અહેવાલ: મહેશ મેવાડા, બાબરા
બાબરા તાલુકામાં નશાખોરી અને દારૂધંધા સામે પોલીસ વિભાગે ફરી એકવાર કડક વલણ અપનાવી નોંધપાત્ર કામગીરી અંજામ આપી છે. સતત મળતા ફરિયાદો, તેમજ જાહેર સ્થળોએ નશાની હાલતમાં જોવા મળતા લોકો સામે કાયદો સખત બને તે માટે બાબરા પોલીસ ચેકિંગ ડ્રાઇવમાં વ્યસ્ત જોવા મળી હતી. એ દરમિયાન અલગ–અલગ સ્થળોએ ત્રણ ઇસમોની અટકાયત કરવામાં આવી છે.
મળતી માહિતી મુજબ બાબરા પોલીસ સ્ટાફ જાહેર માર્ગો તથા સંવેદનશીલ વિસ્તારોમાં નિયમિત ચેકિંગ કરી રહ્યો હતો. આ ડ્રાઇવ દરમ્યાન અકબર અલારભાઇ જાહેર માર્ગ પર કેફી પ્રવાહી પીધેલ હાલતમાં ફરતા મળ્યો હતો. તેની નશાની સ્થિતિને ધ્યાનમાં લઈ જાહેર શાંતિ ભંગ થવાની શક્યતા હતી, જેના કારણે પોલીસે તેની અટકાયત કરી આગળની કાર્યવાહી હાથ ધરી.
તે જ રીતે ગોરધન મુળજીભાઈ પણ જાહેર સ્થળ પર સ્પષ્ટપણે નશાની અસર હેઠળ જોવા મળતા પોલીસે તેમને પણ કસ્ટડીમાં લીધા. જાહેર માર્ગ પર આવી નશાખોરી અન્ય લોકો માટે જોખમી બની શકે તે કારણે પોલીસની આ કાર્યવાહીનું સ્થાનિકોએ સ્વાગત કર્યું છે.
આ ઉપરાંત પોલીસે એક મહત્વપૂર્ણ કાયદેસર પગલું ભર્યું જેમાં ચતુર બટુકભાઇ પોતાના રહેણાંક વિસ્તારમાં ગેરકાયદેસર રીતે દેશી દારૂનું વેચાણ કરતા ઝડપાયા હતા. પોલીસ દ્વારા સ્થળ પરથી દારૂનો મુદ્દામાલ કબજે લઈ ગુનો નોધી આગળની તપાસ શરૂ કરવામાં આવી છે.
બાબરા પોલીસના જણાવ્યા મુજબ વિસ્તારમાં નશીલા પદાર્થોના વ્યવસાય અને નશાખોરીને કારણે અનેકવાર કાયદો અને વ્યવસ્થા ભંગ થતી હોય છે. તેથી આવનારા દિવસોમાં આવા ઓપરેશન વધુ કડક બનાવવામાં આવશે અને ગેરકાયદેસર પ્રવૃત્તિઓમાં સંકળાયેલા લોકો સામે નિષ્પક્ષ રીતે કાયદેસર કાર્યવાહી થશે.
સ્થાનિક નાગરિકોમાં આ પગલાં બાદ વિશ્વાસનો માહોલ જોવા મળી રહ્યો છે અને શાંતિ જળવાઈ રહે તે દિશામાં બાબરા પોલીસની કામગીરીને વખાણવામાં આવી રહી છે
