રિપોર્ટર : પ્રદીપ ઠાકોર ( બહુચરાજી )
બેચરાજી પોલીસ લાઇન પાસે આજે એક ગંભીર બનાવ સામે આવ્યો છે. 21 વર્ષીય સંજયસિંહ પ્રભાતસિંહ સોલંકી (રહે. આકબા) બાઈક પર બજાર તરફ જઈ રહ્યા હતા. તે દરમિયાન રસ્તા પર લટકતી પ્રતિબંધિત ચાઈનીઝ દોરી તેમના ગળા સાથે અથડાતા ગંભીર ઇજા થઈ હતી.
ઘટના બાદ યવાનને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા હતા. હોસ્પિટલ સૂત્રોના જણાવ્યા મુજબ ગળાના ભાગે કપાઈ જવા જેવી ઇજા થઈ હોવા છતાં હાલ સ્થિતિ સ્થિર છે.
ચાઈનીઝ દોરી પર સમગ્ર દેશમાં સ્પષ્ટ પ્રતિબંધ હોવા છતાં બેચરાજી સહિત અનેક વિસ્તારોમાં દોરી કેવી રીતે પહોંચે છે, કોણ લાવે છે અને કોણ વેચે છે— તે અંગે લોકોમાં સવાલો ઉઠ્યા છે.
સ્થાનિક નાગરિકોમાં ભારે રોષ ફેલાયો છે અને બેચરાજી વિસ્તારમાં ચાઈનીઝ દોરીના જથ્થા, સપ્લાયરો અને વેચાણકર્તાઓ સામે તાત્કાલિક કડક પોલીસ કાર્યવાહી કરવાની જોરદાર માંગ ઉઠી રહી છે.
