આજે ગુજરાતના નવા મંત્રીમંડળમાં વિસનગરના ધારાસભ્ય અને અગાઉના આરોગ્ય મંત્રી ઋષિકેશ પટેલને ફરી એકવાર કેબિનેટ કક્ષાનું સ્થાન મળતાં ઉત્તર ગુજરાતના રાજકારણમાં નવો જોશ જોવા મળી રહ્યો છે. ભાજપે ઋષિકેશ પટેલને મંત્રીપદ આપીને મહેસાણામાં નીતિન પટેલ બાદ એક મજબૂત પાટીદાર ચહેરાને ફરી સ્થાપિત કર્યો છે, જેનો સીધો સંદેશ ઉત્તર ગુજરાતના પાટીદાર અને ગ્રામ્ય વિસ્તારો સુધી પહોંચાડવાનો છે.
‘કઢી મેલે તો કાઢી મેલે’ વાયરલ વીડિયોનો પડઘો!
૧. જગદીશ વિશ્વકર્માની પીછેહઠ: થોડા સમય પહેલાં રાજ્યના બે મંત્રીઓ – ઋષિકેશ પટેલ અને તત્કાલીન પ્રદેશ પ્રમુખ જગદીશ વિશ્વકર્મા (પૂર્વ સહકાર મંત્રી) વચ્ચેની ખાનગી વાતચીતનો એક વીડિયો વાયરલ થયો હતો. આ વીડિયોમાં ઋષિકેશ પટેલ કથિત રીતે કહેતા સંભળાયા હતા કે, “કઢી મેલે તો કાઢી મેલે” (જો તેમને મંત્રીમંડળમાંથી કાઢી નાખે તો કાઢી નાખે). આ નિવેદનને પાર્ટી વિરુદ્ધ અસંતોષ તરીકે જોવામાં આવ્યું હતું.
૨. હાઈકમાન્ડનો આકરો નિર્ણય: આજના મંત્રીમંડળ વિસ્તરણમાં ઋષિકેશ પટેલને રીપીટ કરવા અને પૂર્વ પ્રદેશ પ્રમુખ જગદીશ વિશ્વકર્માને ડ્રોપ કરવાથી સ્પષ્ટ સંદેશ ગયો છે કે, હાઈકમાન્ડની નજરમાં ઋષિકેશ પટેલનું પ્રાદેશિક પાટીદાર નેતા તરીકેનું કદ અને ઉપયોગીતા, આંતરિક વિવાદ કરતાં વધુ મહત્વપૂર્ણ છે. જગદીશ વિશ્વકર્માનું પત્તું કપાતા ભાજપના એક મોટા વર્ગમાં નિરાશા અને આક્રોશ ફેલાયો છે.
૩. ઉત્તર ગુજરાતમાં કોંગ્રેસ સામે ‘પાટીદાર પ્લાન’: ઋષિકેશ પટેલ ઉત્તર ગુજરાતમાં મજબૂત પાટીદાર ચહેરો છે અને વિસનગર બેઠક પર સતત જીત મેળવતા આવ્યા છે. તેમના મંત્રી બનવાથી ભાજપે સ્પષ્ટ કરી દીધું છે કે, આગામી સ્થાનિક સ્વરાજ્ય અને વિધાનસભા ચૂંટણીમાં ઉત્તર ગુજરાતના પાટીદાર અને ગ્રામ્ય વિસ્તારોમાં કોંગ્રેસ અને અન્ય વિપક્ષી દળો સામે આક્રમક લીડ લેવાની તૈયારી છે. મહેસાણા જિલ્લામાં નીતિન પટેલની ગેરહાજરીમાં ઋષિકેશ પટેલને પાટીદાર વોટબેંક સાચવવાની અને કોંગ્રેસને ઘેરવાની જવાબદારી સોંપાઈ છે.
સમાચાર ડાયરી 24X7 ના એક્સક્લુઝિવ અહેવાલ મુજબ, “કઢી મેલે તો કાઢી મેલે” જેવા નિવેદન બાદ પણ ઋષિકેશ પટેલનું કદ વધારવું અને જગદીશ વિશ્વકર્મા જેવા નેતાને પડતા મૂકવા એ દર્શાવે છે કે, ભાજપ માટે પ્રાદેશિક સમીકરણો અને જીતની ગણતરી સર્વોપરી છે. આ નિર્ણયથી વિશ્વકર્માના સમર્થકોમાં ફેલાયેલો રોષ અને તેની અસર આવનારા દિવસોમાં સ્પષ્ટપણે જોવા મળશે.
