થરાદમાં પોલીસ પરિવારોનો ગર્જનાટ — ખાખી પર મળેલ ધમકી સામે જનઆક્રોશ

રિપોર્ટર : કિરણ ચૌધરી, વાવ-થરાદ જિલ્લો

જાહેર રેલીમાં મહિલાઓ, વેપારીઓ, પોલીસ પરિવારોનો ઉમળકો; જીગ્નેશ મેવાણી વિરુદ્ધ આવેદનપત્ર પાઠવાયું.

વાવ-થરાદ :
ખાખીધારી પોલીસસદસ્યોને મળેલી ગર્ભિત ધમકીનાં મામલે આજે થરાદમાં પોલીસ પરિવારો સહિત મોટી સંખ્યામાં સ્થાનિક નાગરિકો રસ્તા પર ઉતર્યા. શહેરમાં તંગદિલીનું માહોલ વચ્ચે પ્રચંડ રેલી કાઢવામાં આવી હતી, જેમાં મહિલા સંગઠન, વેપારી સંગઠન, દુકાનદારો અને પોલીસ કર્મચારીઓના પરિવારો હાજર રહ્યાં.

આ રેલી દરમિયાન “જીગ્નેશ મેવાણી હાય હાય” ના નારા ગુંજ્યાં હતાં. સાથે જ જીગ્નેશ મેવાણી વિરુદ્ધ મહિલા અને વેપારી સંગઠનોએ આવેદનપત્ર પાઠવી સરકારને પગલાં લેવા વિનંતી કરી હતી.

પટ્ટા ઉત્તરાવી દેવાના નિવેદનને લઈને ઉદ્ભવેલા વિવાદે સ્થાનિક સ્તરે ઉગ્રતા ફેલાવી છે. લોકોને લાગે છે કે આ પ્રકારના નિવેદનો ખાખીનો અપમાન કરે છે, જેના કારણે પોલીસ પરિવારોમાં ભારે નારાજગી જોવા મળી રહી છે.

સ્થાનિક વેપારીઓએ જણાવ્યું કે કાયદો અને વ્યવસ્થાનું પાલન કરાવતા અધિકારીઓને આ રીતે ટાર્ગેટ કરવામાં આવે તો સમાજમાં ખોટો સંદેશ જાય છે.
આ સમગ્ર રેલી શાંતિપૂર્ણ રહી હતી પરંતુ લોકોએ પોતાની ભાવનાઓ સશક્ત રીતે વ્યક્ત કરી હતી.