મહેસાણા જિલ્લાના કડી શહેરમાં ચેન સ્નેચિંગની ઘટનાએ જ્યાં એક તરફ જનતામાં ભયનો માહોલ ઉભો કર્યો હતો, ત્યાં બીજી તરફ કડી પોલીસએ ચિત્તાની ઝડપે કાર્યવાહી કરીને માત્ર કલાકોમાં જ આરોપીઓને ઝડપી પાડી પોતાની કાર્યક્ષમતા સાબિત કરી છે. કડી પોલીસની કામગીરીને લઈને છેલ્લા સમયમાં ઉઠતા સવાલો વચ્ચે પીઆઇ ઓમકારસિંહ સિસોદિયાની આગેવાની હેઠળની ટીમે આ કેસમાં જે ઝડપ અને ચોકસાઈ બતાવી છે, તે ટીકા કરનારાઓ માટે મોઢે તાળાં લગાવનાર સાબિત થઈ છે.
બનાવની વિગત મુજબ, કડીના કરણનગર રોડ પર આવેલ સોમેશ્વર સોસાયટીમાં રહેતા ગીતાબેન સુથાર મંદિરમાં દર્શન કરી ઘરે પરત ફરી રહ્યા હતા ત્યારે બાઇક સવાર બે અજાણ્યા શખ્સોએ મહિલાના ગળામાંથી સોનાની ચેન ઝૂંટવી ફરાર થઈ ગયા હતા. ધોળા દિવસે બનેલી આ ઘટનાથી વિસ્તારમાં ચકચાર મચી ગઈ હતી. પરંતુ આ સમગ્ર ઘટના નજીકના સીસીટીવી કેમેરામાં કેદ થઈ જતા પોલીસ માટે મહત્વ નું સૂત્ર સાબિત થયું
મહિલાની ફરિયાદ મળતા જ કડી પોલીસ સ્ટેશનના પીઆઇ ઓમકારસિંહ સિસોદિયાની સર્વેલન્સ સ્કોડ તાત્કાલિક એક્શનમાં આવી ગઈ હતી. ટેકનિકલ સર્વેલન્સ અને હ્યુમન ઈન્ટેલિજન્સનો સુમેળ સાધીને પોલીસે આરોપીઓ સુધી પહોંચવાનો માર્ગ તૈયાર કર્યો હતો. દરમિયાન પોલીસને ચોક્કસ બાતમી મળી કે બે શંકાસ્પદ ઈસમો દેઉસણા નજીક વિરમગામ માયનોર કેનાલ રોડ પર આવવાના છે.
આ બાતમીના આધારે કડી પોલીસના જાંબાજ કર્મચારીઓ જયેશ રબારી અને રાજુભાઈ રબારીની ટીમે વોચ ગોઠવી અને બાઇક સવાર બે શંકાસ્પદ ઈસમોને અટકાવી ઝડપી પાડ્યા હતા. કડક પૂછપરછ દરમિયાન બંનેએ ચેન સ્નેચિંગની ઘટના કબૂલ કરી દીધી હતી.
પકડાયેલા આરોપીઓની ઓળખ કડી તાલુકાના દેઉસણા ગામના નરેશ ઉર્ફે ભોલો પ્રહલાદજી ઠાકોર (ઉં.વ. 20) અને આસીફ કાસમમિયા સિપાઈ (ઉં.વ. 26) તરીકે થઈ છે. પોલીસએ તેમના કબજામાંથી અંદાજે દોઢ તોલાની સોનાની ચેન (કીંમત રૂ. 2 લાખ) તેમજ મોટરસાયકલ મળી કુલ રૂ. 2.50 લાખનો મુદ્દામાલ જપ્ત કર્યો છે.
આ સમગ્ર ઓપરેશન એ બતાવી દીધું કે કડી પોલીસ માત્ર આરોપીઓ પકડવામાં જ નહીં, પરંતુ ઝડપ, બુદ્ધિ અને ટેકનિકલ કૌશલ્યમાં પણ આગળ છે. થોડા દિવસોથી પોલીસની કામગીરીને લઈને ઉઠતા સવાલો વચ્ચે આ કાર્યવાહી કડી પોલીસ માટે એક મોટો “રીઅલિટી ચેક” બની છે — કે જ્યારે તંત્ર ઈચ્છે ત્યારે ગુનાખોરીને જડમૂળથી ઉખાડી શકે છે.
સ્થાનિક લોકોમાં પણ હવે પોલીસ પ્રત્યે વિશ્વાસ વધ્યો છે. “કડી પોલીસ એક્શન મોડમાં આવે તો ગુનેગારોને બચવાની કોઈ જગ્યા નથી”
એક તરફ જ્યાં ગુનેગારો માટે આ ઘટના કડક સંદેશ છે, ત્યાં બીજી તરફ કડી પોલીસ માટે આ કામગીરી ગૌરવનો વિષય બની છે. હવે આ જ ગતિ અને દૃઢતા આગળ પણ જળવાઈ રહે તેવી લોકમાંગણી ઉઠવા પામી છે.
