અહેવાલ: પ્રિયંકા પ્રજાપતિ, મુન્દ્રા કચ્છ
કચ્છના મુન્દ્રાની સેન્ટ ઝેવિયર્સ સ્કૂલનો વિદ્યાર્થી ધનુષ સુરાડાએ રાષ્ટ્રીય સ્તરે સ્કૂલ અને જિલ્લાનું નામ રોશન કર્યું છે. શ્રાવસ્તી (ઉત્તર પ્રદેશ) ખાતે આયોજિત ઓલ ઈન્ડિયા નેશનલ ટ્રેકિંગ કેમ્પ (NCC) માં ધનુષે બે મહત્વપૂર્ણ ઇવેન્ટ—સ્પીચ કોમ્પિટિશન અને ટગ ઓફ વોર—બંનેમાં પ્રથમ સ્થાન મેળવી અદ્વિતીય સિદ્ધિ નોંધાવી છે.
આ પ્રતિષ્ઠિત કેમ્પમાં દેશના 8 રાજ્યોના 5 ડાયરેક્ટરેટમાંથી કુલ 510 કેડેટ્સે ભાગ લીધો હતો. કેટલાંક પડકારજનક ટ્રેક, શારીરિક ક્ષમતા, આત્મવિશ્વાસ અને વ્યક્તિત્વ કૌશલ્યની કસોટી લેતા આ 8 દિવસીય કેમ્પ નેપાળ સરહદ નજીક આવેલા ઘન જંગલ વિસ્તારમાં યોજાયો હતો.
સેન્ટ ઝેવિયર્સ સ્કૂલ મુન્દ્રામાંથી NCCના બે કેડેટ્સે આ રાષ્ટ્રીય સ્તરના કેમ્પમાં ભાગ લેવા માટે પસંદગી મેળવી હતી, જે પોતે જ મહત્વપૂર્ણ સિદ્ધિ છે. ધનુષને આ યાત્રામાં માર્ગદર્શન આપનાર તેમના NCC ઇન્ચાર્જ અને શિક્ષિકા શ્રીમતી સૌમ્યા નાયર છે, જેમણે વિદ્યાર્થીઓની અંદરના આત્મવિશ્વાસ અને પ્રતિભાને વિકસાવવાની સતત મહેનત કરી છે.
સ્કૂલના આચાર્યે ધનુષની અદ્ભુત સિદ્ધિ બદલ તેને તેમજ તેના પરિવારને અભિનંદન પાઠવતાં કહ્યું કે ધનુષે શાળાનું ગૌરવ વધાર્યું છે અને તે ભવિષ્યમાં પણ આવી જ ઉપલબ્ધિઓ હાંસલ કરશે એવી શાળાને પૂર્ણ આશા છે.
આ સમગ્ર સિદ્ધિને કારણે મુન્દ્રા વિસ્તાર અને કચ્છમાં આનંદની લાગણી જોવા મળી રહી છે.
