શક્તિ સર્કલ પાસે દરરોજ 40 થી વધુ આખલાઓ નો અડ્ડો; યાત્રાધામની સુરક્ષા અને પ્રતિષ્ઠા બંને જોખમમાં
સ્પેશિયલ રિપોર્ટ..પ્રદીપ ઠાકોર ( બહુચરાજી )
બહુચરાજી યાત્રાધામમાં ભક્તિ નહીં, ભયનું વાતાવરણ
બહુચરાજી — મા બહુચરાજી નું પવિત્ર ધામ. દરરોજ હજારો ભક્તો અહીં માતાજીના દર્શન માટે આવે છે. શહેરના મધ્યમાં આવેલ શક્તિ સર્કલથી લઈને મુખ્ય મંદિર સુધીનો માર્ગ બહુચરાજી નું હાર્ટ લાઇન ગણાય છે.પરંતુ છેલ્લા કેટલાક દિવસોથી આ માર્ગ એક નવા અને જોખમી ત્રાસ હેઠળ આવી ગયો છે
રખડતા ઢોરનો આતંક.
દરરોજ રાત્રે 40 થી વધુ આખલાઓ નો સમૂહ શક્તિ સર્કલ અને આસપાસના વિસ્તારોમાં ભેગો થાય છે. રોડના મધ્યમાં બેઠેલા આ ઢોરને કારણે ટ્રાફિક વારંવાર અટકી જાય છે. વાહનચાલકોને જોખમ તો રહે જ છે, પણ અનેકવાર બાઈક ચાલકો અને રિક્ષાઓ સીધા ઢોર સાથે અથડાઈ અકસ્માતો સર્જાય છે.
ભક્તો અને સ્થાનિકો માટે જોખમ — “આ રસ્તો હવે ભયજનક બની ગયો છે”
શહેરના વેપારીઓ અને સ્થાનિક રહેવાસીઓ કહે છે કે રાત્રે 9 વાગ્યા પછી શક્તિ સર્કલથી મંદિર સુધીનો માર્ગ ભયજનક બની જાય છે.ઘણા ભક્તો રાત્રે મંદિરે જતા સમયે આ રસ્તો ટાળવા મજબૂર બન્યા છે. ખાસ કરીને શનિવાર-રવિવાર અને તહેવારો દરમિયાન, જ્યારે શહેરમાં ભક્તોની સંખ્યા વધે છે, ત્યારે સ્થિતિ વધુ જોખમી બની જાય છે.
સ્થાનિક વેપારી ભરત પટેલ કહે છે:
“રોજ રાત્રે આખલાઓ નો ટોળું અહીં બેસે છે. પોલીસના વાહન પણ પસાર થાય છે, પણ કોઈ કાર્યવાહી નથી. કોઈ દિવસ મોટો અકસ્માત થશે.”
તંત્ર ના દાવા અને હકીકત વચ્ચે અંતર
બહુચરાજી નગરપાલિકા દ્વારા વર્ષો થી ઢોર નિયંત્રણ માટે દાવા કરવામાં આવે છે — ફંડ ની ફાઈલો, ટેન્ડર, અને ગૌશાળા માટેની યોજનાઓ કાગળ પર તો છે, પરંતુ ગ્રાઉન્ડ પર કંઈ જ બદલાવ નથી.
નગરપાલિકાના એક અધિકારીએ નામ ન બતાવવાની શરતે કહ્યું:
“ઢોર પકડવા માટે મજૂર અને વાહન બંનેની તંગી છે. ટેન્ડર પ્રક્રિયા ચાલુ છે.”
પરંતુ સ્થાનિકો કહે છે કે આ માત્ર બહાનું છે. “ફંડ ખાઈ અને ફાઈલ ખોલાય, પણ ઢોર રસ્તા પર જ.”
તંત્ર પાસે ઇચ્છાશક્તિનો અભાવ છે — એ વાત હવે દરેકના મોઢે છે.
છેલ્લા મહિનામાં ત્રણ અકસ્માત — કોઈ રિપોર્ટિંગ નહીં
સ્થાનિક લોકોએ જણાવ્યું કે છેલ્લા એક મહિનામાં ત્રણ અલગ અલગ નાના અકસ્માતો થયાં છે.
બે બાઈક ચાલકો ઢોરને ટકરાઈ પટકાયા
એક રિક્ષા ઢોર સાથે અથડાઈ રોડ પરથી ખસી ગઈ
સદ્દભાગ્યે જાનહાનિ ન થઈ, પરંતુ લોકોને હવે લાગે છે કે તંત્ર મોટી દુર્ઘટનાની રાહ જોઈ રહ્યું છે.
એક નિવાસી સુરેશભાઈ ઠાકોર કહે છે:
“જ્યારે સુધી કોઈ ભક્ત કે બાળકને ઈજા નહીં થાય, ત્યાં સુધી અધિકારીઓ નહીં જાગે.”
યાત્રાધામમાં આવી સ્થિતિ શરમજનક
બહૂચરાજી માત્ર એક શહેર નથી — એ એક યાત્રાધામ અને ધાર્મિક કેન્દ્ર છે. દરરોજ રાજ્યના વિવિધ જિલ્લાઓમાંથી ભક્તો આવે છે.
પરંતુ આવી પરિસ્થિતિમાં,
રસ્તા પર અંધારું,ઢોરનો ઉપદ્રવ અને સુરક્ષા સ્ટાફની ગેરહાજરી મળીને યાત્રાધામની પ્રતિષ્ઠા પર દાગ મૂકે છે.
સ્થાનિક પુરોહિતો પણ આ મુદ્દે નારાજ છે. તેઓ કહે છે:
“માતાજીના ધામમાં ભક્ત સુરક્ષિત રહે તે તંત્રની પ્રથમ ફરજ છે. પણ હાલ તો યાત્રાધામમાં ભક્તિ કરતા ભય વધુ છે.”
રાજકીય ઉદાસીનતા કે તંત્રની નિષ્ફળતા?
રાજકીય સ્તરે પણ આ મુદ્દે માત્ર મુલાકાતો અને ફોટા સુધીની કાર્યવાહી થઈ છે. ધારાસભ્ય અને અધિકારીઓ વચ્ચે અનેક મીટિંગ થઈ હોવાનો દાવો થાય છે, પરંતુ હકીકતમાં રોડ પર ઢોરની સંખ્યા ઘટી નથી.
એક સ્થાનિક રાજકીય કાર્યકર કહે છે:
“દર વર્ષની જેમ આ વર્ષે પણ ઢોર પકડવાના ટેન્ડર નીકળ્યા છે. પરંતુ ક્યારેય કોઈ ગૌશાળામાં ઢોર પહોંચ્યા — તેનો પુરાવો નથી.”
સુધારાના સંકેતો — પણ પગલાં જરૂરી
સ્થાનિક નાગરિક સંગઠનો અને વેપારી એસોસિએશને નીચેના મુદ્દાઓ તાત્કાલિક અમલમાં મુકવાની માંગ કરી છે:
1. ઢોર પકડીને નજીકની ગૌશાળામાં ખસેડવા માટે ખાસ ટીમની રચના
2. નગરપાલિકાની રાત્રિ ટીમ ફરજિયાત બનાવવી
3. શક્તિ સર્કલ અને મંદિર રોડ પર ચેતવણી બોર્ડ અને લાઈટ સિસ્ટમ સુધારવી
4. રખડતા ઢોર સામે જાહેર ફરિયાદ માટે હેલ્પલાઇન શરૂ કરવી
શહેરની એક જ માંગ: “બહુચરાજી યાત્રાધામ છે, રખડતા ઢોરનો અડ્ડો નહીં.”
ભક્તો, વેપારીઓ અને રહેવાસીઓ તંત્ર પાસે એક જ અપીલ કરી રહ્યા છે —
“બહુચરાજી યાત્રાધામ છે, અહીં માતાજીના દર્શન માટે આવનાર ભક્તો ભય વગર ફરવા જોઈએ. રખડતા ઢોર સામે તંત્ર તાત્કાલિક અને કડક પગલાં લે.”
હવે જો તંત્ર સમયસર જાગશે નહીં, તો ભક્તિનું ધામ બહુચરાજી, એક દિવસ દુર્ઘટનાના ધામમાં ફેરવાઈ શકે છે.
