.
પાત્ર મતદારો છૂટી ન જાય, અને અપાત્રનો સમાવેશ ન થાય—ચૂંટણી પંચની પ્રાથમિકતા
મતદાર યાદીમાં અનેક વખત મરણ પામેલા, કાયમી સ્થળાંતર કરેલા અથવા બે જુદી જગ્યાએ નામ ધરાવતા લોકોના નામ યથાવત રહેતા હોય છે. આ સ્થિતિને નિવારવા માટે ચૂંટણી પંચે આ સઘન અભિયાન ચલાવ્યું છે, જેમાં આવા “ડુપ્લિકેટ” અને “અપાત્ર” નામોને યાદીમાંથી દૂર કરાશે. સાથે–સાથે નવા પાત્ર નાગરિકો, ખાસ કરીને 18 વર્ષ પૂરા કરનારા યુવાનોને મતદાર યાદીમાં જોડવા માટે પ્રોત્સાહિત પાડવામાં આવશે.
ખાસ કેમ્પોમાં બી.એલ.ઓની હાજરી — સમય: સવારે 9 થી બપોરે 1
જિલ્લાના દરેક મતદાન મથક પર બંન્ને દિવસો દરમિયાન બૂથ લેવલ ઓફિસર (BLO) સવારે 9.00 થી બપોરે 1.00 વાગ્યા સુધી હાજર રહેશે. તેઓ મતદારોને નીચેની બાબતોમાં માર્ગદર્શન અને સહાયતા કરશે:
ફોર્મ-6 (નવું નામ ઉમેરવા), ફોર્મ-7 (નામ કમી કરાવવા), ફોર્મ-8 (સુધારા) ભરવાની મદદ
મતદાર યાદીમાં પોતાના નામની પુષ્ટિ
2026ની સુધારેલી યાદીમાં શામેલ થવા જરૂરી પુરાવા અંગે માર્ગદર્શન
ઓળખપત્ર, સરનામા પુરાવા વગેરે ચકાસણી
નવા મતદારો માટે વિશેષ તક
જેઓનું નામ 2025ની અથવા અગાઉની મતદાર યાદીમાં ન હોઈ, એ નાગરિકો માટે આ ખાસ દિવસો મતદાર બનીને લોકશાહી પ્રક્રિયામાં જોડાવાની મહત્વપૂર્ણ તક છે. 18 વર્ષ પૂર્ણ કરનારા યુવાઓ માટે BLO તમામ માર્ગદર્શન અને ફોર્મ ભરી લેવામાં સહાયતા કરશે.
ચૂંટણી વ્યવસ્થાની પારદર્શકતા વધારવાનો પ્રયાસ
મતદાર યાદીની ભૂલમુક્તતા ચૂંટણી પ્રણાલીની પાયાની બાબત છે. ખોટી અથવા અધૂરી યાદી મતદાનના હક્કને પ્રભાવિત કરે છે. તે કારણે સાબરકાંઠા જિલ્લા ચૂંટણી તંત્ર દ્વારા આ અભિયાનને સફળ બનાવવા વ્યાપક તૈયારીઓ શરૂ કરાઈ છે. ગ્રામ પંચાયત, નગરપાલિકા અને શાસકીય તંત્રને પણ સક્રિય રીતે કેમ્પોમાં સહકાર આપવા સૂચના અપાઈ છે.
સ્થાનિક મતદારોમાં પણ ખાસ કેમ્પ અંગે ઉત્સાહ જોવા મળી રહ્યો છે, કારણ કે ઘણા સમયથી પેન્ડિંગ સુધારાઓ તેમજ નવા નામ ઉમેરાવાના કામો હવે સરળતાથી થઈ શકશે.
