કડી શહેરમાં સસ્તા અનાજની દુકાનમાં અનાજ લેવા ગયેલી મહિલાને KYCની પ્રક્રિયા નામે ઉપરના માળે લઈ જઈ છેડછાડ કરવાનો ગંભીર બનાવ સામે આવતા જિલ્લામાં હલચલ મચી ગઈ છે. દુકાનદારનો આ ‘ કાવતરું’ માત્ર છેડછાડ પુરતું જ નહોતું, પરંતુ મફત અનાજ અને ફોટો પાડવા દેવાની લાલચ સાથે મહિલાને શરમજનક સ્થિતિમાં મૂકાશે અત્રે ત આરોપો લાગતા શહેરમાં ચકચાર મચી ગઈ છે.
અંગૂઠાની છાપ ન આવતા KYC માટે ઉપર બોલાવવામાં આવી
મળતી માહિતી અનુસાર, પીડિત મહિલા પોતાના બાળક સાથે કડી વિસ્તારમાં આવેલી સસ્તા અનાજની દુકાનમાં અનાજ લેવા ગઈ હતી. અનાજ લેવા માટે જરૂરી અંગૂઠાની છાપ લેતી વખતે ટેકનિકલ સમસ્યા આવતાં દુકાનદાર અજય પટણીએ મહિલાને કહ્યું કે “ઉપરના માળે બે સાહેબ અને એક બેન બેઠા છે, તમારી KYC ઉપર થશે, પછી જ અનાજ મળશે.”
દુકાનદારની આ વાતમાં વિશ્વાસ રાખીને મહિલા પોતાના બાળક સાથે ઉપરના માળે ગઈ, પરંતુ રૂમ બંધ હોવાથી શંકા ઉભી થઈ. થોડા જ પળોમાં દુકાનદાર અજય પટણી પોતે ઉપર આવી પહોંચ્યો અને રૂમનું તાળું ખોલ્યું.
રૂમમાં લઈ જઈ પલંગ પર બેસાડી છેડછાડ કરવાનો આક્ષેપ
પીડિત મહિલાએ લગાવેલા આક્ષેપો મુજબ, અજય પટણી તેને રૂમમાં લઈ જઈ પલંગ પર બેસાડી અશ્લીલ હરકતો કરી, તેમજ અયોગ્ય સ્પર્શ કરી છેડછાડ કરી હતી. આ દરમિયાન મહિલાના બાળકને નીચે રમવા મોકલી દેવાની વાત કહી વધુ એકલું પાડવાનો પ્રયાસ કરાયો હતો.
આરોપી અજય પટણી એ મહિલાને “ફોટો પાડવા દઈશ તો મફત અનાજ આપી દઈશ” એવી લાલચ આપી હતી. પરંતુ મહિલાએ તેની હરકતને સમજી લીધા બાદ તરત જ ત્યાંથી છુટકારો મેળવી નીચે આવી ગઈ.
પીડિતા સબંધીઓ સાથે પોલીસ સ્ટેશન પહોંચી
ઘટનાથી હચમચી ગયેલી મહિલાએ પોતાના સબંધીઓ સાથે કડી પોલીસ સ્ટેશનમાં જઈ દુકાનદાર અજય પટણી વિરુદ્ધ છેડછાડ, અશ્લીલ વર્તન અને લાલચ દ્વારા મહિલા શોષણ કરવાની ધારાઓ હેઠળ સત્તાવાર ફરિયાદ નોંધાવી.
કડી પોલીસે પીડિતાનું નિવેદન લીધું, સ્થળ તપાસ કરી અને કેસની ગંભીરતા જોવા મળતાં આગળની કાર્યવાહી શરૂ કરી છે.
આરોપી અજય પટણી નગરપાલિકાના મહિલા કોર્પોરેટરનો પુત્ર
આ ઘટનાએ વધુ ચર્ચા ત્યારે પામી જ્યારે સામે આવ્યું કે આરોપી અજય પટણી કડી નગરપાલિકાની મહિલા કોર્પોરેટરનો પુત્ર છે. રાજકીય પ્રભાવ ધરાવતા પરિવારમાંથી આવતાં આ યુવકે સસ્તા અનાજની દુકાન—જે સામાન્ય લોકો માટે સરકારી સહાયનો સાધન છે—તેનો તરીકાથી દુરુપયોગ કરી મહિલાઓને નિશાન બનાવ્યા હોવાનો આક્ષેપ છે.
હવે સવાલ એ છે કે રાજકીય પ્રભાવ વચ્ચે કડી પોલીસ કેવી કાર્યવાહી કરે છે, અને મહિલાઓને સસ્તા અનાજની દુકાનો પર સુરક્ષિત વાતાવરણ મળે તે દિશામાં શું પગલાં લેવાશે?
કડી શહેર અને આસપાસના વિસ્તારોમાં આ ઘટના અંગે ભારે ચર્ચા ચાલી રહી છે, ખાસ કરીને એ મુદ્દે કે જો મહિલાઓ અનાજ જેવી મૂળભૂત જરૂરિયાત માટે પણ સુરક્ષિત ન હોય, તો જવાબદારી કોની?
